ਪੰਜਾਬ ਦੇ ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਮੁੱਖ ਸੰਸਦੀ ਸਕੱਤਰ ਵਿਰਸਾ ਸਿੰਘ ਵਲਟੋਹਾ ਨੇ ਪਿੰਡਾਂ 'ਚ ਸੁਰੱਖਿਅਤ ਜਲ ਸਪਲਾਈ ਮੁਹੱਈਆ ਕਰਵਾਉਣ ਦੇ ਖੇਤਰ ਵਿੱਚ ਸ਼ਲਾਘਾਯੋਗ ਕੰਮ ਕਰਨ ਵਾਲੀਆਂ ਰਾਜ ਦੀਆਂ 29 ਗ੍ਰਾਮ ਪੰਚਾਇਤ ਜਲ ਸਪਲਾਈ ਤੇ ਸੈਨੀਟੇਸ਼ਨ ਕਮੇਟੀਆਂ ਨੂੰ ਨਕਦ ਇਨਾਮ ਦੇ ਕੇ ਸਨਮਾਨਤ ਕੀਤਾ।ਇਥੋਂ ਦੇ ਲਾਅ ਭਵਨ ਵਿਖੇ ਕਰਵਾਏ ਗਏ ਸੂਬਾ ਪੱਧਰੀ ਸਮਾਗਮ ਦੌਰਾਨ ਇਕੱਠ ਨੂੰ ਸੰਬੋਧਨ ਕਰਦਿਆਂ ਸ. ਵਲਟੋਹਾ ਨੇ ਕਿਹਾ ਕਿ ਜਲ ਸਪਲਾਈ ਤੇ ਸੈਨੀਟੇਸ਼ਨ ਵਿਭਾਗ, ਵਿਸ਼ਵ ਬੈਂਕ ਦੀ ਸਹਾਇਤਾ ਨਾਲ ਚਲਾਈ ਜਾ ਰਹੇ 'ਪੰਜਾਬ ਪੇਂਡੂ ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਪ੍ਰਾਜੈਕਟ' ਅਧੀਨ ਜਲ ਸਪਲਾਈ ਸਕੀਮਾਂ ਦੇ ਉਸਾਰੀ ਦੇ ਕੰਮ ਨੂੰ ਵਿਕੇਂਦ੍ਰੀਕਰਨ ਦੀ ਨੀਤੀ ਤਹਿਤ ਕਰਵਾ ਰਿਹਾ ਹੈ ਅਤੇ ਉਸਾਰੀ ਲਈ ਲੋੜੀਂਦੇ ਫ਼ੰਡ ਗ੍ਰਾਮ ਕਮੇਟੀ ਨੂੰ ਮੁਹੱਈਆ ਕਰਵਾਏ ਜਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਪ੍ਰਾਜੈਕਟ ਦੇ ਮਿੱਥੇ ਨਿਯਮਾਂ ਅਨੁਸਾਰ ਸਕੀਮ ਮੁਕੰਮਲ ਹੋਣ ਉਪਰੰਤ ਉਸ ਦੇ ਸੰਚਾਲਨ ਅਤੇ ਰੱਖ-ਰਖਾਅ ਦੇ ਕੰਮ ਦੀ ਮੁਕੰਮਲ ਜ਼ਿੰਮੇਵਾਰੀ ਗ੍ਰਾਮ ਪੰਚਾਇਤ ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਕਮੇਟੀ ਨੂੰ ਸੌਂਪੀ ਜਾਂਦੀ ਹੈ। ਸਕੀਮ ਦੇ ਸੰਚਾਲਨ ਅਤੇ ਸੰਭਾਲ 'ਤੇ ਹੋਣ ਵਾਲੇ ਖ਼ਰਚੇ ਦੀ ਭਰਪਾਈ ਗ੍ਰਾਮ ਪੰਚਾਇਤ ਕਮੇਟੀਆਂ ਵਲੋਂ ਜਲ ਸਪਲਾਈ ਮੁਹੱਈਆ ਕਰਾਉਣ ਉਪਰੰਤ ਪ੍ਰਾਪਤ ਹੋਈ ਰਕਮ ਤੋਂ ਕੀਤੀ ਜਾਂਦੀ ਹੈ।