ਖੰਨਾ ਤੋਂ ਵਿਧਾਇਕ ਗੁਰਕੀਤ ਸਿੰਘ ਕੋਟਲੀ ਨੇ ਕਿਹਾ ਹੈ ਕਿ ਲੁਧਿਆਣਾ ਲੋਕ ਸਭਾ ਸੀਟ ਤੋਂ ਕਾਂਗਰਸ ਉਮੀਦਵਾਰ ਰਵਨੀਤ ਸਿੰਘ ਬਿੱਟੂ ਨੂੰ ਮਿਲ ਰਹੇ ਜਨ ਸਮਰਥਨ ਨਾਲ ਉਨ੍ਹਾਂ ਦੇ ਵਿਰੋਧੀ ਘਬਰਾ ਰਹੇ ਹਨ, ਜਿਹੜਾ ਡਰ ਉਨ੍ਹਾਂ ਵੱਲੋਂ ਕੀਤੀ ਜਾ ਰਹੀ ਬਿਆਨਬਾਜੀ 'ਚ ਸਾਫ ਨਜ਼ਰ ਆ ਰਿਹਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਲੋਕ ਸੱਤਾਧਾਰੀ ਅਕਾਲੀ ਭਾਜਪਾ ਗਠਜੋੜ ਦੀਆਂ ਧੱਕੇਸ਼ਾਹੀਆਂ ਤੇ ਮੌਕਾਪ੍ਰਸਤੀ ਦੀ ਧੋਖੇਬਾਜੀ ਤੋਂ ਤੰਗ ਆ ਚੁੱਕੇ ਹਨ ਤੇ ਇਸ ਵਾਰ ਇਕ ਬਲਿਦਾਨੀ ਤੇ ਇਮਾਨਦਾਰ ਪਰਿਵਾਰ ਨਾਲ ਸਬੰਧ ਰੱਖਣ ਵਾਲੇ ਮਿਹਨਤੀ ਆਗੂ ਰਵਨੀਤ ਬਿੱਟੂ ਨੂੰ ਸੰਸਦ 'ਚ ਲੁਧਿਆਣਾ ਦੀ ਅਗਵਾਈ ਦੇਣਾ ਚਾਹੁੰਦੇ ਹਨ। ਕੋਟਲੀ ਆਤਮ ਨਗਰ ਵਿਧਾਨ ਸਭਾ ਹਲਕੇ 'ਚ ਚੋਣ ਪ੍ਰਚਾਰ ਕਰ ਰਹੇ ਸਨ। ਜਿਥੇ ਉਨ੍ਹਾਂ ਨਾਲ ਸੀਨੀਅਰ ਕਾਗਰਸੀ ਆਗੂ ਕੇ.ਕੇ ਬਾਵਾ ਵੀ ਮੌਜ਼ੂਦ ਸਨ।ਇਸ ਮੌਕੇ ਕੋਟਲੀ ਨਾਲ ਗੱਲਬਾਤ ਦੌਰਾਨ ਲੋਕਾਂ ਨੇ ਰੋਸ ਜਤਾਇਆ ਕਿ ਬੀਤੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਅਕਾਲੀ ਭਾਜਪਾ ਗਠਜੋੜ ਦੀ ਧੱਕੇਸ਼ਾਹੀ ਤੋਂ ਤੰਗ ਆ ਕੇ ਉਨ੍ਹਾਂ ਨੇ ਅਕਾਲੀ ਦਲ ਨੂੰ ਛੱਡ ਕੇ ਚੋਣ ਲੜ ਰਹੇ ਇਕ ਅਜ਼ਾਦ ਉਮੀਦਵਾਰ ਨੂੰ ਜਿਤਾਇਆ ਸੀ। ਜਿਸਨੇ ਉਸ ਵੇਲੇ ਸ਼ੇਰ ਦੀ ਤਰ੍ਹਾਂ ਦਹਾੜਕਿਆਂ ਫਿਰ ਕਦੇ ਵੀ ਅਕਾਲੀ ਦਲ ਦਾ ਹੱਥ ਨਾ ਫੜਨ ਦੀ ਗੱਲ ਕਹੀ ਸੀ, ਪਰ ਜਿੱਤਣ ਤੋਂ ਬਾਅਦ ਗਿੱਦੜ ਵਾਂਗ ਅਕਾਲੀਆਂ ਦਾ ਸਹਾਇਕ ਬਣ ਗਿਆ, ਜਿਹੜੀ ਗੱਲ ਕਿਸੇ ਤੋਂ ਲੁੱਕੀ ਨਹੀਂ ਹੈ। ਉਨ੍ਹਾਂ ਨੇ ਕਿਹਾ ਕਿ ਹੁਣ ਓਹੀ ਵਿਧਾਇਕ ਸੂਬੇ 'ਚ ਸੱਤਾਧਾਰੀ ਪਾਰਟੀ ਵੱਲੋਂ ਟਿਕਟ ਨਾ ਦਿੱਤੇ ਜਾਣ ਤੋਂ ਬਾਅਦ ਫਿਰ ਤੋਂ ਪੁਰਾਣੇ ਵਾਅਦੇ ਦੁਹਰਾ ਰਿਹਾ ਹੈ। ਲੋਕਾਂ ਨੇ ਕਿਹਾ ਕਿ ਅਕਾਲੀ ਭਾਜਪਾ ਗਠਜੋੜ ਦੀਆਂ ਧੱਕੇਸ਼ਾਹੀਆਂ ਤੋਂ ਦੁਖੀ ਹੋ ਕੇ ਉਨ੍ਹਾਂ ਨੇ ਇਕ ਅਜ਼ਾਦ ਨੂੰ ਜਿਤਾਇਆ ਸੀ, ਪਰ ਉਹ ਵੀ ਮੌਕਾਪ੍ਰਸਤ ਨਿਕਲਿਆ। ਪਰ ਇਸ ਵਾਰ ਉਹ ਇਸ ਮੌਕਾਪ੍ਰਸਤ ਨੂੰ ਮੌਕਾ ਨਹੀਂ ਦੇਣਗੇ ਤੇ ਬਿੱਟੂ ਨੂੰ ਭਾਰੀ ਵੋਟਾਂ ਨਾਲ ਜਿਤਾ ਕੇ ਸੰਸਦ 'ਚ ਭੇਜਣਗੇ।
