ਲੋਕ ਸਭਾ ਹਲਕਾ ਫਤਿਹਗੜ੍ਹ ਸਾਹਿਬ ਤੋਂ ਸ਼੍ਰੋਮਣੀ ਅਕਾਲੀ ਦਲ-ਭਾਜਪਾ ਦੇ ਸਾਂਝੇ ਉਮੀਦਵਾਰ ਕੁਲਵੰਤ ਸਿੰਘ ਨੇ ਕਿਹਾ ਹੈ ਕਿ ਦਲਿਤ ਅਤੇ ਪਿਛੜੇ ਵਰਗ ਨੂੰ ਅੱਧੀ ਸਦੀ ਤੋਂ ਵੀ ਵੱਧ ਧੋਖੇ ਵਿੱਚ ਰੱਖ ਕੇ ਉਨ੍ਹਾਂ ਦਾ ਸਿਆਸੀ ਸੋਸ਼ਣ ਕਰਨ ਲਈ ਜਿੰਮੇਵਾਰ ਕਾਂਗਰਸ ਪਾਰਟੀ ਤੋਂ ਇਨ੍ਹਾਂ ਵਰਗਾਂ ਦਾ ਖਹਿੜਾ ਛੁਡਾਉਣ ਦੀ ਘੜੀ ਆ ਪਹੁੰਚੀ ਹੈ।ਸ਼੍ਰੀ ਕੁਲਵੰਤ ਸਿੰਘ ਨੇ ਕਿਹਾ ਕਿ ਜਿਹੜੀ ਕਾਂਗਰਸ ਪਾਰਟੀ ਡਾ. ਭੀਮ ਰਾਓ ਅੰਬੇਦਕਰ ਵੱਲੋਂ ਸ਼ੁਰੂ ਕੀਤੇ ਭਲਾਈ ਕਾਰਜਾਂ ਅਤੇ ਪਾਲਸੀਆਂ ਦਾ ਸਿਹਰਾ ਉਸ ਮਹਾਨ ਮਸੀਹਾ ਦੇ ਸਿਰ ਬੰਨਣ ਦੀ ਥਾਂ ਆਪਣੇ ਸਿਰ ਬੰਨ੍ਹ ਕੇ ਦਲਿਤਾਂ ਦੀਆਂ ਅੱਖਾਂ ਵਿੱਚ ਘੱਟਾ ਪਾਉਂਦੀ ਆ ਰਹੀ ਹੈ, ਅੱਜ ਇਤਿਹਾਸ ਨੇ ਉਸ ਪਾਰਟੀ ਨੂੰ ਦਲਿਤ ਵਰਗ ਦੇ ਕਟਿਹਰੇ ਵਿੱਚ ਲਿਆ ਖੜਾ ਕੀਤਾ ਹੈ ਅਤੇ ਕਾਂਗਰਸੀ ਆਗੂਆਂ ਤੋਂ ਉਨ੍ਹਾਂ ਦੀ ਪਾਰਟੀ ਦੇ ਪਾਪਾਂ ਦਾ ਹਿਸਾਬ ਲੈਣ ਦਾ ਸਮਾਂ ਆ ਗਿਆ ਹੈ। ਸ਼੍ਰੀ ਕੁਲਵੰਤ ਸਿੰਘ ਨੇ ਇਹ ਵੀ ਕਿਹਾ ਕਿ 1974 ਅਤੇ 1975 ਵਿੱਚ ਡਾ. ਭੀਮ ਰਾਓ ਅੰਬੇਡਰਕ ਤੋਂ ਬਾਅਦ ਦਲਿਤ ਵਰਗ ਦੇ ਸਭ ਤੋਂ ਮਹਾਨ ਅਤੇ ਦੂਰ ਅੰਦੇਸ਼ ਆਗੂ ਬਾਬੂ ਜਗਜੀਵਨ ਰਾਮ ਨੂੰ ਜਿਸ ਤਰ੍ਹਾਂ ਅਪਮਾਨਿਤ ਕਰਕੇ ਕਾਂਗਰਸ ਪਾਰਟੀ ਵਿਚੋਂ ਬਾਹਰ ਜਾਣ ਲਈ ਮਜ਼ਬੂਰ ਕੀਤਾ ਸੀ ਅੱਜ ਦਲਿਤ ਵਰਗ ਉਸੇ ਕਾਂਗਰਸ ਪਾਰਟੀ ਤੋਂ ਇਸ ਅਪਮਾਨ ਦਾ ਬਦਲਾ ਲੈਣ ਲਈ ਉਠ ਖਲੋਤਾ ਹੈ। ਉਨ੍ਹਾਂ ਕਿਹਾ ਕਿ ਡਾ. ਭੀਮ ਰਾਓ ਅੰਬੇਡਰਕ ਅਤੇ ਬਾਬੂ ਜਗਜੀਵਨ ਰਾਮ ਵਰਗੇ ਮਹਾਨ ਦਾਸ਼ਨਿਕਾਂ ਦੀ ਆਤਮਾਂ ਅੱਜ ਦਲਿਤ ਵਰਗ ਨੂੰ ਪੁਕਾਰ ਵੀ ਰਹੀ ਹੈ, ਮਾਰਗ ਦਰਸ਼ਨ ਵੀ ਕਰ ਰਹੀ ਅਤੇ ਉਨ੍ਹਾਂ ਨੂੰ ਪ੍ਰੇਰਤ ਵੀ ਕਰ ਰਹੀ ਹੈ।ਇੱਥੇ ਜਾਰੀ ਇੱਕ ਸਾਂਝੇ ਬਿਆਨ ਵਿੱਚ ਸ਼੍ਰੀ ਕੁਲਵੰਤ ਸਿੰਘ ਨੇ ਕਿਹਾ ਕਿ ਦੇਸ਼ ਦੀ ਅਜਾਦੀ ਤੋਂ ਲੈ ਕੇ ਅੱਜ ਤੱਕ ਕਾਂਗਰਸ ਪਾਰਟੀ ਨੇ ਦਲਿਤ ਵਰਗ ਨੂੰ ਉਨ੍ਹਾਂ ਸਹੂਲਤਾਂ ਤੋਂ ਇਲਾਵਾ ਇੱਥ ਧੇਲਾਂ ਵੀ ਨਹੀਂ ਦਿੱਤਾ ਜਿਹੜੀਆਂ ਸਹੂਲਤਾਂ ਦਲਿਤਾਂ ਤੇ ਗਰੀਬਾ ਮਸੀਹਾ ਡਾ. ਭੀਮ ਰਾਓ ਅੰਬਡੇਕਰ ਨੇ ਆਪਣੇ ਬਲਬੂਤੇ ਲੈ ਇਨ੍ਹਾਂ ਵਰਗਾਂ ਨੂੰ ਦਿੱਤੀਆਂ ਸਨ। ਸ਼੍ਰੀ ਕੁਲਵੰਤ ਸਿੰਘ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਡਾ. ਅੰਬਡੇਕਰ ਵਰਗੇ ਅਤੇ ਮਹਾਨ ਤੇ ਦੂਰਅੰਦੇਸ਼ ਆਗੂ ਦੀਆਂ ਪ੍ਰਾਪਤੀਆਂ ਨੂੰ ਆਪਣੀ ਪ੍ਰਾਪਤੀ ਦੱਸ ਕੇ ਉਸ ਦੇਵਤਾ ਸਰੂਪ ਮਹਾ ਪੁਰਖ ਨਾਲ ਧ੍ਰੋਹ ਕਰਦੀ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਉਹ ਮੌਕਾ ਆ ਗਿਆ ਹੈ ਕਿ ਕਾਂਗਰਸ ਪਾਰਟੀ ਉਨ੍ਹਾਂ ਦੇ ਇਸ ਬੱਜ਼ਰ ਪਾਪ ਦੀ ਸਜ਼ਾ ਦਿੱਤੀ ਜਾਏ।
