ਵਿਧਾਨ ਸਭਾ ਹਲਕਾ ਦਾਖਾ ਅੰਦਰ ਵਿਧਾਇਕ ਮਨਪ੍ਰੀਤ ਸਿੰਘ ਇਆਲੀ ਵੱਲੋਂ ਪਿੰਡ ਗੁੱਜਰਵਾਲ ਵਿਖੇ ਬਣਾਏ ਆਧੂਨਿਕ ਮਲਟੀਪਰਪਜ਼ ਖੇਡ ਗਰਾਊਂਡ ਕਮ ਪਾਰਕ ਨੂੰ ਵੇਖ ਉੱਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਇਸ ਕਦਰ ਕਾਇਲ ਹੋ ਗਏ ਕਿ ਉਹਨਾਂ ਨੇ ਆਪਣੇ ਹਲਕੇ ਸ਼੍ਰੀ ਮੁਕਤਸਰ ਸਾਹਿਬ ਦੇ ਡੀ ਸੀ ਨੂੰ ਖੇਡ ਗਰਾਉਂਡ ਅਤੇ ਢੈਪਈ ਵਿਖੇ ਬਣਾਏ ਪੋਂਡ ਦਾ ਜਾਇਜਾ ਲੈਣ ਦੇ ਆਦੇਸ਼ ਦੇ ਦਿੱਤੇ। ਸ. ਸੁਖਬੀਰ ਬਾਦਲ ਨੇ ਵਿਧਾਇਕ ਮਨਪ੍ਰੀਤ ਸਿੰਘ ਇਆਲੀ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਸੂਬੇ ਵਿਚ ਜਿਹੜੇ ਸਮਾਰਟ ਪਿੰਡ ਬਣਾਉਣ ਦਾ ਮੈਂ ਸੁਪਨਾ ਲਿਆ ਉਸਨੂੰ ਵਿਧਾਇਕ ਇਆਲੀ ਅਤੇ ਅਫਸਰਾਂ ਨੇ ਪ੍ਰੋਜੈਕਟਾਂ ਨੂੰ ਅਮਲੀ ਜਾਮਾ ਪਹਿਨਾ ਕੇ ਬੂਰ ਵੀ ਪਾ ਦਿੱਤਾ ਹੈ। ਉਹਨਾਂ ਹਰੇਕ ਵਰਗ ਨੂੰ ਸਹੁਲਤ ਦੇਣ ਲਈ ਖੇਡ ਗਰਾਉਂਡ ਵਿੱਚ ਜਿਮ ਬਣਾਉਣ ਦੇ ਨਾਲ ਪਿੰਡ ਢੈਪਈ ਵਿਖੇ ਗੰਦੇ ਪਾਣੀ ਦੀ ਨਿਕਾਸੀ ਜੜੋਂ ਪੁੱਟਣ ਲਈ ਪਿੰਡ ਢੈਪਈ ਵਿਖੇ ਬਣੇ ਪ੍ਰੋਜੈਕਟ ਦਾ ਦੌਰਾ ਵੀ ਕੀਤਾ। ਸੁਖਬੀਰ ਬਾਦਲ ਦੇ ਆਦੇਸ਼ਾਂ ਤੇ ਸ੍ਰੀ ਮੁਕਤਸਰ ਸਾਹਿਬ ਦੇ ਡੀ ਸੀ ਡਾ ਸ੍ਰੀ ਸੁਮੀਤ ਜਾਰੰਗਲ ਅਤੇ ਸ੍ਰੀਮਤੀ ਸਾਕਸ਼ੀ ਸਾਹਨੀ ਆਈ ਏ ਐਸ (ਅੰਡਰ ਟਰੇਨਿੰਗ), ਐਕਸੀਅਨ ਪੰਚਾਇਤੀ ਰਾਜ ਅਤੇ ਡੀ ਐਸ ਓ ਆਦਿ ਆਪਣੀਆਂ ਟੀਮਾਂ ਨਾਲ ੨ ਘੰਟੇ ਦੇ ਅੰਦਰ ਅੰਦਰ ਨੈਚੁਰਲ ਟ੍ਰੀਟਮੈਂਟ ਪੋਂਡ ਢੈਪਈ ਅਤੇ ਮਲਟੀਪਰਪਜ਼ ਸਪੋਰਟਸ ਪਾਰਕ ਗੁੱਜਰਵਾਲ ਪੁੱਜੇ ਅਤੇ ਟੀਮ ਨਾਲ ਮਿਲ ਕੇ ਉਹਨਾਂ ਨੇ ਇਸਦੀ ਸਾਰੀ ਵਿਉਂਤਬੰਦੀ ਅਤੇ ਵੇਰਵੇ ਪ੍ਰਾਪਤ ਕੀਤੇ। ਉਹਨਾਂ ਕਿਹਾ ਕਿ ਗੰਦੇਪਾਣੀ ਦੀ ਨਿਕਾਸੀ ਦਾ ਪੋਂਡ ਬਣਾਕੇ ਬਹੁਤ ਵਧੀਆ ਹੱਲ ਕੱਢਿਆ ਹੋਇਆ ਹੈ ਅਤੇ ਇਹ ਪ੍ਰੋਜੈਕਟ ਆਪਣੇ ਹਲਕੇ ਵਿੱਚ ਲਗਾ ਕੇ ਲਾਹਾ ਲੈਣਗੇ। ਡੀ ਸੀ ਜਾਰੰਗਲ ਨੇ ਕਿਹਾ ਕਿ ਉੱਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦਾ ਕਹਿਣਾ ਹੈ ਕਿ ਇਹ ਪ੍ਰੋਜੈਕਟ ਪੰਜਾਬ ਦੇ ਸਾਰੇ ਜਿਲਿਆਂ 'ਚ ਲਗਾ ਕੇ ਸੂਬੇ ਨੂੰ ਅਗਾਂਹਵਧੂ ਬਣਾਇਆ ਜਾਵੇਗਾ। ਇਹਨਾਂ ਪ੍ਰੋਜੈਕਟਾਂ ਦੀ ਡੀ ਸੀ ਜਾਰੰਗਲ ਨੇ ਵਿਧਾਇਕ ਮਨਪ੍ਰੀਤ ਸਿੰਘ ਇਆਲੀ ਅਤੇ ਉਹਨਾਂ ਨਾਲ ਕੰਮ ਮਰਨ ਵਾਲੀ ਟੀਮ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਇਹ ਪ੍ਰੋਜੈਕਟ ਜਿਲਿਆਂ ਵਿੱਚ ਲਗਾਉਣ ਲਈ ਸੂਬਾ ਸਰਕਾਰ ਤੱਤਪਰ ਹੈ, ਜਿਸ ਤੋਂ ਸੂਬੇ ਦੇ ਲੋਕ ਲਾਭ ਲੈ ਕੇ ਆਪਣਾ ਜੀਵਨ ਪੱਧਰ ਹੋਰ ਉੱਚਾ ਕਰਨਗੇ।