ਕਾਂਗਰਸ ਦੀ ਪ੍ਰਧਾਨ ਸੋਨੀਆ ਗਾਂਧੀ ਅਤੇ ਉਸਦੇ ਪੁੱਤਰ ਰਾਹੁਲ ਗਾਂਧੀ ਵਲੋਂ ਪਿਛਲੇ 10 ਸਾਲਾਂ ਤੋਂ ਮੁਲਕ ਦੇ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਨੂੰ ਮੋਹਰਾ ਬਣਾ ਕੇ ਖੁਦ ਸਰਕਾਰ ਚਲਾਉਂਦੇ ਆ ਰਹੇ ਹਨ। ਡਾ. ਸਿੰਘ ਨੂੰ ਤਾਂ ਗਾਂਧੀ ਪਰਿਵਾਰ ਨੇ ਸਿਰਫ਼ ਦਿਖਾਵੇ ਨੂੰ ਹੀ ਸਾਹਮਣੇ ਰਖਿਆ ਹੋਇਆ ਸੀ ਜਦੋਂਕਿ ਹਰ ਛੋਟਾ-ਵੱਡਾ ਫੈਸਲਾ ਉਹ ਖੁਦ ਕਰਦੇ ਹਨ।ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਮੀਤ ਪ੍ਰਧਾਨ ਸ. ਬਲਵੰਤ ਸਿੰਘ ਰਾਮੂਵਾਲੀਆ ਨੇ ਕਿਹਾ ਕਿ ਸੋਨੀਆ ਗਾਂਧੀ ਦੇਸ਼ ਦੇ ਹਿੱਤਾਂ ਦੀ ਬਲੀ ਦੇ ਕੇ ਨਿਜੀ ਸਿਆਸੀ ਹਿੱਤਾਂ ਦੀ ਪੂਰਤੀ ਲਈ ਪ੍ਰਧਾਨ ਮੰਤਰੀ ਵਰਗੇ ਸ਼ਕਤੀਸ਼ਾਲੀ ਅਹੁਦੇ ਦੇ ਵਕਾਰ ਨੂੰ ਸੱਟ ਮਾਰੀ ਹੈ। ਸੋਨੀਆ ਗਾਂਧੀ ਦੀ ਇਸ ਨਿਤੀ ਨਾਲ ਭਾਰਤ ਦਾ ਅੰਤਰ ਰਾਸ਼ਟੀ ਪੱਧਰ ਉੱਤੇ ਸ਼ਕਤੀਸ਼ਾਲੀ ਦੇਸ਼ ਵਜੋਂ ਬਣਿਆ ਹੋਇਆ ਅਕਸ ਕੰਮਜ਼ੋਰ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਸੋਨੀਆ ਗਾਂਧੀ ਨਹਿਰੂ ਗਾਂਧੀ ਪਰਿਵਾਰ ਦੀ ਅਯੋਗ ਸਿਆਸੀ ਵਿਰਾਸਤ ਰਾਹੁਲ ਗਾਂਧੀ ਨੂੰ ਅੱਗੇ ਵਧਾਉਣ ਲਈ ਪ੍ਰਧਾਨ ਮੰਤਰੀ ਦੇ ਅਹੁਦੇ ਨੂੰ ਕਠਪੁਤਲੀ ਬਣਾ ਕੇ ਰੱਖਣ ਵਾਲੀ ਮਾੜੀ ਪ੍ਰੱਪਰਾ ਦੀ ਜਨਮ ਦਾਤੀ ਵੀ ਬਣ ਗਈ ਹੈ। ਕਾਂਗਰਸ ਦੀ ਪ੍ਰਧਾਨ ਨੇ ਆਪਣੇ ਸੱਤਾ ਦੇ ਲਾਲਚ ਨੂੰ ਪੂਰਾ ਕਰਨ ਲਈ ਪ੍ਰਧਾਨ ਮੰਤਰੀ ਦੀਆਂ ਸਾਰੀਆਂ ਸ਼ਕਤੀਆਂ ਆਪਣੇ ਹੱਥਾਂ ਵਿਚ ਲੈ ਲਈਆਂ ਹਨ। ਸੋਨੀਆ ਗਾਂਧੀ ਦੀ ਦੂਹਰੀ ਸਾਸ਼ਨ ਪ੍ਰਣਾਲੀ ਵਾਲੀ ਨੀਤੀ ਨੇ ਹੀ ਯੂ.ਪੀ.ਏ ਸਰਕਾਰ ਦੇ ਸਾਸ਼ਨ ਕਾਲ ਵਿੱਚ ਅਰਬਾਂ ਖਰਬਾਂ ਦੇ ਘਪਲਿਆਂ ਨੂੰ ਜਨਮ ਦੇਣ ਲਈ ਰਸਤੇ ਪੈਦਾ ਕੀਤੇ।
