ਪੰਜਾਬ ਪੁਲਿਸ ਦੇ ਮੋਹਾਲੀ ਵਿਖੇ ਡੀ.ਐਸ.ਪੀ.-1 ਵਜੋਂ ਤਾਇਨਾਤ ਗੁਰਬੰਸ ਸਿੰਘ ਬੈਂਸ ਨੂੰ ਆਪਣੇ ਸਰਕਾਰੀ ਅਹੁਦੇ ਦੀ ਦੁਰਵਰਤੋਂ ਕਰਦਿਆਂ ਰਿਸ਼ਵਤ ਲੈਣ ਤੇ ਆਮਦਨ ਦੇ ਸ੍ਰੋਤਾਂ ਤੋਂ ਵੱਧ ਜਾਇਦਾਦ ਬਣਾਉਣ ਦੇ ਦੋਸ਼ ਤਹਿਤ ਗ੍ਰਿਫਤਾਰ ਕਰਨ ਉਪਰੰਤ ਆਈ.ਜੀ.ਜੋਨ, ਪਟਿਆਲਾ ਸ਼ੀ੍ਰ ਨਿਰਮਲ ਸਿੰਘ ਢਿੱਲੋਂ ਨੇ ਸੰਵਿਧਾਨ ਦੀ ਧਾਰਾ 311 ਦੀ ਉਪ ਧਾਰਾ (ਬੀ) ਅਤੇ ਉਪ ਧਾਰਾ 2 ਤਹਿਤ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਹੈ। ਇਸੇ ਦੌਰਾਨ ਬਰਤਰਫ ਡੀ.ਐਸ.ਪੀ ਦੇ ਪਟਿਆਲਾ ਸਥਿਤ ਘਰ ਦੀ ਤਲਾਸ਼ੀ ਦੌਰਾਨ ਇੱਕ ਗੈਰ-ਲਾਇਸੰਸੀ 32 ਬੋਰ ਵੈਬਲੇ ਸਕਾਟ ਰਿਵਾਲਵਰ ਬਰਾਮਦ ਕੀਤਾ ਗਿਆ ਹੈ ਜਿਸ ਸਬੰਧੀ ਪਟਿਆਲਾ ਦੇ ਸਿਵਲ ਲਾਇਨਜ਼ ਪੁਲਿਸ ਸਟੇਸ਼ਨ ਵਿਖੇ ਮਾਮਲਾ ਦਰਜ਼ ਕੀਤਾ ਗਿਆ ਹੈ।
ਇਹ ਜਾਣਕਾਰੀ ਦਿੰਦਿਆਂ ਮੋਹਾਲੀ ਦੇ ਐਸ.ਐਸ.ਪੀ ਸ਼੍ਰੀ ਜੀ.ਐਸ. ਸੰਧੂ ਨੇ ਦੱਸਿਆ ਕਿ ਉਕਤ ਡੀ.ਐਸ.ਪੀ ਦਾ ਇੱਕ ਐਨ.ਕੇ. ਗੋਇਲ ਨਾਮੀ ਵਿਅਕਤੀ ਕਰੀਬੀ ਸਾਥੀ ਸੀ ਜੋ ਕਿ ਚੰਡੀਗੜ ਦੇ 20/ਡੀ ਸਥਿਤ ਮਕਾਨ ਨੰ:3015 ਦਾ ਰਹਿਣ ਵਾਲਾ ਹੈ ਜੋ ਉਸ ਦੀਆਂ ਸਾਰੀਆਂ ਭ੍ਰਿਸ਼ਟ ਅਤੇ ਗੈਰ-ਕਾਨੂੰਨੀ ਕਾਰਵਾਈਆਂ ਵਿਚ ਭਾਈਵਾਲ ਸੀ। ਡੀ.ਐਸ.