ਪੰਜਾਬ ਦੇ ਬਾਗਬਾਨੀ ਤੇ ਤਕਨੀਕੀ ਸਿੱਖਿਆ ਮੰਤਰੀ ਰਾਣਾ ਗੁਰਜੀਤ ਸਿੰਘ ਨੇ ਕਿਹਾ ਹੈ ਕਿ ਦੁਆਬਾ ਖੇਤਰ ਨੂੰ ਆਲੂ ਬੀਜ਼ ਦੀ ਹੱਬ ਵਜੋਂ ਵਿਕਸਤ ਕੀਤਾ ਜਾਵੇਗਾ, ਕਿਉਂਕਿ ਦੁਆਬਾ ਖੇਤਰ ਦੀ ਮਿੱਟੀ ਦੀ ਸਿਹਤ ਵਿਸ਼ਵ ਪੱਧਰ ਦੇ ਮੁਕਾਬਲੇ ਲਈ ਆਲੂ ਬੀਜ਼ ਤਿਆਰ ਕਰਨ ਵਾਸਤੇ ਬਹੁਤ ਢੁਕਵੀਂ ਹੈ।ਇਸ ਲਈ ਟਿਸ਼ੂ ਕਲਚਰ ਅਧਾਰਿਤ ‘ਸੀਡ ਪਟੈਟੋ ਐਕਟ 2021 ਪੰਜਾਬ ਕੈਬਨਿਟ ਵਲੋਂ ਪਾਸ ਕੀਤਾ ਗਿਆ ਹੈ, ਜਿਸ ਤਹਿਤ ਪਹਿਲੀ ਵਾਰ ਆਲੂ ਦੇ ‘ਬੀਜ਼ ਦੀ ਟਰੇਸੇੇਬਿਲਟੀ’ ਤੇ ‘ਬੀਜ ਪ੍ਰਮਾਣੀਕਰਨ’ ਦੀ ਵਿਵਸ਼ਥਾ ਸ਼ੁਰੂ ਕੀਤੀ ਗਈ ਹੈ, ਜਿਸ ਨਾਲ ਨਾ ਸਿਰਫ ਬੀਜ ਦੀ ਗੁਣਵੱਤਾ ਵਿਚ ਸੁਧਾਰ ਹੋਵੇਗਾ ਸਗੋਂ ਉਹ ਅੰਤਰਰਾਸ਼ਟਰੀ ਮਾਪਦੰਡਾਂ ਉਪਰ ਵੀ ਪੂਰਾ ਉਤਰ ਸਕੇਗਾ। ਅਜਿਹਾ ਐਕਟ ਪਾਸ ਕਰਨ ਵਾਲਾ ਪੰਜਾਬ ਦੇਸ਼ ਦਾ ਪਹਿਲਾ ਸੂਬਾ ਹੈ।ਅੱਜ ਆਈ.ਕੇ. ਗੁਜ਼ਰਾਲ ਪੰਜਾਬ ਤਕਨੀਕੀ ਯੂਨੀਵਰਸਿਟੀ ਵਿਖੇ ਪਹਿਲੇ ਬਾਗਬਾਨੀ ਸੰਮੇਲਨ ਜਿਸ ਵਿਚ ਸੂਬੇ ਭਰ ਦੇ ਹਜ਼ਾਰਾਂ ਬਾਗਬਾਨਾਂ ਤੇ ਬਾਗਬਾਨੀ ਦੇ ਮਾਹਿਰਾਂ ਨੇ ਭਾਗ ਲਿਆ , ਦੌਰਾਨ ਕਿਸਾਨਾਂ ਨੂੰ ਸੰਬੋਧਨ ਕਰਦਿਆਂ ਕੈਬਨਿਟ ਮੰਤਰੀ ਰਾਣਾ ਗੁਰਜੀਤ ਸਿੰਘ ਨੇ ਕਿਹਾ ਕਿ ਦੁਆਬਾ ਖੇਤਰ ਅੰਦਰ ਆਲੂ ਬੀਜ਼ ਦੇ ਉਤਪਾਦਨ ਦੀਆਂ ਅਸੀਮ ਸੰਭਾਵਨਾਵਾਂ ਮੌਜੂਦ ਹਨ, ਜਿਸ ਲਈ ਐਰੌਪੋਨਿਕ ਤਕਨੀਕ (ਹਵਾ ਵਿਚ ਮਿੱਟੀ ਰਹਿਤ ਬੀਜ ਪੈਦਾ ਕਰਨਾ) ਨੂੰ ਹੋਰ ਹੁਲਾਰਾ ਦਿੱਤਾ ਜਾਵੇਗਾ।