ਨਸ਼ਾ ਮੁਕਤ ਪੰਜਾਬ-ਤੰਦਰੁਸਤ ਪੰਜਾਬ: ਕੇਂਦਰੀ ਜੇਲ੍ਹ ਪਟਿਆਲਾ 'ਚ ਵੀ ਕਾਮਯਾਬ ਹੋਈ ਪੰਜਾਬ ਸਰਕਾਰ ਦੀ ਨਸ਼ਾ ਮੁਕਤੀ ਮੁਹਿੰਮ

ਕੈਪਟਨ ਸਰਕਾਰ ਦੇ ਬਨਣ ਮਗਰੋਂ 2952 ਬੰਦੀਆਂ ਦਾ ਕੀਤਾ ਇਲਾਜ, ਸਫ਼ਲਤਾ ਪੂਰਵਕ ਚੱਲ ਰਿਹਾ ਹੈ ਜੇਲ੍ਹ ਦਾ ਨਸ਼ਾ ਮੁਕਤੀ ਕੇਂਦਰ ਤੇ ਓਟ ਸੈਂਟਰ

5 Dariya News

ਪਟਿਆਲਾ 05-Feb-2019

ਨਸ਼ਾ ਮੁਕਤ ਪੰਜਾਬ ਸਿਰਜਣ ਦੇ ਪੰਜਾਬ ਸਰਕਾਰ ਦੇ ਨਾਅਰੇ ਦੀ ਪੂਰਤੀ ਲਈ ਪੰਜਾਬ ਸਰਕਾਰ ਵੱਲੋਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਹੇਠ ਚੁੱਕੇ ਕਦਮਾਂ ਤਹਿਤ ਕੇਂਦਰੀ ਜੇਲ੍ਹ ਪਟਿਆਲਾ ਵਿਖੇ ਸਥਾਪਤ ਕੀਤੇ ਗਏ ਓਟ ਸੈਂਟਰ (ਆਊਟ ਪੇਸ਼ੈਂਟ ਓਪੀਓਡ ਅਸਿਸਟਡ ਟ੍ਰੀਟਮੈਂਟ) ਸਮੇਤ ਜੇਲ੍ਹ ਦੇ ਹਸਪਤਾਲ 'ਚ ਬਣਾਏ ਗਏ ਨਸ਼ਾ ਮੁਕਤੀ ਕੇਂਦਰ ਦਾ ਨਸ਼ੇ ਦੀ ਲਤ ਦੇ ਸ਼ਿਕਾਰ ਬੰਦੀ (ਕੈਦੀ ਤੇ ਹਵਾਲਾਤੀ) ਪੂਰਾ ਲਾਭ ਉਠਾ ਰਹੇ ਹਨ। ਕੇਂਦਰੀ ਜੇਲ ਪਟਿਆਲਾ ਦੇ ਨਸ਼ਾ ਮੁਕਤੀ ਕੇਂਦਰ ਵਿਖੇ 2017 ਦੇ ਸ਼ੁਰੂ ਤੋਂ ਲੈਕੇ ਹੁਣ ਤਕ 2952 ਬੰਦੀਆਂ ਨੇ ਆਪਣਾ ਇਲਾਜ ਕਰਵਾਇਆ ਹੈ। ਇੱਥੇ ਇਕੱਲੇ ਪਟਿਆਲਾ ਤੋਂ ਹੀ ਨਹੀਂ ਬਲਕਿ ਰਾਜ ਦੀਆਂ ਹੋਰਨਾਂ ਜੇਲ੍ਹਾਂ ਦੇ ਬੰਦੀ ਵੀ ਨਸ਼ਾ ਮੁਕਤੀ ਲਈ ਭੇਜੇ ਜਾਂਦੇ ਹਨ। ਜਦੋਂਕਿ ਓਟ ਸੈਂਟਰ ਦੀ ਜੁਲਾਈ 2018 'ਚ ਸਥਾਪਤੀ ਤੋਂ ਹੁਣ ਤੱਕ 151 ਮਰੀਜਾਂ ਦਾ ਇਲਾਜ ਕੀਤਾ ਜਾ ਰਿਹਾ ਹੈ।ਜੇਲ੍ਹ ਦੇ ਸੀਨੀਅਰ ਸੁਪਰਡੈਂਟ ਸ. ਜਸਪਾਲ ਸਿੰਘ ਹਾਂਸ ਨੇ ਦੱਸਿਆ ਕਿ ਨਸ਼ਾ ਮੁਕਤ ਪੰਜਾਬ ਸਿਰਜਣ ਲਈ ਪੰਜਾਬ ਸਰਕਾਰ ਵੱਲੋਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਗਤੀਸ਼ੀਲ ਅਗਵਾਈ ਹੇਠ ਨਸ਼ਿਆਂ ਵਿਰੁੱਧ ਵਿੱਢੀ ਮੁਹਿੰਮ ਨੂੰ ਸਫ਼ਲ ਬਨਾਉਣ ਤੇ ਨਸ਼ਿਆਂ ਦੀ ਲਾਹਨਤ ਦੇ ਖਾਤਮੇ ਲਈ ਤਿੰਨ ਪੜਾਵੀ ਰਣਨੀਤੀ 'ਇਨਫੋਰਸਮੈਂਟ', 'ਡੀ-ਅਡਿਕਸ਼ਨ' ਅਤੇ 'ਪ੍ਰੀਵੈਨਸ਼ਨ' ਨੂੰ ਕੇਂਦਰੀ ਜੇਲ੍ਹ ਪਟਿਆਲਾ ਵਿੱਚ ਵੀ ਲਾਗੂ ਕੀਤਾ ਜਾ ਰਿਹਾ ਹੈ। ਸ. ਹਾਂਸ ਨੇ ਕਿਹਾ ਕਿ ਜੇਲ੍ਹ 'ਚ ਬੰਦੀਆਂ ਦੇ ਹਰ ਪੱਖ ਤੋਂ ਸੁਧਾਰ ਨੂੰ ਮੁੱਖ ਰੱਖਦਿਆਂ ਨਸ਼ੇ ਦੀ ਲਤ ਦੇ ਸ਼ਿਕਾਰ ਬੰਦੀਆਂ ਦਾ ਇਲਾਜ ਕਰਵਾਇਆ ਜਾਂਦਾ ਹੈ।

