ਦਿੱਲੀ ਤੋਂ ਭਾਜਪਾ ਸੰਸਦ ਅਤੇ ਭੋਜਪੁਰੀ ਸੁਪਰ ਸਟਾਰ ਮਨੋਜ ਤਿਵਾੜੀ ਦਾ ਕਹਿਣਾ ਹੈ ਕਿ ਚੰਡੀਗੜ੍ਹ ਦੇ ਵਿਕਾਸ ਵਿਚ ਪੂਰਬਾਚਲ ਸਮਾਜ ਦੀ ਭੂਮਿਕਾ ਸਭ ਤੋਂ ਅਹਿਮ ਹੈ। ਪੂਬਾਚਲ ਦੇ ਲੋਕਾਂ ਨੇ ਆਪਣੀ ਮਿਹਨਤ ਦੇ ਦਮ ’ਤੇ ਇਥੇ ਵੱਖਰੀ ਪਛਾਣ ਬਣਾਈ ਹੈ। ਮਨੋਜ ਤਿਵਾੜੀ ਅੱਜ ਨਿਗਮ ਚੋਣਾਂ ਵਿਚ ਉਤਾਰੇ ਗਏ ਉਮੀਦਵਾਰਾਂ ਦੇ ਸਮਰਥਨ ਵਿਚ ਚੋਣ ਮੀਟਿੰਗਾਂ ਨੂੰ ਸੰਬੋਧਨ ਕਰ ਰਹੇ ਸਨ। ਤਿਵਾੜੀ ਨੇ ਅੱਜ ਵਾਰਡ ਨੰ. 7 ਤੋਂ ਉਮੀਦਵਾਰ ਮਨੋਜ ਸੋਨਕਰ ਦੇ ਸਮਰਥਨ ਵਿਚ ਵਿਕਾਸ ਨਗਰ ਸਬਜ਼ੀ ਮੰਡੀ, ਵਾਰਡ ਨੰ. 4 ਤੋਂ ਉਮੀਦਵਾਰ ਸਵੀਤਾ ਗੁਪਤਾ ਦੇ ਸਮਰਥਨ ਵਿਚ ਇੰਦਰਾ ਕਲੋਨੀ, ਵਾਰਡ ਨੰ. 20 ਤੋਂ ਉਮੀਦਵਾਰ ਦੇਵੀ ਸਿੰਘ ਦੇ ਸਮਰਥਨ ਵਿਚ ਹੱਲੋਮਾਜਰਾ, ਵਾਰਡ ਨੰ. 31 ਤੋਂ ਭਾਰਤ ਕੁਮਾਰ ਦੇ ਸਮਰਥਨ ਵਿਚ ਆਦਰਸ਼ ਕਲੋਨੀ, ਵਾਰਡ ਨੰ. 28 ਤੋਂ ਜਸਵਿੰਦਰ ਕੌਰ ਦੇ ਸਮਰਥਨ ਵਿਚ ਮਲੋਆ ਅਤੇ ਵਾਰਡ ਨੰ. 15 ਤੋਂ ਗੋਪਾਲ ਸ਼ੁਕਲਾ ਉਰਫ ਪੱਪੂ ਸ਼ੁਕਲਾ ਦੇ ਸਮਰਥਨ ਵਿਚ ਈ. ਡਬਲਿਊ. ਐਸ. ਕਲੋਨੀ ਧਨਾਸ ਸਬਜ਼ੀ ਮੰਡੀ ਗਰਾਊਡ ਦੇ ਨਜ਼ਦੀਕ ਚੋਣ ਮੀਟਿੰਗਾਂ ਨੂੰ ਸੰਬੋਧਨ ਕੀਤਾ। ਮਨੋਜ ਤਿਵਾੜੀ ਨੇ ਕਿਹਾ ਕਿ ਪੂਰਬਾਚਲ ਦੇ ਲੋਕ ਜਿਥੇ ਵੀ ਜਾਂਦੇ ਹਨ ਉਥੇ ਆਪਣੀ ਮਿਹਨਤ ਦੇ ਬਲ ’ਤੇ ਮੁਕਾਮ ਹਾਸਲ ਕਰਦੇ ਹਨ।
