ਪੰਜਾਬ ਕੇਂਦਰੀ ਯੂਨੀਵਰਸਿਟੀ, ਬਠਿੰਡਾ (ਸੀਯੂਪੀਬੀ) ਦੇ ਵਾਤਾਵਰਣ ਅਤੇ ਧਰਤ-ਵਿਗਿਆਨ ਸਕੂਲ ਨੇ ਜੀਓਸਪੇਸ਼ੀਅਲ ਤਕਨਾਲੋਜੀ ਦੀ ਵਰਤੋਂ ਰਾਹੀਂ ਖੋਜ ਅਤੇ ਅਕਾਦਮਿਕ ਸਹਿਯੋਗ ਨੂੰ ਉਤਸ਼ਾਹਤ ਕਰਨ ਲਈ ਪੰਜਾਬ ਰਿਮੋਟ ਸੈਂਸਿੰਗ ਸੈਂਟਰ (ਪੀਆਰਐਸਸੀ), ਲੁਧਿਆਣਾ ਨਾਲ ਇੱਕ ਮੈਮੋਰੰਡਮ ਆਫ਼ ਅਕਾਦਮਿਕ ਸਪੋਰਟ (ਐਮਓਏਐਸ) ਤੇ ਦਸਤਖਤ ਕੀਤੇ।ਸਮਾਗਮ ਦੌਰਾਨ ਡਾ. ਬ੍ਰਿਜੇਂਦਰ ਪਟੇਰੀਆ, ਡਾਇਰੈਕਟਰ ਪੀਆਰਐਸਸੀ, ਲੁਧਿਆਣਾ ਨੇ ਵਾਈਸ ਚਾਂਸਲਰ ਪ੍ਰੋ. ਰਾਘਵੇਂਦਰ ਪ੍ਰਸਾਦ ਤਿਵਾੜੀ ਦੀ ਮਾਣਮੱਤੀ ਹਾਜ਼ਰੀ ਵਿੱਚ ਪੰਜਾਬ ਕੇਂਦਰੀ ਯੂਨੀਵਰਸਿਟੀ ਨਾਲ ਸਮਝੌਤਾ ਪੱਤਰ ਤੇ ਹਸਤਾਖਰ ਕੀਤੇ।ਪ੍ਰੋਗਰਾਮ ਦੀ ਸ਼ੁਰੂਆਤ ਵਿੱਚ ਡਾ. ਸੁਨੀਲ ਮਿੱਤਲ, ਡੀਨ, ਵਾਤਾਵਰਣ ਅਤੇ ਧਰਤ-ਵਿਗਿਆਨ ਸਕੂਲ, ਸੀਯੂਪੀਬੀ ਨੇ ਸਵਾਗਤੀ ਭਾਸ਼ਣ ਦੌਰਾਨ ਸਮਝੌਤਾ ਪੱਤਰ ਦੇ ਉਦੇਸ਼ਾਂ ਨੂੰ ਸਾਂਝਾ ਕੀਤਾ। ਉਨ੍ਹਾਂ ਨੇ ਦੱਸਿਆ ਕਿ ਇਸ ਸਮਝੌਤੇ ਤਹਿਤ ਦੋਵੇਂ ਸੰਸਥਾਵਾਂ ਜੀਓਨਫਾਰਮੈਟਿਕਸ ਵਿੱਚ ਇੱਕ ਸਾਲ ਦਾ ਪੋਸਟ ਗ੍ਰੈਜੂਏਟ ਡਿਪਲੋਮਾ ਸ਼ੁਰੂ ਕਰਨਗੀਆਂ। ਇਸ ਪ੍ਰੋਗਰਾਮ ਵਿੱਚ ਵਿਦਿਆਰਥੀ ਪਹਿਲੇ ਸਮੈਸਟਰ ਦੀ ਪੜ੍ਹਾਈ ਸੀਯੂਪੀਬੀ ਵਿੱਚ ਕਰਨਗੇ ਅਤੇ ਦੂਸਰੇ ਸਮੈਸਟਰ ਦੀ ਪੜ੍ਹਾਈ ਪੀਆਰਐਸਸੀ ਵਿੱਚ ਕਰਨਗੇ। ਡਾ. ਬ੍ਰਿਜੇਂਦਰ ਪਟੇਰੀਆ, ਡਾਇਰੈਕਟਰ, ਪੀਆਰਐਸਸੀ, ਲੁਧਿਆਣਾ ਨੇ ਸੀਯੂਪੀਬੀ ਨਾਲ ਇਸ ਸਮਝੌਤੇ ਤੇ ਦਸਤਖਤ ਕਰਨ ਤੋਂ ਬਾਅਦ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਇਹ ਸਮਝੌਤਾ ਦੋਵਾਂ ਸੰਸਥਾਵਾਂ ਦੇ ਵਿਗਿਆਨੀਆਂ ਨੂੰ ਸਾਂਝੇ ਖੋਜ ਪ੍ਰੋਜੈਕਟਾਂ ਤੇ ਕੰਮ ਕਰਨ, ਖੋਜ ਸਮੱਗਰੀ ਦਾ ਆਦਾਨ-ਪ੍ਰਦਾਨ ਕਰਨ, ਅੰਤਰਰਾਸ਼ਟਰੀ ਵਿਗਿਆਨਕ ਰਸਾਲਿਆਂ ਵਿੱਚ ਖੋਜ ਪੱਤਰ ਲਿਖਣ, ਕਿਤਾਬਾਂ ਪ੍ਰਕਾਸ਼ਤ ਕਰਨ ਅਤੇ ਮਿਲ ਕੇ ਆਈਪੀਆਰ ਬਣਾਉਣ ਵਿੱਚ ਸਹਾਇਤਾ ਕਰੇਗਾ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਇਹ ਪੋਸਟ ਗ੍ਰੈਜੂਏਟ ਡਿਪਲੋਮਾ ਇਸ ਖੇਤਰ ਵਿੱਚ ਆਪਣੀ ਤਰ੍ਹਾਂ ਦਾ ਪਹਿਲਾ ਡਿਪਲੋਮਾ ਹੋਵੇਗਾ।