ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਚੇਅਰਮੈਨ ਅਤੇ ਡਿਪਟੀ ਕਮਿਸ਼ਨਰ ਨੇ ਦੁਕਾਨਾਂ ਉਤੇ ਪਲਾਸਟਿਕ ਮੁਕਤ ਲਿਫਾਫੇ ਵੰਡੇ
ਦੁਕਾਨਦਾਰਾਂ ਨੂੰ ਪਲਾਸਟਿਕ ਦੀ ਵਰਤੋਂ ਨਾ ਕਰਨ ਲਈ ਪ੍ਰੇਰਿਆ
5 Dariya News
5 Dariya News
ਅੰਮ੍ਰਿਤਸਰ , 18 Oct 2019
ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ ਪੁਰਬ ਨੂੰ ਧਿਆਨ ਵਿਚ ਰੱਖਕੇ ਪੰਜਾਬ ਨੂੰ ਪਲਾਸਟਿਕ ਮੁੱਕਤ ਕਰਨ ਲਈ ਪੰਜਾਬ ਸਰਕਾਰ ਵੱਲੋਂ ਕੀਤੇ ਜਾ ਰਹੇ ਯਤਨਾਂ ਦਾ ਸੱਦਾ ਦੁਕਾਨਦਾਰਾਂ ਤੱਕ ਪੁੱਜਦਾ ਕਰਨ ਲਈ ਅੱਜ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਚੇਅਰਮੈਨ ਡਾ. ਐਸ. ਐਸ ਮਰਵਾਹਾ ਅਤੇ ਡਿਪਟੀ ਕਮਿਸ਼ਨਰ ਸ. ਸ਼ਿਵਦੁਲਾਰ ਸਿੰਘ ਢਿਲੋਂ ਖ਼ੁਦ ਹਾਲ ਗੇਟ ਸਥਿਤ ਦੁਕਾਨਾਂ ਉਤੇ ਪਲਾਸਟਿਕ ਮੁਕਤ ਲਿਫਾਫੇ ਵੰਡਣ ਲਈ ਪਹੁੰਚੇ। ਪੰਜਾਬ ਰਾਈਸ ਮਿਲਰ ਐਸੋਸੀਏਸ਼ਨ ਦੇ ਸਹਿਯੋਗ ਨਾਲ ਕਰਵਾਏ ਗਏ ਇਸ ਸਮਾਗਮ ਵਿਚ ਉਨਾਂ ਦਾ ਸਾਥ ਸਹਾਇਕ ਕਮਿਸ਼ਨਰ ਕਾਰਪੋਰੇਸ਼ਨ ਸ੍ਰੀ ਸੰਦੀਪ ਰਿਸ਼ੀ ਅਤੇ ਐਸੋਸੀਏਸ਼ਨ ਦੇ ਅਹੁਦੇਦਾਰਾਂ ਨੇ ਦਿੱਤਾ। ਇਸ ਮੌਕੇ ਭਵਨ ਐਸ ਐਲ ਸਕੂਲ ਦੇ ਬੱਚਿਆਂ ਨੇ ਪਾਲਸਟਿਕ ਮੁਕਤ ਵਾਤਾਵਰਣ ਦਾ ਸੱਦਾ ਦਿੰਦੇ ਬੈਨਰ ਚੁੱਕੇ ਹੋਏ ਸਨ।