ਉਨ੍ਹਾਂ ਕਿਹਾ ਕਿ ਭਾਰਤੀ ਜਨਤਾ ਪਾਰਟੀ ਹੀ ਇਕ ਅਜਿਹੀ ਪਾਰਟੀ ਹੈ ਜੋ ਪੂਰਬਾਚਲ ਦੇ ਲੋਕਾਂ ਨੂੰ ਸਭ ਤੋਂ ਜ਼ਿਆਦਾ ਸਤਿਕਾਰ ਦਿੰਦੀ ਹੈ। ਉਨ੍ਹਾਂ ਕਿਹਾ ਕਿ ਚੰਡੀਗੜ੍ਹ ਸ਼ਹਿਰ ਪੂਰਬਾਚਲੀਆਂ ਦੇ ਬਲਬੂਤੇ ’ਤੇ ਹੀ ਬਣਿਆ ਹੈ। ਸ਼ਹਿਰ ਦੀਆਂ ਵੱਡੀਆਂ ਵੱਡੀਆਂ ਇਮਾਰਤਾਂ ਦੇ ਬਨਣ ਵਿਚ ਪੂਰਬਾਚਲੀਆਂ ਦਾ ਪਸੀਨਾ ਵਹਿਆ ਹੈ। ਸਹੀ ਮਾਇਨੇ ਵਿਚ ਚੰਡੀਗੜ੍ਹ ਦੀ ਨੀਂਵ ਪੂਰਬਾਚਲੀਆਂ ਨੇ ਹੀ ਰੱਖੀ ਹੈ।
ਦਿੱਲੀ ਦੇ ਸੰਸਦ ਨੇ ਜ਼ਿਆਦਾਤਰ ਚੋਣ ਮੀਟਿੰਗਾਂ ਦੌਰਾਨ ਭੋਜਪੁਰੀ ਵਿਚ ਗੱਲਬਾਤ ਕਰਦਿਆਂ ਵੋਟਰਾਂ ਨੂੰ ਅਪੀਲ ਕੀਤੀ ਕਿ ਉਹ ਭਾਜਪਾ ਪਾਰਟੀ ਦੇ ਸਮਰਥਨ ਵਿਚ ਇਕਜੁੱਟ ਹੋ ਕੇ ਭਾਜਪਾ ਉਮੀਦਵਾਰਾਂ ਨੂੰ ਜਿਤਾਉਣ ਦਾ ਕੰਮ ਕਰਨ। ਉਨ੍ਹਾਂ ਕਿਹਾ ਕਿ ਅੱਜ ਵਿਰੋਧੀਆਂ ਕੋਲ ਚੰਡੀਗੜ੍ਹ ਵਿਚ ਗਿਣਵਾਉਣ ਲਈ ਕੋਈ ਵਿਕਾਸ ਯੋਜਨਾ ਨਹੀਂ ਹੈ ਕਿਉਂਕਿ ਉਨ੍ਹਾਂ ਦੇ ਕਾਰਜਕਾਲ ਵਿਚ ਕੇਵਲ ਘੋਟਾਲੇ ਹੋਏ ਹਨ। ਭਾਂਜਪਾ ਦੇ ਉਮੀਦਵਾਰ ਪਿਛਲੇ ਪੰਜ ਸਾਲ ਵਿਚ ਹੋਏ ਵਿਕਾਸ ਕਾਰਜਾਂ ਦੇ ਨਾਮ ’ਤੇ ਜਨਤਾ ਵਿਚ ਜਾ ਰਹੇ ਹਨ ਅਤੇ ਵਿਰੋਧੀ ਅੱਜ ਵੋਟ ਮੰਗਣ ਦੇ ਲਾਇਕ ਵੀ ਨਹੀਂ ਰਹੇ। ਇਸ ਮੌਕੇ ਪਾਰਟੀ ਆਗੂ ਹਰੀਸ਼ੰਕਰ ਮਿਸ਼ਰਾ, ਵਾਰਡ ਪ੍ਰਧਾਨ ਅਰਵਿੰਦ ਸਿੰਘ, ਅਮਿਤ ਬਿਰਲਾ, ਵਿਨੋਦ ਕੁਮਾਰ ਚੌਹਾਨ, ਲਲਿਤ ਚੌਹਾਨ, ਰਾਹੁਲ ਦਿਰਵੇਦੀ ਸਮੇਤ ਕਈ ਹੋਰ ਆਗੂ ਹਾਜ਼ਰ ਸਨ।