ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਆਗੂ ਬਲਵੰਤ ਸਿੰਘ ਰਾਮੂਵਾਲੀਆ ਨੇ ਕੈਪਟਨ ਅਮਰਿੰਦਰ ਸਿੰਘ ਅਤੇ ਪ੍ਰਤਾਪ ਸਿੰਘ ਬਾਜਵਾ ਨੂੰ ਕਾਂਗਰਸ ਦੀ ਉਹ ਭੰਡਾਂ ਦੀ ਜੋੜੀ ਕਰਾਰ ਦਿੰਦੇ ਹੋਏ ਕਿਹਾ ਹੈ ਕਿ ਜੋ ਇਸ ਵਕਤ ਇਹ ਦੋਨੇਂ ਨੇਤਾ ਪੰਜਾਬ ਦੇ ਲੋਕਾਂ ਲਈ ਮੁਫ਼ਤ ਮੰਨੋਰੰਜਨ ਦਾ ਸਾਧਨ ਬਣੇ ਹੋਏ ਹਨ। ਉਨ੍ਹਾਂ ਕਿਹਾ, ''ਬਾਜਵਾ ਅਤੇ ਕੈਪਟਨ ਆਪਣੇ ਭੰਡਪੁਣੇਂ ਨਾਲ ਪੰਜਾਬ ਦੇ ਸੰਜੀਦਾ ਮਾਹੌਲ ਵਿੱਚ ਆਮ ਲੋਕਾਂ ਦੇ ਮੁਫ਼ਤ ਮਨਪ੍ਰਚਾਵੇ ਲਈ ਰਾਸਧਾਰੀਆਂ ਵਾਂਗ ਵਿਚਰ ਰਹੇ ਹਨ।'' ਜਦੋਂ ਲੋਕ ਚੋਣ ਅਖਾੜੇ ਵਿੱਚ ਆ ਕੇ ਇਨ੍ਹਾਂ ਵੱਲੋਂ ਕੀਤੇ ਜਾਂਦੇ ਭੰਡਪੁਣੇਂ ਉਤੇ ਹੱਸਦੇ ਹਨ ਤਾਂ ਇਹਨਾਂ ਲੀਡਰਾਂ ਅੰਦਰ ਭਰਮ ਪੈਦਾ ਹੁੰਦਾ ਹੈ ਕਿ ਲੋਕਾਂ ਵਿੱਚ ਸਾਡੀ ਵਾਹ ਵਾਹ! ਹੋ ਰਹੀ ਹੈ। ਕੈਪਟਨ ਤੇ ਬਾਜਵਾ ਨੂੰ ਪਤਾ ਹੀ ਨਹੀਂ! ਕਿ ਹੁਣ ਪੰਜਾਬ ਦੀ ਜਨਤਾ ਉਨ੍ਹਾਂ ਨੂੰ ਸਿਆਸੀ ਤੇ ਲੋਕਪੱਖੀ ਮੁੱਦਿਆ ਉੱਤੇ ਗੰਭੀਰਤਾ ਨਾਲ ਨਹੀਂ ਲੈ ਰਹੀ। ਸੂਬੇ ਦੇ ਲੋਕ ਚੰਗੀ ਤਰ੍ਹਾਂ ਸਮਝ ਰਹੇ ਹਨ ਕਿ ਕਾਂਗਰਸ ਪਾਰਟੀ ਦੇ ਚੋਣ ਅਖਾੜਿਆ ਵਿੱਚੋਂ ਭ੍ਰਿਸਟਾਚਾਰ, ਮਹਿੰਗਾਈ, ਬੇਰੁਜ਼ਗਾਰੀ ਅਤੇ ਕਾਲੇ ਧਨ ਵਰਗੇ ਕੌਮੀ ਅਤੇ ਪੰਜਾਬ ਦੀ ਤਰੱਕੀ ਵਾਲੇ ਅਹਿਮ ਚੋਣ ਮੁੱਦੇ ਗਾਇਬ ਹਨ।
ਲੋਕ ਆਪਣੇ ਨਿੱਜੀ ਤੇ ਸਮਾਜਿਕ ਜੀਵਨ ਵਿੱਚ ਨਿੱਤ ਪੈਦਾ ਹੋਣ ਵਾਲੇ ਤਣਾਓ ਤੋਂ ਆਰਜੀ ਤੌਰ ਤੇ ਮੁਕਤੀ ਲੈਣ ਲਈ ਕੈਪਟਨ-ਬਾਜਵਾ ਦੀਆਂ ਹਾਸੇ-ਮਜਾਕ ਦਾ ਕੇਂਦਰ ਬਣੀਆਂ ਹੋਈਆ ਚੋਣ ਮੀਟਿੰਗਾਂ 'ਚ ਪਲ-ਦੋ-ਪਲ ਹਾਜਰੀ ਲੁਵਾ ਲੈਂਦੇ ਹਨ। ਇਸ ਸਥਿਤੀ ਨਾਲ ਦੋਨਾਂ ਹੀ ਧਿਰਾਂ ਆਪਣਾ ਆਪਣਾ ਰਾਝਾਂ-ਰਾਜੀ ਕਰ ਰਹੀਆ ਹਨ, ਸਰੋਤੇ ਮਨੋਰੰਜਨ ਕਰਕੇ ਤਣਾਓ ਮੁਕਤ ਹੋ ਰਹੇ ਹਨ ਅਤੇ ਕਾਂਗਰਸੀ ਨੇਤਾ ਚੋਣ ਮੀਟਿੰਗਾਂ ਨੂੰ ਸੰਬੋਧਨ ਕਰਨ ਵਾਲੀ ਆਪਣੀ ਭਲ਼ ਪੂਰੀ ਕਰ ਰਹੇ ਹਨ। ਰਾਮੂਵਾਲੀਆ ਨੇ ਆਖਿਆ ਕਿ ਪੰਜਾਬ ਦੀ ਹਰ ਖੇਤਰ 'ਚ ਤਰੱਕੀ ਵਾਲੀ ਚੜ੍ਹਤ ਨੂੰ ਵੇਖਕੇ ਦੁਨੀਆਂ ਭਰ ਦੇ ਨੇਤਾ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਤੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੂੰ ਵਧਾਈਆਂ ਦੇ ਰਹੇ ਹਨ। ਪੰਜਾਬ ਕਾਂਗਰਸ ਦੇ ਆਗੂ ਕੇਂਦਰ ਦੇ ਇਸ਼ਾਰੇ ਉੱਤੇ ਸੂਬੇ ਦੀ ਤਰੱਕੀ ਵਾਲੇ ਰਸਤੇ ਵਿੱਚ ਕਦਮ-ਕਦਮ ਉੱਤੇ ਅੜਿੱਕਾ ਪੈਦਾ ਕਰਦੇ ਆ ਰਹੇ ਹਨ, ਜੋ ਪੰਜਾਬ ਤੇ ਪੰਜਾਬੀਆਂ ਨਾਲ ਸਭ ਤੋਂ ਵੱਡੀ ਗਦਾਰੀ ਹੈ।ਅੰਤ 'ਚ ਸੀਨੀਅਰ ਅਕਾਲੀ ਨੇਤਾ ਨੇ ਪੰਜਾਬ ਦੇ ਸਾਰੇ ਜ਼ਿਲ੍ਹਾ ਪੱਧਰੀ ਕਾਂਗਰਸੀ ਨੇਤਾਵਾਂ ਨੂੰ ਸੁਝਾਓ ਦਿੱਤਾ ਕਿ ਉਹ ਸੂਬੇ ਦੀ ਭਲਾਈ ਤੇ ਤਰੱਕੀ ਲਈ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਤੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੀ ਅਗਵਾਈ ਨੂੰ ਕਬੂਲ ਕਰ ਲੈਣ। ਅਜਿਹਾ ਕਦਮ ਚੁੱਕਣ ਨਾਲ ਪੰਜਾਬ ਦੀ ਦੁਸ਼ਮਣ ਜਮਾਤ ਕਾਂਗਰਸ ਨੂੰ ਸਦਾ ਲਈ ਦਫ਼ਨਾਇਆ ਜਾ ਸਕਦਾ ਹੈ।