ਅਕਾਲੀ ਨੇਤਾ ਨੇ ਕਿਹਾ ਕਿ ਇਸ ਤੋਂ ਮਾੜਾ ਪ੍ਰਬੰਧ ਹੋਰ ਕੀ ਹੋਵੇਗਾ ਜਦੋਂ ਪਹਿਲੀ ਵਾਰ ਪ੍ਰਧਾਨ ਮੰਤਰੀ ਦਫ਼ਤਰ ਪੱਧਰ ਉੱਤੇ ਅਜਿਹਾ ਕੁਝ ਵਾਪਰਦਾ ਰਿਹਾ ਹੈ ਜਿਸ ਲਈ ਕਿਸੇ ਵਿਆਕਤੀ ਨੂੰ ਸਿੱਧੇ ਤੌਰ ਤੇ ਜਵਾਬ ਦੇਹ ਨਹੀਂ ਬਣਾਇਆ ਜਾ ਸਕਿਆ। ਪ੍ਰਧਾਨ ਮੰਤਰੀ ਦਾ ਦਫ਼ਤਰ ਗੈਰ ਸਰਕਾਰੀ ਬੰਦਿਆਂ ਦੁਆਰਾ ਚਲਾਇਆ ਜਾਂਦਾ ਰਿਹਾ ਹੈ। ਰਾਮੂਵਾਲੀਆ ਨੇ ਕਿਹਾ ਕਿ ਭਾਰਤ ਵਿੱਚ ਜੋ ਵਰਤਮਾਨ ਅੰਦਰ ਰਾਜਨੀਤਕ, ਸਮਾਜਿਕ ਅਤੇ ਆਰਥਿਕ ਪ੍ਰਸਥਤੀਆਂ ਹਨ ਉਹ ਦੇਸ਼ ਨੂੰ ਨਿਘਾਰ ਵੱਲ ਲਿਜਾ ਰਹੀਆ ਹਨ। ਇਸ ਨਿਘਾਰ ਨੂੰ ਰੋਕਣ ਲਈ ਇੱਕ ਮਜ਼ਬੂਤ ਅਤੇ ਦ੍ਰਿੜ੍ਹ ਇੱਛਾ ਸ਼ਕਤੀ ਰੱਖਣ ਵਾਲੀ ਲੀਡਰਸ਼ਿਪ ਦੀ ਸਖ਼ਤ ਜਰੂਰਤ ਹੈ ਜੋ ਕੇਵਲ ਐਨ.ਡੀ.ਏ ਹੀ ਸ਼੍ਰੀ ਨਰਿੰਦਰ ਮੋਦੀ ਨੂੰ ਪ੍ਰਧਾਨ ਮੰਤਰੀ ਦੇ ਰੂਪ ਵਿੱਚ ਦੇਸ਼ ਨੂੰ ਦੇ ਸਕਦੀ ਹੈ। ਅਕਾਲੀ ਨੇਤਾ ਨੇ ਦੇਸ਼ ਅੰਦਰ ਪੈਦਾ ਹੋਏ ਭ੍ਰਿਸ਼ਟਾਚਾਰ, ਮਹਿੰਗਾਈ, ਨਕਸਲਵਾਦ, ਅਤਵਾਦ ਅਤੇ ਬੇਰੁਜ਼ਗਾਰੀ ਵਰਗੀਆ ਸਮੱਸਿਆਵਾਂ ਲਈ ਯੂ.ਪੀ.ਏ ਸਰਕਾਰ ਦੀ ਕਮਜ਼ੋਰ ਸਾਸ਼ਨ ਪ੍ਰਣਾਲੀ ਨੂੰ ਜਿੰਮੇਵਾਰ ਦੱਸਿਆ ਹੈ। ਅਕਾਲੀ ਨੇਤਾ ਨੇ ਦਾਅਵਾ ਕੀਤਾ ਹੈ ਕਿ ਕਾਂਗਰਸ ਪਾਰਟੀ ਨੂੰ 16ਵੀਂ ਲੋਕ ਸਭਾ ਚੋਣ ਵਿੱਚ ਵੱਡੀ ਹਾਰ ਮਿਲੇਗੀ। ਕੇਂਦਰ ਵਿੱਚ ਭਾਜਪਾ ਦੇ ਕੱਦਵਰ ਨੇਤਾ ਸ਼੍ਰੀ ਨਰਿੰਦਰ ਮੋਦੀ ਦੇ ਅਗਵਾਈ ਹੇਠ ਐਨ.ਡੀ.ਏ ਸਰਕਾਰ ਬਣਾਏਗੀ।