ਪੰਜਾਬ ਸਰਕਾਰ ਨੇ ਸੂਬੇ ਵਿਚ ਬਾਗਵਾਨੀ ਨੂੰ ਪ੍ਰਫੁੱਲਤ ਕਰਨ ਲਈ ਵਿਸ਼ੇਸ਼ ਉਪਰਾਲੇ ਕੀਤੇ ਹਨ ਜਿਸਦੀ ਬਦੌਲਤ ਸੂਬੇ ਵਿਚ ਲੋਕਾਂ ਦਾ ਰੁਝਾਨ ਬਾਗਵਾਨੀ ਵਾਲੇ ਪਾਸੇ ਕਰਨ ਵਿਚ ਸਫਲਤਾ ਪ੍ਰਾਪਤ ਹੋਈ ਹੈ। ਇਹਨਾਂ ਵਿਚਾਰਾਂ ਦਾ ਪ੍ਰਗਟਾਵਾ ਮੁੱਖ ਪਾਰਲੀਮਾਨੀ ਸਕੱਤਰ ਉਦਯੋਗ ਤੇ ਵਣਜ ਐਨ ਕੇ ਸ਼ਰਮਾ ਨੇ ਕੀਤਾ ਹੈ।ਅੱਜ ਇਥੇ ਰੀਅਲ ਅਸਟੇਟ ਕੰਪਨੀ ਜਨਤਾ ਲੈਂਡ ਪ੍ਰੋਮੋਟਰਜ਼ ਲਿਮਟਿਡ ਵੱਲੋਂ ਲਗਾਏ ਜੇ ਐਲ ਪੀ ਐਲ ਫਲਾਵਰ ਸ਼ੌਅ ਦਾ ਉਦਘਾਟਨ ਕਰਨ ਮਗਰੋਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ੍ਰੀ ਸ਼ਰਮਾ ਨੇ ਕਿਹਾ ਕਿ ਫੁੱਲਾਂ ਦੀ ਪ੍ਰਦਰਸ਼ਨੀ ਲਗਾਉਣਾ ਇਕ ਚੰਗਾ ਉਪਰਾਲਾ ਹੈ ਜਿਸ ਨਾਲ ਲੋਕਾਂ ਨੂੰ ਕੁਦਰਤ ਨਾਲ ਜੁੜਨ ਦੀ ਪ੍ਰੇਰਨਾ ਮਿਲਦੀ ਹੈ। ਉਹਨਾਂ ਕਿਹਾ ਕਿ ਸ਼ੌਅ ਦੌਰਾਨ ਹੀ ਪੰਜਾਬ ਦੇ ਅਮੀਰ ਸਭਿਆਚਾਰਕ ਵਿਰਸੇ ਦੇ ਨਾਲ ਨਾਲ ਦੇਸ਼ ਦੇ ਹੋਰਨਾ ਭਾਗਾਂ ਦੇ ਸਭਿਆਚਾਰ ਨਾਲ ਸਬੰਧਤ ਲੋਕ ਨਾਚ ਦੀ ਪੇਸ਼ਕਾਰੀ ਵੀ ਸ਼ਲਾਘਾਯੋਗ ਕਦਮ ਹੈ। ਉਹਨਾਂ ਨੇ ਅਜਿਹੇ ਸ਼ੌਅ ਨੂੰ ਹਰ ਵਰ੍ਹੇ ਆਯੋਜਿਤ ਕਰਨ ਦੀ ਲੋੜ 'ਤੇ ਜ਼ੋਰ ਦਿੱਤਾ।
ਇਸ ਮੌਕੇ ਜੇ. ਐਲ. ਪੀ. ਐਲ ਦੇ ਮੁਖੀ ਸ੍ਰੀ ਕੁਲਵੰਤ ਸਿੰਘ ਨੇ ਆਖਿਆ ਕਿ ਕੰਪਨੀ ਵੱਲੋਂ ਚੰਡੀਗੜ੍ਹ ਤੇ ਪੰਚਕੁਲ ਵਿਖੇ ਲਗਾਏ ਜਾਂਦੇ ਫਲਾਵਰ ਸ਼ੌਅ ਦੀ ਤਰਜ਼ 'ਤੇ ਅਜਿਹਾ ਸ਼ੌਅ ਪਹਿਲੀ ਵਾਰ ਆਯੋਜਿਤ ਕੀਤਾ ਗਿਆ ਹੈ ਅਤੇ ਕੰਪਨੀ ਹੁਣ ਇਸਨੂੰ ਹਰ ਵਰ੍ਹੇ ਆਯੋਜਿਤ ਕਰੇਗੀ।
ਇਸ ਸ਼ੌਅ ਵਿਚ ਪੰਜਾਬੀ ਢੋਲ 'ਤੇ ਭੰਗੜੇ ਦੀ ਪੇਸ਼ਕਾਰੀ ਤੇ ਹੋਰ ਲੋਕ ਨਾਚ ਦੀ ਪੇਸ਼ਕਾਰੀ ਵੀ ਕੀਤੀ ਗਈ। ਸ਼ੌਅ ਵਿਚ ਫਲਾਵਰ ਅਰੇਂਜਮੈਂਟ, ਕਟ ਫਲਾਵਰ (ਐਮਚਿਓਰ) ਅਤੇ ਕਟ ਫਲਾਵਰ (ਸਰਕਾਰੀ, ਨੀਮ ਸਰਕਾਰੀ ਸੰਸਥਾਵਾਂ ਤੇ ਪ੍ਰਾਈਵੇਟ ਨਰਸਰੀ ਲਈ) ਆਦਿ ਵਰਗਾਂ ਵਿਚ ਫੁੱਲਾਂ ਦੀ ਪੇਸ਼ਕਾਰੀ ਕੀਤੀ ਗਈ ਹੈ। ਇਸ ਮੌਕੇ ਬੇਬੀ ਸ਼ੌਅ ਵੀ ਆਯੋਜਿਤ ਕੀਤਾ ਗਿਆ ਤੇ ਫੋਟੋਗ੍ਰਾਫੀ, ਪੇਂਟਿੰਗ ਤੇ ਰੰਗੋਲੀ ਮੁਕਾਬਲਾ ਵੀ ਕਰਵਾਇਆ ਗਿਆ। ਸ਼ੌਅ ਦੌਰਾਨ ਹੋਏ ਮੁਕਾਬਲਿਆਂ ਦੇ ਨਤੀਜਿਆਂ ਵਿਚ ਕਲਾਸ ਡੀ ਫਲਾਵਰ ਪਲਾਂਟ ਗਮਲਿਆਂ ਵਿਚ ਉਗਾਏ ਪੌਦਿਆਂ ਲਈ ਫੇਜ਼ 7 ਮੁਹਾਲੀ ਦੀ ਅਵਿਨਾਸ਼ ਕੌਰ ਨੇ 10 ਪੁਰਸਕਾਰ ਜਿੱਤੇ, ਪ੍ਰਿੰਸੀਪਲ ਐਸ. ਜੀ. ਜੀ. ਐਸ ਕਾਲਜ ਸੈਕਟਰ 26 ਨੇ 8, ਹਰੀਸ਼ਵਰ ਸ਼ਰਮਾ ਸੈਕਟਰ 28 ਡੀ ਨੇ 4, ਸ੍ਰੀ ਰਾਮ ਰਾਜ ਮਾਲੀ ਧਨਾਸ ਚੰਡੀਗੜ੍ਹ ਨੇ 3, ਸੁਖਵਿੰਦਰ ਸਿੰਘ ਮਜਾਤੜੀ, ਮੁਹਾਲੀ ਨੇ 4 ਅਤੇ ਥਾਪਰ ਯੂਨੀਵਰਸਿਟੀ, ਐਲ ਐਮ ਟੀ, ਡੇਰਾਬਸੀ ਨੇ 3 ਪੁਰਸਕਾਰ ਜਿੱਤੇ।ਈ ਕਲਾਸ ਵਿਚ ਪੀ ਜੀ ਆਈ ਚੰਡੀਗੜ੍ਹ ਨੇ 28, ਥਾਪਰ ਯੂਨੀਵਰਸਿਟੀ ਐਲ ਐਮ ਟੀ ਡੇਰਾਬਸੀ ਨੇ 3, ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਨੇ 3, ਸਮਾਲ ਵੰਡਰ ਸਕੂਲ ਨੇ 1, ਸ਼ਿਵਾਲਿਕ ਨਰਸਰੀ, ਖੁੱਡਾ ਅਲੀਸ਼ੇਰ ਚੰਡੀਗੜ੍ਹ ਨੇ 6 ਜਦਕਿ ਰਾਣੀ ਸ਼ਰਮਾ ਸੈਕਟਰ 38 ਡੀ ਚੰਡੀਗੜ੍ਹ ਤੇ ਓਮ ਪ੍ਰਕਾਸ਼ ਮਨੌਲੀ ਨੇ ਇਕ-ਇਕ ਪੁਰਸਕਾਰ ਜਿੱਤਿਆ। ਸ਼ੌਅ ਵਾਸਤੇ ਜੱਜਾਂ ਵਜੋਂ ਭੂਮਿਕਾ ਗਿਆਨ ਚੰਦ ਸੇਵਾ ਮੁਕਤ ਐਸ. ਈ. ਪੀ ਡਬਲਿਊ ਡੀ ਬਾਗਵਾਨੀ, ਰਘੂਬੀਰ ਸਿੰਘ ਕਾਰਜਕਾਰਨੀ ਇੰਜੀਨੀਅਰ ਬਾਗਵਾਨੀ ਐਮ ਸੀ ਚੰਡਗੜ੍ਹ ਤੇ ਡਾ ਜਸਬੀਰ ਸਿੰਘ ਵਜ਼ੀਰ ਪ੍ਰੋਫੈਸਰ ਬਾਗਵਾਨੀ ਯੂਨੀਵਰਸਿਟੀ ਸੋਲਨ ਨੇ ਨਿਭਾਈ। ਇਸ ਮੌਕੇ ਅਸ਼ਵਨੀ ਸੰਭਾਲਕੀ, ਕ੍ਰਿਸ਼ਨਪਾਲ ਸ਼ਰਮਾ, ਸਤਬੀਰ ਸਿੰਘ ਤੇ ਕੰਪਨੀ ਦੇ ਹੋਰ ਅਧਿਕਾਰੀ ਮੌਜੂਦ ਸਨ।