ਪੀ ਬੈਂਸ ਵਲੋਂ ਆਪਣੀ ਪਤਨੀ ਨੂੰ ਪਟਿਆਲੇ ਤੋਂ ਲੁਧਿਆਣੇ ਜਾ ਕੇ 40 ਲੱਖ ਰੁਪਏ ਪ੍ਰਾਪਤ ਕਰਨ ਲਈ ਕਿਹਾ ਗਿਆ ਸੀ ਜੋ ਕਿ ਉਸ ਨੇ ਹਾਸਲ ਕੀਤੇ ਅਤੇ ਮਾਲ ਰੋਡ ਲੁਧਿਆਣਾ ਵਿਖੇ ਐਚ.ਡੀ.ਐਫ.ਸੀ ਬੈਂਕ ਦੇ ਆਪਣੇ ਲਾਕਰ ਵਿਚ ਜੋ ਕਿ ਗੁਰਬੰਸ ਸਿੰਘ ਬੈਂਸ ਅਤੇ ਉਹਨਾਂ ਦੀ ਪਤਨੀ ਅਮਰਦੀਪ ਸ਼ੇਰਗਿੱਲ ਦੇ ਨਾਂ ਹੈ ਵਿਚ ਰੱਖੇ ਗਏ ਸਨ। ਡੀ.ਐਸ.ਪੀ ਦੇ ਇੱਕ ਗਨਮੈਨ ਵਲੋਂ ਉਨਾਂ ਦੀ ਪਤਨੀ ਦਾ ਸਹਿਯੋਗ ਕੀਤਾ ਗਿਆ ਜਦਕਿ ਦੂਜੇ ਨੂੰ ਐਨ.ਕੇ. ਗੋਇਲ ਨਾਲ ਬਾਕੀ ਰਕਮ ਲੁਧਿਆਣੇ ਤੋਂ ਚੰਡੀਗੜ ਲਿਜਾਣ ਲਈ ਭੇਜਿਆ ਗਿਆ। ਲੁਧਿਆਣੇ ਤੋਂ ਵਾਪਸ ਆਉਣ ਤੋਂ ਪਹਿਲਾਂ ਗੋਇਲ ਨੇ 14 ਲੱਖ ਰੁਪਏ ਕਿਸੇ ਹੋਰ ਵਿਅਕਤੀ ਨੂੰ ਵੀ ਦਿੱਤੇ।
ਇਸ ਸਬੰਧ ਵਿਚ ਮੋਹਾਲੀ ਦੇ ਥਾਣਾ ਮਟੌਰ ਵਿਖੇ ਇੱਕ ਕੇਸ ਨੰਬਰ 45 ਮਿਤੀ 27 ਮਾਰਚ, 2014 ਭ੍ਰਿਸ਼ਟਾਚਾਰ ਰੋਕੂ ਕਾਨੂੰਨ 88 ਦੀਆਂ ਧਾਰਾਵਾਂ 7, 8, 13 (1) (ਏ)(ਡੀ) (ਈ) ਅਤੇ ਆਈ.ਪੀ.ਸੀ ਦੀ ਧਾਰਾ 120 ਤਹਿਤ ਦਰਜ਼ ਕੀਤਾ ਗਿਆ ਹੈ ਅਤੇ ਇਸ ਮਾਮਲੇ ਦੀ ਜਾਂਚ ਮੋਹਾਲੀ ਦੇ ਐਸ.ਪੀ.ਡੀ ਸ਼੍ਰੀ ਗੁਰਸ਼ਰਨਦੀਪ ਸਿੰਘ ਗਰੇਵਾਲ ਨੂੰ ਸੌਂਪੀ ਗਈ ਹੈ।ਉਨਾਂ ਦੱਸਿਆ ਕਿ ਜਾਂਚ ਦੌਰਾਨ ਲੁਧਿਆਣਾ ਦੇ ਪੁਲਿਸ ਕਮਿਸ਼ਨਰ ਨੂੰ ਗੁਰਬੰਸ ਬੈਂਸ ਦੇ ਐਚ.ਡੀ.ਐਫ.ਸੀ ਬੈਂਕ (ਮਾਲ ਰੋਡ) ਵਿਚਲੇ ਲਾਕਰ ਦੀ ਤਲਾਸ਼ੀ ਲਈ ਬੇਨਤੀ ਕੀਤੀ ਗਈ ਜਿਨਾਂ ਡੀ.ਸੀ.