ਕੇਂਦਰ 'ਚ 10 ਸਾਲਾ ਤੋਂ ਲਗਾਤਾਰ ਸੱਤਾ ਉਤੇ ਕਾਬਜ਼ ਚਲੀ ਆ ਰਹੀ ਕਾਂਗਰਸ ਸਰਕਾਰ ਵਿਰੁੱਧ ਦੇਸ਼ ਭਰ ਵਿੱਚ ਸਿਆਸੀ ਸੁਨਾਮੀ ਲਹਿਰ ਪੈਦਾ ਹੋ ਗਈ ਹੈ, ਜਿਸ ਵਿੱਚ ਕਾਂਗਰਸ ਦੇ ਦਿੱਗਜ਼ ਨੇਤਾ ਰੁੜ ਜਾਣਗੇ। ਬਲਵੰਤ ਸਿੰਘ ਰਾਮੂਵਾਲੀਆ ਨੇ ਕਿਹਾ ਹੈ ਕਿ ਕੇਂਦਰ ਵਿੱਚ ਕਾਂਗਰਸ ਦੀ ਸਥਾਪਤੀ ਵਿਰੁੱਧ ਪੈਦਾ ਹੋਈ ਸੁਨਾਮੀ ਦਾ ਸਭ ਤੋਂ ਵੱਧ ਅਸਰ ਪੰਜਾਬ ਅੰਦਰ ਹੋਣ ਲੱਗਾ ਹੈ ਜਿਸ ਸਦਕਾ ਕਾਂਗਰਸ ਪਾਰਟੀ ਦੇ 13 ਸੀਟਾਂ ਉਤੇ ਚੋਣ ਲੜ ਰਹੇ ਉਮੀਦਵਾਰਾਂ ਦੀਆਂ ਜਮਾਨਤਾਂ ਜਬਤ ਹੋ ਜਾਣਗੀਆਂ। ਚੋਣਾਂ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਪੰਜਾਬ ਕਾਂਗਰਸ ਦੇ ਉਮੀਦਵਾਰਾਂ ਨੂੰ 2014 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਰਿਕਾਰਡ ਤੋੜ ਵੋਟਾਂ ਨਾਲ ਹਾਰ ਮਿਲੇਗੀ ਅਤੇ ਉਨ੍ਹਾਂ ਦੀ ਦੀ ਇਸ ਹਾਰ ਦਾ ਰਿਕਾਰਡ ਗਿੰਨੀਜ ਬੁੱਕ ਵਿੱਚ ਦਰਜ਼ ਹੋਵੇਗਾ। ਸ. ਰਾਮੂਵੀਆ ਨੇ ਕਿਹਾ ਕਿ ਕੇਂਦਰ ਦੀ ਸਰਕਾਰ ਵਿੱਚ ਸ਼ਾਮਿਲ ਮੰਤਰੀਆਂ ਵੱਲੋਂ ਅਰਬਾਂ ਖਰਬਾਂ ਦੇ ਕੀਤੇ ਗਏ ਸੈਂਕੜੇ ਘੁਟਾਲਿਆਂ ਅਤੇ ਭ੍ਰਿਸ਼ਟਾਚਾਰ ਕਰਕੇ ਦੇਸ਼ ਦੀ ਆਰਥਿਕ ਵਿਵਸਥਾ ਤਹਿਸ ਨਹਿਸ ਹੋ ਗਈ ਹੈ। ਯੂ.ਪੀ.ਏ-2 ਸਰਕਾਰ ਦੀ ਆਰਥਿਕ ਖੇਤਰ ਵਿੱਚ ਕਾਰਗੁਜ਼ਾਰੀ ਦਾ ਗਰਾਫ਼ ਇੰਨਾ ਥੱਲੇ ਡਿੱਗ ਗਿਆ ਹੈ ਕਿ ਰੁਪਏ ਦੀ ਕੀਮਤ ਵਿੱਚ ਪਹਿਲੀ ਵਾਰ ਰਿਕਾਰਡ ਤੋੜ ਗਿਰਾਵਟ ਦਰਜ਼ ਕੀਤੀ ਗਈ ਹੈ। ਕੇਂਦਰ ਦੀਆਂ ਗਲਤ ਨੀਤੀਆ ਨੇ ਦੇਸ਼ ਅੰਦਰ ਮਹਿੰਗਾਈ ਅਤੇ ਬੇਰੁਜ਼ਾਗਰੀ ਦੇ ਦੈਂਤ ਦੀ ਭੁੱਖ ਵਿੱਚ ਵਾਧਾ ਕਰ ਦਿੱਤਾ ਹੈ ਜਿਸ ਨੇ ਆਮ ਆਦਮੀ ਦੇ ਜੀਵਨ ਨੂੰ ਖ਼ਤਮ ਕਰ ਦਿੱਤਾ ਹੈ।