ਡਾ. ਮਰਵਾਹਾ ਨੇ ਇਸ ਮੌਕੇ ਸ਼ੈਲਰ ਐਸੋਸੀਏਸ਼ਨ ਵੱਲੋਂ ਕੀਤੇ ਗਏ ਇਸ ਉਪਰਾਲੇ ਦਾ ਧੰਨਵਾਦ ਕਰਦੇ ਕਿਹਾ ਕਿ ਸਰਕਾਰ ਵੱਲੋਂ ਕੀਤਾ ਗਿਆ ਕੋਈ ਵੀ ਯਤਨ ਉਨੀ ਦੇਰ ਵਿਚ ਕਾਮਯਾਬ ਨਹੀਂ ਹੋ ਸਕਦਾ, ਜਦ ਤੱਕ ਆਮ ਲੋਕ ਉਸ ਵਿਚ ਭਾਈਵਾਲ ਨਾ ਬਣਨ ਅਤੇ ਅੱਜ ਤੁਹਾਡੇ ਵਰਗੇ ਵਪਾਰੀ ਲੋਕਾਂ ਦੇ ਇਸ ਮੁਹਿੰਮ ਵਿਚ ਅੱਗੇ ਆਉਣਾ ਇਸ ਗੱਲ ਦਾ ਸੂਚਕ ਹੈ ਕਿ ਹੁਣ ਪੰਜਾਬ ਵਿਚ ਪਲਾਸਟਿਕ ਬਹੁਤਾ ਸਮਾਂ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਨਹੀਂ ਕਰ ਸਕੇਗੀ। ਉਨਾਂ ਦੁਕਾਨਦਾਰਾਂ ਨੂੰ ਅਪੀਲ ਕੀਤੀ ਕਿ ਉਹ ਪਲਾਸਟਿਕ ਦੇ ਬਣੇ ਲਿਫਾਫੇ, ਜੋ ਕਿ ਵਾਤਾਵਰਣ ਨੂੰ ਗੰਦਾ ਕਰਨ ਦੇ ਨਾਲ-ਨਾਲ ਸ਼ਹਿਰ ਲਈ ਕਈ ਸਮੱਸਿਆਵਾਂ ਪੈਦਾ ਕਰ ਰਹੇ ਹਨ, ਨੂੰ ਛੱਡ ਕੇ ਬਾਇਓ ਕੰਪੋਸੈਟ ਤੋਂ ਬਣੇ ਲਿਫਾਫੇ ਵਰਤਣ, ਜੋ ਕਿ ਪਲਾਸਿਟਕ ਦੇ ਲਿਫਾਫੇ ਨਾਲੋਂ ਵੱਧ ਕਫਾਇਤੀ ਹੋਣ ਦੇ ਨਾਲ-ਨਾਲ ਵਾਤਾਵਰਣ ਲਈ ਖ਼ਤਰਾ ਨਹੀਂ ਹਨ।ਡਿਪਟੀ ਕਮਿਸ਼ਨਰ ਸ ਸ਼ਿਵਦੁਲਾਰ ਸਿੰਘ ਢਿਲੋਂ ਨੇ ਇਸ ਮੌਕੇ ਜਿੱਥੇ ਆਪ ਦੁਕਾਨਦਾਰਾਂ ਨੂੰ ਲਿਫਾਫੇ ਵੰਡੇ ਉਥੇ ਪੁਰਾਣੇ ਚੱਲਦੇ ਪਲਾਸਟਿਕ ਦੇ ਲਿਫਾਫੇ ਵਾਪਸ ਵੀ ਲਏ। ਉਨਾਂ ਦੁਕਾਨਾਂ ਉਤੇ ਪਲਾਸਿਟਕ ਦੇ ਲਿਫਾਫੇ ਦੀ ਵਰਤੋਂ ਨਾ ਕਰਨ ਦਾ ਪ੍ਰਣ ਲੈਂਦਾ ਸਟਿਕਰ ਵੀ ਦੁਕਾਨਾਂ ਤੇ ਲਗਾਏ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਚੀਫ ਪ੍ਰਦੂਸ਼ਣ ਵਿਭਾਗ ਸ. ਗੁਰਿੰਦਰ ਸਿੰਘ ਮਜੀਠੀਆ, ਐਕਸੀਅਨ ਗੁਰਬੀਰ ਸਿੰਘ ਅਤੇ ਹੋਰ ਸਖਸ਼ੀਅਤਾਂ ਵੀ ਹਾਜ਼ਰ ਸਨ, ਜਿੰਨਾ ਨੇ ਦੁਕਾਨਾਂ ਉਤੇ ਲਿਫਾਫੇ ਵੰਡੇ ਤੇ ਦੁਕਾਨਦਾਰਾਂ ਨੂੰ ਪਲਾਸਟਿਕ ਮੁਕਤ ਸ਼ਹਿਰ ਬਨਾਉਣ ਲਈ ਪ੍ਰੇਰਿਆ।