ਪੰਜਾਬ ਸਰਕਾਰ ਵੱਲੋਂ ਫਰੀਦਕੋਟ ਜ਼ਿਲੇ ਦੇ 85737 ਆਟਾ-ਦਾਲ ਰਾਸ਼ਨ ਕਾਰਡਾਂ ਨਾਲ ਸਬੰਧਤ ਲਾਭਪਾਤਰੀ ਪਰਿਵਾਰਾਂ ਨੂੰ ਕੌਮੀ ਅੰਨ ਸੁਰੱਖਿਆ ਮਿਸ਼ਨ ਅਧੀਨ ਕੀਤੀ ਜਾਂਦੀ ਕਣਕ ਦੀ ਵੰਡ ਇਸ ਵਾਰ ਵੀ ਮੁਕੰਮਲ ਪਾਰਦਰਸ਼ਤਾ ਨਾਲ ਹੋ ਰਹੀ ਹੈ। ਰਾਜ ਸਰਕਾਰ ਦੇ ਖੁਰਾਕ ਤੇ ਸਿਵਲ ਸਪਲਾਈ ਮਹਿਕਮੇ ਵੱਲੋਂ ਪਿਛਲੇ ਸਾਲ ਬਾਇਓਮੈਟ੍ਰਿਕ ਪ੍ਰਣਾਲੀ ਲਾਗੂ ਕਰਨ ਬਾਅਦ ਇਸ ਸਾਲ ਵੀ ਜ਼ਿਲੇ ਦੇ ਪਿੰਡਾਂ ਵਿੱਚ 10372.93 ਮੀਟ੍ਰਿਕ ਟਨ ਕਣਕ ਦੀ ਵੰਡ ਈ ਪੋਸ (ਇਲੈਕਟ੍ਰਾਨਿਕ ਪੁਆਇੰਟ ਆਫ਼ ਸੇਲ) ਮਸ਼ੀਨਾਂ ਰਾਹੀਂ ਕੀਤੀ ਜਾ ਰਹੀ ਹੈ।ਇਹ ਜਾਣਕਾਰੀ ਦਿੰਦਿਆਂ ਖੁਰਾਕ ਤੇ ਸਪਲਾਈਜ਼ ਕੰਟਰੋਲਰ ਸ: ਜਸਪ੍ਰੀਤ ਸਿੰਘ ਕਾਹਲੋਂ ਨੇ ਦੱਸਿਆ ਕਿ ਜਿਹੜਾ ਵੀ ਰਾਸ਼ਨ ਕਾਰਡ ਧਾਰਕ ਆਪਣੇ ਹਿੱਸੇ ਦਾ ਰਾਸ਼ਨ (ਕਣਕ) ਲੈਣ ਆਵੇਗਾ, ਉਸ ਨੂੰ ਸਭ ਤੋਂ ਪਹਿਲਾਂ ਆਪਣੇ ਬਾਇਓਮੈਟ੍ਰਿਕ ਨਿਸ਼ਾਨਾਂ (ਹੱਥਾਂ ਜਾਂ ਅੱਖਾਂ ਦੇ) ਰਾਹੀਂ ਇਹ ਯਕੀਨੀ ਬਣਾਉਣਾ ਪਵੇਗਾ ਕਿ ਜਿਸ ਨੂੰ ਆਟਾ-ਦਾਲ ਸਕੀਮ ਦਾ ਲਾਭ ਦਿੱਤਾ ਜਾ ਰਿਹਾ ਹੈ, ਉਹ ਬਿਲਕੁਲ ਸਹੀ ਵਿਅਕਤੀ ਹੈ। ਈ ਪੋਸ ਮਸ਼ੀਨਾਂ ਨਾਲ ਜੋੜੀਆਂ ਬਾਇਓਮੈਟ੍ਰਿਕ ਮਸ਼ੀਨਾਂ ਵਿੱਚ ਆਟਾ-ਦਾਲ ਕਾਰਡ ਧਾਰਕ ਪਰਿਵਾਰ ਦੇ ਸਾਰੇ ਮੈਂਬਰਾਂ ਦੇ ਅਧਾਰ ਕਾਰਡ 'ਚ ਦਰਜ ਬਾਇਓਮੈਟ੍ਰਿਕ ਨਿਸ਼ਾਨਾਂ ਦਾ ਵੇਰਵਾ ਮੌਜੂਦ ਹੋਣ ਕਾਰਨ, ਕਾਰਡ 'ਤੇ ਦਰਜ ਕੋਈ ਵੀ ਪਰਿਵਾਰਿਕ ਮੈਂਬਰ ਕਣਕ ਲੈ ਸਕਦਾ ਹੈ।