ਡਿਪਟੀ ਕਮਿਸ਼ਨਰ ਵੱਲੋਂ ਜ਼ਿਲ੍ਹੇ ’ਚ ਸਰੀਰਕ ਤੌਰ ’ਤੇ ਅਸਮਰੱਥ ਮਤਦਾਤਾਵਾਂ ਦੀ ਹੁਣ ਤੋਂ ਹੀ ਸ਼ਨਾਖਤ ਕਰਨ ਦੀ ਹਦਾਇਤ

ਮਤਦਾਤਾ ਬਣਨ ਤੋਂ ਵਾਂਝੇ ਪੀ ਡਬਲਯੂ ਡੀ ਨਾਗਰਿਕਾਂ ਦੇ ਫ਼ਾਰਮ ਨੰ. 6 ਭਰਨ ਲਈ ਆਖਿਆ

5 Dariya News

ਸ਼ਹੀਦ ਭਗਤ ਸਿੰਘ ਨਗਰ (ਨਵਾਂਸ਼ਹਿਰ) 26-Dec-2018

ਡਿਪਟੀ ਕਮਿਸ਼ਨਰ ਵਿਨੈ ਬਬਲਾਨੀ ਨੇ ਅੱਜ ਨਵਾਂਸ਼ਹਿਰ ਤੇ ਔੜ ਬਲਾਕਾਂ ਦੀਆਂ ਆਂਗਨਵਾੜੀ ਵਰਕਰਾਂ ਨਾਲ ਮੀਟਿੰਗ ਦੌਰਾਨ ਉਨ੍ਹਾਂ ਨੂੰ ਸਰੀਰਕ ਤੌਰ ’ਤੇ ਅਸਮਰੱਥ ਮਤਦਾਤਾਵਾਂ ਦੀ ਹੁਣ ਤੋਂ ਹੀ ਸ਼ਨਾਖ਼ਤ ਕਰਨ ਲਈ ਆਖਿਆ। ਉਨ੍ਹਾਂ ਕਿਹਾ ਕਿ ਸ਼ਨਾਖ਼ਤ ਦੌਰਾਨ ਜੇਕਰ ਕੋਈ ਦਿਵਿਆਂਗ ਨਾਗਰਿਕ ਮਤਦਾਤਾ ਬਣਨ ਤੋਂ ਵਾਂਝਾ ਪਾਇਆ ਜਾਂਦਾ ਹੈ ਤਾਂ ਉਸ ਦਾ ਫ਼ਾਰਮ ਨੰ. 6 ਭਰਵਾਇਆ ਜਾਵੇ।ਉਨ੍ਹਾਂ ਪਿਛਲੇ ਦਿਨੀਂ ਇਸ ਮਾਮਲੇ ’ਤੇ ਪੰਜਾਬ ਦੇ ਮੁੱਖ ਚੋਣ ਅਫ਼ਸਰ ਵੱਲੋਂ ਜ਼ਿਲ੍ਹਿਆਂ ਦੇ ਡਿਪਟੀ ਕਮਿਸ਼ਨਰਾਂ ਨਾਲ ਹੋਈ ਮੀਟਿੰਗ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਚੋਣ ਕਮਿਸ਼ਨ ਵੱਲੋਂ ਆਗਾਮੀ ਲੋਕ ਸਭਾ ਚੋਣਾਂ ਦੇ ਮੱਦੇਨਜ਼ਰ ਪੀ ਡਬਲਯੂ ਡੀ ਅਤੇ ਐਨ ਆਰ ਆਈਜ਼ ਵੋਟਰਾਂ ਦੀ ਹੁਣ ਤੋਂ ਹੀ ਪਛਾਣ ਕਰਨ ’ਤੇ ਜ਼ੋਰ ਦਿੱਤਾ ਗਿਆ ਹੈ ਤਾਂ ਜੋ ਜੇਕਰ ਕੋਈ ਵੋਟਰ ਬਣਨ ਤੋਂ ਵਾਂਝਾ ਹੈ ਤਾਂ ਉਸ ਦੀ ਵੋਟ ਬਣਾਈ ਜਾ ਸਕੇ।