ਉਨ੍ਹਾਂ ਕਿਹਾ ਕਿ ਪਹਿਲੀ ਵਾਰ ਹੈ ਕਿ ਆਲੂ ਬੀਜ਼ ਲਈ ਸੂਬੇ ਵਿਚ 78 ਹਜਾਰ ਹੈਕਟੇਅਰ ਅੰਦਰ ਖੇਤੀ ਹੋਈ ਹੈ, ਜੋ ਕਿ ਆਪਣੇ ਆਪ ਅੰਦਰ ਰਿਕਾਰਡ ਹੈ। ਉਨ੍ਹਾਂ ਕਿਹਾ ਕਿ ਕਿਸਾਨਾਂ ਤੇ ਬਾਗਬਾਨਾਂ ਨੂੰ ਗੁਣਵੱਤਾ ਵਾਲੇ ਪੌਦੇ ਮਿਲਣਾ ਯਕੀਨੀ ਬਣਾਉਣ ਦੇ ਮੰਤਵ ਨਾਲ ‘ਫਰੂਟ ਤੇ ਨਰਸਰੀ ਐਕਟ 1961 ਵਿਚ ਸੋਧ ਕੀਤੀ ਗਈ ਹੈ, ਜਿਸ ਤਹਿਤ ਨਰਸਰੀਆਂ ਦੀ ਰਜਿਸਟ੍ਰੇਸ਼ਨ, ਪੌਦੇ ਤਿਆਰ ਕਰਨ ਲਈ ਜੜ੍ਹ ਦੀ ਪਹਿਚਾਣ, ਟੈਗਿੰਗ ਤੇ ਟਰੇਸੇਬਿਲਟੀ ( ਬੀਜ ਦਾ ਅਸਲੀ ਉਤਪਦਾਨ ਸਥਾਨ ਪਤਾ ਕਰਨਾ) ਲਾਜਮੀ ਕੀਤਾ ਗਿਆ ਹੈ।
ਇਸ ਨਾਲ ਨਾ ਸਿਰਫ ਕਿਸਾਨਾਂ ਨੂੰ ਸਹੀ ਬੀਜ਼ ਤੇ ਪੌਦੇ ਮਿਲਣਗੇ ਸਗੋਂ ਭਵਿੱਖ ਵਿਚ ਵੀ ਇਸਦੇ ਵੱਡੇ ਲਾਭ ਮਿਲਣਗੇ।ਕਿਸਾਨਾਂ ਨਾਲ ਗੱਲਬਾਤ ਦੇ ਸ਼ੈਸ਼ਨ ਦੌਰਾਨ ਕੈਬਨਿਟ ਮੰਤਰੀ ਨੇ ਸੂਬੇ ਭਰ ਵਿਚ ਕੇਲੇ ਦਾ ਉਤਪਾਦਨ ਕਰਨ ਵਾਲੇ ਕਿਸਾਨਾਂ ਲਈ ਕੇਲੇ ਨੂੰ ਵਿਗਿਆਨਕ ਤਰੀਕੇ ਨਾਲ ਪਕਾਉਣ ਵਾਸਤੇ ‘ਰਾਈਪਨਿੰਗ ਯੂਨਿਟ’ ਸਥਾਪਿਤ ਕਰਨ ਦਾ ਵੀ ਐਲਾਨ ਕੀਤਾ। ਪਹਿਲਾਂ ਕੇਲੇ ਨੂੰ ਕੈਲਸ਼ੀਅਮ ਕਾਰਬਾਇਡ ਨਾਲ ਪਕਾਇਆ ਜਾਂਦਾ ਹੈ, ਜੋ ਕਿ ਸਿਹਤ ਲਈ ਖਤਰਨਾਕ ਹੈ। ਉਨਾਂ ਕਿਹਾ ਕਿ ਸੂਬੇ ਅੰਦਰ ਜ਼ਮੀਨ ਹੇਠਲੇ ਪਾਣੀ ਨੂੰ ਬਚਾਉਣ ਲਈ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਤੇ ਬਾਗਬਾਨੀ ਵਿਭਾਗ ਸੂਬੇ ਅੰਦਰ ਖਿੱਤਾਬੰਦੀ ’ਤੇ ਕੰਮ ਕਰਨ ਤਾਂ ਜੋ ਖੇਤਰ ਅਧਾਰਿਤ ਫਸਲਾਂ ਤੇ ਘੱਟ ਪਾਣੀ ਲੈਣ ਵਾਲੀਆਂ ਫਸਲਾਂ ਨੂੰ ਉਤਸ਼ਾਹਿਤ ਕੀਤਾ ਜਾ ਸਕੇ।