ਮਿਸ਼ਨ ਤੰਦਰੁਸਤ ਪੰਜਾਬ ਅਧੀਨ ਇਲਾਕਾ ਨਿਵਾਸੀਆਂ ਨੂੰ ਪ੍ਰਦੂਸ਼ਣ ਮੁਕਤ ਅਤੇ ਹਰਾ ਭਰਾ ਮਾਹੌਲ ਉਪਲੱਬਧ ਕਰਵਾਉਣ ਲਈ ਜ਼ਿਲਾ ਪ੍ਰਸ਼ਾਸਨ ਬਠਿੰਡਾ ਅਤੇ ਸਟੇਟ ਬੈਕ ਆਫ ਇੰਡੀਆ ਵੱਲੋਂ 21 ਈ ਰਿਕਸ਼ਾ ਜ਼ਿਲਾ ਪ੍ਰਬੰਧਕੀ ਕੰਪਲੈਕਸ ਤੋਂ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤੇ ਗਏ। ਡਿਪਟੀ ਕਮਿਸ਼ਨਰ, ਬਠਿੰਡਾ ਪ੍ਰਨੀਤ, ਵਧੀਕ ਡਿਪਟੀ ਕਮਿਸ਼ਨਰ (ਵਿਕਾਸ) ਸਾਕਸ਼ੀ ਸਾਹਨੀ, ਕਮਿਸ਼ਨਰ ਨਗਰ ਨਿਗਮ ਡਾ.ਰਿਸ਼ੀ ਪਾਲ, ਚੀਫ਼ ਜਨਰਲ ਮੈਨੇਜਰ ਐਸ.ਬੀ.ਆਈ. ਸ਼੍ਰੀ ਰਾਣਾ ਆਸ਼ੂਤੋਸ਼ ਕੁਮਾਰ ਸਿੰਘ, ਡੀ.ਜੀ.ਐਮ. ਸ਼੍ਰੀ ਅਜਮੇਰ ਸੇਠੀ, ਆਰ.ਐਮ. ਸ਼੍ਰੀ ਸੁਰੇਸ਼ ਗੋਇਲ, ਏ.ਜੀ.ਐਮ. ਸ਼੍ਰੀ ਰਾਕੇਸ਼ ਜਿੰਦਲ, ਏ.ਜੀ.ਐਮ ਸ਼੍ਰੀ ਸੋਮ ਨਾਥ ਗੋਇਲ, ਚੀਫ਼ ਮੈਨੇਜਰ ਸ਼੍ਰੀ ਬਲਜੀਤ ਸਿੰਘ, ਚੀਫ਼ ਮੈਨੇਜਰ ਸ਼੍ਰੀ ਪ੍ਰੇਮ ਗਰਗ, ਚੀਫ਼ ਮੈਨੇਜਰ ਸ਼੍ਰੀ ਈਸ਼ਵਰ ਗਰਗ, ਮੈਨੇਜਰ ਸ਼੍ਰੀ ਅਮਿਤ ਬਾਂਸਲ, ਡਿਪਟੀ ਮੈਨੇਜਰ ਸ਼੍ਰੀ ਰਾਜੀਵ ਟੀਨਾ, ਸ਼੍ਰੀ ਰਾਜੇਸ਼ ਰੰਜਨ ਅਤੇ ਡਿਪਟੀ ਮੈਨੇਜਰ ਸ਼੍ਰੀ ਵਿਕਰਮ ਸ਼ਾਹ ਨੇ ਈ-ਰਿਕਸ਼ਿਆਂ ਨੂੰ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ।ਇਸ ਮੌਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਡਿਪਟੀ ਕਮਿਸ਼ਨਰ ਸ਼੍ਰੀ ਪ੍ਰਨੀਤ ਅਤੇ ਚੀਫ਼ ਜਨਰਲ ਮੈਨੇਜਰ ਐਸ.ਬੀ.ਆਈ. ਸ਼੍ਰੀ ਰਾਣਾ ਆਸ਼ੂਤੋਸ਼ ਕੁਮਾਰ ਸਿੰਘ ਨੇ ਦੱਸਿਆ ਕਿ ਈ-ਰਿਕਸ਼ਾ ਖ੍ਰੀਦਣ ਵਾਲੇ 21 ਵਿਅਕਤੀਆਂ ਨੂੰ ਕੁੱਲ 23.62 ਲੱਖ ਰੁਪਏ ਦਾ ਕਰਜ਼ਾ ਪ੍ਰਧਾਨ ਮੰਤਰੀ ਮੁਦਰਾ ਸਕੀਮ ਅਧੀਨ ਦਿੱਤਾ ਗਿਆ ਹੈ। ਇਸ ਦਿੱਤੇ ਗਏ ਕਰਜ਼ੇ ਲਈ ਕਿਸੇ ਵੀ ਪ੍ਰਕਾਰ ਦੀ ਸਬੰਧਤ ਤੋਂ ਕੋਈ ਗਾਰੰਟੀ ਨਹੀਂ ਲਈ ਗਈ ਹੈ।
ਹਰ ਇੱਕ ਵਿਅਕਤੀ ਨੂੰ 1.10 ਲੱਖ ਰੁਪਏ ਤੋਂ ਲੈ ਕੇ 1.30 ਲੱਖ ਰੁਪਏ ਦਾ ਕਰਜ਼ਾ ਘੱਟ ਵਿਆਜ਼ ਅਤੇ ਆਸਾਨ ਕਿਸਤਾਂ 'ਤੇ ਦਿੱਤਾ ਗਿਆ ਹੈ, ਜਿਹੜਾ ਕਿ ਉਹ ਅਗਲੇ 5 ਸਾਲਾਂ ਵਿਚ ਵਾਪਿਸ ਦੇ ਕੇ ਸਕਣਗੇ। ਉਨਾਂ ਕਿਹਾ ਕਿ ਇਸ ਨਾਲ ਨਾ ਸਿਰਫ਼ ਗਰੀਬ ਨੂੰ ਰੋਟੀ ਜੁੜੀ ਹੈ ਬਲਕਿ ਉਹ ਆਪਣੇ ਕਿੱਤੇ (ਈ-ਰਿਕਸ਼ਾ) ਦਾ ਖੁਦ ਮਾਲਕ ਵੀ ਬਣਿਆ ਹੈ। ਉਨਾਂ ਕਿਹਾ ਕਿ ਸਟੇਟ ਬੈਂਕ ਆਫ਼ ਇੰਡੀਆ ਵਲੋਂ ਹੋਰ ਈ-ਰਿਕਸ਼ੇ ਵੀ ਇਸੇ ਤਰਾਂ ਮੁਹੱਈਆ ਕਰਵਾਏ ਜਾਣਗੇ। ਜੇਕਰ ਕੋਈ ਵੀ ਵਿਅਕਤੀ ਇਹ ਰਿਕਸ਼ਾ ਲੈਣਾ ਚਾਹੁੰਦਾ ਹੈ ਤਾਂ ਉਹ ਆਪਣੇ ਨਜ਼ਦੀਕ ਦੀ ਸਟੇਟ ਬੈਂਕ ਆਫ਼ ਇੰਡੀਆ ਦੀ ਬ੍ਰਾਂਚ ਨਾਲ ਸੰਪਰਕ ਕਰ ਸਕਦੇ ਹਨ। ਬੈਂਕ ਦੇ ਇਸ ਕਾਰਜ ਦੀ ਸ਼ਲਾਘਾ ਕਰਦਿਆਂ ਡਿਪਟੀ ਕਮਿਸ਼ਨਰ ਸ਼੍ਰੀ ਪ੍ਰਨੀਤ ਨੇ ਕਿਹਾ ਕਿ ਜ਼ਿਲਾ ਪ੍ਰਸਾਸ਼ਨ ਵਲੋਂ ਤੰਦਰੁਸਤ ਪੰਜਾਬ ਮਿਸ਼ਨ ਤਹਿਤ ਕਰਵਾਈ ਗਈ ਵਾਕਾਥਨ ਵਿੱਚ ਵੀ ਬੈਂਕ ਨੇ ਹਿੱਸਾ ਪਾਇਆ ਸੀ, ਜਿਸ ਦਾ ਲੋਕਾਂ ਤੋਂ ਵੱਡਾ ਹੁੰਗਾਰਾ ਮਿਲਿਆ। ਅੱਜ ਐਸ.ਬੀ.ਆਈ. ਵਲੋਂ ਨਵੀਂ ਮੋਬਾਇਲ ਏ.ਟੀ.ਐਮ. ਵੈਨ ਵੀ ਸ਼ੁਰੂ ਕੀਤੀ ਗਈ ਜਿਹੜੀ ਕਿ 15 ਲੱਖ ਰੁਪਏ ਦੀ ਲਾਗਤ ਨਾਲ ਤਿਆਰ ਕੀਤੀ ਗਈ ਹੈ। ਇਹ ਇੱਕ ਤਰੀਕੇ ਦਾ ਮਿੰਨੀ ਬੈਂਕ ਹੈ ਜਿਸ ਵਿੱਚ ਏ.ਟੀ.ਐਮ. ਤੋਂ ਇਲਾਵਾ ਨਵਾਂ ਖਾਤਾ ਖੋਲਣ ਸਬੰਧੀ ਸੁਵਿਧਾ, ਕਰਜ਼ਿਆ ਸਬੰਧੀ ਜਾਣਕਾਰੀ ਅਤੇ ਹੋਰ ਸੇਵਾਵਾਂ ਦੀਆਂ ਸੁਵਿਧਾਵਾਂ ਉਪਲੱਬਧ ਹਨ। ਇਹ ਵੈਨ ਬਠਿੰਡਾ ਸ਼ਹਿਰ ਅਤੇ ਕੈਂਟ ਦੇ ਇਲਾਕਿਆਂ ਵਿੱਚ ਚਲਾਈ ਜਾਵੇਗੀ।