ਭਾਰਤੀ ਖੇਤੀਬਾੜੀ ਖੋਜ ਸੰਸਥਾ, ਨਵੀਂ ਦਿੱਲੀ ਵੱਲੋਂ 9 ਤੋਂ 11 ਮਾਰਚ, 2022 ਨੂੰ ਕਰਵਾਏ ਗਏ ਕਿਸਾਨ ਮੇਲੇ ਵਿੱਚ ਪਿੰਡ ਜਿੰਦਾਵਾਲਾ, ਜ਼ਿਲ੍ਹਾ ਤਰਨ ਤਾਰਨ ਦੇ ਅਗਾਂਹਵਧੂ ਕਿਸਾਨ ਸ. ਗੁਰਵਿੰਦਰ ਸਿੰਘ ਸੰਧੂ ਨੂੰ ਇਨੋਵੇਟਿਵ ਫਾਰਮਰ ਰਾਸ਼ਟਰੀ ਪੁਰਸਕਾਰ ਨਾਲ ਸਮਾਨਿਤ ਕੀਤਾ।ਇਹ ਪੁਰਸਕਾਰ ਭਾਰਤੀ ਖੇਤੀਬਾੜੀ ਖੋਜ ਸੰਸਥਾ ਦੇ ਡਾਇਰੈਕਟਰ, ਡਾ. ਏ. ਕੇ. ਸਿੰਘ ਅਤੇ ਡਾ. ਬੀ. ਐੱਸ. ਤੋਮਰ, ਜੋਇੰਟ ਡਾਇਰੈਕਟਰ (ਪਸਾਰ) ਵਲੋਂ ਪ੍ਰਦਾਨ ਕੀਤਾ ਗਿਆ। ਇਸ ਐਵਾਰਡ ਦੀ ਅਰਜੀ ਕੇ ਵੀ ਕੇ ਬੂਹ ਵਿਖੇ ਕੰਮ ਕਰਦੇ ਡਾ. ਨਿਰਮਲ ਸਿੰਘ ਨੇ ਕੰਪਾਇਲ ਕਰਕੇ ਕੇ. ਵੀ. ਕੇ. ਰਾਹੀਂ ਭਾਰਤੀ ਖੇਤੀਬਾੜੀ ਖੋਜ ਸੰਸਥਾ, ਨਵੀਂ ਦਿੱਲੀ ਨੂੰ ਜਮਾ ਕਰਵਾਈ ਸੀ।ਅਗਾਂਹਵਧੂ ਕਿਸਾਨ ਗੁਰਵਿੰਦਰ ਸਿੰਘ ਪਿਛਲੇ ਕਾਫੀ ਸਾਲਾਂ ਤੋਂ ਕ੍ਰਿਸ਼ੀ ਵਿਗਿਆਨ ਕੇਂਦਰਾਂ ਬੂਹ ਨਾਲ ਜੁੜਿਆ ਹੈ ਅਤੇ ਨਾਖਾਂ ਦੀ ਕਾਸ਼ਤ ਤੋਂ ਖੁਦ ਮੰਡੀਕਰਨ ਕਰਕੇ ਚੰਗਾ ਮੁਨਾਫ਼ਾ ਲੈ ਰਿਹਾ ਹੈ ਅਤੇ ਇਸਤੋਂ ਇਲਾਵਾ ਬਾਗ ਵਿੱਚ ਸਬਜ਼ੀਆਂ ਦੀ ਕਾਸ਼ਤ (ਮਟਰ ), ਮੁਰਗੀ ਪਾਲਣ (ਕੜਕ ਨਾਥ), ਸ਼ਹਿਦ ਮੱਖੀ ਪਾਲਣ ਅਤੇ ਡੇਅਰੀ ਫਾਰਮਿੰਗ ਕਰਕੇ ਬਾਕੀ ਕਿਸਾਨਾਂ ਤੋਂ ਵੱਧ ਆਮਦਨ ਲੈ ਰਿਹਾ ਹੈ ।
ਉਹਨਾਂ ਨੇ ਨਾਖਾਂ ਦੀ ਤੁੜਾਈ ਲਈ ਇੱਕ ਲੋਹੇ ਦੀ ਪੌੜੀ ਵੀ ਬਣਾਈ ਹੋਈ ਹੈ, ਜਿਸ ਨਾਲ ਨਾਖਾਂ ਦੇ ਬੂਟੇ ਤੋਂ ਸਪਰ ਘੱਟ ਟੁੱਟਦੇ ਹਨ ਅਤੇ ਵੱਧ ਝਾੜ ਮਿਲਦਾ ਹੈ ਅਤੇ ਓਹਨਾ ਨੇ ਘਰ ਵਿੱਚ ਪਹਿਲਾਂ ਤੋਂ ਮੌਜੂਦ ਟਰੈਕਟਰ ਦੇ ਟਾਇਰ ਛੋਟੇ ਕਰਕੇ ਬਾਗ ਦੀ ਵਾਹੀ ਦਾ ਕੰਮ ਲੈ ਰਿਹਾ ਹੈ ਜਿਸ ਨਾਲ ਨਵਾਂ ਟਰੈਕਟਰ ਨਹੀਂ ਖਰੀਦਣਾ ਪਿਆ ਅਤੇ ਵਾਧੂ ਖਰਚੇ ਤੋਂ ਬਚਤ ਵੀ ਹੋਈ। ਉਹ ਲਗਾਤਾਰ ਆਪਣੇ ਜਿਲੇ ਦੇ ਹੋਰ ਕਿਸਾਨਾਂ ਨੂੰ ਵੀ ਬਾਗਬਾਨੀ ਖੇਤਰ ਵੱਲ ਉਤਸਾਹਿਤ ਕਰਦੇ ਰਹਿੰਦੇ ਹਨ।ਓਹਨਾ ਦਾ ਕਹਿਣਾ ਹੈ ਕਿ ਮੈਂ ਕੇ. ਵੀ. ਕੇ. ਬੂਹ ਤਰਨ ਤਾਰਨ, ਪੀ. ਏ. ਯੂ. ਲੁਧਿਆਣਾ ਅਤੇ ਬਾਗਬਾਨੀ ਵਿਭਾਗ ਪੰਜਾਬ ਦੇ ਮਾਹਿਰਾਂ ਦੀ ਸਲਾਹ ਲੈ ਕੇ ਹੀ ਇਸ ਖੇਤਰ ਵਿੱਚ ਨਾਮਣਾ ਖੱਟਿਆ ਹੈ। ਓਹਨਾ ਨੂੰ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਵਲੋਂ ਵੀ ਬਾਗਬਾਨੀ ਖੇਤਰ ਵਿੱਚ ਮੁੱਖ ਮੰਤਰੀ ਐਵਾਰਡ ਦਿੱਤਾ ਗਿਆ ਸੀ ਅਤੇ ਓਹਨਾ ਨੇ ਜਿਲ੍ਹੇ ਦੇ ਹੋਰ ਨੌਜਵਾਨ ਕਿਸਾਨਾਂ ਨੂੰ ਵੀ ਸਲਾਹ ਦਿੱਤੀ ਕਿ ਸਾਨੂੰ ਬਾਹਰ ਦੇ ਮੁਲਕਾਂ ਨੂੰ ਜਾਣ ਦੀ ਬਜਾਏ ਵਿਗਿਆਨਿਕ ਖੇਤੀ ਕਰਕੇ ਆਪਣੇ ਦੇਸ਼ ਵਿੱਚ ਹੀ ਵਧੀਆ ਮੁਨਾਫ਼ਾ ਲੈ ਸਕਦੇ ਹਾਂ।