ਵਾਤਾਵਰਣ ਦੇ ਰਾਖੇ ਕਿਸਾਨ , ਪਿੰਡ ਗੂੜੀ ਸੰਘਰ ਦੇ ਕਿਸਾਨ ਅੰਗਰੇਜ਼ ਸਿੰਘ ਨੇ ਬਿਨਾ ਪਰਾਲੀ ਸਾੜੇ ਬੀਜੀ ਕਣਕ

ਕਿਹਾ ਹੈਪੀ ਸੀਡਰ ਨਾਲ ਬਿਜਾਈ ਦੇ ਹੁੰਦੇ ਹਨ ਕਈ ਫਾਇਦੇ, ਕੇ ਵੀ ਕੇ ਨੇ ਕੀਤਾ ਮਾਰਗ ਦਰਸ਼ਨ

5 Dariya News

ਸ੍ਰੀ ਮੁਕਤਸਰ ਸਾਹਿਬ 27-Nov-2018

ਜਿਲਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪਿੰਡ ਗੁੜੀ ਸੰਗਰ ਦੇ ਕਿਸਾਨ ਅੰਗਰੇਜ਼ ਸਿੰਘ ਨੇ ਇਸ ਸਾਲ 40 ਏਕੜ ਰਕਬੇ ਵਿੱਚ ਪਰਾਲੀ ਨੂੰ ਬਿਨਾ ਸਾੜੇ ਕਣਕ ਦੀ ਬਿਜਾਈ ਕੀਤੀ ਸੀ ਅਤੇ ਹੁਣ ਕਣਕ ਦੇ ਸਫਲ ਪੁੰਗਾਰੇ ਤੋਂ ਬਾਅਦ ਇਹ ਕਿਸਾਨ ਇਸ ਨਵੀਂ ਤਕਨੀਕ ਦੇ ਨਤੀਜ਼ਿਆ ਤੋਂ ਉਤਸਾਹਿਤ ਹੈ।ਅੰਗਰੇਜ ਸਿੰਘ ਆਖਦਾ ਹੈ ਕਿ ਉਸ ਨੇ ਐਸ ਐਮ ਐਸ ਲੱਗੀ ਕੰਬਾਇੰਨ ਨਾਲ ਝੋਨੇ ਦੀ ਕਟਾਈ ਕਰਕੇ ਬਿਨਾਂ ਅੱਗ ਲਗਾਏ ਹੈਪੀ ਸੀਡਰਨਾਲ ਸਾਰਾ ਖੇਤ ਬੀਜਿਆ ਹੈ। ਉਸ ਨੇ ਹੈਪੀ ਸੀਡਰ ਸਰਕਾਰ ਵਲੋਂ ਮੁਹੱਈਆ ਕਰਵਾਈ ਸਬਸਿਡੀ ਨਾਲ ਪਿਛਲੇ ਸਾਲ ਖਰੀਦ ਲਿਆ ਸੀ। ਪਿਛਲੇ ਸਾਲ ਵੀ ਉਸ ਨੇ ਇਸ ਨਵੀਂ ਤਕਨੀਕ ਦਾ ਤਜ਼ਰਬਾ ਕੀਤਾ ਸੀ ਅਤੇ ਉਸਨੇ ਕਣਕ ਦਾ ਪੂਰਾ ਝਾੜ ਮਿਲਿਆ ਸੀ, ਜਿਸ ਤੋਂ ਉਸ ਨੇ ਇਸ ਵਾਰ ਸਾਰਾ ਖੇਤ ਹੀ ਹੈਪੀ ਸੀਡਰ ਨਾਲ ਬੀਜਿਆ ਹੈ।ਅੰਗਰੇਜ ਸਿੰਘ ਦੇ ਪੁੱਤਰ ਗੁਰਮੀਤ ਸਿੰਘ ਨੇ ਦੱਸਿਆਂ ਕਿ ਹੈਪੀ ਸੀਡਰ ਨਾਲ ਕਣਕ ਦੀ ਬਿਜਾਈ ਤੇ ਉਸਦਾ ਸਵਾ ਤਿੰਨ ਲੀਟਰ ਡੀਜ਼ਲ ਪ੍ਰਤੀ ਏਕੜ ਖਰਚ ਹੋਇਆ ਜਦ ਕਿ ਜੇਕਰ ਪਰਾਲੀ ਸਾੜ ਕੇ ਖੇਤ ਨੂੰ ਵਾਹ ਸਵਾਰ ਕੇ ਕਣਕ ਦੀ ਬਿਜਾਈ ਕੀਤੀ ਜਾਵੇ ਤਾਂ 20 ਲੀਟਰ ਡੀਜ਼ਲ ਲੱਗਦਾ ਹੈ । ਉਸਦੇ ਅਨੁਸਾਰ ਪਿਛਲੇ ਸਾਲ ਉਸਨੇ ਹੈਪੀ ਸੀਡਰ ਨਾਲ ਬੀਜੀ ਕਣਕ ਵਿੱਚ ਕੋਈ ਨਦੀਕ ਨਾਸ਼ਕ ਵੀ ਨਹੀਂ ਛਿੜਕਿਆ ਸੀ ਅਤੇ ਇਸ ਤਰਾਂ ਉਸਨੂ ਪ੍ਰਤੀ ਏਕੜ 450 ਰੁਪਏ ਦੀ ਬਚਤ ਇਸ ਤਰੀਕੇ ਵੀ ਹੋਈ ਸੀ।ਗੁਰਮੀਤ ਸਿੰਘ ਅਨੁਸਾਰ ਪਰਾਲੀ ਮਿੱਟੀ ਵਿੱਚ ਮਿਲ ਜਾਣ ਨਾਲ ਜਮੀਨ ਦੀ ਉਪਜਾਊ ਸ਼ਕਤੀ ਵਿੱਚ ਵੀ ਵਾਧਾ ਹੁੰਦਾ ਹੈ ਅਤੇ ਸਾਡੇ ਮਿੱਤਰ ਜੀਵ ਵੀ ਨਸ਼ਟ ਨਹੀਂ ਹੁੰਦੇ ਹਨ। ਉਸਨੇ ਕਿਹਾ ਕਿ ਪਰਾਲੀ ਦੀ ਜਮੀਨ ਤੇ ਤਹਿ ਵਿੱਛ ਜਾਂਦੀ ਹੈ, ਜਿਸ ਕਾਰਨ ਨਦੀਨ ਨਹੀਂ ਉਗਦੇ ਹਨ।ਗੁਰਮੀਤ ਸਿੰਘ ਨੇ ਦੱਸਿਆਂ ਕਿ ਉਹ ਲਗਾਤਾਰ ਕ੍ਰਿਸ਼ੀ ਵਿਗਿਆਨ ਕੇਂਦਰ ਗੋਨਿਆਣਾ ਦੇ ਸੰਪਰਕ ਵਿੱਚ ਰਹਿੰਦਾ ਹੈ ਅਤੇ ਖੇਤੀ ਵਿਗਿਆਨੀਆਂ ਦੀ ਸਲਾਹ ਅਨੁਸਾਰ ਖੇਤੀ ਕਰਦਾ ਹੈ। ਉਸ ਅਨੁਸਾਰ ਕਿਸਾਨ ਲਈ ਆਮਦਨ ਵਾਧੇ ਦਾ ਇਹ ਤਰੀਕਾ ਖਰਚੇ ਘੱਟ ਕਰਨਾ ਵੀ ਹੈ ਅਤੇ ਹੈਪੀ ਸੀਡਰ ਨਾਲ ਬਿਜਾਈ ਨਾਲ ਖੇਤੀ ਖਰਚੇ ਘੱਟਦੇ ਹਨ।

