ਪਿੰਡ ਗੁਨੋਮਾਜਰਾ ਦੇ ਨੀਲੇ ਕਾਰਡ ਧਾਰਕਾਂ ਵੱਲੋਂ ਪੰਚਾਇਤ ਅਤੇ ਡਿਪੂ ਹੋਲਡਰ ਖਿਲਾਫ਼ ਕਣਕ ਦੀ ਵੰਡ 'ਚ ਅਣਦੇਖੀ ਤੇ ਧੱਕੇਸ਼ਾਹੀ ਕਰਨ ਦੇ ਦੋਸ਼ ਲਗਾਏ ਹਨ। ਇਸ ਸਬੰਧੀ ਮਹਿਲਾ ਕਾਂਗਰਸੀ ਆਗੂ ਜਸਵੀਰ ਕੌਰ, ਜਸਵਿੰਦਰ ਸਿੰਘ, ਮੋਹਨ ਸਿੰਘ, ਲਾਲ ਸਿੰਘ, ਜਗਵਿੰਦਰ ਸਿੰਘ ਤੇ ਹਰਜੀਤ ਸਿੰਘ ਆਦਿ ਨੇ ਕਿਹਾ ਕਿ ਸਰਕਾਰ ਵੱਲੋਂ ਕਰਫ਼ਿਊ ਦੌਰਾਨ ਕਾਰਡ ਧਾਰਕਾਂ ਲਈ ਡਿੱਪੂ ਰਾਹੀਂ ਭੇਜੀ ਕਣਕ ਕੁਝ ਪਰਿਵਾਰਾਂ ਨੂੰ ਦੇਣ ਤੋਂ ਬਾਅਦ ਬਾਕੀ ਨੂੰ ਕਣਕ ਦੇਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਦੋ ਵਸਨੀਕਾਂ ਨਾਲ ਧੱਕਾਮੁੱਕੀ ਵੀ ਕੀਤੀ। ਇਨ੍ਹਾਂ ਕਿਹਾ ਕਿ ਇਸ ਵਿਤਕਰੇ ਕਾਰਨ ਲੋਕਾਂ ਵਿਚ ਰੋਸ ਹੈ ਕਿ ਜਦੋਂ ਸਾਰੇ ਮੈਂਬਰਾਂ ਦੇ ਕੋਟੇ ਅਨੁਸਾਰ ਅਨਾਜ ਆ ਚੁੱਕਾ ਹੈ ਫਿਰ ਉਨ੍ਹਾਂ ਨਾਲ ਇਹ ਅਨਿਆਂ ਕਿਉਂ ਕੀਤਾ ਜਾ ਰਿਹਾ ਹੈ। ਇਨ੍ਹਾਂ ਵਿਭਾਗ ਤੋਂ ਇਸ ਮਾਮਲੇ ਦੀ ਜਾਂਚ ਕਰਨ ਦੀ ਮੰਗ ਕਰਦਿਆਂ ਅਨਾਜ ਦੇ ਘਪਲੇ ਦੀ ਸ਼ੱਕ ਜ਼ਾਹਿਰ ਕੀਤੀ ਹੈ ਅਤੇ ਇਨ੍ਹਾਂ ਉਨ੍ਹਾਂ ਦੇ ਕਾਰਡ ਕਟਾਉਣ ਲਈ ਵਿਭਾਗ ਨੂੰ ਗਲਤ ਰਿਪੋਰਟਾਂ ਦੇਣ ਦਾ ਵੀ ਦੋਸ਼ ਲਗਾਇਆ। ਇਸ ਬਾਰੇ ਸਰਪੰਚ ਕੁਲਵਿੰਦਰ ਸਿੰਘ ਤੇ ਡਿੱਪੂ ਹੋਲਡਰ ਭਾਗ ਸਿੰਘ ਨੇ ਸਪੱਸ਼ਟੀਕਰਨ ਦਿੰਦਿਆਂ ਕਿਹਾ ਕਣਕ ਸਭ ਕਾਰਡ ਧਾਰਕਾਂ ਦੀ ਆਈ ਹੋਈ ਹੈ, ਪਰ ਉਨ੍ਹਾਂ ਪਹਿਲਾਂ ਅਤੀ ਗਰੀਬੀ ਰੇਖਾ ਵਾਲੇ ਕਾਰਡ ਹੋਲਡਰਾਂ ਨੂੰ ਪਹਿਲਾਂ ਵੰਡੀ ਜਾਵੇਗੀ ਅਤੇ ਬਾਕੀਆਂ ਨੂੰ ਬਾਅਦ ਵਿੱਚ ਪਰ ਇਹ ਮੁੱਦਾ ਬਣਾਇਆ ਜਾ ਰਿਹਾ ਹੈ।