ਖਰੜ ਫਲਾਈਓਵਰ ਪ੍ਰਾਜੈਕਟ ਜਨਵਰੀ 2021 ਦੀ ਆਖਰੀ ਸਮਾਂ-ਸੀਮਾ ਦੇ ਅਨੁਸਾਰ ਪੂਰੀ ਤਰ੍ਹਾਂ ਤਿਆਰ ਹੈ ਜਿਸਦੇ 98% ਹਿੱਸੇ ਦਾ ਕੰਮ ਮੁਕੰਮਲ ਹੋ ਗਿਆ ਹੈ ਅਤੇ ਇਹ ਹਿੱਸਾ ਅੱਜ ਇੱਥੇ ਲੋਕਾਂ ਲਈ ਖੋਲ੍ਹ ਦਿੱਤਾ ਗਿਆ ਹੈ।ਇਹ ਜਾਣਕਾਰੀ ਐਸਡੀਐਮ ਖਰੜ ਹਿਮਾਂਸ਼ੂ ਜੈਨ ਨੇ ਦਿੱਤੀ।ਉਨ੍ਹਾਂ ਕਿਹਾ “ਪਾ੍ਰਜੈਕਟ ਦਾ ਕੰਮ ਲਗਭਗ ਪੂਰੀ ਤਰ੍ਹਾਂ ਮੁਕੰਮਲ ਹੋ ਗਿਆ ਹੈ ਅਤੇ ਰੋਪੜ ਵੱਲ ਲਗਭਗ 2% ਹਿੱਸੇ `ਤੇ ਕੰਮ ਪ੍ਰਗਤੀ ਅਧੀਨ ਹੈ। ਉਨ੍ਹਾਂ ਕਿਹਾ ਕਿ ਜਨਵਰੀ 2021 ਤੱਕ ਫਲਾਈਓਵਰ ਦੀ ਉਸਾਰੀ ਮੁਕੰਮਲ ਹੋਣ ਦੀ ਉਮੀਦ ਹੈ।`ਜ਼ਿਕਰਯੋਗ ਹੈ ਕਿ ਤਕਰੀਬਨ 350 ਕਰੋੜ ਰੁਪਏ ਦੀ ਲਾਗਤ ਵਾਲੇ ਪ੍ਰਾਜੈਕਟ ਵਿੱਚ ਵੱਖ-ਵੱਖ ਕਾਰਨਾਂ ਕਰਕੇ ਦੇਰੀ ਹੁੰਦੀ ਰਹੀ ਪਰ ਡਿਪਟੀ ਕਮਿਸ਼ਨਰ ਗਿਰੀਸ਼ ਦਿਆਲਨ ਵੱਲੋਂ ਲਗਾਤਾਰ ਦਬਾਅ ਬਣਾਉਣ ਅਤੇ ਐਸ.ਡੀ.ਐਮ. ਦੀ ਸਖ਼ਤ ਮਿਹਨਤ ਦੇ ਸਿੱਟੇ ਵਜੋਂ ਇਹ ਪ੍ਰਾਜੈਕਟ ਆਖ਼ਰਕਾਰ ਮੁਕੰਮਲ ਹੋਣ ਕੰਢੇ ਹੈ।ਅਕਤੂਬਰ ਮਹੀਨੇ ਸਭ ਤੋਂ ਪਹਿਲਾਂ ਬਲੌਂਗੀ ਵੱਲ ਦੇ ਹਿੱਸੇ ਨੂੰ ਖੋਲ੍ਹਿਆ ਗਿਆ ਸੀ ਜਿਸ ਤੋਂ ਬਾਅਦ ਬਲੌਂਗੀ ਅਤੇ ਖਰੜ ਟੀ-ਪੁਆਇੰਟ ਦੇ ਵਿਚਕਾਰਲੀ ਸੜਕ ਨੂੰ ਚੌੜਾ ਕੀਤਾ ਗਿਆ ਅਤੇ ਦਸੰਬਰ ਦੇ ਸ਼ੁਰੂ ਵਿਚ ਫਲਾਈਓਵਰ ਦੇ ਦੋ ਹੋਰ ਹਿੱਸਿਆਂ ਅਤੇ ਤਿੰਨ ਛੋਟੇ ਪੁਲਾਂ ਦਾ ਨਿਰਮਾਣ ਕੀਤਾ ਗਿਆ। ਫਲਾਈ ਓਵਰ ਦੀ ਕੁੱਲ ਲੰਬਾਈ ਲਗਭਗ 10 ਕਿਲੋਮੀਟਰ ਹੈ। ਇਸ ਸਮੇਂ ਵੇਰਕਾ ਚੌਕ ਤੋਂ ਖਾਨਪੁਰ - ਲੁਧਿਆਣਾ ਵੱਲ ਦੇ ਮੁਕੰਮਲ ਹੋ ਚੁੱਕੇ ਹਿੱਸੇ ਨੂੰ ਲੋਕਾਂ ਲਈ ਖੋਲ੍ਹ ਦਿੱਤਾ ਗਿਆ ਹੈ। ਜੁਲਾਈ 2019 ਤੋਂ ਦਸੰਬਰ 2020 ਦਰਮਿਆਨ ਸਥਾਪਤ ਮੀਲ ਪੱਥਰਾਂ ਬਾਰੇ ਜਾਣਕਾਰੀ ਸਾਂਝੀ ਕਰਦਿਆਂ ਐਸਡੀਐਮ ਹਿਮਾਂਸ਼ੂ ਜੈਨ ਨੇ ਦੱਸਿਆ ਕਿ ਕਈ ਜ਼ਮੀਨਾਂ ਦਾ ਕਬਜ਼ਾ ਲੈਣਾ ਇਸ ਪ੍ਰਾਜੈਕਟ ਵਿਚ ਇਕ ਵੱਡੀ ਸਮੱਸਿਆ ਸੀ। ਜੁਲਾਈ 2019 ਤੋਂ ਢਹਾਈ ਮੁਹਿੰਮ ਚਲਾਈ ਗਈ ਅਤੇ ਯੁਟੀਲਿਟੀਜ਼, ਡਰੇਨ ਵਰਕ ਅਤੇ ਸਰਵਿਸ ਰੋਡ ਦੀ ਤਬਦੀਲੀ ਲਈ ਪ੍ਰਾਜੈਕਟ ਦੇ ਲਗਭਗ 99% ਹਿੱਸੇ ਨੂੰ ਸਾਫ਼ ਕੀਤਾ ਗਿਆ ਜੋ ਪਹਿਲਾਂ ਸਿਰਫ 40% ਸੀ।ਇਸ ਤੋਂ ਬਾਅਦ ਤੇਜ਼ੀ ਨਾਲ ਕੰਮ ਕਰਦਿਆਂ, ਡਰੇਨ ਦਾ ਕੰਮ (20% ਤੋਂ 100%) ਮੁਕੰਮਲ ਕੀਤਾ ਗਿਆ। ਇਸ ਤੋਂ ਬਾਅਦ ਸਮਾਂਬੱਧ ਢੰਗ ਨਾਲ ਸਰਵਿਸ ਰੋਡਜ਼ ਦੀ ਉਸਾਰੀ ਅਤੇ ਹਾਈ ਟੈਨਸ਼ਨ ਲਾਈਨਾਂ ਦੀ ਤਬਦੀਲੀ ਦਾ ਕੰਮ ਨੇਪਰੇ ਚਾੜ੍ਹਿਆ ਗਿਆ ਜੋ ਲੰਬੇ ਸਮੇਂ ਤੋਂ ਲਟਕਿਆ ਹੋਇਆ ਸੀ। ਕੋਵਿਡ-19 ਦੀ ਚੁਣੌਤੀ ਦੇ ਬਾਵਜੂਦ, ਰੋਪੜ ਤੋਂ ਫਲਾਈ ਐਸ਼ ਅਤੇ ਬਜਰੀ ਦੀ ਨਿਯਮਤ ਸਪਲਾਈ ਯਕੀਨੀ ਬਣਾਈ ਗਈ। ਉਨ੍ਹਾਂ ਦੱਸਿਆ ਕਿ ਫਲਾਈਓਵਰ ਦੇ ਸਿਖਰਲੇ ਢਾਂਚਿਆਂ ਦਾ ਕੰਮ ਹੁਣ ਮੁਕੰਮਲ ਹੋ ਚੁੱਕਿਆ ਹੈ ਅਤੇ ਚੜ੍ਹਾਈ ਵਾਲੀ ਸੜਕ ਦੀ ਵਾੜ ਦਾ ਕੰਮ ਤਕਰੀਬਨ 95% ਮੁਕੰਮਲ ਹੋ ਚੁੱਕਾ ਹੈ।