ਉਨ੍ਹਾਂ ਦੱਸਿਆ ਕਿ 31 ਜਨਵਰੀ, 2014 ਤੱਕ ਪ੍ਰਾਜੈਕਟ ਅਧੀਨ 1208 ਪਿੰਡਾਂ ਵਿਚ ਜਲ ਸਪਲਾਈ ਸਕੀਮਾਂ ਲਾਗੂ ਕੀਤੀਆਂ ਜਾ ਚੁੱਕੀਆਂ ਹਨ, ਜਿਨ੍ਹਾਂ ਵਿੱਚੋਂ 773 ਗ੍ਰਾਮ ਕਮੇਟੀਆਂ ਸੰਚਾਲਨ ਅਤੇ ਰੱਖ-ਰਖਾਅ 'ਤੇ ਹੋਣ ਵਾਲੇ ਖ਼ਰਚੇ ਦੀ ਪੂਰੀ ਰਕਮ ਸਕੀਮ ਧਾਰਕਾਂ ਤੋਂ ਪ੍ਰਾਪਤ ਕਰ ਰਹੀਆਂ ਹਨ ਅਤੇ ਇਨ੍ਹਾਂ ਸਕੀਮਾਂ ਨੂੰ ਖ਼ੁਦ ਚਲਾ ਰਹੀਆਂ ਹਨ। ਉਨ੍ਹਾਂ ਦੱਸਿਆ ਕਿ ਅਜਿਹੀਆਂ ਉਤਮ ਕੰਮ ਕਰਨ ਵਾਲੀਆਂ ਗ੍ਰਾਮ ਪੰਚਾਇਤਾਂ ਨੂੰ ਸਨਮਾਨਤ ਕਰਨ ਲਈ ਰਾਜ ਪੱਧਰੀ ਇਨਾਮ ਵੰਡ ਸਮਾਰੋਹ ਹਰ ਸਾਲ ਕੀਤਾ ਜਾਂਦਾ ਹੈ। ਰਾਜ ਪੱਧਰ ਤੋਂ ਸਭ ਤੋਂ ਵਧੀਆ ਕਾਰਗੁਜ਼ਾਰੀ ਕਰਨ ਵਾਲੀਆਂ 3 ਪੰਚਾਇਤਾਂ ਨੂੰ ਰਾਜ ਪੱਧਰੀ ਇਨਾਮ ਅਤੇ ਜ਼ਿਲ੍ਹਾ ਪੱਧਰ 'ਤੇ 2 ਤਰ੍ਹਾਂ ਦੇ ਇਨਾਮ ਪੰਚਾਇਤਾਂ ਨੂੰ ਤਕਸੀਮ ਕੀਤੇ ਜਾਂਦੇ ਹਨ। ਉਨ੍ਹਾਂ ਦੱਸਿਆ ਕਿ ਇਸ ਵਾਰ 3 ਸੂਬਾ ਪੱਧਰੀ ਇਨਾਮਾਂ ਤਹਿਤ ਜ਼ਿਲ੍ਹਾ ਫ਼ਰੀਦਕੋਟ ਦੀ ਕਰੀਰਵਾਲੀ ਗ੍ਰਾਮ ਪੰਚਾਇਤ ਜਲ ਸਪਲਾਈ ਤੇ ਸੈਨੀਟੇਸ਼ਨ ਕਮੇਟੀ ਨੂੰ 2 ਲੱਖ ਰੁਪਏ ਦਾ ਪਹਿਲਾ, ਜ਼ਿਲ੍ਹਾ ਬਠਿੰਡਾ ਦੇ ਪਿੰਡ ਪੱਕਾ ਖ਼ੁਰਦ ਦੀ ਗ੍ਰਾਮ ਕਮੇਟੀ ਨੂੰ ਡੇਢ ਲੱਖ ਰੁਪਏ ਦਾ ਦੂਜਾ ਅਤੇ ਜਲੰਧਰ ਜ਼ਿਲ੍ਹੇ ਦੇ ਪਿੰਡ ਢੰਡੋਵਾਲ ਦੀ ਗ੍ਰਾਮ ਕਮੇਟੀ ਨੂੰ 1 ਲੱਖ ਰੁਪਏ ਦਾ ਨਕਮ ਇਨਾਮ ਦਿੱਤਾ ਗਿਆ ਹੈ ਜਦ ਕਿ ਜ਼ਿਲ੍ਹਾ ਪੱਧਰੀ ਇਨਾਮਾਂ ਅਧੀਨ ਪਿੰਡ ਚਾਹਲ ਖ਼ੁਰਦ (ਐਸ.ਬੀ.