ਜੇਲ੍ਹ ਦੇ ਵਧੀਕ ਸੁਪਰਡੈਂਟ ਸ. ਗੁਰਚਰਨ ਸਿੰਘ ਧਾਲੀਵਾਲ ਨੇ ਦੱਸਿਆ ਕਿ ਜੇਲ੍ਹ ਅੰਦਰਲੇ ਨਸ਼ਾ ਮੁਕਤੀ ਕੇਂਦਰ 'ਚ ਸਾਲ 2017 'ਚ 1238 ਬੰਦੀਆਂ ਨੇ ਇਲਾਜ ਕਰਵਾਇਆ, ਸਾਲ 2018 'ਚ 1564 ਬੰਦੀ ਇਲਾਜ ਲਈ ਪੁੱਜੇ ਜਦੋਂਕਿ ਇਸ ਸਾਲ ਦੇ ਸ਼ੁਰੂ ਤੋਂ ਲੈਕੇ ਹੁਣ ਤੱਕ 150 ਤੋਂ ਵੱਧ ਬੰਦੀ ਨਸ਼ਿਆਂ ਤੋਂ ਤੌਬਾ ਕਰਨ ਲਈ ਇੱਥੇ ਪੁੱਜ ਚੁੱਕੇ ਹਨ। ਇਸ ਤੋਂ ਬਿਨ੍ਹਾਂ ਜੇਲ੍ਹ ਅੰਦਰਲੇ ਓਟ ਸੈਂਟਰ ਵਿਖੇ 151 ਬੰਦੀ ਆਪਣਾ ਇਲਾਜ ਵੱਖਰੇ ਤੌਰ 'ਤੇ ਕਰਵਾ ਰਹੇ ਹਨ। ਸ. ਧਾਲੀਵਾਲ ਨੇ ਦੱਸਿਆ ਕਿ ਜਦੋਂ ਕੋਈ ਬੰਦੀ ਜੇਲ੍ਹ ਅੰਦਰ ਦਾਖਲ ਹੁੰਦਾ ਹੈ ਤਾਂ ਇੱਕ ਟੈਸਟਿੰਗ ਕਿਟ ਰਾਹੀਂ ਉਸਦੇ ਪਿਸ਼ਾਬ ਦੀ ਜਾਂਚ ਕਰਕੇ ਪਤਾ ਲਾਇਆ ਜਾਂਦਾ ਹੈ ਕਿ ਉਹ ਕਿਹੜਾ ਨਸ਼ਾ ਕਰਦਾ ਹੈ। ਉਨ੍ਹਾਂ ਦੱਸਿਆ ਕਿ ਨਸ਼ੇੜੀ ਪਾਏ ਜਾਣ ਵਾਲੇ ਬੰਦੀ ਨੂੰ 15 ਦਿਨ ਨਸ਼ਾ ਮੁਕਤੀ ਦੀ ਦਵਾਈ ਦਿੱਤੀ ਜਾਂਦੀ ਹੈ ਅਤੇ 15 ਦਿਨ ਨਿਗਰਾਨੀ ਹੇਠ ਰੱਖੇ ਜਾਣ ਬਾਅਦ ਕਰੀਬ 1 ਮਹੀਨੇ ਦੇ ਮਗਰੋਂ ਹੀ ਬਾਕੀ ਬੰਦੀਆਂ 'ਚ ਛੱਡਿਆ ਜਾਂਦਾ ਹੈ।ਇਸੇ ਦੌਰਾਨ ਇਨ੍ਹਾਂ ਬੰਦੀਆਂ ਦਾ ਜੇਲ੍ਹ ਅੰਦਰਲੇ ਓਟ ਕਲੀਨਿਕ ਅਤੇ ਨਸ਼ਾ ਮੁਕਤੀ ਕੇਦਰ ਵਿਖੇ ਇਲਾਜ ਕਰ ਰਹੇ ਡਾਕਟਰਾਂ ਤੇ ਕੌਂਸਲਰ ਨੇ ਦੱਸਿਆ ਕਿ ਇਥੇ ਅਫ਼ੀਮ, ਭੁੱਕੀ, ਸਮੈਕ ਸਮੇਤ ਮੈਡੀਸਨ ਨਸ਼ਾ, ਹੈਰੋਇਨ (ਚਿੱਟਾ) ਆਦਿ ਦਾ ਸੇਵਨ ਕਰਨ ਵਾਲਿਆਂ ਦਾ ਇਲਾਜ ਕੀਤਾ ਜਾਂਦਾ ਹੈ ਤੇ ਇਨ੍ਹਾਂ ਨੂੰ ਬੁਪਰੀਨੋਰਫਿਨ ਸਮੇਤ ਨੈਲੌਕਜੋਨ ਅਤੇ ਹੋਰ ਜਰੂਰੀ ਦਵਾਈਆਂ ਦਿੱਤੀਆਂ ਜਾਂਦੀਆਂ ਹਨ। ਜਦੋਂਕਿ ਇਨ੍ਹਾਂ ਬੰਦੀਆਂ ਦੀ ਵਿਅਕਤੀਗਤ ਤੇ ਗਰੁੱਪ ਕਾਉਂਸਲਿੰਗ, ਸਰੀਰਕ ਕਸਰਤਾਂ, ਮੈਡੀਟੇਸ਼ਨ ਸਮੇਤ ਚੰਗਾ ਖਾਣਾ ਮੁਹੱਈਆ ਕਰਵਾਇਆ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਬੰਦੀਆਂ ਦਾ ਇਸ ਕੇਂਦਰ ਨੂੰ ਚੰਗਾ ਸਹਿਯੋਗ ਮਿਲ ਰਿਹਾ ਹੈ ਅਤੇ ਨਸ਼ੇ ਦੀ ਲਤ ਦਾ ਸ਼ਿਕਾਰ ਬੰਦੀ ਇਸ ਦਾ ਭਰਪੂਰ ਲਾਭ ਉਠਾ ਰਹੇ ਹਨ।