ਪੰਜਾਬ ਸਰਕਾਰ ਵੱਲੋਂ ਸੂਬਾ ਵਾਸੀਆਂ ਨੂੰ ਸ਼ੁੱਧ ਅਤੇ ਮਿਲਾਵਟ ਰਹਿਤ ਭੋਜਨ ਪਦਾਰਥ ਮੁਹੱਈਆ ਕਰਵਾਉਣ ਦੇ ਮਕਸਦ ਨਾਲ ਚਲਾਏ ਜਾ ਰਹੇ 'ਮਿਸ਼ਨ ਤੰਦਰੁਸਤ ਪੰਜਾਬ' ਤਹਿਤ 'ਕਮਿਸ਼ਨਰ ਫੂਡ ਐਂਡ ਡਰੱਗਜ਼ ਐਡਮਿਨਸਟ੍ਰੇਸ਼ਨ ਪੰਜਾਬ' ਸ. ਕਾਹਨ ਸਿੰਘ ਪੰਨੂੰ ਦੇ ਦਿਸ਼ਾ-ਨਿਰਦੇਸ਼ਾਂ 'ਤੇ ਕੀਤੀ ਜਾ ਰਹੀ 'ਫੂਡ ਸੈਂਪਲਿੰਗ' ਦੇ ਨਾਲ-ਨਾਲ ਆਮ ਲੋਕਾਂ ਨੂੰ ਜਾਗਰੂਕ ਕਰਨ ਲਈ ਅੱਜ ਡਿਪਟੀ ਕਮਿਸ਼ਨਰ ਇੰਜੀ: ਡੀ. ਪੀ. ਐਸ ਖਰਬੰਦਾ ਵੱਲੋਂ 'ਫੂਡ ਸੇਫਟੀ ਮੋਬਾਈਲ ਵੈਨ' ਨੂੰ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ ਗਿਆ। ਡਿਪਟੀ ਕਮਿਸ਼ਨਰ ਨੇ ਇਸ ਮੌਕੇ ਦੱਸਿਆ ਕਿ ਇਹ ਫ਼ੂਡ ਸੇਫ਼ਟੀ ਮੋਬਾਈਲ ਵੈਨ ਮਿਆਰੀ ਭੋਜਨ ਪਦਾਰਥਾਂ ਲਈ ਲੋਕਾਂ ਨੂੰ ਜਾਗਰੂਕ ਕਰੇਗੀ। ਉਨਾਂ ਕਿਹਾ ਕਿ ਜ਼ਿਲੇ ਦੇ ਵੱਖ-ਵੱਖ ਇਲਾਕਿਆਂ ਵਿਚ ਅੱਜ ਤੋਂ 15 ਦਿਨ ਤੱਕ ਵਿਚਰਨ ਵਾਲੀ ਇਸ ਮੋਬਾਇਲ ਵੈਨ ਦੇ ਸਟਾਫ਼ ਪਾਸੋਂ ਨਾਮਾਤਾਰ ਫ਼ੀਸ 'ਤੇ ਖਾਣ-ਪੀਣ ਵਾਲੀਆਂ ਵਸਤਾਂ ਨਾਲ ਸਬੰਧਤ ਟੈਸਟ ਕਰਵਾ ਕੇ ਮੌਕੇ 'ਤੇ ਹੀ ਰਿਪੋਰਟ ਹਾਸਲ ਕੀਤੀ ਜਾ ਸਕਦੀ ਹੈ। ਉਨਾਂ ਕਿਹਾ ਕਿ ਸਰਕਾਰ ਵੱਲੋਂ ਆਪਣੇ ਪੱਧਰ 'ਤੇ ਫ਼ੂਡ ਸੇਫ਼ਟੀ ਟੀਮਾਂ ਰਾਹੀਂ ਕਰਵਾਈ ਜਾਂਦੀ ਚੈਕਿੰਗ ਪਹਿਲਾਂ ਦੀ ਤਰਾਂ ਜਾਰੀ ਰਹੇਗੀ ਅਤੇ ਇਹ ਮੋਬਾਈਲ ਵੈਨ ਉਸ ਤੋਂ ਵੱਖਰੀ ਹੋਵੇਗੀ ਜੋ ਕਿ ਲੋਕਾਂ ਨੂੰ ਮੌਕੇ 'ਤੇ ਹੀ ਰਿਪੋਰਟ ਦੇ ਕੇ ਖਾਣ-ਪੀਣ ਵਾਲੇ ਪਦਾਰਥਾਂ ਦੇ ਸ਼ੁੱਧ ਜਾਂ ਅਸ਼ੁੱਧ ਹੋਣ ਬਾਰੇ ਦੱਸੇਗੀ।