ਜ਼ਿਲਾ ਖੁਰਾਕ ਤੇ ਸਪਲਾਈ ਕੰਟਰੋਲਰ ਨੇ ਅੱਗੇ ਦੱਸਿਆ ਕਿ ਜ਼ਿਲੇ ਵਿੱਚ ਅੰਨਤੋਦਿਆ (ਏ ਵੀ ਵਾਈ) ਅਤੇ ਆਟਾ-ਦਾਲ (ਪੀ ਐਚ ਐਚ) ਸਕੀਮ ਤਹਿਤ ਰਜਿਸਟਰ ਪਰਿਵਾਰਾਂ ਨੂੰ ਅੰਨਤੋਦਿਆ ਸਕੀਮ ਤਹਿਤ 6 ਮਹੀਨੇ ਦੀ 2.10 ਕੁਇੰਟਲ ਕਣਕ ਪ੍ਰਤੀ ਕਾਰਡ ਅਤੇ ਆਟਾ-ਦਾਲ ਸਕੀਮ ਤਹਿਤ 6 ਮਹੀਨੇ ਲਈ 30 ਕਿਲੋਗ੍ਰਾਮ ਪ੍ਰਤੀ ਮੈਂਬਰ ਦੇ ਹਿਸਾਬ ਨਾਲ ਦੋ ਰੁਪਏ ਪ੍ਰਤੀ ਕਿਲੋਗ੍ਰਾਮ ਦੀ ਨਾ ਮਾਤਰ ਕੀਮਤ 'ਤੇ ਕਣਕ ਦੀ ਵੰਡ ਕੀਤੀ ਜਾ ਰਹੀ ਹੈ। ਉਨਾਂ ਦੱਸਿਆ ਕਿ ਜ਼ਿਲੇ ਵਿੱਚ ਕੁੱਲ 103729.35 ਕੁਇੰਟਲ ਕਣਕ ਦੀ ਵੰਡ ਕੀਤੀ ਜਾਣੀ ਹੈ। ਇਹ ਅਨਾਜ ਦਾ ਕੋਟਾ ਅਕਤੂਬਰ 2019 ਤੋਂ ਮਾਰਚ 2020 ਤੱਕ ਦਾ ਹੈ। ਜ਼ਿਲਾ ਖੁਰਾਕ ਤੇ ਸਪਲਾਈ ਅਫ਼ਸਰ ਨੇ ਦੱਸਿਆ ਕਿ ਸ਼ੁਰੂਆਤੀ ਤੌਰ 'ਤੇ ਜ਼ਿਲੇ 'ਚ ਕਰੀਬ 10,000 ਕੁਇੰਟਲ ਕਣਕ ਦੀ ਵੰਡ ਕੀਤੀ ਜਾ ਚੁੱਕੀ ਹੈ। ਉਨਾਂ ਦੱਸਿਆ ਕਿ ਸਰਕਾਰ ਦੀਆਂ ਹਦਾਇਤਾਂ ਮੁਤਾਬਕ ਕਣਕ ਵੰਡ ਦੇ ਕੰਮ ਨੂੰ ਮਿੱਥੇ ਸਮੇਂ 'ਚ ਮੁਕੰਮਲ ਕਰ ਲਿਆ ਜਾਵੇਗਾ। ਉਨਾਂ ਦੱਸਿਆ ਕਿ ਈ ਪੋਸ ਮਸ਼ੀਨਾਂ ਨਾਲ ਜਿੱਥੇ ਵੰਡ 'ਚ ਪਾਰਦਰਸ਼ਤਾ ਬਣ ਗਈ ਹੈ ਉੱਥੇ ਰਾਸ਼ਨ ਵੰਡ 'ਚ ਕਿਸੇ ਵੀ ਤਰਾਂ ਦੀ ਅਣਜਾਣੇ 'ਚ ਜਾਂ ਜਾਣਬੁੱਝ ਕੇ ਗਲਤੀ ਹੋਣ ਦੀ ਗੁੰਜਾਇਸ਼ ਵੀ ਮੁੱਕ ਗਈ ਹੈ।