ਡਿਪਟੀ ਕਮਿਸ਼ਨਰ ਅਨੁਸਾਰ ਪੀ ਡਬਲਯੂ ਡੀ ਵੋਟਰਾਂ ਦੀ ਕੌਮੀ ਪੱਧਰ ’ਤੇ ਔਸਤ ਮੁਤਾਬਕ ਜ਼ਿਲ੍ਹੇ ’ਚ ਗਿਣਤੀ 10 ਹਜ਼ਾਰ ਤੋਂ ਵਧੇਰੇ ਬਣਨੀ ਚਾਹੀਦੀ ਹੈ ਅਤੇ ਹੁਣ ਤੱਕ ਕੀਤੀ ਗਈ 4500 ਪੀ ਡਬਲਯੂ ਡੀ ਵੋਟਰਾਂ ਦੀ ਸ਼ਨਾਖਤ ਇਸ ਟੀਚੇ ਤੋਂ ਕਾਫ਼ੀ ਪਿੱਛੇ ਹੈ। ਉਨ੍ਹਾਂ ਕਿਹਾ ਕਿ ਪੀ ਡਬਲਯੂ ਡੀ ਵੋਟਰਾਂ ਦੀ ਮੋਟੇ ’ਤੇ ਸ਼ਨਾਖ਼ਤ ਉਸ ਦੀ ਸਰੀਰਕ ਸਥਿਤੀ ਤੋਂ ਕੀਤੀ ਜਾਂਦੀ ਹੈ, ਜਿਸ ’ਚ ਜਿਨ੍ਹਾਂ ਵਿਅਕਤੀਆਂ ਨੂੰ ਸਿਹਤ ਵਿਭਾਗ ਵੱਲੋਂ ਘੱਟੋ-ਘੱਟ 40 ਫ਼ੀਸਦੀ ਅੰਗਹੀਣਤਾ ਦਾ ਸਰਟੀਫ਼ਿਕੇਟ ਜਾਰੀ ਕੀਤਾ ਗਿਆ ਹੋਵੇ ਜਾਂ ਫ਼ਿਰ ਆਂਗਨਵਾੜੀ ਵਰਕਰ ਵੱਲੋਂ ਕੀਤੇ ਜਾਣ ਵਾਲੇ ਸਰਵੇਖਣ ਦੌਰਾਨ ਉਹ ਮਤਦਾਨ ਕੇਂਦਰ ਤੱਕ ਬਿਨਾਂ ਸਹਾਰੇ ਤੋਂ ਜਾਣ ’ਚ ਅਸਮਰੱਥ ਹੋਵੇ।ਉਨ੍ਹਾਂ ਕਿਹਾ ਕਿ ਜੇਕਰ ਅਸੀਂ ਦਿਵਿਆਂਗ ਮਤਦਾਤਾਵਾਂ ਦੀ ਸ਼ਨਾਖ਼ਤ ਦਾ ਕੰਮ ਸਮੇਂ ਸਿਰ ਨਿਪਟਾ ਲਵਾਂਗੇ ਤਾਂ ਸਾਨੂੰ ਭਵਿੱਖ ’ਚ ਮਤਦਾਨ ਮੌਕੇ ਉਨ੍ਹਾਂ ਨੂੰ ਮਤਦਾਨ ਕੇਂਦਰ ’ਤੇ ਪੁੱਜਣ ’ਤੇ ਦਿੱਤੀ ਜਾਣ ਵਾਲੀ ਸਹੂਲਤ ਜਿਵੇਂ ਵ੍ਹੀਲ ਚੇਅਰ, ਰੈਂਪ, ਸਹਾਇਕ ਵਾਲੰਟੀਅਰ ਆਦਿ ਦੀ ਉਪਲਬਧਤਾ ਸੌਖਿਆਂ ਹੀ ਕਰਵਾਈ ਜਾ ਸਕੇਗੀ। ਉਨ੍ਹਾਂ ਕਿਹਾ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਦਾ ਇਸ ਸ਼ਨਾਖਤ ਪਿੱਛੇ ਮੁੱਖ ਮੰਤਵ ਇਨ੍ਹਾਂ ਵਿਅਕਤੀਆਂ ਨੂੰ ਵੀ ਮਤਦਾਨ ਦੇ ਮਿਲੇ ਅਧਿਕਾਰ ਦਾ ਪ੍ਰਗਟਾਵਾ ਕਰਨ ਦੀ ਸੁਵਿਧਾ ਦੇਣਾ ਹੈ, ਜਿਸ ਲਈ ਇਨ੍ਹਾਂ ਦੀ ਸਬ ਡਵੀਜ਼ਨ/ਵਿਧਾਨ ਸਭਾ ਹਲਕਾ ਵਾਰ ਗਿਣਤੀ ਜ਼ਰੂਰੀ ਹੈ। 