ਇਸ ਮੌਕੇ ਮੌਜੂਦ ਸਹਾਇਕ ਕਮਿਸ਼ਨਰ ਫੂਡ ਡਾ. ਹਰਜੋਤ ਪਾਲ ਸਿੰਘ ਨੇ ਦੱਸਿਆ ਕਿ ਇਸ ਮੋਬਾਈਲ ਵੈਨ ਰਾਹੀਂ ਪਾਣੀ ਵਿੱਚ ਟੀ ਡੀ ਐਸ, ਤੇਜ਼ਾਬੀ ਮਾਦਾ, ਕੁਚਾਲਕਤਾ, ਦੁੱਧ ਵਿੱਚ ਫ਼ੈਟ, ਠੋਸ ਪਦਾਰਥ, ਟੋਟਲ ਪ੍ਰੋਟੀਨ, ਸਟਾਰਚ ਤੇ ਯੂਰੀਆ ਆਦਿ, ਠੰਡਿਆਂ/ਜੂਸ ਵਿੱਚ ਸ਼ੱਕਰ ਦਾ ਪੱਧਰ, ਹਲਦੀ ਤੇ ਮਿਰਚਾਂ ਵਿੱਚ ਕੀਤੀ ਜਾਂਦੀ ਰੰਗ ਤੇ ਹੋਰ ਮਿਲਾਵਟ, ਮੈਦਾ, ਆਟਾ, ਵੇਸਣ ਵਿੱਚ ਹੁੰਦੀ ਮਿਲਾਵਟ ਅਤੇ ਘਿਉ ਵਿੱਚ ਕੀਤੀ ਜਾਂਦੀ ਡਾਲਡੇ ਦੀ ਮਿਲਾਵਟ ਨੂੰ ਮੌਕੇ 'ਤੇ ਹੀ ਦੱਸਿਆ ਜਾਵੇਗਾ ਅਤੇ ਇਸ ਲਈ ਕੇਵਲ 50 ਰੁਪਏ ਦੀ ਸਰਕਾਰੀ ਫ਼ੀਸ ਹੀ ਲਈ ਜਾਵੇਗੀ।ਮੌਕੇ 'ਤੇ ਮੌਜੂਦ ਸਿਵਲ ਸਰਜਨ ਡਾ. ਬਲਵੰਤ ਸਿੰਘ ਨੇ ਦੱਸਿਆ ਕਿ ਜ਼ਿਲੇ ਵਿੱਚ 'ਤੰਦਰੁਸਤ ਪੰਜਾਬ ਸਿਹਤ ਮਿਸ਼ਨ' ਤਹਿਤ ਲੋਕਾਂ ਦੇ ਮੈਡੀਕਲ ਚੈੱਕ ਅਪ ਤੇ ਸਿਹਤ ਜਾਗਰੂਕਤਾ ਲਈ ਪਹਿਲਾਂ ਤਿੰਨ ਵੈਨਾਂ ਚਲਾਏ ਜਾਣ ਬਾਅਦ ਅੱਜ ਸਰਕਾਰ ਵੱਲੋਂ ਖਾਣ-ਪੀਣ ਦੇ ਪਦਾਰਥਾਂ ਵਿੱਚ ਮਿਲਾਵਟ ਪ੍ਰਤੀ ਜਾਗਰੂਕਤਾ ਲਿਆਉਣ ਲਈ ਇਹ ਮੋਬਾਈਲ ਫ਼ੂਡ ਸੇਫ਼ਟੀ ਵੈਨ ਚਲਾਈ ਗਈ ਹੈ। ਉਨਾਂ ਜ਼ਿਲੇ ਦੇ ਲੋਕਾਂ ਨੂੰ ਇਨਾਂ ਵੈਨਾਂ ਦਾ ਵੱਧ ਤੋਂ ਵੱਧ ਲਾਭ ਉਠਾਉਣ ਦੀ ਅਪੀਲ ਕੀਤੀ। ਮੌਕੇ ਵਧੀਕ ਡਿਪਟੀ ਕਮਿਸ਼ਨਰ (ਜ) ਸ੍ਰੀ ਰਾਹੁਲ ਚਾਬਾ, ਸ. ਅਵਤਾਰ ਸਿੰਘ ਭੁੱਲਰ, ਡਾ. ਸ਼ਿਖਾ ਭਗਤ, ਡਾ. ਨਯਨ, ਡਾ. ਚਾਰੂਮਿਤਾ, ਡੀ. ਐਸ. ਪੀ ਸ. ਸਰਬਜੀਤ ਸਿੰਘ ਬਾਹੀਆ, ਸਿਵਲ ਸਰਜਨ ਡਾ. ਬਲਵੰਤ ਸਿੰਘ, ਤਹਿਸੀਲਦਾਰ ਸ. ਮਨਵੀਰ ਸਿੰਘ ਢਿੱਲੋਂ, ਏ. ਪੀ. ਆਰ. ਓ ਹਰਦੇਵ ਸਿੰਘ ਆਸੀ, ਫੂਡ ਸੇਫਟੀ ਅਫ਼ਸਰ ਸ. ਸਤਨਾਮ ਸਿੰਘ, ਮੈਡਮ ਅੰਜੂ ਬਾਲਾ, ਸ. ਦਵਿੰਦਰ ਪਾਲ ਸਿੰਘ ਆਹੂਜਾ ਅਤੇ ਹੋਰ ਹਾਜ਼ਰ ਸਨ।