ਆਪਣੇ ਬਿਆਨ ਵਿੱਚ ਅੱਗੇ ਚੱਲ ਕੇ ਹਲਕਾ ਫਤਿਹਗੜ੍ਹ ਸਾਹਿਬ ਦੇ ਅਕਾਲੀ-ਭਾਜਪਾ ਉਮੀਦਵਾਰ ਨੇ ਕਿਹਾ ਕਿ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਅੰਦਰ ਵੀ ਦਲਿਤਾਂ, ਖਾਸ ਕਰਕੇ ਦਲਿਤ ਵਰਕਰਾਂ ਨਾਲ ਜੋ ਵਿਤਕਰਾ ਅਤੇ ਧੱਕੇਸ਼ਾਹੀ ਅਮਰਿੰਦਰ ਸਿੰਘ ਅਤੇ ਪ੍ਰਤਾਪ ਸਿੰਘ ਬਾਜਵਾ ਵਰਗੇ ਹੈਕੜਬਾਜ਼ ਅਤੇ ਜਾਤੀ ਵਾਦੀ ਆਗੂਆਂ ਵੱਲੋਂ ਕੀਤੀ ਜਾ ਰਹੀ ਹੈ ਉਹ ਕਾਰਨ ਹੀ ਕਾਂਗਰਸ ਪਾਰਟੀ ਅੰਦਰ ਦਲਿਤ ਭਾਈਚਾਰੇ ਵੱਲੋਂ ਵਿਸਫੋਟਕ ਬਗਾਵਤ ਦੇ ਹਲਾਤ ਬਣੇ ਹੋਏ ਹਨ ਉਨ੍ਹਾਂ ਕਿਹਾ ਕਿ ਸ਼੍ਰੀ ਸ਼ਮਸ਼ੇਰ ਸਿੰਘ ਦੂਲੋ ਵਰਗੇ ਸੀਨੀਅਰ ਦਲਿਤ ਆਗੂ ਨਾਲ ਜੋ ਅਪਮਾਨ ਜਨਕ ਸਲੂਕ ਕੀਤਾ ਜਾ ਰਿਹਾ ਹੈ ਉਹ ਕਿਸੇ ਤੋਂ ਛੁਪਿਆ ਹੋਇਆ ਨਹੀਂ ਹੈ। ਸ਼੍ਰੀ ਕੁਲਵੰਤ ਸਿੰਘ ਨੇ ਅੱਗੇ ਚੱਲ ਕੇ ਕਿਹਾ ਕਿ ਹੈਕੜ ਬਾਜ਼ ਫਿਰਕੂ ਕਾਂਗਰਸੀ ਆਗੂਆਂ ਵੱਲੋਂ ਦਲਿਤ ਵਰਕਰਾਂ ਅਤੇ ਆਗੂਆਂ ਨੂੰ ਰੋਜ਼ਾਨਾ ਜ਼ਲੀਲ ਕਰਨ ਦੇ ਨਤੀਜੇ ਵਜੋਂ ਹੀ ਸ਼੍ਰੀ ਇਸ਼ਰ ਸਿੰਘ ਮੇਹਰਬਾਨ, ਪ੍ਰਕਾਸ਼ ਸਿੰਘ ਭੱਟੀ ਵਰਗੇ ਆਗੂ ਕਾਂਗਰਸ ਪਾਰਟੀ ਨੂੰ ਛੱਡ ਕੇ ਸਭੇ ਸਾਂਝੀ ਬਾਲ ਸਦਾਇਨ ਦੇ ਅਦਰਸ਼ਾਂ ਉਤੇ ਚੱਲ ਰਹੀ ਸ਼੍ਰੋਮਦੀ ਅਕਾਲੀ ਦਲ ਵਿੱਚ ਵਿੱਚ ਸ਼ਾਮਿਲ ਹੋ ਚੁੱਕੇ ਹਨ। ਅਕਾਲੀ ਆਗੂ ਨੇ ਅੱਗੇ ਚੱਲ ਕੇ ਕਿਹਾ ਕਿ ਕਾਂਗਰਸ ਪਾਰਟੀ ਵੱਲੋਂ ਡਾ. ਬੀ.ਆਰ.