ਅਕਾਲੀ ਨੇਤਾ ਨੇ ਦਾਅਵਾ ਕੀਤਾ ਹੈ ਕਿ ਪੰਜਾਬ ਵਿੱਚ ਕੇਂਦਰ ਦੀ ਕਾਂਗਰਸ ਸਰਕਾਰ ਦੀਆਂ ਲੋਕ ਵਿਰੋਧੀ ਨੀਤੀਆਂ ਕਰਕੇ ਗੁੱਸੇ ਦੀ ਲਹਿਰ ਨੇ ਸੁਨਾਮੀ ਲਹਿਰਾਂ ਦਾ ਰੂਪ ਧਾਰਨ ਕਰ ਲਿਆ ਹੈ ਜਿਸ ਵਿੱਚ ਦੇਸ਼ ਪੱਧਰ ਦੇ ਵੱਡੇ ਵੱਡੇ ਕਾਂਗਰਸੀ ਨੇਤਾ ਡੁੱਬਣ ਜਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਲੋਕ ਕਾਂਗਰਸ ਵਿਰੁੱਧ ਖੁੱਲ੍ਹੇਆਮ ਗੁੱਸਾ ਪ੍ਰਗਟ ਕਰਨ ਲਈ 30 ਅਪ੍ਰੈਲ ਨੂੰ ਆਪਣੇ ਘਰਾਂ 'ਚ ਬਾਹਰ ਆਉਣਗੇ ਅਤੇ ਆਪਣੀ ਵੋਟ ਦਾ ਅਕਾਲੀ ਭਾਜਪਾ ਉਮੀਦਵਾਰਾਂ ਦੇ ਹੱਕ ਵਿੱਚ ਇਸਤੇਮਾਲ ਕਰਕੇ ਵੱਡੀ ਜਿੱਤ ਦਿਵਾਉਂਣਗੇ। ਕਾਂਗਰਸ ਵਿਰੁੱਧ ਦੇਸ਼ ਵਿਆਪੀ ਪੱਧਰ ਉਤੇ ਉਠੀ ਸੁਨਾਮੀ ਲਹਿਰ ਨੂੰ ਵੇਖਦੇ ਹੋਏ ਪਾਰਟੀ ਦੇ ਵੱਡੇ ਵੱਡੇ ਨੇਤਾ ਚੋਣਾਂ ਤੋਂ ਡਰਦੇ ਲੁਕਦੇ ਰਹੇ ਹਨ। ਅਮਰਿੰਦਰ ਵਰਗੇ ਨੇਤਾਵਾਂ ਨੂੰ ਮਜ਼ਬੂਰੀ ਕਰਕੇ ਹੀ ਖਾਨਾ ਪੂਰਤੀ ਕਰਨ ਲਈ ਪਾਰਟੀ ਵੱਲੋਂ ਚੋਣ ਮੈਦਾਨ ਵਿੱਚ ਆਉਣਾ ਪਿਆ ਹੈ। ਕੈਪਟਨ ਵਰਗੇ ਸੈਂਕੜੇ ਕਾਂਗਰਸੀ ਨੇਤਾ ਪਹਿਲਾਂ ਹੀ ਮਾਨਸਿਕ ਰੂਪ ਵਿੱਚ ਆਪਣੀ ਹਾਰ ਨੂੰ ਕਬੂਲ ਕਰ ਚੁੱਕੇ ਹਨ। ਚੋਣਾਂ ਦੇ ਨਤੀਜੇ ਕੇਵਲ ਰਸਮੀ ਐਲਾਨ ਵਜੋਂ ਬਾਕੀ ਰਹਿ ਗਏ ਹਨ। ਪੰਜਾਬ ਅੰਦਰ ਲੋਕ ਸਭਾ ਚੋਣਾਂ ਵਾਲੀ ਲੜਾਈ ਇੱਕ ਪਾਸੜ ਹੋ ਕੇ ਰਹਿ ਗਈ ਹੈ।