ਬੀਤੇ ਦਿਨੀ ਥਾਣਾ ਘੁਮਾਣ ਦੇ ਅਧੀਨ ਆਉਂਦੇ ਪਿੰਡ ਭਗਤੂਪੁਰ ਦੀ ਇੱਕ ਔਰਤ ਨਾਲ ਬਦਲਸਲੂਕੀ ਕਰਨ ਦਾ ਮਾਮਲੇ ਦਾ ਐੱਸ.ਸੀ. ਕਮਿਸ਼ਨ ਪੰਜਾਬ ਨੇ ਗੰਭੀਰ ਨੋਟਿਸ ਲਿਆ ਹੈ। ਪਿੰਡ ਭਗਤੂਪੁਰ ਦੀ ਇੱਕ ਦਲਿਤ ਔਰਤ ਦਾ ਐਸਐਚਓ ਪੁਲੀਸ ਥਾਣਾ ਘੁਮਾਣ ਉੱਪਰ ਇਹ ਇਲਜ਼ਾਮ ਸੀ ਕਿ ਐੱਸ.ਐੱਚ.ਓ. ਨੇ ਉਸਨੂੰ ਅੱਧ ਨੰਗਿਆ ਹਾਲਤ ’ਚ ਬਾਥਰੂਮ ਚੋਂ ਘਸੀਟ ਕੇ ਬਾਹਰ ਕੱਢਿਆ ਸੀ।ਇਸ ਸਾਰੇ ਮਾਮਲੇ ਦਾ ਗੰਭੀਰ ਨੋਟਿਸ ਲੈਂਦਿਆਂ ਅੱੱਜ ਪੰਜਾਬ ਰਾਜ ਐਸਸੀ ਕਮਿਸ਼ਨ ਦੇ ਮੈਂਬਰ ਸ਼੍ਰੀ ਗਿਆਨ ਚੰਦ, ਡਾ. ਤਰਸੇਮ ਸਿੰਘ ਸਿਆਲਕਾ ਅਤੇ ਸ਼੍ਰੀ ਪ੍ਰਭ ਦਿਆਲ ਅਧਾਰਿਤ 3 ਮੈਂਬਰੀ ‘ਟੀਮ’ ਨੇ ਅੱਜ ਪਿੰਡ ਭਗਤੂਪੁਰ ਵਿਖੇ ਪੁੱਜੀ। ਮੌਕੇ ਤੇ ਮੌਜੂਦ ਐੱਸਐੱਸਐੱਸ ਬੋਰਡ ਦੇ ਮੈਂਬਰ ਸ੍ਰ ਭੁਪਿੰਦਰਪਾਲ ਸਿੰਘ ਵਿੱਟੀ, ਡੀਐਸਪੀ ਸ਼੍ਰੀ ਹਰਗੋਬਿੰਦਪੁਰ ਹਰਕ੍ਰਿਸ਼ਨ ਸਿੰਘ, ਐਸਐਚਓ ਘੁਮਾਣ ਸੁਰਿੰਦਰ ਸਿੰਘ ਅਤੇ ਤਹਿਸੀਲਦਾਰ ਰਾਜ ਕੁਮਾਰ, ਸਰਪੰਚ ਦਲਜੀਤ ਸਿੰਘ ਬਮਰਾਹ ਪਿੰਡ ਚੂਹੇਵਾਲ ਅਤੇ ਸਾਰੇ ਪਿੰਡ ਭਗਤੂਪੁਰ ਵਾਸੀਆਂ ਦੀ ਹਾਜ਼ਰੀ ’ਚ ਪੀੜਤ ਦਲਿਤ ਮਹਿਲਾ ਨਰਿੰਦਰ ਕੌਰ ਦੇ ਪਤੀ ਲਖਬੀਰ ਸਿੰਘ ਤੋਂ ਸਾਰੇ ਕੇਸ ਦੀ ਜਾਣਕਾਰੀ ਪ੍ਰਾਪਤ ਕੀਤੀ।