ਇਥੋਂ ਦੇ ਗੁਰੂ ਗੋਬਿੰਦ ਸਿੰਘ ਸਟੇਡੀਅਮ ਵਿਖੇ ਖੇਡੇ ਗਏ ਚੌਥੇ ਕਬੱਡੀ ਵਿਸ਼ਵ ਕੱਪ-2013 ਦੇ ਆਪੋ-ਆਪਣੇ ਕੁਆਲੀਫਿਕੇਸ਼ਨ ਮੈਚਾਂ ਵਿੱਚ ਜਿੱਤ ਹਾਸਲ ਕਰਦਿਆਂ ਪੁਰਸ਼ ਵਰਗ ਅਮਰੀਕਾ ਅਤੇ ਮਹਿਲਾ ਵਰਗ ਵਿੱਚ ਡੈਨਮਾਰਕ ਨੇ ਤੀਜਾ ਸਥਾਨ ਹਾਸਲ ਕਰ ਲਿਆ। ਪੁਰਸ਼ ਵਰਗ ਵਿੱਚ ਇੰਗਲੈਂਡ ਅਤੇ ਮਹਿਲਾ ਵਰਗ ਵਿੱਚ ਪਾਕਿਸਤਾਨ ਟੀਮ ਨੂੰ ਚੌਥੇ ਸਥਾਨ 'ਤੇ ਹੀ ਸਬਰ ਕਰਨਾ ਪਿਆ। ਤੀਜੇ ਸਥਾਨ ਲਈ ਇਥੇ ਖੇਡੇ ਗਏ ਮੈਚਾਂ ਵਿੱਚ ਪਹਿਲਾ ਖੇਡੇ ਗਏ ਮਹਿਲਾ ਵਰਗ ਦੇ ਮੁਕਾਬਲੇ ਵਿੱਚ ਡੈਨਮਾਰਕ ਨੇ ਪਾਕਿਸਤਾਨ ਨੂੰ 34-33 ਦੇ ਫਸਵੇਂ ਮੁਕਾਬਲੇ ਅਤੇ ਬਾਅਦ ਵਿੱਚ ਖੇਡੇ ਗਏ ਪੁਰਸ਼ ਵਰਗ ਦੇ ਮੈਚ ਵਿੱਚ ਅਮਰੀਕਾ ਨੇ ਇੰਗਲੈਂਡ ਨੂੰ 62-27 ਨਾਲ ਹਰਾ ਕੇ ਤੀਜਾ ਸਥਾਨ ਹਾਸਲ ਕੀਤਾ।ਪੁਰਸ਼ ਵਰਗ ਵਿੱਚ ਅਮਰੀਕਾ ਦੀ ਟੀਮ ਨੇ 51 ਲੱਖ ਰੁਪਏ ਅਤੇ ਮਹਿਲਾ ਵਰਗ ਵਿੱਚ ਡੈਨਮਾਰਕ ਟੀਮ ਨੇ 25 ਲੱਖ ਰੁਪਏ ਦੀ ਇਨਾਮ ਰਾਸ਼ੀ ਵੀ ਜਿੱਤੀ। ਇੰਗਲੈਂਡ ਦੀ ਟੀਮ ਪਹਿਲੀ ਵਾਰ ਵਿਸ਼ਵ ਕੱਪ ਦੇ ਸੈਮੀ ਫਾਈਨਲ ਵਿੱਚ ਪੁੱਜੀ ਸੀ ਭਾਵੇਂ ਉਹ ਤਮਗਾ ਜਿੱਤਣ ਤੋਂ ਵਾਂਝੀ ਹੋ ਗਈ ਫੇਰ ਵੀ ਕੈਨੇਡਾ ਨੂੰ ਲੀਗ ਮੈਚ ਵਿੱਚ ਹਰਾਉਣ ਵਾਲੀ ਇੰਗਲੈਂਡ ਨੇ ਪਹਿਲੀ ਵਾਰ ਪਹਿਲੀਆਂ ਚਾਰ ਟੀਮਾਂ ਵਿੱਚ ਸ਼ੁਮਾਰ ਹੋ ਕੇ ਅਗਲੇ ਸਾਲਾਂ ਲਈ ਦਾਅਵਾ ਮਜ਼ਬੂਤ ਕੀਤਾ। ਦੂਜੇ ਪਾਸੇ ਮਹਿਲਾ ਵਰਗ ਵਿੱਚ ਪਹਿਲੀ ਵਾਰ ਵਿਸ਼ਵ ਕੱਪ ਵਿੱਚ ਹਿੱਸਾ ਲੈਣ ਵਾਲੀ ਪਾਕਿਸਤਾਨ ਦੀ ਟੀਮ ਨੇ ਬਿਹਤਰ ਪ੍ਰਦਰਸ਼ਨ ਕਰਦਿਆਂ ਚੌਥਾ ਸਥਾਨ ਹਾਸਲ ਕੀਤਾ ਜਦੋਂ ਕਿ ਪਿਛਲੇ ਸਾਲ ਵਿਸ਼ਵ ਕੱਪ ਵਿੱਚ ਪਹਿਲੀ ਵਾਰ ਖੇਡਣ ਆਈ ਡੈਨਮਾਰਕ ਦੀ ਟੀਮ ਨੇ ਪਿਛਲੇ ਸਾਲ ਜਲੰਧਰ ਵਿਖੇ ਹੀ ਤੀਜਾ ਸਥਾਨ ਹਾਸਲ ਕੀਤਾ ਸੀ ਅਤੇ ਇਸ ਵਾਰ ਵੀ ਉਹ ਆਪਣੀ ਪੁਜ਼ੀਸਨ ਬਰਕਰਾਰ ਰੱਖਣ ਵਿੱਚ ਸਫਲ ਰਹੀ।
ਫਲੱਡ ਲਾਈਟਾਂ ਹੇਠ ਦੇਰ ਸ਼ਾਮ ਖੇਡੇ ਗਏ ਤੀਜੇ ਸਥਾਨ ਦੇ ਕੁਆਲੀਫਿਕੇਸ਼ਨ ਮੈਚਾਂ ਦਾ ਉਦਘਾਟਨ ਸਿੱਖਿਆ ਮੰਤਰੀ ਸ. ਸਿਕੰਦਰ ਸਿੰਘ ਮਲੂਕਾ, ਸੈਰ ਸਪਾਟਾ ਤੇ ਸੱਭਿਆਚਾਰ ਮਾਮਲੇ ਦੇ ਮੰਤਰੀ ਸ. ਸਰਵਣ ਸਿੰਘ ਫਿਲੌਰ, ਟਰਾਂਸਪੋਰਟ ਮੰਤਰੀ ਸ. ਅਜੀਤ ਸਿੰਘ ਕੋਹਾੜ, ਖੇਡਾਂ ਦੇ ਮੁੱਖ ਸੰਸਦੀ ਸਕੱਤਰ ਸ੍ਰੀ ਪਵਨ ਕੁਮਾਰ ਟੀਨੂੰ ਤੇ ਮੁੱਖ ਸੰਸਦੀ ਸਕੱਤਰ ਸ੍ਰੀ ਅਵਿਨਾਸ਼ ਚੰਦਰ ਨੇ ਖਿਡਾਰੀਆਂ ਨਾਲ ਜਾਣ-ਪਛਾਣ ਕਰ ਕੇ ਕੀਤੀ। ਮਹਿਲਾ ਵਰਗ ਦਾ ਮੈਚ ਬਹੁਤ ਫਸਵਾਂ ਰਿਹਾ। ਡੈਨਮਾਰਕ ਟੀਮ ਅੱਧੇ ਸਮੇਂ ਤੱਕ 19-14 ਨਾਲ ਅੱਗੇ ਸੀ ਪਰ ਦੂਜੇ ਅੱਧ ਵਿੱਚ ਪਾਕਿਸਤਾਨ ਦੀ ਟੀਮ ਨੇ ਇਕ ਵਾਰ ਤਾਂ ਡੈਨਿਸ਼ ਟੀਮ ਨੂੰ ਵਖਤ ਪਾ ਦਿੱਤਾ ਪਰ ਡੈਨਿਸ਼ ਟੀਮ ਅੰਤ ਤੱਕ ਲੀਡ ਕਾਇਮ ਰੱਖਦੀ ਹੋਈ ਸਿਰਫ ਇਕ ਅੰਕ ਦੇ ਫਰਕ (34-33) ਨਾਲ ਜਿੱਤ ਕੇ ਤੀਜਾ ਸਥਾਨ ਹਾਸਲ ਕਰਨ ਵਿੱਚ ਸਫਲ ਰਹੀ।ਪੁਰਸ਼ ਵਰਗ ਦੇ ਕੁਆਲੀਫਿਕੇਸ਼ਨ ਮੈਚ ਵਿੱਚ ਅਮਰੀਕਾ ਦੇ ਖਿਡਾਰੀਆਂ ਨੇ ਬਿਹਤਰ ਖੇਡ ਦਿਖਾਉਂਦਿਆਂ ਇੰਗਲੈਂਡ ਦਾ ਪਹਿਲੀ ਵਾਰ ਕੋਈ ਤਮਗਾ ਜਿੱਤਣ ਦਾ ਸੁਫਨਾ ਚਕਨਾਚੂਰ ਕਰ ਦਿੱਤਾ। ਅਮਰੀਕਾ ਦੀ ਟੀਮ ਅੱਧੇ ਸਮੇਂ ਤੱਕ 28-17 ਨਾਲ ਅੱਗੇ ਸੀ ਅਤੇ ਅੰਤ ਵਿੱਚ 62-27 ਅੰਕਾਂ ਦੇ ਫਰਕ ਨਾਲ ਮੈਚ ਜਿੱਤ ਲਿਆ। ਅਮਰੀਕਾ ਦੇ ਰੇਡਰਾਂ ਵਿੱਚੋਂ ਧਰਮਜੀਤ ਸੰਧੂ ਤੇ ਜੀਸਸ ਨੇ 15-15 ਅੰਕ ਲਏ ਜਦੋਂ ਕਿ ਜਾਫੀ ਮੀਕ ਸਿਆਟਲ ਨੇ 10 ਤੇ ਨਵਪ੍ਰੀਤ ਨੇ 5 ਜੱਫੇ ਲਾਏ। ਇੰਗਲੈਂਡ ਵੱਲੋਂ ਸਿਰਫ ਰੇਡਰ ਅਵਤਾਰ ਤਾਰੀ ਨੇ 9 ਅੰਕ ਅਤੇ ਜਾਫੀ ਅਮਨਦੀਪ ਰਿਆੜ ਨੇ 2 ਜੱਫੇ ਲਾ ਕੇ ਥੋੜਾਂ ਮੁਕਾਬਲਾ ਕਰਨ ਦੀ ਕੋਸ਼ਿਸ਼ ਕੀਤੀ।ਅੱਜ ਦੇ ਮੈਚਾਂ ਦੌਰਾਨ ਖੇਡ ਵਿਭਾਗ ਦੇ ਸਕੱਤਰ ਸ੍ਰੀ ਅਸ਼ੋਕ ਕੁਮਾਰ ਗੁਪਤਾ, ਖੇਡ ਲਿਵਭਾਗ ਦੇ ਡਾਇਰੈਕਟਰ ਸ੍ਰੀ ਸ਼ਿਵਦੁਲਾਰ ਸਿੰਘ ਢਿੱਲੋਂ, ਡਿਪਟੀ ਕਮਿਸ਼ਨਰ ਸ੍ਰੀ ਵਰੁਣ ਰੂਜ਼ਮ, ਵਿਸ਼ਵ ਕੱਪ ਲਈ ਖੇਡ ਵਿਭਾਗ ਦੇ ਸਹਾਇਕ ਡਾਇਰੈਕਟਰ ਸ੍ਰੀ ਇਕਬਾਲ ਸਿੰਘ ਸੰਧੂ ਆਦਿ ਹਾਜ਼ਰ ਸਨ।