ਸਿੰਚਾਈ ਮੰਤਰੀ, ਪੰਜਾਬ ਜਨਮੇਜਾ ਸਿੰਘ ਸੇਖੋਂ ਨੇ ਪੰਜਾਬ ਦੇ ਡੈਮਾਂ ਵਿੱਚ ਪਾਣੀ ਦੀ ਲਗਾਤਾਰ ਘੱਟ ਰਹੀ ਆਮਦ ਦੇ ਮੱਦੇਨਜ਼ਰ ਪੰਜਾਬ ਦੇ ਕਿਸਾਨਾਂ ਨੂੰ ਝੋਨੇ ਦੀ ਬਿਜਾਈ ਸਮੇਂ ਸੰਜਮ ਵਰਤਦਿਆਂ ਘੱਟ ਤੋਂ ਘੱਟ ਪਾਣੀ ਵਰਤਣ ਦੀ ਅਪੀਲ ਕੀਤੀ। ਇੱਥੇ ਪ੍ਰੈਸ ਨੂੰ ਜਾਰੀ ਬਿਆਨ ਵਿੱਚ ਸੇਖੋਂ ਨੇ ਕਿਹਾ ਕਿ ਪਹਾੜਾਂ ਵਿੱਚ ਬਰਫ਼ ਉਸ ਰਫ਼ਤਾਰ ਨਾਲ ਨਹੀਂ ਪਿੰਘਲ ਰਹੀ, ਜਿਵੇਂ ਇਸ ਸੀਜ਼ਨ ਵਿੱਚ ਗਰਮੀ ਕਾਰਨ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਕਾਰਨ ਡੈਮਾਂ ਵਿੱਚ ਪਾਣੀ ਦੀ ਆਮਦ ਲਗਾਤਾਰ ਘੱਟ ਰਹੀ ਹੈ। ਸੇਖੋਂ ਨੇ ਕਿਹਾ ਕਿ ਅੱਜ ਦੇ ਦਿਨ ਪੌਂਗ ਡੈਮ ਵਿੱਚ ਪਾਣੀ ਦਾ ਪੱਧਰ 1299.64 ਫ਼ੁਟ ਹੈ, ਜੋ ਪਿਛਲੇ ਸਾਲ ਨਾਲੋਂ 50.22 ਫ਼ੁਟ ਘੱਟ ਹੈ। ਉਨ੍ਹਾਂ ਦੱਸਿਆ ਕਿ ਭਾਖੜਾ ਡੈਮ ਵਿੱਚ ਅੱਜ ਦੇ ਦਿਨ ਪਾਣੀ ਦਾ ਪੱਧਰ 1527.62 ਫ਼ੁਟ ਹੈ, ਜੋ ਪਿਛਲੇ ਸਾਲ ਨਾਲੋਂ 50.46 ਫ਼ੁਟ ਘੱਟ ਹੈ। ਸੇਖੋਂ ਨੇ ਦੱਸਿਆ ਕਿ ਡੈਮਾਂ ਵਿੱਚ ਪਾਣੀ ਦਾ ਪੱਧਰ ਹਰ ਰੋਜ਼ ਤਕਰੀਬਨ 1 ਫ਼ੁਟ ਹੇਠਾਂ ਜਾ ਰਿਹਾ ਹੈ। ਸਿੰਚਾਈ ਮੰਤਰੀ ਨੇ ਇਹ ਵੀ ਦੱਸਿਆ ਕਿ ਜੇ ਹਾਲਾਤ ਇਸੇ ਤਰ੍ਹਾਂ ਬਣੇ ਰਹੇ ਤਾਂ ਮਜਬੂਰਨ ਨਹਿਰਾਂ ਨੂੰ ਹਫ਼ਤਾਵਾਰੀ ਚਲਾਉਣਾ ਪਵੇਗਾ। ਉਨ੍ਹਾਂ ਦੱਸਿਆ ਕਿ ਮੌਜੂਦਾ ਸਮੇਂ ਵੀ ਪਾਣੀ ਦੀ ਆਮਦ ਘੱਟ ਹੋਣ ਕਾਰਨ ਹਰ ਇੱਕ ਡਿਵੀਜ਼ਨ ਦੀ ਇੱਕ-ਇੱਕ ਨਹਿਰ ਨੂੰ ਹਫ਼ਤਾਵਾਰੀ ਚਲਾਇਆ ਜਾ ਰਿਹਾ ਹੈ। ਉਨ੍ਹਾਂ ਕਿਸਾਨ ਵੀਰਾਂ ਨੂੰ ਅਪੀਲ ਕੀਤੀ ਕਿ ਸਮੇਂ ਦੀ ਨਜ਼ਾਕਤ ਅਤੇ ਕੁਦਰਤ ਦੇ ਕਹਿਰ ਨੂੰ ਸਮਝਦਿਆਂ ਝੋਨੇ ਦੀ ਬਿਜਾਈ ਸਮੇਂ ਪਾਣੀ ਨੂੰ ਸੰਜਮ ਨਾਲ ਵਰਤਣ ਤਾਂ ਕਿ ਭਵਿੱਖ ਵਿੱਚ ਪਾਣੀ ਦੀ ਕਿੱਲਤ ਪੇਸ਼ ਨਾ ਆ ਸਕੇ।