ਡਿਪਟੀ ਕਮਿਸ਼ਨਰ ਵੱਲੋਂ 'ਨਬਾਰਡ' ਦੀ ਤਜਵੀਜ਼ਤ ਕਰਜ਼ਾ ਯੋਜਨਾ ਜਾਰੀ

5 Dariya News

ਕਪੂਰਥਲਾ 26-Dec-2018

ਕੌਮੀ ਖੇਤੀਬਾੜੀ ਤੇ ਦਿਹਾਤੀ ਵਿਕਾਸ ਬੈਂਕ (ਨਬਾਰਡ) ਵੱਲੋਂ ਕਪੂਰਥਲਾ ਜ਼ਿਲੇ ਲਈ ਮਾਲੀ ਵਰੇ 2019-20 ਲਈ ਤਿਆਰ ਕੀਤੀ ਤਜਵੀਜ਼ਤ ਕਰਜ਼ਾ ਯੋਜਨਾ (ਪੋਟੈਂਸ਼ਲ ਲਿੰਕਡ ਕ੍ਰੈਡਿਟ ਪਲਾਨ) ਡਿਪਟੀ ਕਮਿਸ਼ਨਰ ਸ੍ਰੀ ਮੁਹੰਮਦ ਤਇਅਬ ਵੱਲੋਂ ਜਾਰੀ ਕੀਤੀ ਗਈ। ਉਨਾਂ ਦੱਸਿਆ ਕਿ 6924.34 ਕਰੋੜ ਰੁਪਏ ਦੀ 'ਨਬਾਰਡ' ਦੀ ਇਹ ਕਰਜ਼ਾ ਯੋਜਨਾ ਜ਼ਿਲੇ ਦੇ ਪ੍ਰਾਥਮਿਕ ਖੇਤਰ ਲਈ ਲੋੜੀਂਦੇ ਕਰਜ਼ਿਆਂ ਦੀ ਪੂਰਤੀ ਕਰੇਗੀ ਜਿਸ ਨਾਲ ਅੱਗੋਂ ਬੈਂਕਾਂ ਰਾਹੀਂ ਇਹ ਰਾਸ਼ੀ ਲੋੜਵੰਦ ਕਿਸਾਨਾਂ, ਦਰਮਿਆਨੇ ਤੇ ਲਘੂ ਉਦਮੀਆਂ ਅਤੇ ਹੋਰ ਪ੍ਰਾਥਮਿਕ ਖੇਤਰ ਕਰਜ਼ਿਆਂ ਦੇ ਲਾਭਪਾਤਰੀਆਂ ਨੂੰ ਉਪਲਬਧ ਹੋਵੇਗੀ। 'ਨਬਾਰਡ' ਦੇ ਜ਼ਿਲਾ ਵਿਕਾਸ ਮੈਨੇਜਰ ਸ੍ਰੀ ਰਾਕੇਸ਼ ਵਰਮਾ ਨੇ ਇਸ ਸੰਭਾਵਿਤ ਯੋਜਨਾ ਦਾ ਮੱਦ ਵਾਰ ਵੇਰਵਾ ਦਿੰਦਿਆਂ ਦੱਸਿਆ ਕਿ 6924.34 ਕਰੋੜ ਰੁਪਏ ਦੀ ਇਸ ਕਰਜ਼ਾ ਯੋਜਨਾ ਤਹਿਤ 4354.27 ਕਰੋੜ ਖੇਤੀਬਾੜੀ ਕਰਜ਼ਿਆਂ ਲਈ, 1507.44 ਕਰੋੜ ਰੁਪਏ ਦਰਮਿਆਨੇ, ਲਘੂ ਅਤੇ ਅਤਿ ਲਘੂ ਉਦਮੀਆਂ ਵਾਸਤੇ ਅਤੇ ਹੋਰਨਾਂ ਪ੍ਰਾਥਮਿਕ ਖੇਤਰਾਂ ਲਈ 1062.63 ਕਰੋੜ ਰੁਪਏ ਰੱਖੇ ਗਏ ਹਨ। ਉਨਾਂ ਦੱਸਿਆ ਕਿ ਇਸ ਦਸਤਾਵੇਜ਼ ਵਿਚ ਦਿੱਤੇ ਗਏ ਅਨੁਮਾਨ ਬੈਕਿੰਗ ਖੇਤਰ ਲਈ ਅਗਲੇ ਸਾਲ ਦੀ ਸਾਲਾਨਾ ਕਰਜ਼ ਯੋਜਨਾ, ਜੋ ਕਿ ਲੀਡ ਬੈਂਕ ਦੁਆਰਾ ਬਣਾਈ ਜਾਵੇਗੀ, ਦੇ ਟੀਚੇ ਦਾ ਆਧਾਰ ਬਣਨਗੇ। ਇਸ ਤੋਂ ਪਹਿਲਾਂ ਬੈਂਕਾਂ ਦੀ ਜ਼ਿਲਾ ਪੱਧਰੀ ਕਮੇਟੀ (ਡੀ.ਸੀ.ਸੀ.) ਦੀ ਮੀਟਿੰਗ ਕਰਦਿਆਂ, ਡਿਪਟੀ ਕਮਿਸ਼ਨਰ ਨੇ ਸਮੂਹ ਬੈਂਕਾਂ ਨੂੰ ਕਮਜ਼ੋਰ ਵਰਗਾਂ, ਮੁਦਰਾ ਯੋਜਨਾ ਅਤੇ ਸਟੈਂਡ ਅਪ ਕਰਜ਼ ਵੱਧ ਤੋਂ ਵੱਧ ਕਰਨ ਲਈ ਆਖਿਆ ਤਾਂ ਜੋ ਯੋਗ ਵਰਗਾਂ ਅਤੇ ਲਾਭਪਾਤਰੀਆਂ ਨੂੰ ਇਨਾਂ ਦਾ ਫਾਇਦਾ ਮਿਲ ਸਕੇ। ਇਸ ਮੌਕੇ ਵਧੀਕ ਡਿਪਟੀ ਕਮਿਸ਼ਨਰ (ਵਿਕਾਸ) ਅਵਤਾਰ ਸਿੰਘ ਭੁੱਲਰ, ਡਿਪਟੀ ਸਰਕਲ ਹੈੱਡ ਪੀ. ਐਨ. ਬੀ ਵਰਿੰਦਰ ਧਵਨ, ਜ਼ਿਲਾ ਲੀਡ ਮੈਨੇਜਰ ਸਰਵੇਂਦਰ ਸਿੰਘ, ਐਲ. ਡੀ. ਓ ਆਰ. ਬੀ. ਆਈ ਰਾਜੀਵ ਨਾਰੰਗ, ਡਾਇਰੈਕਟਰ ਆਰ. ਸੇਟੀ ਪਰਮਜੀਤ ਸਿੰਘ, ਡਿਪਟੀ ਡਾਇਰੈਕਟਰ ਬਾਗਬਾਨੀ ਡਾ. ਕੁਲਵਿੰਦਰ ਸਿੰਘ ਸੰਧੂ, ਰਵਿੰਦਰ ਕੁਮਾਰ, ਆਰ. ਐਸ. ਬਾਵਾ ਤੇ ਹੋਰ ਅਧਿਕਾਰੀ ਹਾਜ਼ਰ ਸਨ।