ਅੰਬੇਡਕਰ ਤੋਂ ਬਾਅਦ ਦਲਿਤਾਂ ਦੇ ਮਹਾਨ ਆਗੂ ਬਾਬੂ ਜਗਜੀਵਨ ਰਾਮ ਨੂੰ ਜ਼ਲੀਲ ਕਰਕੇ ਕਿਨਾਰੇ ਲਗਾ ਦਿੱਤਾ ਗਿਆ ਸੀ। ਅਖੀਰ ਵਿੱਚ ਬਾਬੂ ਜਗਜੀਵਨ ਰਾਮ ਜੀ ਨੇ ਕਾਂਗਰਸੀ ਫਿਰਕਾ ਪ੍ਰਸਤੀ ਅਤੇ ਦਲਿਤ ਮਾਰੂ ਤੇ ਗਰੀਬ ਦੁਸ਼ਮਣ ਦੇ ਰਵੀਏ ਕਾਰਨ ਉਸ ਸਮੇਂ ਸ਼੍ਰੀਮਤੀ ਇੰਦਰਾ ਗਾਂਧੀ ਵਿਰੱਧ ਦਲਿਤ ਵਰਗ ਵੱਲੋਂ ਬਗਾਵਤ ਦਾ ਝੰਡਾ ਬੁਲੰਦ ਕਰ ਦਿੱਤਾ ਸੀ ਜਦੋਂ ਸ਼੍ਰੀਮਤੀ ਗਾਂਧੀ ਸੱਤਾ ਦੇ ਸਿਖਰ ਤੇ ਸਨ ਅਤੇ ਸਾਰਾ ਦੇਸ਼ ਉਨ੍ਹਾਂ ਦੇ ਖ਼ੋਫ਼ ਵਿੱਚ ਕੰਬਦਾ ਸੀ। ਸ. ਕੁਲਵੰਤ ਸਿੰਘ ਨੇ ਕਿਹਾ ਕਿ ਬਾਬੂ ਜਗਜੀਵਨ ਵਰਗੇ ਮਹਾਨ ਦਲਿਤ ਅਗੂ ਵੱਲੋਂ ਆਪਣੇ ਵਰਗ ਦੇ ਹਿੱਤਾਂ ਦੀ ਸੁਰੱਖਿਆ ਲਈ ਜੋ ਦਲੇਰੀ ਅਤੇ ਤਿਆਗ ਦੀ ਮਿਸਾਲ ਪੇਸ਼ ਕੀਤੀ ਗਈ ਸੀ, ਅੱਜ ਸਮੁੱਚੇ ਦਲਿਤ ਭਾਏਚਾਰੇ ਨੂੰ ਉਸ ਤੋਂ ਪ੍ਰੇਰਨਾ ਲੈ ਕਿ ਕਾਂਗਰਸ ਪਾਰਟੀ ਵਿਰੁੱਧ ਲਾਮਬੰਦ ਹੋਣ ਦੀ ਸਖ਼ਤ ਜਰੂਰਤ ਹੈ। ਅੰਤ ਵਿੱਚ ਅਕਾਲੀ-ਭਾਜਪਾ ਦੇ ਲੋਕ ਸਭਾਈ ਉਮੀਦਵਾਰ ਨੇ ਕਾਂਗਰਸ ਪਾਰਟੀ ਅੰਦਰ ਚੁੱਪ ਚਾਪ ਅਪਮਾਨ ਸਹਿ ਰਹੇ ਦਲਿਤ ਆਗੂਆਂ ਨੂੰ ਪੁਰਜ਼ੋਰ ਅਪੀਲ ਕੀਤੀ ਕਿ ਉਹ ਦਲਿਤ ਵਰਗ ਦੇ ਬੇਹਤਰ ਭਵਿੱਖ ਲਈ ਹਿੰਮਤ ਅਤੇ ਹੌਸਲੇ ਦਾ ਸਬੂਤ ਦੇਣ ਅਤੇ ਕਾਂਗਰਸ ਪਾਰਟੀ ਵਿਰੁੱਧ ਬਗਾਵਤ ਦਾ ਝੰਡਾ ਬੁਲੰਦ ਕਰਕੇ ਦਲਿਤ ਵਰਗ ਦੀਆਂ ਭਾਵਨਾਵਾਂ ਦੀ ਸਹੀ ਰਹਿਨੁਮਾਈ ਕਰਨ।