ਆਪਣੇ ਪ੍ਰਧਾਨਗੀ ਭਾਸ਼ਣ ਵਿੱਚ ਪੰਜਾਬ ਕੇਂਦਰੀ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਪ੍ਰੋ. ਰਾਘਵੇਂਦਰ ਪ੍ਰਸਾਦ ਤਿਵਾੜੀ ਨੇ ਕਿਹਾ ਕਿ ਇਹ ਐਮਓਐਸ ਪੰਜਾਬ ਅਤੇ ਦੇਸ਼ ਦੇ ਲੋਕਾਂ ਲਈ ਲਾਭਕਾਰੀ ਹੋਵੇਗਾ ਕਿਉਂਕਿ ਕੁਦਰਤੀ ਸਰੋਤਾਂ ਦੀ ਢੁੱਕਵੀਂ ਵਰਤੋਂ ਦੁਆਰਾ ਜਿਓਸਪੇਸ਼ੀਅਲ ਤਕਨੀਕਾਂ ਪੰਜਾਬ ਦੇ ਵਾਤਾਵਰਣਕ ਮਸਲਿਆਂ ਦੇ ਹੱਲ ਲੱਭਣ ਅਤੇ ਦੇਸ਼ ਦੇ ਵਾਤਾਵਰਣ ਦੀ ਰਾਖੀ ਲਈ ਅਹਿਮ ਰੋਲ ਅਦਾ ਕਰ ਸਕਦੀਆਂ ਹਨ। ਉਹਨਾਂ ਨੇ ਦੱਸਿਆ ਕਿ ਇਹ ਸਮਝੌਤਾ ਹੁਨਰ-ਅਧਾਰਤ ਸਿੱਖਿਆ ਤੇ ਜੋਰ ਦੇਣ ਵਾਲੀ ਨਵੀਂ ਸਿੱਖਿਆ ਨੀਤੀ 2020 ਦੇ ਅਨੁਰੂਪ ਹੈ ਜਿਸ ਅਧੀਨ ਦੋਵੇਂ ਸੰਸਥਾਵਾਂ ਦੁਆਰਾ ਆਪਣੇ ਸ੍ਰੋਤਾਂ ਦੀ ਸਾਂਝੀ ਵਰਤੋਂ ਕਰਦਿਆਂ ਦੋਹਰੀ ਡਿਗਰੀ ਪ੍ਰੋਗਰਾਮ ਅਧੀਨ ਇਹ ਡਿਪਲੋਮਾ ਪ੍ਰਦਾਨ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਇਹ ਸਮਝੌਤਾ ਉੱਭਰ ਰਹੀਆਂ ਵਿਗਿਆਨਕ ਤਕਨੀਕਾਂ ਦੀ ਸਹਾਇਤਾ ਨਾਲ ਨਵੇਂ ਗਿਆਨ ਦੀ ਸਿਰਜਣਾ ਲਈ ਇਕ ਮਹੱਤਵਪੂਰਣ ਉਪਰਾਲਾ ਹੈ।ਪ੍ਰੋਗਰਾਮ ਦੇ ਅੰਤ ਤੇ ਡਾ. ਪੁਨੀਤਾ ਪਾਂਡੇ ਨੇ ਧੰਨਵਾਦ ਦਾ ਮਤਾ ਪੇਸ਼ ਕੀਤਾ। ਇਸ ਮੌਕੇ ਪੀਆਰਐਸਸੀ ਦੀ ਟੀਮ ਤੋਂ ਡਾ. ਰਾਜ ਸੇਤੀਆ, ਡਾ. ਅਜੈ ਮਾਥੁਰ ਅਤੇ ਸ੍ਰੀ. ਐਸ.ਕੇ. ਸਾਹੂ ਮੌਜੂਦ ਸਨ। ਪ੍ਰੋ. ਵਿਨੋਦ ਕੇ. ਗਰਗ, ਡੀਨ ਵਿਦਿਆਰਥੀ ਭਲਾਈ, ਪ੍ਰੋ. ਆਰ. ਕੇ. ਵੁਸੀਰਿਕਾ, ਡੀਨ ਇੰਚਾਰਜ ਅਕਾਦਮਿਕਸ, ਡਾ. ਜੇ.ਕੇ. ਪਟਨਾਇਕ, ਮੁਖੀ, ਜੀਓਲੋਜੀ ਵਿਭਾਗ, ਡਾ. ਐਲ.ਟੀ. ਸਸਾਂਗ ਗੁਈਟ, ਮੁਖੀ, ਭੂਗੋਲ ਵਿਭਾਗ, ਡਾ. ਧਾਨਿਆ ਐਮ.ਐਸ. ਅਤੇ ਡਾ. ਪੀ.ਕੇ. ਸਾਹੂ ਸੀਯੂਪੀਬੀ ਦੀ ਟੀਮ ਤੋਂ ਪ੍ਰੋਗਰਾਮ ਵਿੱਚ ਸ਼ਾਮਲ ਹੋਏ।