ਐਸ. ਨਗਰ), ਮਜਾਰਾ (ਲੁਧਿਆਣਾ), ਮੱਲਾ (ਫ਼ਰੀਦਕੋਟ), ਕਟਲੀ (ਰੋਪੜ), ਕੁਲਾਰਾਂ (ਪਟਿਆਲਾ), ਸ਼ਬੂਦੀਨ (ਹੁਸ਼ਿਆਰਪੁਰ), ਹਰੜ ਖ਼ੁਰਦ (ਅੰਮ੍ਰਿਤਸਰ), ਮਹਿਮਾ ਸਵਾਈ (ਬਠਿੰਡਾ), ਭੱਖੜੀਆਂ (ਕਪੂਰਥਲਾ), ਦਾਊਂ ਮਾਜਰਾ (ਐਸ.ਏ.ਐਸ. ਨਗਰ), ਬੁਰਜ ਢਿੱਲਵਾਂ (ਮਾਨਸਾ), ਨੂਰਪੁਰ ਹਕੀਮਾਂ (ਮੋਗਾ), ਛਿਛੜੇਵਾਲ (ਤਰਨ ਤਾਰਨ), ਨੁੱਸੀ (ਜਲੰਧਰ) ਅਤੇ ਮੁਨਸ਼ੀਵਾਲਾ (ਸੰਗਰੂਰ) 15 ਗ੍ਰਾਮ ਕਮੇਟੀਆਂ ਨੂੰ 75,000 ਰੁਪਏ ਦਾ ਪਹਿਲਾ ਅਤੇ ਪਿੰਡ ਚੱਕ ਮਾਈ ਦਾਸ (ਐਸ.ਬੀ.ਐਸ. ਨਗਰ), ਮੜੌਲੀ (ਰੋਪੜ), ਰਾਮਪੁਰ ਕਲਾਂ (ਪਟਿਆਲਾ), ਖ਼ਾਨਪੁਰ ਥਿਆੜਾ (ਹੁਸ਼ਿਆਪੁਰ), ਕਾਹਨਪਰ (ਫ਼ਤਹਿਗੜ੍ਹ ਸਾਹਿਬ), ਦਿਆਲਪੁਰ (ਕਪੂਰਥਲਾ), ਖ਼ੂਨੀ ਮਾਜਰਾ (ਐਸ.ਏ.ਐਸ. ਨਗਰ), ਜਿਊਣ (ਮਾਨਸਾ), ਸ਼ੇਖ਼ਾ ਖ਼ੁਰਦ (ਮੋਗਾ), ਪੰਡੋਰੀ ਰਹਿਮਾਨਾਂ (ਤਰਨ ਤਾਰਨ) ਅਤੇ ਜੈਤੇਵਾਲੀ (ਜਲੰਧਰ) 11 ਗ੍ਰਾਮ ਪੰਚਾਇਤ ਜਲ ਸਪਲਾਈ ਤੇ ਸੈਨੀਟੇਸ਼ਨ ਕਮੇਟੀਆਂ ਨੂੰ 50,000 ਦਾ ਦੂਜਾ ਇਨਾਮ ਦਿੱਤਾ ਗਿਆ।ਇਕੱਠ ਨੂੰ ਸੰਬੋਧਨ ਕਰਦਿਆਂ ਸ. ਵਲਟੋਹਾ ਨੇ ਐਲਾਨ ਕੀਤਾ ਕਿ ਪੰਚਾਇਤਾਂ ਨੂੰ ਦਿੱਤੀ ਜਾਣ ਵਾਲੀ ਇਹ ਰਾਸ਼ੀ ਅਗਲੇ ਵਰ੍ਹੇ ਤੋਂ ਦੁੱਗਣੀ ਕੀਤੀ ਜਾਵੇਗੀ। ਸਕੀਮਾਂ ਨੂੰ ਸੁਚਾਰੂ ਢੰਗ ਨਾਲ ਨੇਪਰੇ ਚਾੜ੍ਹਨ ਲਈ ਅਧਿਕਾਰੀਆਂ ਅਤੇ ਪੰਚਾਇਤਾਂ ਨੂੰ ਅਪੀਲ ਕਰਦਿਆਂ ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਸ. ਪਰਕਾਸ਼ ਸਿੰਘ ਬਾਦਲ ਦੀ ਅਗਵਾਈ ਵਾਲੀ ਪੰਜਾਬ ਸਰਕਾਰ ਉਨ੍ਹਾਂ ਨੂੰ ਪੈਸੇ ਪੱਖੋਂ ਕੋਈ ਥੁੜ ਨਹੀਂ ਆਉਣ ਦੇਵੇਗੀ ਬਸ਼ਰਤੇ ਉਹ ਈਮਾਨਦਾਰੀ ਅਤੇ ਮਿਹਨਤ ਨਾਲ ਇਨ੍ਹਾਂ ਪ੍ਰਾਜੈਕਟਾਂ ਨੂੰ ਮੁਕੰਮਲ ਕਰਨ। Àਨ੍ਹਾਂ ਅਧਿਕਾਰੀਆਂ ਨੂੰ ਸੁਚੇਤ ਕੀਤੀ ਕਿ ਬੇਈਮਾਨੀ ਜਾਂ ਕੁਤਾਹੀ ਬਰਦਾਸ਼ਤ ਨਹੀਂ ਹੋਵੇਗੀ।
