ਈਕੋਸਿਟੀ ਵਿੱਚ ਲੈਂਡ ਪੂਲਿੰਗ ਸਕੀਮ ਅਧੀਨ ਅਲਾਟ ਕੀਤੇ ਗਏ ਰਿਹਾਇਸ਼ੀ ਤੇ ਵਪਾਰਕ ਪਲਾਟਾਂ ਦੀ ਗਮਾਡਾ ਵੱਲੋਂ ਅਜੇ ਤਕ ਐਲ ਓ ਆਈ ਜਾਰੀ ਨਾ ਕਰਨ ਨਾਲ ਕਿਸਾਨਾਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਅੱਜ ਗਮਾਡਾ ਦਫਤਰ ਅੱਗੇ ਪਹੁੰਚੇ ਦੁਖੀ ਕਿਸਾਨਾਂ ਨੇ ਗਮਾਡਾ ਖਿਲਾਫ ਜੋਰਦਾਰ ਨਾਹਰੇਬਾਜੀ ਕੀਤੀ ਤੇ ਦੱਸਿਆ ਕਿ ਗਮਾਡਾ ਨੇ ਤਾਂ ਕਿਸਾਨਾਂ ਤੋਂ ਜਮੀਨ ਅਕਵਾਇਰ ਕਰਕੇ ਪਲਾਟ ਅੱਗੇ ਵੇਚ ਕੇ ਅਰਬਾਂ ਰੁਪਏ ਕਮਾ ਲਏ ਹਨ ਪਰ ਲੈਂਡ ਪੂਲਿੰਗ ਅਧੀਨ ਕਿਸਾਨਾਂ ਨੂੰ ਮਿਲਣ ਵਾਲੇ ਕਮਰਸ਼ੀਅਲ ਤੇ ਰਿਹਾਇਸ਼ੀ ਖੇਤਰ ਬਾਰੇ ਕੋਈ ਐਲ.ਓ. ਆਈ. ਜਾਰੀ ਨਹੀਂ ਕੀਤਾ ਜਾ ਰਿਹਾ। ਅ.ਓ.ਆਈ. ਜਾਰੀ ਨਾ ਹੋਣ ਦੀ ਸੂਰਤ ਵਿੱਚ ਕਿਸਾਨ ਮਿਲਣ ਵਾਲੇ ਪਲਾਟਾਂ ਨੂੰ ਵੇਚ ਨਹੀਂ ਸਕਦਾ। ਕਈ ਕਿਸਾਨਾਂ ਨੇ ਇਹ ਪਲਾਟ ਵੇਚ ਕੇ ਹੋਰ ਜਮੀਨ ਲੈਣੀ ਹੈ ਪਰ ਐਲ.ਓ. ਆਈ. ਨਾ ਹੋਣ ਕਰਕੇ ਉਹ ਵੇਚ ਨਹੀਂ ਸਕਦੇ ਜਦੋਂ ਕਿ ਉਸੇ ਹੀ ਥਾਂ ਤੇ ਗਮਾਡਾ ਆਪਣੇ ਪਲਾਟ ਵੇਚ ਵੀ ਚੁੱਕਾ ਹੈ। ਹਾਜਰ ਕਿਸਾਨਾਂ ਨੇ ਦੋਸ਼ ਲਾਇਆ ਕਿ ਐਲ.ਓ.ਆਈ. ਜਾਰੀ ਕਰਨ ਨਾਲ ਕਿਸਾਨਾਂ ਵਲੋਂ ਵੇਚੇ ਜਾਣ ਵਾਲੇ ਪਲਾਟਾਂ ਤੌਂ ਟਰਾਂਸਫਰ ਫੀਸ ਦੇ ਰੂਪ ਵਿੱਚ ਗਮਾਡਾ ਨੂੰ ਵੀ ਆਮਦਨ ਆਉਣੀ ਹੈ ਜਿਸਦਾ ਹੁਣ ਗਮਾਡਾ ਨੂੰ ਨੁਕਸਾਨ ਹੋ ਰਿਹਾ ਹੈ। ਗਮਾਡਾ ਨੇ ਐਰੋਸਿਟੀ ਵਿੱਚ ਸਾਢੇ ਸੋਲਾਂ ਏਕੜ ਜਮੀਨ ਦਾ ਅਵਾਰਡ ਸੁਨਾਉਣ ਤੋਂ ਪਹਿਲਾਂ ਹੀ ਕਿਸਾਨਾਂ ਦੀ ਖੜੀ ਫਸਲ ਵਾਹ ਦਿਤੱ ਹੈ ਤੇ ਐਲ.ਐਂਡ ਟੀ ਕੰਪਨੀ ਨੂੰ ਟੈਂਡਰ ਦੇ ਕੇ ਕੰਮ ਸ਼ੁਰੂ ਕਰ ਦਿੱਤਾ ਹੈ।ਇਸ ਤੋਂ ਪਹਿਲਾਂ ਕਿਸਾਨਾਂ ਵਲੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਮੋਹਾਲੀ ਹਲਕਾ ਇੰਚਾਰਜ ਸ: ਬਲਵੰਤ ਸਿੰਘ ਰਾਮੂਵਾਲੀਆ ਨੂੰ ਮੰਗ ਪੱਤਰ ਵੀ ਦਿਤਾ।ਅੱਜ ਇਕੱਠੇ ਹੋਏ ਕਿਸਾਨਾਂ ਵਿੱਚ ਮੁੱਖ ਤੋਰ ਤੇ ਬਾਲ ਕ੍ਰਿਸ਼ਨ, ਬਰਿੰਦਰ ਸਿੰਘ, ਜਰਨੈਲ ਸਿੰਘ, ਗੁਰਮੀਤ ਸਿੰਘ, ਗੁਰਪਿੰਦਰ ਸਿੰਘ, ਨਰਜੰਣ ਸਿੰਘ, ਬਲਵਿੰਦਰ ਸਿੰਘ, ਰਾਜ ਕੁਮਾਰ ਆਦਿ ਸ਼ਾਮਲ ਸਨ।