ਸਮਾਜਿਕ ਬੁਰਾਈਆਂ ਦੇ ਹਰ ਪਹਿਲੂ ਨੂੰ ਆਪਣੀਆਂ ਫਿਲਮਾਂ ਨਾਟਕ ਤੇ ਕਾਮੇਡੀ ਦੇ ਰੂਪ ਵਿੱਚ ਧੜੱਲੇ ਨਾਲ ਉਜਾਗਰ ਕਰਨ ਵਾਲੇ ਕਮੇਡੀਅਨ ਗੁਰਚੇਤ ਚਿਤਰਕਾਰ ਨੇ ਕਿਹਾ ਕਿ ਉਹ ਸਮਾਜਿਕ ਮਿਸ਼ਨ ਨੂੰ ਪੂਰਾ ਕਰਨ ਹਿੱਤ ਕਿਸੇ ਵੀ ਧਮਕੀ ਤੋਂ ਨਹੀਂ ਡਰੇਗਾ।ਮੋਹਾਲੀ ਪ੍ਰੈਸ ਕਲੱਬ ਵਿੱਚ ਅੱਜ ਆਪਣੀ ਪੂਰੀ ਟੀਮ ਗੁਰਦੀਪ ਕਕਰਾਲਾ (ਮੱਦੀ) ਪ੍ਰਕਾਸ਼ ਗਦੂ(ਜੋਰਾ ਜੈਲਦਾਰ) ਜੀਤ ਪੈਂਚਰਾਂ ਵਾਲਾ ਤੇ ਦਮਨਦੀਪ ਸੰਧੂ ਪਹੁੰਚੇ ਅਜਾਇਬ ਚਿਤਰਕਾਰ ਨੇ ਕਿਹਾ ਕਿ ਉਹ ਹੁਣ ਤੱਕ ਫੈਮਿਲੀ 420 ਤੋਂ 427 ਤਕ 8 ਕੈਸਟਾਂ ਕਰ ਚੁੱਕੇ ਹਨ ਜਿਨ੍ਹਾਂ ਵਿੱਚ ਸਮਾਜ ਦੇ ਕਿਸੇ ਪੱਖ ਨੂੰ ਲੈ ਕੇ ਕਟਾਖਸ ਤੇ ਸਮਾਜ ਲਈ ਕੋਈ ਚੰਗਾ ਸੁਨੇਹਾ ਹੁੰਦਾ ਹੈ। ਇਹੀ ਕਾਰਨ ਹੈ ਕਿ ਉਨ੍ਹਾਂ ਦੀ ਕੈਸਟ ਫੈਮਿਲੀ 425, ਫੈਮਿਲੀ 426 ਤੇ ਹੁਣ ਫੈਮਿਲੀ 427 ਲਗਾਤਾਰ ਤੀਜੀ ਵਾਰ ਨਾਮੀਨੇਟ ਹੋ ਕੇ ਪਹਿਲਾ ਇਨਾਮ ਜਿੱਤਦੀ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੇ ਉਨ੍ਹਾਂ ਦੀ ਹਰ ਕੈਸਿਟ, ਨਾਟਕ ਨੂੰ ਵੱਡਾ ਪਿਆਰ ਦਿੱਤਾ ਹੈ ਜਿਸ ਕਾਰਨ ਉਹ ਅੱਜ ਇਸ ਮੁਕਾਮ ਤੇ ਪਹੁੰਚੇ ਹਨ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਪਰਿਵਾਰ ਦੀਆਂ ਔਰਤਾਂ ਉਨ੍ਹਾਂ ਦੀ ਹਰ ਫਿਲਮ ਜਾਂ ਨਾਟਕ ਦਾ ਸੈਂਸਰ ਬੋਰਡ ਹੁੰਦੀਆਂ ਹਨ ਜੋ ਪਰਿਵਾਰਕ , ਸਮਾਜਿਕ ਤੇ ਲੋਕ ਪੱਖੀ ਗੱਲਾਂ ਹੀ ਫਿਲਮਾਂ ਵਿੱਚ ਪਾਸ ਕਰਦੀਆਂ ਹਨ। ਬੇਬੇ ਜੀ ਮੈਂ ਸੰਤ ਬਂਣਗਿਆ ਨਾਟਕ ਬਾਰੇ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਪਖੰਡੀ ਸਾਧਾਂ, ਡੇਰਿਆਂ ਵਲੋਂ ਵਹਿਮਾਂ ਭਰਮਾਂ ਨਾਲ ਲੁੱਟੀ ਜਾਂਦੀ ਭੋਲੀ ਭਾਲੀ ਜਨਤਾ ਨੂੰ ਬਚਾਉਣ ਦਾ ਸੁਨੇਹਾ ਦਿੱਤਾ ਸੀ ਪਰ ਪਾਖੰਡੀ ਬਾਬਿਆਂ ਨੇ ਉਨ੍ਹਾਂ ਨੂੰ ਬਹੁਤ ਧਮਕੀਆਂ ਦਿੱਤੀਆਂ ਪਰ ਉਹ ਆਪਣੇ ਕੰਮ ਤੇ ਅਡੋਲ ਰਹੇ ਹਨ।ਫੈਮਿਲੀ 2012 ਕੈਸਟ ਵਿੱਚ ਉਨ੍ਹਾਂ ਨੇ 2012 ਵਿੱਚ ਧਰਤੀ ਦੇ ਤਬਾਹ ਹੋ ਜਾਣ ਤੇ ਪਖੰਡੀ ਲੋਕਾਂ ਤੇ ਕਟਾਖਸ਼ ਕਸਿਆ ਸੀ ਜੋ ਇਸ ਵਾਰ ਪਹਿਲੇ ਨੰਬਰ ਤੇ ਆਈ ਹੈ। ਬੇਬੇ ਨੀ ਮੈਂ ਸੰਤ ਬਣ ਗਿਆ ਵਿੱਚ 36 ਪਾਤਰ ਹਨ ਜਿਸ ਨੂੰ ਬੈਸਟ ਕਾਮੇਡੀ ਦਾ ਆਵਾਰਡ ਮਿਲਿਆ ਹੈ।ਉਨ੍ਹਾਂ ਕਿਹਾ ਕਿ ਪੰਜਾਬੀ ਫਿਲਮਾਂ ਦਾ ਭਵਿੱਖ ਹੁਣ ਚੰਗਾ ਹੋ ਰਿਹਾ ਹੈ ਤੇ ਹਿੰਦੀ ਫਿਲਮਾਂ ਵਾਲੇ ਵੀ ਇਸ ਖੇਤਰ ਵੱਲ ਆ ਰਹੇ ਹਨ।