ਪ੍ਰਗਤੀਸ਼ੀਲ ਪੰਜਾਬ ਖੇਤੀਬਾੜੀ ਸੰਮੇਲਨ-2014 ਦੇ ਆਖਰੀ ਦਿਨ ਅੱਜ ਪੰਜਾਬ ਸਰਕਾਰ ਨੇ ਵਿਦਾਇਗੀ ਸਮਾਰੋਹ ਦੌਰਾਨ ਸੂਬੇ ਵਿੱਚ ਖੇਤੀ ਤੇ ਸਨਅਤ ਨੂੰ ਵੱਡਾ ਹੁਲਾਰਾ ਦੇਣ ਲਈ ਖੇਤੀਬਾੜੀ ਦੇ ਵੱਖ-ਵੱਖ ਖੇਤਰਾਂ, ਫੂਡ ਪ੍ਰੋਸੈਸਿੰਗ ਤੇ ਖੇਤੀ ਰਹਿੰਦ-ਖੂੰਹਦ ਤੋਂ ਬਿਜਲੀ ਬਣਾਉਣ ਦੇ ਖੇਤਰ ਦੀਆਂ ਵੱਖ-ਵੱਖ ਕੰਪਨੀਆਂ ਨਾਲ 2600 ਕਰੋੜ ਰੁਪਏ ਦੇ ਇਕਰਾਰਨਾਮੇ ਕੀਤੇ। ਇਹ ਜ਼ਿਕਰਯੋਗ ਹੈ ਕਿ ਪੰਜਾਬ ਸਰਕਾਰ ਨੇ ਇਸ ਤੋਂ ਪਹਿਲਾਂ ਪਿਛਲੇ ਸਾਲ ਦਸੰਬਰ ਕਰਵਾਏ ਗਏ ਪ੍ਰਗਤੀਸ਼ੀਲ ਪੰਜਾਬ ਨਿਵੇਸ਼ਕ ਸੰਮੇਲਨ ਦੌਰਾਨ ਹੋਏ 6500 ਕਰੋੜ ਰੁਪਏ ਦੇ ਹੋਏ 128 ਇਕਰਾਰਨਾਮਿਆਂ ਵਿੱਚੋਂ 12000 ਕਰੋੜ ਰੁਪਏ ਦੇ 62 ਇਕਰਾਰਨਾਮੇ ਖੇਤੀ ਤੇ ਫੂਡ ਪ੍ਰੋਸੈਸਿੰਗ ਖੇਤਰਾਂ ਨਾਲ ਸਬੰਧਤ ਸਨ। ਅੱਜ ਹੋਏ 10 ਨਵੇਂ ਇਕਰਾਰਨਾਮਿਆਂ ਨਾਲ ਖੇਤੀ ਤੇ ਇਸ ਨਾਲ ਸਬੰਧਤ ਖੇਤਰਾਂ ਵਿੱਚ ਹੋਣ ਵਾਲਾ ਕੁਲ ਨਿਵੇਸ਼ 14600 ਕਰੋੜ ਰੁਪਏ 'ਤੇ ਪਹੁੰਚ ਗਿਆ ਹੈ।Îਮੁੱਖ ਮੰਤਰੀ ਦਫਤਰ ਦੇ ਇਕ ਬੁਲਾਰੇ ਨੇ ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਅੱਜ ਹੋਏ ਇਕਰਾਰਨਾਮਿਆਂ 'ਤੇ ਪੰਜਾਬ ਸਰਕਾਰ ਵੱਲੋਂ ਵਿੱਤ ਕਮਿਸ਼ਨਰ ਵਿਕਾਸ ਸ੍ਰੀ ਸੁਰੇਸ਼ ਕੁਮਾਰ ਨੇ ਮੁੱਖ ਮੰਤਰੀ ਸ. ਪਰਕਾਸ਼ ਸਿੰਘ ਬਾਦਲ ਤੇ ਕਈ ਹੋਰ ਪਤਵੰਤਿਆਂ ਦੀ ਹਾਜ਼ਰੀ ਦਸਖ਼ਤ ਕੀਤੇ। ਬੁਲਾਰੇ ਨੇ ਅੱਗੇ ਦੱਸਿਆ ਕਿ ਸੂਬੇ ਵਿੱਚ ਆਲੂ ਮੁਹਾਰਤ ਕੇਂਦਰ ਸਥਾਪਤ ਕਰਨ ਲਈ ਨੀਦਰਲੈਂਡ ਸਰਕਾਰ, ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਅਤੇ ਕਨਫੈਡਰੇਸ਼ਨ ਆਫ਼ ਪੋਟੋਟੋ ਸੀਡਜ਼ ਫਾਰਮਰਜ਼ ਵਿਚਕਾਰ ਤਿੰਨ ਧਿਰੀ ਇਕਰਾਰਨਾਮਾ ਹੋਇਆ। ਇਸੇ ਤਰ੍ਹਾਂ 125 ਕਰੋੜ ਰੁਪਏ ਦੀ ਲਾਗਤ ਨਾਲ 20 ਮੈਗਾਵਾਟ ਦਾ ਬਾਇਓਮਾਸ ਪਾਵਰ ਪਲਾਂਟ ਲਾਉਣ ਲਈ ਮੈਸ. ਪੀ.ਐਡ ਆਰ ਐਗਰੀ ਐਨਰਜੀ ਪ੍ਰਾਈਵੇਟ ਲਿਮਟਡ ਅਤੇ ਪੰਜਾਬ ਸਰਕਾਰ ਦਰਮਿਆਨ ਇਕਰਾਰਨਾਮਾ ਹੋਇਆ। ਇਕ ਹੋਰ ਇਕਰਾਰਨਾਮਾ ਮੈਸ. ਨੈਕਸਟਜੈੱਨ ਸੋਲੱਸ ਪਾਵਰ ਪ੍ਰਾਈਵੇਟ ਲਿਮਟਡ ਅਤੇ ਪੰਜਾਬ ਸਰਕਾਰ ਦਰਮਿਆਨ ਹੋਇਆ ਜਿਸ ਤਹਿਤ 800 ਕਰੋੜ ਰੁਪਏ ਦੀ ਲਾਗਤ ਨਾਲ ਫਰੀਦਕੋਟ ਤੇ ਅਬੋਹਰ ਵਿਖੇ 100 ਮੈਗਾਵਾਟ ਦੇ ਪਲਾਂਟ ਲਾਏ ਜਾਣਗੇ। ਇਸੇ ਤਰ੍ਹਾਂ ਹੀ 400 ਕਰੋੜ ਰੁਪਏ ਦੀ ਲਾਗਤ ਨਾਲ ਝੋਨੇ ਦੀ ਪਰਾਲੀ ਤੋਂ ਬਿਜਲੀ ਬਣਾਉਣ ਵਾਲਾ 30 ਮੈਗਾਵਾਟ ਸਮਰਥਾ ਵਾਲਾ ਪਾਵਰ ਪਲਾਂਟ ਸਥਾਪਤ ਕਰਨ ਲਈ ਪੰਜਾਬ ਸਰਕਾਰ ਨੇ ਮੈਸ. ਸੰਪੂਰਨ ਐਗਰੀ ਵੈਨਚਰਜ਼ ਪ੍ਰਾਈਵੇਟ ਲਿਮਟਡ ਨਾਲ ਇਕਰਾਰਨਾਮਾ ਕੀਤਾ। ਝੋਨੇ ਦੀ ਪਰਾਲੀ ਅਤੇ ਖੇਤੀ ਦੀ ਹੋਰ ਰਹਿੰਦ-ਖੂੰਹਦ ਤੋਂ ਪੈਟਰੋਲ ਵਿੱਚ ਮਿਲਾਇਆ ਜਾਣ ਵਾਲਾ ਐਥਾਨੋਲ ਬਣਾਉਣ ਲਈ 900 ਕਰੋੜ ਰੁਪਏ ਦੀ ਲਾਗਤ ਨਾਲ ਵੱਖ ਵੱਖ ਥਾਵਾਂ 'ਤੇ 9 ਪ੍ਰਾਜੈਕਟ ਸਥਾਪਤ ਕਰਨ ਲਈ ਪੰਜਾਬ ਸਰਕਾਰ ਤੇ ਮੈਸ. ਬਾਇਓ ਈਕੋ ਐਨਰਜੀ ਪ੍ਰਾਈਵੇਟ ਲਿਮਟਡ ਨਾਲ ਵੀ ਇਕਰਾਰਨਾਮਾ ਹੋਇਆ।