ਉਨ੍ਹਾਂ ਦੱਸਿਆ ਕਿ ਵਰਲਡ ਬੈਂਕ ਦਾ ਪੰਜਾਬ ਵਿਚਲਾ ਚਲੰਤ ਪ੍ਰਾਜੈਕਟ ਮੁਕੰਮਲ ਹੋਣ ਕਿਨਾਰੇ ਹੈ ਅਤੇ ਪੰਜਾਬ ਦੌਰੇ 'ਤੇ ਆਈ ਵਰਲਡ ਬੈਂਕ ਦੀ ਟੀਮ ਨੇ ਸਰਕਾਰ ਦੇ ਇਸ ਹੰਭਲੇ ਦੀ ਭਰਪੂਰ ਸ਼ਲਾਘਾ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਸਰਕਾਰ ਨੇ 2200 ਕਰੋੜ ਰੁਪਏ ਦਾ ਨਵਾਂ ਪ੍ਰਾਜੈਕਟ ਬਣਾ ਕੇ ਕੇਂਦਰ ਨੂੰ ਭੇਜਿਆ ਹੈ ਤਾਂ ਜੋ ਇਸ ਲਈ ਵਰਲਡ ਬੈਂਕ ਦੀ ਮਦਦ ਲਈ ਜਾ ਸਕੇ। ਉਨ੍ਹਾਂ ਦੱਸਿਆ ਕਿ ਨਵੇਂ ਪ੍ਰਾਜੈਕਟ ਤਹਿਤ 1000 ਪਿੰਡਾਂ 'ਚ ਸੀਵਰੇਜ ਪਾਈ ਜਾਵੇਗੀ ਅਤੇ ਪੀਣਯੋਗ ਪਾਣੀ ਮੁਹੱਈਆ ਕਰਵਾਈ ਜਾਵੇਗੀ। ਸ. ਵਲਟੋਹਾ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਪਿੰਡਾਂ ਤੱਕ ਸਾਫ਼-ਸੁਥਰਾ ਪਾਣੀ ਮੁਹੱਈਆ ਕਰਾਉਣ ਦਾ ਟੀਚਾ 97 ਫ਼ੀਸਦੀ ਪੂਰਾ ਚੁੱਕੀ ਹੈ।ਵਿੱਤ ਕਮਿਸ਼ਨਰ (ਵਿਕਾਸ) ਅਤੇ ਪ੍ਰਮੁੱਖ ਸਕੱਤਰ, ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਵਿਭਾਗ ਸ੍ਰੀ ਸੁਰੇਸ਼ ਕੁਮਾਰ ਨੇ ਦੱਸਿਆ ਕਿ ਰਾਜ ਪੱਧਰੀ ਇਨਾਮ ਵੰਡ ਸਮਾਰੋਹ ਦਾ ਮੁੱਖ ਮੰਤਵ ਗ੍ਰਾਮ ਪੰਚਾਇਤ ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਕਮੇਟੀਆਂ ਨੂੰ ਜਲ ਸਪਲਾਈ ਸਕੀਮਾਂ ਦੇ ਸੰਚਾਲਨ ਅਤੇ ਰੱਖ-ਰਖਾਅ ਨੂੰ ਸੁਚੱਜੇ ਢੰਗ ਨਾਲ ਚਲਾਉਣ ਲਈ ਪ੍ਰੇਰਤ ਕਰਨਾ ਹੈ ਤਾਂ ਜੋ ਆਪਣੀਆਂ ਸਕੀਮਾਂ ਨੂੰ ਵਿੱਤੀ ਅਤੇ ਤਕਨੀਕੀ ਤੌਰ ਤੇ ਸਵੈ-ਨਿਰਭਰ ਰੱਖ ਸਕਣ। ਉਨ੍ਹਾਂ ਦੱਸਿਆ ਕਿ ਰਾਜ ਦੀ ਕੋਈ ਵੀ ਗ੍ਰਾਮ ਪੰਚਾਇਤ ਜੋ ਜਲ ਸਪਲਾਈ ਸਕੀਮ ਦੇ ਰੱਖ-ਰਖਾਅ ਅਤੇ ਸੰਚਾਲਨ ਨੂੰ ਇੱਕ ਸਾਲ ਤੋਂ ਜ਼ਿਆਦਾ ਸਮੇਂ ਤੋਂ ਸਵੈ-ਨਿਰਭਰ ਢੰਗ ਨਾਲ ਚਲਾ ਰਹੀ ਹੈ ਰਾਜ ਪੱਧਰ ਅਤੇ ਜ਼ਿਲ੍ਹਾ ਪੱਧਰ ਤੇ ਇਨਾਮ ਪ੍ਰਾਪਤ ਕਰਨ ਲਈ ਮਕਾਬਲੇ ਵਿੱਚ ਸ਼ਾਮਲ ਹੋ ਸਕਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਨਾਮ ਵੰਡ ਸਮਾਰੋਹ ਲਈ ਜੇਤੂ ਗ੍ਰਾਮ ਕਮੇਟੀ ਦੀ ਚੋਣ ਪਾਰਦਰਸ਼ੀ ਢੰਗ ਨਾਲ ਕੀਤੀ ਜਾਂਦੀ ਹੈ। ਉਨ੍ਹਾਂ ਦੱਸਿਆ ਕਿ ਵਿਭਾਗ ਦੁਆਰਾ ਪਿਛਲੇ 5 ਸਾਲਾਂ ਦੌਰਾਨ 6204 ਪਿੰਡਾਂ ਅਤੇ 1555 ਛੋਟੀਆਂ ਅਬਾਦੀਆਂ ਵਿੱਚ ਜਲ ਸਪਲਾਈ ਸਕੀਮਾਂ ਮੁਹੱਈਆ ਕਰਵਾਈਆਂ ਗਈਆਂ। ਹੁਣ 165 ਪਿੰਡਾਂ ਅਤੇ 372 ਛੋਟੀਆਂ ਅਬਾਦੀਆਂ ਵਿੱਚ ਜਲ ਸਪਲਾਈ ਸਕੀਮਾਂ ਲਾਗੂ ਕਰਨੀਆਂ ਰਹਿੰਦੀਆਂ ਹਨ, ਜੋ 30 ਜੂਨ 2014 ਤੱਕ ਪੂਰੀਆਂ ਕਰ ਦਿੱਤੀਆਂ ਜਾਣ ਗਈਆਂ। ਉਨ੍ਹਾਂ ਇਨਾਮ ਜਿੱਤਣ ਵਾਲੀਆਂ ਗ੍ਰਾਮ ਕਮੇਟੀਆਂ ਨੂੰ ਵਧਾਈ ਦਿੰਦਿਆਂ ਬਾਕੀ ਕਮੇਟੀਆਂ ਨੂੰ ਵੀ ਜੇਤੂ ਕਮੇਟੀਆਂ ਦੇ ਕਦਮਾਂ 'ਤੇ ਚਲਣ ਲਈ ਪ੍ਰੇਰਤ ਕੀਤਾ।ਸਮਾਗਮ ਨੂੰ ਸ੍ਰੀ ਏ.ਕੇ. ਸੋਨੀ ਮੁੱਖ ਇੰਜੀਨੀਅਰ ਤੇ ਪ੍ਰੋਗਰਾਮ ਡਾਇਰੈਕਟਰ, ਸ੍ਰੀ ਐਨ.ਕੇ. ਧੀਰ ਨਿਗਰਾਨ ਇੰਜੀਨੀਅਰ ਤੇ ਸੀਨੀਅਰ ਪ੍ਰੋਗਰਾਮ ਸਪੈਸਲਿਸ਼ਟ ਆਦਿ ਨੇ ਵੀ ਸੰਬੋਧਨ ਕੀਤਾ…। ਇਸ ਮੌਕੇ ਸ੍ਰੀ ਐਸ.ਆਰ. ਅਗਰਵਾਲ ਮੁੱਖ ਤਕਨੀਕੀ ਕੋਆਰਡੀਨੇਟਰ ਐਸ.ਪੀ.ਐਮ.ਸੀ., ਸ੍ਰੀ ਸੁਧੀਰ ਭਾਟੀਆ ਮੁੱਖ ਇੰਜੀਨੀਅਰ (ਉਤਰੀ), ਸ੍ਰੀ ਡੀ.ਐਸ. ਚੀਮਾ ਮੁੱਖ ਇੰਜੀਨੀਅਰ ਆਦਿ ਹਾਜ਼ਰ ਸਨ।