ਕੋਟਲੀ ਨੇ ਕਿਹਾ ਕਿ ਸੂਬਾ ਸਰਕਾਰ ਨੇ ਕਦੇ ਵੀ ਲੁਧਿਆਣੇ ਦਾ ਵਿਕਾਸ ਨਹੀਂ ਚਾਹਿਆ ਹੈ। ਜਦਕਿ ਕੇਂਦਰੀ ਸੂਚਨਾ ਤੇ ਪ੍ਰਸਾਰਨ ਮੰਤਰੀ ਮਨੀਸ਼ ਤਿਵਾੜੀ ਨੇ ਲੁਧਿਆਣਾ 'ਚ ਸਿਟੀ ਬੱਸ ਸੇਵਾ, ਪਾਸਪੋਰਟ ਸੇਵਾ ਕੇਂਦਰ, ਹੌਜ਼ਰੀ ਇੰਡਸਟਰੀ ਨੂੰ ਸੈਂਟਰਲ ਐਕਸਈਜ ਡਿਊਟੀ ਤੋਂ ਮੁਕਤੀ ਦਿਲਾ ਕੇ ਲੱਖਾਂ ਲੋਕਾਂ ਨੂੰ ਫਾਇਦਾ ਦਿਲਾਇਆ, 108 ਐਂਬੁਲੇਂਸ ਸੇਵਾ ਚਲਵਾਈ, ਬੁੱਢੇ ਨਾਲੇ ਦੀ ਸਫਾਈ ਲਈ ਕੇਂਦਰ ਤੋਂ ਫੰਡ ਲਿਆਏ, ਪ੍ਰਧਾਨ ਮੰਤਰੀ ਗ੍ਰਾਮ ਸੜਕ ਯੋਜਨਾ ਹੇਠ ਪਿੰਡਾਂ ਦੀਆਂ ਜ਼ਿਆਦਾਤਰ ਸੜਕਾਂ ਨੂੰ ਬਣਵਾਇਆ, ਲੁਧਿਆਣਾ ਦਿੱਲੀ ਸ਼ਤਾਬਦੀ ਵਰਗੇ ਕਈ ਪ੍ਰੋਜੈਕਟ ਲਿਆਏ। ਉਨ੍ਹਾਂ ਨੇ ਕਿਹਾ ਕਿ ਰਵਨੀਤ ਬਿੱਟੂ ਨੇ ਆਪਣੇ ਦਾਦਾ ਸਾਬਕਾ ਮੁੱਖ ਮੰਤਰੀ ਸਵ. ਬੇਅੰਤ ਸਿੰਘ ਦੀ ਰਾਹ 'ਤੇ ਚੱਲਦਿਆਂ ਹਮੇਸ਼ਾ ਤੋਂ ਸਮਾਜਿਕ ਕੁਰੀਤੀਆਂ ਦਾ ਵਿਰੋਧ ਕੀਤਾ ਹੈ ਤੇ ਵਿਕਾਸ ਨੂੰ ਉਤਸਾਹਿਤ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਅੱਤਵਾਦ ਦੌਰਾਨ ਹਾਸ਼ਿਏ 'ਤੇ ਚਲੀ ਗਈ ਪੰਜਾਬ ਤੇ ਖਾਸ ਕਰਕੇ ਲੁਧਿਆਣਾ ਦੀ ਇੰਡਸਟਰੀ ਨੂੰ ਮੁੜ ਖੜ੍ਹਾ ਕਰਨ 'ਚ ਸਵ. ਬੇਅੰਤ ਸਿੰਘ ਦੀ ਭੂਮਿਕਾ ਨੂੰ ਅੱਜ ਵੀ ਲੋਕ ਯਾਦ ਕਰਦੇ ਹਨ।ਇਸ ਮੌਕੇ ਕੋਟਲੀ ਤੇ ਬਾਵਾ ਨਾਲ ਸੁਸ਼ੀਲ ਮਲਹੋਤਰਾ, ਮੱਖਣ ਸਿੰਘ, ਕੋਸ਼ਲ ਕੁਮਾਰ, ਨਿਰਮਲ ਕੈੜਾ, ਬਲਜਿੰਦਰ ਸਿੰਘ, ਭੁਪਿੰਦਰ ਸਿੰਘ, ਗੁਰਬਚਨ ਸਿੰਘ, ਜਸਬੀਰ ਸਿੰਘ ਜੱਸਲ, ਹਰਚੰਦ ਸਿੰਘ, ਰੇਸ਼ਮ ਸਿੰਘ, ਟੀ.ਟੀ ਸ਼ਰਮਾ, ਯਸ਼ਪਾਲ, ਰਾਜ ਰਾਣੀ, ਸੁਖਮਿੰਦਰ, ਗੁਰਦੀਪ ਕੌਰ ਵੀ ਮੌਜ਼ੂਦ ਰਹੇ।