ਉਨ੍ਹਾਂ ਨਾਲ ਹੀ ਕਿਹਾ ਕਿ ਇਸ ਸਰਵੇਖਣ ਦਾ ਦੂਹਰਾ ਫ਼ਾਇਦਾ ਉਨ੍ਹਾਂ ਪੀ ਡਬਲਯੂ ਡੀ ਵੋਟਰਾਂ ਨੂੰ ਮਿਲੇਗਾ, ਜਿਨ੍ਹਾਂ ਨੂੰ ਸਿਹਤ ਵਿਭਾਗ ਪਾਸੋਂ ਸਰਟੀਫ਼ਿਕੇਟ ਨਾ ਮਿਲੇ ਹੋਣ ਜਾਂ ਸਰਕਾਰ ਵੱਲੋਂ ਮਿਲਦੀ ਕੋਈ ਸਹੂਲਤ ਨਾ ਮਿਲੀ ਹੋਵੇ। ਉਨ੍ਹਾਂ ਦੀ ਪਿੰਡ ਵਾਰ ਸੂਚੀ ਸਾਹਮਣੇ ਆਉਣ ’ਤੇ ਸਮਾਜਿਕ ਸੁਰੱਖਿਆ ਵਿਭਾਗ ਇਸ ’ਤੇ ਬਣਦੀ ਕਾਰਵਾਈ ਕਰਨ ਦੇ ਸਮਰੱਥ ਹੋ ਜਾਵੇਗਾ।ਡਿਪਟੀ ਕਮਿਸ਼ਨਰ ਨੇ ਮਤਦਾਤਾ ਰਜਿਸਟ੍ਰੇਸ਼ਨ ਦੇ ਕਾਰਜ ਨੂੰ ਦੇਖ ਰਹੇ ਸੁਪਰਵਾਈਜ਼ਰਾਂ ਨਾਲ ਮੀਟਿੰਗ ਕਰਦਿਆਂ ਜ਼ਿਲ੍ਹਾ ਪ੍ਰਵਾਸੀ ਭਾਰਤੀਆਂ ਦੀ ਬਹੁਤਾਤ ਵਾਲਾ ਹੋਣ ਕਾਰਨ, ਮਤਦਾਤਾ ਸੂਚੀਆਂ ’ਚ ਪ੍ਰਵਾਸੀ ਭਾਰਤੀਆਂ ਦੀ ਸੰਤੋਖਜਨਕ ਗਿਣਤੀ ਹੋਣ ’ਤੇ ਵੀ ਜ਼ੋਰ ਦਿੱਤਾ। ਉਨ੍ਹਾਂ ਪ੍ਰਵਾਸੀ ਭਾਰਤੀ ਦੇ ਮਤਦਾਤਾ ਬਣਨ ਦੀ ਵੱਡੀ ਤੇ ਸੌਖੀ ਸ਼ਰਤ ਉਸ ਦੇ ਭਾਰਤੀ ਪਾਸਪੋਰਟ ਧਾਰਕ ਹੋਣ ਦੀ ਦੱਸਦਿਆਂ ਕਿਹਾ ਕਿ ਜਿਹੜਾ ਵੀ ਵਿਅਕਤੀ ਰਹਿ ਭਾਵੇਂ ਵਿਦੇਸ਼ ’ਚ ਰਿਹਾ ਹੋਵੇ ਪਰ ਭਾਰਤੀ ਪਾਸਪੋਰਟ ਧਾਰਕ ਹੈ, ਉਹ ਮਤਦਾਤਾ ਬਣਨ ਦੇ ਯੋਗ ਹੈ। ਅਜਿਹੇ ਵਿਅਕਤੀ ਜਾਂ ਤਾਂ ਬੀ ਐਲ ਓ ਨੂੰ ਆਪਣਾ ਫ਼ਾਰਮ ਨੰ. 