ਪਾਕਿਸਤਾਨੀ ਪੰਜਾਬ ਦੇ ਮੁੱਖ ਮੰਤਰੀ ਮਿਆਂ ਸ਼ਾਹਬਾਜ਼ ਸ਼ਰੀਫ ਨੇ ਆਪਣੇ ਡੈਲੀਗੇਸ਼ਨ ਅਤੇ ਸੂਬੇ ਦੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਅਤੇ ਮਾਲ ਮੰਤਰੀ ਸ. ਬਿਕਰਮ ਸਿੰਘ ਮਜੀਠੀਆ ਦੀ ਮੌਜੂਦਗੀ ਵਿੱਚ ਤਲਵੰਡੀ ਸਾਬੋ ਥਰਮਲ ਪਲਾਂਟ ਬਣਾਂਵਾਲਾ ਦਾ ਦੌਰਾ ਕਰ ਕੇ ਅਜਿਹੇ ਮਾਡਲ ਨੂੰ ਸਰਹੱਦ ਪਾਰ ਆਪਣੇ ਸੂਬੇ ਵਿੱਚ ਵੀ ਸਥਾਪਤ ਕਰਨ ਦੀਆਂ ਸੰਭਾਵਨਾਵਾਂ ਦਾ ਪਤਾ ਲਗਾਇਆ ਤਾਂ ਜੋ ਚੜ੍ਹਦੇ ਪੰਜਾਬ ਵਾਂਗ ਲਹਿੰਦਾ ਪੰਜਾਬ ਵੀ ਬਿਜਲੀ ਵਾਧੂ ਵਾਲਾ ਸੂਬਾ ਬਣ ਜਾਵੇ।ਮਿਆਂ ਸ਼ਰੀਫ ਨੇ ਥਰਮਲ ਪਲਾਂਟ ਦਾ ਪੂਰਾ ਨਿਰੀਖਣ ਕਰਦਿਆਂ ਪਾਵਰ ਉਤਪਾਦਨ ਦਾ ਬਨਿਆਦੀ ਢਾਂਚਾ ਦੇਖਦਿਆਂ ਪਤਾ ਲਗਾਇਆ ਕਿ ਬਿਜਲੀ ਖੇਤਰ ਵਿੱਚ ਚੜ੍ਹਦਾ ਪੰਜਾਬ ਕਿਵੇਂ ਭਾਰਤ ਵਿੱਚ ਵਾਧੂ ਬਿਜਲੀ ਵਾਲਾ ਸੂਬਾ ਬਣਿਆ। ਮਿਆਂ ਸ਼ਰੀਫ ਨੇ ਇਹ ਜਾਣਕਾਰੀ ਵੀ ਹਾਸਲ ਕੀਤੀ ਕਿ ਬਿਜਲੀ ਖੇਤਰ ਵਿੱਚ ਤੈਅ ਟੀਚਿਆਂ ਨੂੰ ਹਾਸਲ ਕਰਨ ਲਈ ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਦਾ ਕੀ ਦ੍ਰਿਸ਼ਟੀ ਹੈ।
ਬਾਦਲ ਵੱਲੋਂ ਵਿਸਥਾਰ ਵਿੱਚ ਦਿੱਤੀ ਗਈ ਪਾਵਰ ਪੁਆਇੰਟ ਪੇਸ਼ਕਾਰੀ ਰਾਹੀਂ ਮਿਆਂ ਸ਼ਰੀਫ ਨੂੰ ਬਿਜਲੀ ਖੇਤਰ ਵਿੱਚ ਪੰਜਾਬ ਦੀਆਂ ਭਵਿੱਖੀ ਯੋਜਨਾਵਾਂ ਤੋਂ ਜਾਣੂੰ ਕਰਵਾਇਆ। ਸ. ਬਾਦਲ ਨੇ ਦੱਸਿਆ ਕਿ ਤਿੰਨ ਨਵੇਂ ਥਰਮਲ ਪਲਾਂਟਾਂ ਤੋਂ ਇਲਾਵਾ 