ਪੀੜ੍ਹਤ ਸ਼ਿਕਾਇਤ ਕਰਤਾ ਦਾ ਪੱਖ ਸੁਣਨ ਤੋਂ ਬਾਅਦ ਐੱਸ.ਸੀ. ਕਮਿਸ਼ਨ ਦੀ 3 ਮੈਂਬਰੀ ਟੀਮ ਨੇ ਪਿੰਡ ਵਾਲਿਆਂ ਦੇ ਬਿਆਨ ਵੀ ਕਲਮਬੰਦ ਕੀਤੇ ਉਪਰੰਤ ਮੌਕੇ ਤੇ ਪੁੱਜੇ ਵਿਵਾਦਿਤ ਐਸਐਚਓ ਸੁਰਿੰਦਰ ਸਿੰਘ ਦਾ ਪੱਖ ਵੀ ਸੁਣਿਆ। ਪਿੰਡ ਦੇ ਵਸਨੀਕ ਅਤੇ ਐੱਸ.ਐੱਸ.ਐੱਸ ਬੋਰਡ ਪੰਜਾਬ ਸਰਕਾਰ ਦੇ ਮੈਂਬਰ ਭੁਪਿੰਦਰਪਾਲ ਸਿੰਘ ਨੇ ਪੁਲੀਸ ਵਲੋਂ ਦਲਿਤ ਪ੍ਰੀਵਾਰਾਂ ਨਾਲ ਕੀਤੀ ਜਾ ਰਹੀ ਜ਼ਿਆਦਤੀ ਦਾ ਮੁੱਦਾ ਧੜੱਲੇ ਨਾਲ ਕਮਿਸ਼ਨ ਦੇ ਕੋਲ ਉਠਾਇਆ।ਦੋਵਾਂ ਧਿਰਾਂ ਦਾ ਪੱਖ ਸੁਣਨ ਤੋਂ ਬਾਅਦ ਪੰਜਾਬ ਰਾਜ ਐੱਸ.ਸੀ. ਕਮਿਸ਼ਨ ਦੇ ਮੈਂਬਰ ਗਿਆਨ ਚੰਦ, ਡਾ. ਤਰਸੇਮ ਸਿੰਘ ਸਿਆਲਕਾ ਅਤੇ ਪ੍ਰਭ ਦਿਆਲ ਅਧਾਰਿਤ 3 ਮੈਂਬਰੀ ‘ਟੀਮ’ ਨੇ ਦੱਸਿਆ ਕਿ ਮਾਮਲਾ ਸੰਗੀਨ ਹੈ। ਇਥੇ ਇੱਕ ਪੁਲੀਸ ਥਾਣਾ ਘੁਮਾਣ ਦੇ ਐਸਐਚਓ ਸੁਰਿੰਦਰ ਸਿੰਘ ਵਲੋਂ ਪਿੰਡ ਭਗਤੂਪੁਰ ਦੇ ਦਲਿਤ ਔਰਤ ਦੇ ਘਰ ਜਬਰੀ ਦਾਖਲ ਹੋ ਕੇ ਬਾਥਰੂਮ ਚੋਂ ਅੱਧ ਨੰਗੀ ਹਾਲਤ ’ਚ ਘਸੀਟ ਕੇ ਬਾਹਰ ਕੱਢਣ ਦੇ ਲੱਗੇ ਦੋਸ਼ਾਂ ਦੀ ਜਾਂਚ ਡਾਇਰੈਕਟਰ ਬਿਯੂਰੋ ਆਫ ਇਨਵੈਸਟੀਗਟਸ਼ਨ ਪੰਜਾਬ ਤੋਂ ਕਰਵਾਉਣ ਦਾ ਫੈਸਲਾ ਕੀਤਾ ਗਿਆ ਹੈ। ਉਨਾਂ ਨੇ ਦੱਸਿਆ ਕਿ ਕਮਿਸ਼ਨ ਇਹ ਲਿਖੇਗਾ ਕਿ ਜਦੋਂ ਤੱਕ ਉਕਤ ਮਾਮਲੇ ਦੀ ਜਾਂਚ ਸਪੱਸ਼ਟ ਨਹੀਂ ਹੋ ਜਾਂਦੀ ਉਨੀ ਦੇਰ ਤੱਕ ਇਸ ਵਿਵਾਦਿਤ ਐਸਐਚਓ ਨੂੰ ਇਥੋਂ ਮੁਅੱਤਲ ਕਰਕੇ ਲਾਈਨ ਹਾਜ਼ਰ ਕੀਤਾ ਜਾਵੇ ਅਤੇ ਜਦੋਂ ਤੱਕ ਜਾਂਚ ਮੁਕੰਮਲ ਨਹੀਂ ਹੋ ਜਾਂਦੀ ਉਦੋਂ ਤੱਕ ਇਸ ਐਸਐਚਓ ਨੂੰ ਪਬਲਿਕ ਡੀਲਿੰਗ ਦੀ ਜ਼ਿੰਮੇਵਾਰੀ ਤੋਂ ਲਾਂਭੇਂ ਰੱਖਿਆ ਜਾਵੇ ਅਤੇ ਇਸ ਦੇ ਖਿਲਾਫ ਵੱਖਰੇ ਤੌਰ ’ਤੇ ਵਿਭਾਗੀ ਜਾਂਚ ਖੋਲ੍ਹੀ ਜਾਵੇ। ਕਮਿਸ਼ਨ ਦੇ ਮੈਂਬਰਾਂ ਨੇ ਕਿਹਾ ਕਿ ਉਹ ਡੀਜੀਪੀ ਪੰਜਾਬ ਨੂੰ ਲਿਖਣਗੇ ਕਿ ਜ਼ਿਲ੍ਹਾ ਪੁਲਿਸ ਮੁਖੀਆਂ ਨੁੰ ਨਿਰਦੇਸ਼ ਦਿੱਤੇ ਜਾਣ ਕਿ ਪੁਲੀਸ ਅਫ਼ਸਰ ਜਨਤਾ ਦੇ ਨਾਲ ਅਦਬ ਦੇ ਨਾਲ ਪੇਸ਼ ਹੋਣ।ਇਸ ਮੌਕੇ ਐਸਐਸ ਬੋਰਡ ਦੇ ਮੈਂਬਰ ਸ੍ਰ ਭੁਪਿੰਦਰਪਾਲ ਸਿੰਘ ਵਿੱਟੀ, ਸਰਪੰਚ ਪਿੰਡ ਭਗਤੂਪੁਰਾ ਸ਼੍ਰੀਮਤੀ ਕੁਲਵਿੰਦਰ ਕੌਰ, ਕੋਮੀਂ ਘੱਟ ਗਿਣਤੀਆਂ ਲੋਕ ਭਲਾਈ ਸੰਸਥਾ ਦੇ ਪ੍ਰਧਾਨ ਸ੍ਰ ਸਤਨਾਮ ਸਿੰਘ ਗਿੱਲ, ਪੀਏ ਗੁਰਪ੍ਰੀਤ ਸਿੰਘ ਖਾਲਸਾ, ਪ੍ਰਧਾਨ ਲਖਵਿੰਦਰ ਸਿੰਘ ਢਿਲੋਂ, ਪੀਏ ਗੁਰਪ੍ਰੀਤ ਸਿੰਘ ਖਾਲਸਾ, ਪੰਚ ਸਰਬਜੀਤ ਕੌਰ, ਕੈਪਟਨ ਸਿੰਘ ਮੀਕੇ, ਸਤਨਾਮ ਸਿੰਘ, ਸਲਵਿੰਦਰ ਸਿੰਘ, ਕਸ਼ਮੀਰ ਸਿੰਘ, ਅਮਨਦੀਪ ਸਿੰਘ, ਸਰਪੰਚ ਦਲਜੀਤ ਸਿੰਘ ਚੂਹੇਵਾਲ ਆਦਿ ਹਾਜ਼ਰ ਸਨ।