ਬੀਤੇ ਦਿਨੀ ਨੇੜਲੇ ਪਿੰਡ ਲਖਨੌਰ ਵਿਖੇ ਦੇਰ ਰਾਤ ਫਰਨੀਚਰ ਮਾਰਕਿਟ ਦੇ ਸਾਹਮਣੇ ਮੋਟਰ ਸਾਇਕਲ ਸਵਾਰ ਤਿੰਨ ਨੌਜਵਾਨਾਂ ਨੂੰ ਸੜਕ ਹਾਦਸੇ ਦੌਰਾਨ ਅਣਪਛਾਤੇ ਵਾਹਨ ਚਾਲਕ ਵੱਲੋਂ ਫੇਟ ਮਾਰ ਕੇ ਜ਼ਖਮੀ ਕਰਨ ਅਤੇ ਮੌਕੇ ਤੋਂ ਫਰਾਰ ਹੋਣ ਦੀ ਖਬਰ ਪ੍ਰਾਪਤ ਹੋਈ ਜਿਸ ਵਿੱਚ 2 ਨੌਜਵਾਨਾਂ ਦੀ ਮੌਤ ਹੋ ਜਾਣ ਜਦਕਿ ਇਕ ਨੂੰ ਡਾਕਟਰਾਂ ਵੱਲੋਂ ਮੁਢਲੇ ਇਲਾਜ ਮਗਰੋਂ ਘਰ ਭੇਜ ਦਿੱਤਾ ਗਿਆ ਹੈ । ਥਾਣਾ ਸਦਰ ਕੁਰਾਲੀ ਵੱਲੋਂ ਤੀਜੇ ਵਿਅਕਤੀ ਨਰੇਸ਼ ਕੁਮਾਰ ਦੇ ਬਿਆਨਾਂ ਤੇ ਅਣਪਛਾਤੇ ਵਾਹਨ ਖਿਲਾਫ ਮਾਮਲਾ ਦਰਜ਼ ਕਰਕੇ ਭਾਲ ਸ਼ੁਰੂ ਕਰ ਦਿੱਤੀ ਗਈ ਹੈ। ਤਫਤੀਸ਼ੀ ਅਫਸਰ ਦਲਵਿੰਦਰ ਸਿੰਘ ਨੇ ਦੱਸਿਆ ਕਿ ਚਸ਼ਮਦੀਦ ਨਰੇਸ਼ ਕੁਮਾਰ ਪੁੱਤਰ ਪ੍ਰਕਾਸ਼ ਚੰਦ (ਗੜਵਾਲ ਉਤਰਾਖੰਡ) ਹਾਲ ਵਾਸੀ ਵਾਰਡ ਨੰਬਰ 7 ਸਿਸਵਾਂ ਰੋਡ ਕੁਰਾਲੀ ਵੱਲੋਂ ਪੁਲਿਸ ਕੋਲ ਦਰਜ਼ ਕਰਵਾਏ ਬਿਆਨਾ ਮੁਤਾਬਿਕ ਉਹ ਆਪਣੇ ਦੋ ਸਾਥੀ ਪਰਵਿੰਦਰ ਸਿੰਘ ਪੁੱਤਰ ਹਰਬੰਸ ਸਿੰਘ ਵਾਸੀ ਪਿੰਡ ਅਰਨੌਲੀ (ਰੋਪੜ ) ਅਤੇ ਜਸਪ੍ਰੀਤ ਸਿੰਘ ਪੁੱਤਰ ਸਤਵੰਤ ਸਿੰਘ ਵਾਰਡ ਨੰਬਰ 2 ਨੇੜੇ ਗੋਇਲ ਹਸਪਤਾਲ ਰੋਪੜ ਰੋਡ ਦੇ ਰਹਿਣ ਵਾਲੇ ਸਨ ਤੇ ਉਹ ਇਕੱਠੇ ਨੇੜਲੇ ਪਿੰਡ ਫੋਕਲ ਪੁਆਇੰਟ ਚਨਾਲੋਂ ਵਿਖੇ ਮੈਟਾਲੇਨਿਕ ਕੰਪਨੀ ਵਿੱਚ ਵੈਲਡਿੰਗ ਦਾ ਕੰਮ ਕਰਦੇ ਸਨ। ਪਰਵਿੰਦਰ ਸਿੰਘ ਵੀ ਪਹਿਲਾਂ ਉਸਦੇ ਨਾਲ ਹੀ ਕੰਮ ਕਰਦਾ ਸੀ ਪਰ ਕੁਝ ਸਮੇਂ ਪਹਿਲਾਂ ਉਸਨੇ ਫੈਕਟਰੀ ਵਿੱਚੋਂ ਕੰਮ ਛੱਡ ਦਿੱਤਾ ਸੀ ਤੇ ਆਪਣੇ ਪਿਤਾ ਹਰਬੰਸ ਸਿੰਘ ਨਾਲ ਆਪਣੀ ਵੈਲਡਿੰਗ ਦੀ ਦੁਕਾਨ ਤੇ ਹੀ ਕੰਮ ਕਰਨ ਲੱਗ ਪਿਆ ਸੀ। ਪਰਵਿੰਦਰ ਆਪਣੇ ਸਹੁਰੇ ਘਰ ਘਟੌਰ ਵਿਖੇ ਹੀ ਰਹਿੰਦਾ ਸੀ ਤੇ ਕੰਮ ਤੋਂ ਬਾਅਦ ਘਟੌਰ ਹੀ ਚਲਾ ਜਾਂਦਾ ਸੀ। ਜਸਪ੍ਰੀਤ ਦਾ ਘਰ ਪਰਵਿੰਦਰ ਦੀ ਦੁਕਾਨ ਦੇ ਨਜਦੀਕ ਹੋਣ ਕਰਕੇ ਉਸਦੀ ਵੀ ਜਸਪ੍ਰੀਤ ਨਾਲ ਦੋਸਤੀ ਹੋ ਗਈ ਸੀ। ਲੰਘੀ 19-20 ਅਪ੍ਰੈਲ ਦੀ ਰਾਤ ਉਹ ਇਕੱਠੇ ਹੀ ਸਨ ਤੇ ਲਾਕਡਾਊਨ ਅਤੇ ਰਾਤ ਹੋਣ ਕਾਰਨ ਉਹ ਤਿੰਨੋਂ ਮੋਟਰ ਸਾਇਕਲ ਪੀ ਬੀ 87-4206 ਤੇ ਸਵਾਰ ਹੋ ਕੇ ਪਰਵਿੰਦਰ ਨੂੰ ਘਰ ਛੱਡਣ ਲਈ ਜਾ ਰਹੇ ਸਨ। ਜਦੋਂ ਉਹ ਪਿੰਡ ਲਖਨੋਰ ਨਜਦੀਕ ਪੁੱਜੇ ਤਾਂ ਇਕ ਤੇਜ ਰਫਤਾਰ ਵਾਹਨ ਨੇ ਉਨ੍ਹਾ ਨੂੰ ਪਿੱਛੋਂ ਜੋਰਦਾਰ ਫੇਟ ਮਾਰ ਦਿੱਤੀ ਜਿਸ ਕਾਰਨ ਉਹ ਸੜਕ ਤੇ ਡਿੱਗ ਪਏ । ਮੌਕੇ ਤੇ ਹਾਜਰ ਰਾਹਗੀਰਾਂ ਵੱਲੋਂ ਉਨ੍ਹਾਂ ਨੂੰ ਚੁੱਕਿਆ ਗਿਆ ਤੇ ਐਬੂਲੈਂਸ ਅਤੇ ਕੁਰਾਲੀ ਪੁਲਿਸ ਨੂੰ ਸੂਚਿਤ ਕੀਤਾ ਤੇ ਐਬੂਲੈਂਸ ਰਾਂਹੀ ਉਨ੍ਹਾ ਨੂੰ ਨੇੜੇ ਦੇ ਸਿਵਲ ਹਸਪਤਾਲ ਖਰੜ੍ਹ ਵਿਖੇ ਲਿਜਾਇਆ ਗਿਆ ਜਿਥੇ ਡਾਕਟਰਾਂ ਵੱਲੋਂ ਪਰਵਿੰਦਰ ਨੂੰ ਮੌਕੇ ਤੇ ਮ੍ਰਿਤਕ ਐਲਾਨ ਦਿੱਤਾ ਗਿਆ ਤੇ ਹਾਲਤ ਗੰਭੀਰ ਹੋਣ ਕਾਰਨ ਨਰੇਸ਼ ਕੁਮਾਰ ਅਤੇ ਜਸਪ੍ਰੀਤ ਨੂੰ ਜੀਐਮਸੀਐਚ ਸੈਕਟਰ 16 ਚੰਡੀਗੜ੍ਹ ਲਈ ਰੈਫਰ ਕਰ ਦਿੱਤਾ ਗਿਆ ਜਿਥੇ ਦੂਜੇ ਦਿਨ ਦੁਪਿਹਰ 2 ਵਜੇ ਦੇ ਕਰੀਬ ਇਲਾਜ ਦੌਰਾਨ ਜਸਪ੍ਰੀਤ ਦੀ ਵੀ ਮੌਤ ਹੋ ਗਈ ਤੇ ਉਸਨੂੰ ਡਾਕਟਰਾਂ ਵੱਲੋਂ ਛੁੱਟੀ ਦੇ ਕੇ ਘਰ ਭੇਜ ਦਿੱਤਾ ਗਿਆ। ਪੁਲਿਸ ਥਾਣਾ ਸਦਰ ਵੱਲੋਂ ਮ੍ਰਿਤਕਾਂ ਦਾ ਪੋਸਟ ਮਾਰਟਮ ਕਰਵਾ ਕੇ ਲਾਸ਼ਾਂ ਵਾਰਸਾਂ ਦੇ ਹਵਾਲੇ ਕਰ ਦਿੱਤੀਆ ਗਈਆਂ ਹਨ ਤੇ ਮਾਮਲਾ ਦਰਜ਼ ਕਰਕੇ ਅਣਪਛਾਤੇ ਵਾਹਨ ਚਾਲਕ ਦੀ ਭਾਲ ਕੀਤੀ ਜਾ ਰਹੀ ਹੈ।