ਹੈਪੀ ਸੀਡਰ ਨਾਲ ਬੀਜੀ ਕਣਕ ਨੂੰ ਪਹਿਲੇ ਪਾਣੀ ਤੋਂ ਪਹਿਲਾਂ ਪਾਓ ਯੂਰੀਆ

ਕ੍ਰਿਸ਼ੀ ਵਿਗਿਆਨ ਕੇਂਦਰ ਗੋਨਿਆਣਾ ਦੇ ਡਿਪਟੀ ਡਾਇਰੈਕਟਰ ਡਾ. ਐਨ ਐਸ ਧਾਲੀਵਾਲ ਅਤੇ ਡਾ. ਬਲਕਰਨ ਸਿੰਘ ਸੰਧੂ ਸਹਾਇਕ ਪ੍ਰੋਫੈਸਰ ਫਸਲ ਵਿਗਿਆਨ ਨੇ ਕਿਹਾ ਕਿ ਪਰਾਲੀ ਨੂੰ ਬਿਨਾਂ ਸਾੜੇ ਹੈਪੀ ਸੀਡਰ ਨਾਲ ਜਿੱਥੇ ਬਿਜਾਈ ਕੀਤੀ ਹੈ ਅਤੇ ਬਿਜਾਈ ਨੂੰ 25 ਦਿਨ ਹੋ ਗਏ ਹਨ ਤਾਂ ਪਹਿਲਾ ਪਾਣੀ ਲਗਾ ਦਿਓ। ਉਹਨਾਂ ਕਿਹਾ ਕਿ ਅਜਿਹੇ ਖੇਤਾਂ ਵਿੱਚ ਪਾਣੀ ਲਗਾਉਣ ਤੋਂ ਪਹਿਲਾਂ ਯੂਰੀਆ ਖਾਦ ਦੀ ਪਹਿਲੀ ਕਿਸਤ 45 ਕਿਲੋ ਪ੍ਰਤੀ ਏਕੜ ਦੀ ਦਰ ਨਾਲ ਖੇਤ ਵਿੱਚ ਛਿੜਕ ਦਿਓ। ਉਹਨਾਂ ਕਿਹਾ ਕਿ ਪਹਿਲਾ ਪਾਣੀ ਹਲਕਾ ਲਗਾਉਦਾ ਚਾਹੀਦਾ ਹੈ। ਪਰਾਲੀ ਵਾਲੇ ਖੇਤ ਵਿੱਚ ਜਦ ਕਿਆਰੇ ਦੇ 60 ਫੀਸਦੀ ਹਿਸੇ ਵਿੱਚ ਪਾਣੀ ਪੁੱਜ ਜਾਵੇ ਤਾਂ ਪਾਣੀ ਬੰਦ ਕਰ ਦਿਓ ਕਿਉਕਿ ਪਰਾਲੀ ਨਾਲ ਪਾਣੀ ਹੌਲੀ ਹੌਲੀ ਕਿਆਰੇ ਦੇ ਸਿਰੇ ਤੱਕ ਪੁੱਜ ਜਾਵੇਗਾ। ਜਦਕਿ ਜਿੱਥੇ ਗੱਠਾ ਬਣਾ ਕੇ ਜ਼ੀਰੋ ਟਿਲੇਜ ਮਸ਼ੀਨ ਨਾਲ ਜਾਂ ਹੋਰ ਤਕਨੀਕ ਨਾਲ ਬਿਜਾਈ ਕੀਤੀ ਹੈ ਉਥੇ ਵੀ ਯੂਰੀਆ ਖਾਦ ਦੀ ਪਹਿਲੀ ਕਿਸਤ ਪਹਿਲੇ ਪਾਣੀ ਨਾਲ ਹੀ ਪਾ ਦਿੱਤੀ ਜਾਵੇ ।