Web Admin

5 ਦਰਿਆ ਨਿਊਜ਼

ਐਸ.ਏ.ਐਸ.ਨਗਰ , 07 Feb 2014

Last updated on: Feb 07, 2014, 00:00 IST

ਮੋਹਾਲੀ ਪੁਲਿਸ ਨੇ ਖੋਹ ਕਰਨ ਵਾਲੇ ਦੋਸ਼ੀ ਨੂੰ ਕੁਝ ਹੀ ਸਮੇਂ ਬਾਅਦ ਗ੍ਰਿਫਤਾਰ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ ਅਤੇ ਦੋਸ਼ੀ ਪਾਸੋਂ ਖੋਹ ਕੀਤਾ ਸਮਾਨ ਸਮੇਤ ਨਕਦੀ ਵੀ ਬਰਾਮਦ ਕੀਤੀ। ਇਸ ਸਬੰਧੀ ਜਾਣਕਾਰੀ ਦਿੰਦਿਆ ਜ਼ਿਲ੍ਹਾ ਪੁਲਿਸ ਮੁੱਖੀ ਇੰਦਰ ਮੋਹਨ ਸਿੰਘ ਭੱਟੀ ਨੇ ਦੱਸਿਆ ਹੈ ਕਿ ਥਾਣਾ ਫੇਸ-1 ਮੋਹਾਲੀ ਵਿਖੇ ਪ੍ਰਵੀਨ ਕੁਮਰ ਪੁੱਤਰ ਰਮੇਸ਼ਵ ਕੌਸ਼ਲ ਵਾਸੀ ਮਕਾਨ ਨੰਬਰ 781 ਫਸਟ ਫਲੋਅਰ ਫੇਸ-4 ਮੋਹਾਲੀ ਦੇ ਬਿਆਨ ਤੇ ਮੁਕੱਦਮਾ ਨੰਬਰ 20 ਮਿਤੀ 07.02.14 ਅ/ਧ 382,34 ਹਿੰ:ਦੰ: ਦਰਜ ਰਜਿਸਟਰ ਕੀਤਾ ਗਿਆ ਸੀ ਅਤੇ ਪ੍ਰਵੀਨ ਕੁਮਾਰ ਨੇ ਪੁਲਿਸ ਨੂੰ ਇਤਲਾਹ ਦਿੱਤੀ ਸੀ ਕਿ ਉਹ ਅੱਜ ਸਵੇਰੇ  ਕਰੀਬ 5.00 ਵਜੇ ਜੰਮੂ ਤੋਂ ਮੋਹਾਲੀ ਵਿਖੇ ਆਇਆ ਸੀ, ਜਦੋਂ ਉਹ ਫੇਸ 3/5 ਮੋਹਾਲੀ ਦੀਆਂ ਲਾਈਟਾਂ ਵਾਲੇ ਚੌਕ ਕੋਲ ਪੁੱਜਾ ਤਾ ਦੋ ਨਾ ਮਾਲੂਮ ਲੜਕਿਆਂ ਨੇ ਤਲਵਾਰ ਅਤੇ ਕੁਹਾੜੀ ਨਾਲ ਡਰਾਅ ਧਮਕਾ ਕੇ ਉਸ  ਦਾ ਬੈਗ, ਪਰਸ, ਏਟੀਐਮ ਕਾਰਡ ਅਤੇ ਡਾਇਰੀ ਆਦਿ ਖੋਹ ਕੇ ਫਰਾਰ ਹੋ ਗਏ ਸਨ।  ਉਨ੍ਹਾਂ ਦੱਸਿਆ ਕਿ ਇਹ ਖੋਹ ਦੀ ਵਾਰਦਾਤ ਹੋਣ ਤੋਂ ਬਾਅਦ ਤੁਰੰਤ ਸ਼ਹਿਰ ਵਿੱਚ ਤਾਇਨਾਤ ਪੀ.ਸੀ.ਆਰ. ਪਾਰਟੀਆਂ ਨੂੰ ਅਲਰਟ ਕੀਤਾ ਗਿਆ। ਪੀ.ਸੀ.ਆਰ. ਪੁਲਿਸ ਵਲੋਂ ਕਾਰਵਾਈ ਕਰਦਿਆਂ ਨਾਈਟ ਡਿਊਟੀਆਂ ਦੀ ਚੈਕਿੰਗ ਕਰਨ ਵਾਲੇ ਅਫਸਰ ਇੰਸਪੈਕਟਰ ਸੁਖਜੀਤ ਸਿੰਘ ਸਮੇਤ ਸਿਪਾਹੀ ਅਮੋਲਕ ਸਿੰਘ ਨੇ ਉਕੱਤ ਵਾਰਦਾਤ ਦੇ ਦੋਸ਼ੀਆਂ ਵਿਚੋਂ ਦੋਸ਼ੀ ਸਾਹਿਲ ਪੁੱਤਰ ਮੁਲਾਂਜੀ ਉਮਰ ਕਰੀਬ 17 ਸਾਲ ਵਾਸੀ ਕਿਰਾਏਦਾਰ ਪਿੰਡ ਮਦਨਪੁਰ ਨੂੰ ਖੋਹ ਕੀਤੇ ਸਮਾਨ ਸਮੇਤ ਗ੍ਰਿਫਤਾਰ ਕਰਾਉਣ ਵਿੱਚ ਬਹੁਤ ਅਹਿਮ ਯੋਗਦਾਨ ਪਾਇਆ।  ਗ੍ਰਿਫਤਾਰ ਕੀਤੇ ਗਏ ਦੋਸ਼ੀ ਪਾਸੋਂ ਖੋਹ ਕੀਤਾ ਸਾਰਾ ਸਮਾਨ ਬ੍ਰਾਮਦ ਹੋ ਚੁੱਕਾ ਹੈ। ਦੋਸ਼ੀ ਦੀ ਮੁੱਢਲੀ ਪੁੱਛਗਿੱਛ ਦੌਰਾਨ ਪਾਇਆ ਗਿਆ ਕਿ ਦੋਸ਼ੀ ਪਿੰਡ ਮਟੌਰ ਵਿਖੇ ਵੈਦਵਾਨ ਕੈਟਰਿੰਗ ਵਾਲਿਆਂ ਕੋਲ ਮਜਦੂਰੀ ਦਾ ਕੰਮ ਕਰਦਾ ਹੈ। ਇਸ ਵਾਰਦਾਤ ਵਿੱਚ ਇਸ ਦੋਸ਼ੀ ਦਾ ਇੱਕ ਸਾਥੀ ਦੋਸ਼ੀ ਅਜੇ ਫਰਾਰ ਹੈ, ਜਿਸ ਦੀ ਭਾਲ ਕੀਤੀ ਜਾ ਰਹੀ ਹੈ। ਮੁਕੱਦਮੇ ਦੀ ਤਫਤੀਸ਼ ਜਾਰੀ ਹੈ।