ਉਨ੍ਹਾਂ ਕਿਹਾ ਕਿ ਸੂਬੇ ਅੰਦਰ ਕੇਵਲ 7 ਫੀਸਦੀ ਖੇਤਰ ਹੀ ਬਾਗਬਾਨੀ ਅਧੀਨ ਹੈ ਪਰ ਇਸਦਾ ਕੁੱਲ ਘਰੇਲੂ ਉਤਪਾਦ ਵਿਚ ਯੋਗਦਾਨ 13 ਫੀਸਦੀ ਹੈ, ਜਿਸਨੂੰ ਦੁੱਗਣਾ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਪਹਿਲੀ ਵਾਰ ਵਿਭਾਗ ਵਲੋਂ ਇਜ਼ਰਾਇਲ ਵਿਖੇ ਦੋ ਮਾਹਿਰ ਭੇਜੇ ਗਏ ਹਨ, ਜੋ ਕਿ ਜਲਦ ਹੀ ਰਿਪੋਰਟ ਸੌਪਣਗੇ ਜਿਸ ਅਨੁਸਾਰ ਸੂਬੇ ਵਿਚ ਬਾਗਬਾਨੀ ਨੂੰ ਉਤਸ਼ਾਹਿਤ ਕਰਨ ਲਈ ਰਿਪੋਰਟ ਨੂੰ ਲਾਗੂ ਕੀਤਾ ਜਾਵੇਗਾ।ਇਸ ਮੌਕੇ ਬਾਗਬਾਨੀ ਵਿਭਾਗ ਦੀ ਡਾਇਰੈਕਟਰ ਸ਼ੈਲਿੰਦਰ ਕੌਰ ਆਈ.ਐਫ.ਐਸ. ਨੇ ਕਿਹਾ ਕਿ ਕਿਸਾਨ ਕੇਵਲ ਉਨ੍ਹਾਂ ਦੀ ਜ਼ਮੀਨ ਵਿਚੋਂ ਇਕ ਕਨਾਲ ਬਾਗਬਾਨੀ ਨੂੰ ਜਰੂਰ ਦੇਣ, ਜਿਸ ਨਾਲ ਨਾ ਸਿਰਫ ਉਨਾਂ ਦੀ ਆਮਦਨ ਵਧੇਗੀ ਸਗੋਂ ਉਹ ਫਸਲੀ ਵਿਭਿੰਨਤਾ ਵੱਲ ਵੀ ਵਧ ਸਕਣਗੇ।
ਕੈਬਨਿਟ ਮੰਤਰੀ ਵਲੋਂ ਇਸ ਮੌਕੇ ਕਿਸਾਨਾਂ ਨਾਲ ਵਿਚਾਰ ਵਟਾਂਦਰਾ ਵੀ ਕੀਤਾ ਗਿਆ , ਜਿਸ ਦੌਰਾਨ ਕਿਸਾਨਾਂ ਨੇ ਉਨ੍ਹਾਂ ਨੂੰ ਪੰਜਾਬ ਸਰਕਾਰ ਦੀਆਂ ਯੋਜਨਾਵਾਂ ਬਾਰੇ ਸਵਾਲ ਕੀਤੇ। ਸੰਮੇਲਨ ਦੌਰਾਨ ਵੱਖ-ਵੱਖ ਮਾਹਿਰ ਕਿਸਾਨਾਂ ਤੇ ਬਾਗਬਾਨੀ ਸਾਇੰਸਦਾਨਾਂ ਨੇ ਵੀ ਸੰਬੋਧਨ ਕੀਤਾ, ਜਿਸ ਵਿਚ ਰਾਣਾ ਇੰਦਰ ਪ੍ਰਤਾਪ ਸਿੰਘ ਗੰਨਾ ਕਾਸ਼ਤਕਾਰ, ਗੁਰਰਾਜ ਸਿੰਘ ਪ੍ਰਧਾਨ ਆਲੂ ਉਤਪਦਾਨ ਐਸੋਸੀਏਸ਼ਨ, ਕੁਲਵੰਤ ਸਿੰਘ ਆਹਲੂਵਾਲੀਆ ਚੇਅਰਮੈਨ ਪੰਜਾਬ ਐਗਰੋ ਜੂਸ, ਡਾ. ਅਵਤਾਰ ਸਿੰਘ ਢੀਂਡਸਾ ਫੁੱਲ ਉਤਪਾਦਕ, ਰਣਬੀਰ ਸਿੰਘ ਜੀ.ਐਮ. ,ਡਾ, ਰਾਕੇਸ਼ ਸ਼ਾਰਦਾ ਖੇਤੀਬਾੜੀ ਯੂਨੀਵਰਸਿਟੀ, ਡਾ. ਪਰਮਜੀਤ ਸਿੰਘ ਨੋਡਲ ਅਫਸਰ ਆਲੂ ਉਤਪਾਦਨ ਨੇ ਵੀ ਸੰਬੋਧਨ ਕੀਤਾ। ਕੈਬਨਿਟ ਮੰਤਰੀ ਵਲੋਂ ਇਸ ਮੌਕੇ ਵੱਖ-ਵੱਖ ਸਫਲ ਕਿਸਾਨਾਂ ਦਾ ਵੀ ਸਨਮਾਨ ਕੀਤਾ ਗਿਆ ਤੇ ਸਫਲ ਕਿਸਾਨਾਂ ਦੀਆਂ ਕਹਾਣੀਆਂ ਵਾਲੀ ਇਕ ਕਿਤਾਬ ਵੀ ਜਾਰੀ ਕੀਤੀ ਗਈ। ਉਨ੍ਹਾਂ ਇਸ ਮੌਕੇ ਵੱਖ-ਵੱਖ ਵਿਭਾਗਾਂ ਦੇ ਕਿਸਾਨਾਂ ਵਲੋਂ ਲਗਾਈਆਂ ਪ੍ਰਦਰਸ਼ਨੀਆਂ ਦਾ ਵੀ ਦੌਰਾ ਕੀਤਾ ਤੇ ਕਿਸਾਨਾਂ ਨਾਲ ਗੱਲਬਾਤ ਕੀਤੀ।ਇਸ ਮੌਕੇ ਉੱਘੇ ਗਾਇਕ ਦਵਿੰਦਰ ਦਿਆਲਪੁਰੀ ਨੇ ਕਿਸਾਨਾਂ ਦਾ ਮਨੋਰੰਜਨ ਵੀ ਕੀਤਾ। ਇਸ ਮੌਕੇ ਪੀ.ਟੀ.ਯੂ ਦੇ ਰਜਿਸਟਰਾਰ ਸ਼੍ਰੀ ਜਸਪ੍ਰੀਤ ਸਿੰਘ, ਵਧੀਕ ਡਿਪਟੀ ਕਮਿਸ਼ਨਰ ਐਸ ਪੀ ਆਂਗਰਾ, ਅਮਨਦੀਪ ਸਿੰਘ ਗੋਰਾ ਗਿੱਲ, ਸੰਯੂਕਤ ਡਾਇਰੈਕਟਰ ਜਸਪਾਲ ਸਿੰਘ ਭੱਟੀ ਤੇ ਜਗਦੇਵ ਸਿੰਘ, ਸੁਖਦੀਪ ਸਿੰਘ ਹੁੰਦਲ ਸਹਾਇਕ ਡਾਇਰੈਕਟਰ , ਲਾਲ ਬਹਾਦਰ ਸਹਾਇਕ ਡਾਇਰੈਕਟਰ , ਦਲਜੀਤ ਸਿੰਘ ਗਿੱਲ ਸਹਾਇਕ ਡਾਇਰੈਕਟਰ, ਬਲਵਿੰਦਰ ਸਿੰਘ ਬਾਗਬਾਨੀ ਵਿਕਾਸ ਅਫਸਰ ਤੇ ਬਾਗਬਾਨੀ ਵਿਭਾਗ ਦੇ ਅਧਿਕਾਰੀ ਤੇ ਕਿਸਾਨ ਹਾਜ਼ਰ ਸਨ।