6 ਏ ਭਰ ਕੇ ਦੇ ਸਕਦੇ ਹਨ। ਵਿਦੇਸ਼ ਰਹਿਣ ਵਾਕੇ ਪ੍ਰਵਾਸੀ ਭਾਰਤੀ ਆਪਣਾ ਫ਼ਾਰਮ ਈ ਮੇਲ ਰਾਹੀਂ ਜਾਂ ਉੱਥੇ ਸਥਿਤ ਭਾਰਤੀ ਦੂਤਾਵਾਸ ਰਾਹੀਂ ਭੇਜ ਸਕਦੇ ਹਨ। ਈ ਮੇਲ ’ਤੇ ਮਿਲਣ ਵਾਲੇ ਫ਼ਾਰਮ 6 ਏ ਦੀ ਸਥਾਨਕ ਪੱਧਰ ’ਤੇ ਉਸ ਵੱਲੋਂ ਦਿੱਤੇ ਪਤੇ ’ਤੇ ਪੜਤਾਲ ਕਰਵਾਈ ਜਾਵੇਗੀ ਜਦਕਿ ਦੂਤਾਵਾਸ ਰਾਹੀਂ ਮਿਲੇ ਫ਼ਾਰਮ 6 ਏ ਦੀ ਕੋਈ ਪੜਤਾਲ ਨਹੀਂ ਹੋਵੇਗੀ। ਉਨ੍ਹਾਂ ਦੱਸਿਆ ਕਿ ਜੇਕਰ ਕੋਈ ਪ੍ਰਵਾਸੀ ਭਾਰਤੀ ਪਹਿਲਾਂ ਤੋਂ ਹੀ ਜ਼ਿਲ੍ਹੇ ’ਚ ਫ਼ਾਰਮ ਨੰ. 6 ਰਾਹੀਂ ਵੋਟਰ ਵਜੋਂ ਰਜਿਸਟਰ ਹੈ ਤਾਂ ਉਹ ਆਪਣੀ ਸਬੰਧਤ ਵੋਟ ਦਾ ਵੇਰਵਾ ਦਿੰਦਿਆਂ ਫ਼ਾਰਮ 6 ਏ ਜ਼ਰੂਰ ਭਰ ਕੇ ਜਮ੍ਹਾ ਕਰਵਾਏ ਤਾਂ ਜੋ ਉਸ ਦੀ ਵੋਟ ਨੂੰ ਆਮ ਵੋਟਾਂ ਨਾਲੋਂ ਨਿਖੇੜ ਕੇ ਐਨ ਆਰ ਆਈ  ਵੋਟ ਵਜੋਂ ਮੰਨਿਆ ਜਾ ਸਕੇ। ਉਨ੍ਹਾਂ ਦੱਸਿਆ ਕਿ ਲੋਕ ਸਭਾ ਚੋਣ 2019 ਦੇ ਮੱਦੇਨਜ਼ਰ ਜ਼ਿਲ੍ਹੇ ’ਚ 1.1.19 ਨੂੰ 18 ਸਾਲ ਜਾਂ ਇਸ ਤੋਂ ਵੱਧ ਦੀ ਉਮਰ ਦਾ ਹਰੇਕ ਵਿਅਕਤੀ ਵੋਟਰ ਬਣਨ ਲਈ ਅਰਜ਼ੀ ਦੇ ਸਕਦਾ ਹੈ। ਮੀਟਿੰਗ ’ਚ ਏ ਡੀ ਸੀ (ਜ) ਸ੍ਰੀਮਤੀ ਅਮਿ੍ਰਤ ਸਿੰਘ, ਸਹਾਇਕ ਸਿਵਲ ਸਰਜਨ ਡਾ. ਬਲਵਿੰਦਰ ਸਿੰਘ, ਜ਼ਿਲ੍ਹਾ ਸਮਾਜਿਕ ਸੁਰੱਖਿਆ ਅਫ਼ਸਰ ਸੰਤੋਸ਼ ਵਿਰਦੀ, ਚੋਣ ਤਹਿਸੀਲਦਾਰ ਹਰੀਸ਼ ਕੁਮਾਰ, ਸੀ ਡੀ ਪੀ ਓ ਔੜ ਨਰੇਸ਼ ਕੌਰ, ਸੀ ਡੀ ਪੀ ਓ ਨਵਾਂਸ਼ਹਿਰ ਸਵਿਤਾ ਕੁਮਾਰੀ, ਚੋਣ ਕਾਨੂੰਗੋ ਵਿਵੇਕ ਮੋਹਿਲਾ ਮੌਜੂਦ ਸਨ।