ਪੰਜਾਬ ਸਰਕਾਰ ਵੱਲੋਂ ਐਮ.ਡੀ. ਗਰੁੱਪ ਨਾਲ ਅੱਜ ਹੋਏ ਇਕਰਾਰਨਾਮੇ ਤਹਿਤ ਕਣਕ ਦੇ ਨਾੜ ਤੇ ਝੋਨੇ ਦੀ ਪਰਾਲੀ ਦੇ ਸੁਰੱਖਿਅਤ ਅਤੇ ਆਰਥਿਕ ਤੌਰ 'ਤੇ ਪਾਏਦਾਰ ਨਿਪਟਾਰੇ ਲਈ ਨਵੇਂ ਢੰਗ-ਤਰੀਕੇ ਲੱਭੇ ਜਾਣਗੇ। ਮੈਸ. ਬੈਕਟਰ ਫੂਡ ਸਪੈਸ਼ਲਿਟੀਜ਼ ਲਿਮਟਡ ਨਾਲ ਹੋਏ ਇਕ ਹੋਰ ਸਮਝੌਤੇ ਤਹਿਤ 100 ਕਰੋੜ ਰੁਪਏ ਦੀ ਪੂੰਜੀਕਾਰੀ ਨਾਲ ਫੂਡ ਪ੍ਰੋਸੈਸਿੰਗ ਦੇ ਖੇਤਰ ਵਿੱਚ ਨਵੇਂ ਪ੍ਰਾਜੈਕਟ ਲੱਗਣਗੇ।ਇਸੇ ਦੌਰਾਨ ਕੇ.ਟੀ.ਸੀ. ਫੂਡਜ਼ ਪ੍ਰਾਈਵੇਟ ਲਿਮਟਡ, ਨਿਊ ਹਰਿਆਣਾ ਓਵਰਸੀਜ਼, ਨਵਜੋਤੀ ਐਗਰੋ ਫੂਡ ਪ੍ਰਾਈਵੇਟ ਲਿਮਟਡ ਅਤੇ ਪੰਜਾਬ ਸਰਕਾਰ ਦਰਮਿਆਨ 20-20 ਕਰੋੜ ਰੁਪਏ ਦੇ ਹੋਏ ਤਿੰਨ ਵੱਖਰੋ-ਵੱਖਰੇ ਇਕਰਾਰਨਾਮਿਆਂ ਤਹਿਤ ਰਾਈਸ ਮਿਲਿੰਗ ਲਈ ਕ੍ਰਮਵਾਰ 12 ਟਨ ਪ੍ਰਤੀ ਘੰਟਾ, 8-10 ਪ੍ਰਤੀ ਘੰਟਾ ਅਤੇ 12 ਟਨ ਪ੍ਰਤੀ ਘੰਟਾ ਦੀ ਸਮਰਥਾ ਵਾਲੇ ਪਲਾਂਟ ਲਾਏ ਜਾਣਗੇ।ਇਸ ਮੌਕੇ ਕੈਬਨਿਟ ਮੰਤਰੀ ਸ. ਗੁਲਜ਼ਾਰ ਸਿੰਘ ਰਣੀਕੇ, ਸ. ਸੁਰਜੀਤ ਸਿੰਘ ਰੱਖੜਾ, ਮੁੱਖ ਸੰਸਦੀ ਸਕੱਤਰ ਸ. ਗੁਰਬਚਨ ਸਿੰਘ ਬੱਬੇਹਾਲੀ, ਮੁੱਖ ਮੰਤਰੀ ਦੇ ਪ੍ਰਮੁੱਖ ਸਕੱਤਰ ਸ੍ਰੀ ਐਸ.ਕੇ. ਸੰਧੂ ਤੇ ਵਿਸ਼ੇਸ਼ ਪ੍ਰਮੁੱਖ ਸਕੱਤਰ ਸ੍ਰੀ ਗਗਨਦੀਪ ਸਿੰਘ ਬਰਾੜ, ਕੈਨੇਡਾ ਦੇ ਹਾਈ ਕਮਿਸ਼ਨਰ ਸ੍ਰੀ ਸਟੀਵਾਰਟ ਬੈੱਕ ਅਤੇ ਪੰਜਾਬ ਦੇ ਖੇਤੀਬਾੜੀ ਸਕੱਤਰ ਸ੍ਰੀ ਕਾਹਨ ਸਿੰਘ ਪੰਨੂੰ ਵੀ ਹਾਜ਼ਰ ਸਨ।ਸਮਾਰੋਹ ਵਿੱਚ ਆਈ.ਟੀ.ਸੀ. ਕੰਪਨੀ ਦੇ ਡਾਇਰੈਕਟਰ ਸ੍ਰੀ ਕੁਰਸ਼ ਗਰਾਂਟ, ਭਾਰਤੀ ਐਗਰੋ ਦੇ ਸੀ.ਐਮ.ਡੀ. ਸ੍ਰੀ ਰਾਕੇਸ਼ ਭਾਰਤੀ ਮਿੱਤਲ, ਵਰਧਮਾਨ ਗਰੁੱਪ ਦੇ ਉਪ ਪ੍ਰਧਾਨ ਸ੍ਰੀ ਕਮਲ ਓਸਵਾਲ, ਟਰਾਈਡੈਂਟ ਗਰੁੱਪ ਦੇ ਸੀ.ਐਮ.ਡੀ. ਸ੍ਰੀ ਰਾਜਿੰਦਰ ਗੁਪਤਾ ਅਤੇ ਕੇ.ਪੀ.ਐਮ.ਜੀ. ਦੇ ਸੀ.ਈ.ਓ. ਸ੍ਰੀ ਰਿਚਰਡ ਰੇਖੀ ਵੀ ਸ਼ਾਮਲ ਸਨ।