ਪੀ ਸ਼੍ਰੀ ਹਰਸ਼ ਬੰਸਲ ਨੂੰ ਇਹ ਜਿੰਮੇਵਾਰੀ ਸੌਂਪੀ। ਇਸ ਲਾਕਰ ਵਿਚੋਂ ਕਲ ਰੱਖੇ ਗਏ 40 ਲੱਖ ਰੁਪਏ ਤੋਂ ਇਲਾਵਾ 1 ਲੱਖ ਰੁਪਏ ਦੀ ਭਾਰਤੀ ਕਰੰਸੀ, 1464 ਅਮਰੀਕੀ ਡਾਲਰ ਅਤੇ 58 ਸਿੰਗਾਪੁਰ ਦੇ ਡਾਲਰ ਵੀ ਬਰਾਮਦ ਹੋਏ ਹਨ। ਬੈਂਕ ਦੇ ਰਿਕਾਰਡ ਮੁਤਾਬਕ ਕਲ ਊਨਾਂ ਦੀ ਧਰਮਪਤਨੀ ਵਲੋਂ ਲਾਕਰ ਦੀ ਵਰਤੋਂ ਵੀ ਕੀਤੀ ਗਈ ਹੈ। ਉਨਾਂ ਅੱਗੇ ਦੱਸਿਆ ਕਿ ਹੋਰ ਪੁੱਛ ਗਿੱਛ ਦੌਰਾਨ ਉਸਦੇ ਵੈਸਟ ਐਂਡ ਮਾਲ ਫਿਰੋਜ਼ਪੁਰ ਰੋਡ ਸਥਿਤ ਓ.ਬੀ.ਸੀ ਬੈਂਕ ਲਾਕਰ ਦਾ ਪਤਾ ਲੱਗਿਆ ਜਿਸ ਦੀ ਪੁਲਿਸ ਕਮਿਸ਼ਨਰ ਲੁਧਿਆਣਾ ਨੇ ਏ.ਡੀ.ਸੀ.ਪੀ ਸਵਪਨ ਸ਼ਰਮਾ ਦੀ ਦੇਖ ਰੇਖ ਹੇਠ ਤਲਾਸ਼ੀ ਕਰਵਾਈ ਜਿਥੋਂ 20 ਲੱਖ ਰੁਪਏ ਦੀ ਰਾਸ਼ੀ ਬਰਾਮਦ ਹੋਈ ਹੈ। ਇਸ ਸਬੰਧੀ ਗੁਰਬੰਸ ਬੈਂਸ ਤੋਂ ਪੁੱਛ ਗਿੱਛ ਜਾਰੀ ਹੈ। ਦੋਵਾਂ ਲਾਕਰਾਂ ਦੀ ਵਿਡਿਓਗ੍ਰਾਫੀ ਕਰਵਾਈ ਗਈ। ਡੀ.ਐਸ.ਪੀ ਗੁਰਬੰਸ ਬੈਂਸ ਨੂੰ ਗ੍ਰਿਫਤਾਰ ਕਰਨ Àਪਰੰਤ ਉਨਾਂ ਤੋਂ ਐਸ.ਐਸ.ਪੀ ਮੋਹਾਲੀ ਦੀ ਅਗਵਾਈ ਹੇਠਲੀ ਪੁਲਿਸ ਟੀਮ ਅਤੇ ਐਸ.ਐਸ.ਪੀ ਸੰਗਰੂਰ ਸ਼੍ਰੀ ਮਨਦੀਪ ਸਿੰਘ ਸਿੱਧੂ ਜਿਨਾਂ ਨੂੰ ਵਿਸ਼ੇਸ਼ ਤੌਰ 'ਤੇ ਆਈ.ਜੀ ਪਟਿਆਲਾ ਜੋਨ ਵਲੋਂ ਭੇਜਿਆ ਗਿਆ ਹੈ ਵਲੋਂ ਉਕਤ ਰਾਸ਼ੀ ਬਾਰੇ ਪੁੱਛ ਗਿੱਛ ਕੀਤੀ ਜਾ ਰਹੀ ਹੈ। ਐਨ.ਕੇ ਗੋਇਲ ਨੂੰ ਵੀ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।