2018 ਤੱਕ ਮੁਕੇਰੀਆ ਥਰਮਲ ਪਲਾਂਟ ਵਿਖੇ ਵੀ 660-660 ਮੈਗਾਵਾਟ ਦੇ 2 ਯੂਨਿਟ ਚਾਲੂ ਹੋਣ ਜਾਣਗੇ। ਇਸ ਤੋਂ ਇਲਾਵਾ 2025 ਤੱਕ ਗੁਰੂ ਗੋਬਿੰਦ ਸਿੰਘ ਥਰਮਲ ਪਲਾਂਟ ਰੋਪੜ ਵਿਖੇ ਨਵੀਆਂ ਅਤਿ ਆਧੁਨਿਕ ਟਰਬਾਈਨਜ਼ ਲਗਾ ਕੇ ਉਤਪਾਦਨ ਵਿੱਚ ਵਾਧਾ ਕਰਦਿਆਂ 800 ਮੈਗਾਵਾਟ ਦੇ 6 ਯੂਨਿਟ (ਕੁੱਲ 4800 ਮੈਗਾਵਾਟ) ਚਾਲੂ ਹੋ ਜਾਣਗੇ। ਉਪ ਮੁੱਖ ਮੰਤਰੀ ਨੇ ਲਹਿੰਦੇ ਪੰਜਾਬ ਦੇ ਵਜ਼ੀਰ-ਏ-ਆਲਾ ਨੂੰ ਦੱਸਿਆ ਕਿ ਪੰਜਾਬ ਕੋਲ ਝਾਰਖੰਡ ਵਿਖੇ ਇਕ ਕੋਲ ਖਾਣ ਹੈ ਜਦੋਂ ਕਿ ਇਕ ਹੋਰ ਨਵਾਂ ਕੋਲ ਬਲਾਕ ਛੇਤੀ ਹੀ ਅਲਾਟ ਹੋ ਜਾਵੇਗਾ। ਸ. ਬਾਦਲ ਨੇ ਦੱਸਿਆ ਕਿ ਪੰਜਾਬ ਨੇ ਟਰਾਂਜਮਿਸ਼ਨ ਅਤੇ ਵੰਡ (ਟੀ ਐਂਡ ਡੀ) ਦੀਆਂ ਕਟੌਤੀਆਂ ਨੂੰ ਘਟਾ ਕੇ 4000 ਕਰੋੜ ਰੁਪਏ ਦੀ ਬੱਚਤ ਕਰ ਕੇ ਸੂਬੇ ਨੇ ਦੇਸ਼ ਵਿੱਚ ਦੂਜਾ ਸਥਾਨ ਹਾਸਲ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ 2015 ਤੱਕ ਪੰਜਾਬ 13000 ਕਰੋੜ ਰੁਪਏ ਦੇ ਨਿਵੇਸ਼ ਨਾਲ 15 ਫੀਸਦੀ ਹੋਰ ਟੀ ਐਂਡ ਡੀ ਕਟੌਤੀ ਨਾਲ ਪੰਜਾਬ ਦੇਸ਼ ਦਾ ਨੰਬਰ ਇਕ ਸੂਬਾ ਬਣ ਜਾਵੇਗਾ।
ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਵੱਲੋਂ ਦਿੱਤੀ ਪੇਸ਼ਕਾਰੀ ਅਤੇ ਪੰਜਾਬ ਨੂੰ ਬਿਜਲੀ ਖੇਤਰ ਵਿੱਚ ਭਾਰਤ ਦਾ ਮੋਹਰੀ ਸੂਬਾ ਬਣਾਉਣ ਲਈ ਚੁੱਕੇ ਕਦਮਾਂ ਤੋਂ ਮਿਆਂ ਸ਼ਰੀਫ ਬਹੁਤ ਪ੍ਰਭਾਵਿਤ ਹੋਏ। ਉਨ੍ਹਾਂ ਇੱਛਾ ਪ੍ਰਗਟਾਈ ਕਿ ਬਿਜਲੀ ਖੇਤਰ ਵਿੱਚ ਚੜ੍ਹਦਾ ਪੰਜਾਬ ਆਪਣੀ ਮੁਹਾਰਤ, ਤਕਨੀਕੀ ਜਾਣਕਾਰੀ ਅਤੇ ਗਿਆਨ ਉਨ੍ਹਾਂ ਨਾਲ ਸਾਂਝਾ ਕਰੇ ਤਾਂ ਜੋ ਲਹਿੰਦਾ ਪੰਜਾਬ ਵੀ ਬਿਜਲੀ ਵਾਧੂ ਵਾਲਾ ਸੂਬਾ ਬਣ ਸਕੇ।
ਇਸ ਮੌਕੇ ਸਕੱਤਰ, ਬਿਜਲੀ ਸ੍ਰੀ ਅਨਿਰੁੱਧ ਤਿਵਾੜੀ ਨੇ ਪਾਕਿਸਤਾਨੀ ਪੰਜਾਬ ਦੇ ਡੈਲੀਗੇਸ਼ਨ ਨੂੰ ਸੂਬੇ ਵਿੱਚ ਚੱਲ ਰਹੇ ਅਤੇ ਨਵੇਂ ਚਾਲੂ ਹੋਏ ਪਾਵਰ ਪ੍ਰਾਜੈਕਟਾਂ ਬਾਰੇ ਜਾਣਕਾਰੀ ਦੇਣ ਤੋਂ ਇਲਾਵਾ, ਸੂਬੇ ਵਿੱਚ ਬਾਇਓ ਮਾਸ, ਸੋਲਰ ਪਾਵਰ ਪਲਾਂਟ, ਬਹੁਤ ਛੋਟੇ ਅਤੇ ਲਘੂ ਹਾਈਡਲ ਪਾਵਰ ਪਲਾਂਟ ਅਤੇ ਗੈਰ ਰਵਾਇਤੀ ਪਾਵਰ ਯੂਨਿਟਾਂ ਬਾਰੇ ਵੀ ਜਾਣਕਾਰੀ ਦਿੱਤੀ।ਤਲਵੰਡੀ ਸਾਬੋ ਪਾਵਰ ਲਿਮਟਿਡ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਸ੍ਰੀ ਫਿਲੀਪ ਚਾਕੋ ਅਤੇ ਐਸੋਸੀਏਟ ਮੀਤ ਪ੍ਰਧਾਨ ਸ੍ਰੀ ਚੇਤਨ ਸ੍ਰੀਵਾਸਤਵ ਨੇ ਮਿਆਂ ਸ਼ਾਹਬਾਜ਼ ਸ਼ਰੀਫ ਨੂੰ ਵਿਸ਼ੇਸ਼ ਤੌਰ 'ਤੇ ਸਨਮਾਨਤ ਕੀਤੀ। ਇਸ ਮੌਕੇ ਰਾਜ ਸਭਾ ਮੈਂਬਰ ਸ. ਬਲਵਿੰਦਰ ਸਿੰਘ ਭੂੰਦੜ, ਸਿੱਖਿਆ ਮੰਤਰੀ ਸ. ਸਿਕੰਦਰ ਸਿੰਘ ਮਲੂਕਾ, ਮੁੱਖ ਸੰਸਦੀ ਸਕੱਤਰ ਸ੍ਰੀ ਸਰੂਪ ਚੰਦ ਸਿੰਗਲਾ, ਵਿਧਾਇਕ ਸ੍ਰੀ ਪ੍ਰੇਮ ਮਿੱਤਲ ਤੇ ਸ. ਚਤਿੰਨ ਸਿੰਘ ਸਮਾਓ, ਡੀ.ਆਈ.ਜੀ. ਬਠਿੰਡਾ ਰੇਜ਼ ਸ੍ਰੀ ਯੁਰਿੰਦਰ ਸਿੰਘ ਤੇ ਡਿਪਟੀ ਕਮਿਸ਼ਨਰ ਮਾਨਸਾ ਸ੍ਰੀ ਅਮਿਤ ਢਾਕਾ ਵੀ ਹਾਜ਼ਰ ਸਨ।