ਵਰਲਡ ਕੈਂਸਰ ਕੇਅਰ ਵੱਲੋਂ ਸਰਹਾਲੀ ਕਲਾਂ ਵਿਖੇ 1847 ਮਰੀਜਾਂ ਦੀ ਜਾਂਚ

ਕੁਲਵੰਤ ਸਿੰਘ ਧਾਲੀਵਾਲ ਵੱਲੋਂ ਨਰੋਏ ਜੀਵਨ ਲਈ ਸਧਾਰਨ ਜੀਵਨ ਸ਼ੈਲੀ ਅਪਨਾਉਣ 'ਤੇ ਜ਼ੋਰ, ਗੁਰੂ ਗੋਬਿੰਦ ਸਿੰਘ ਖਾਲਸਾ ਵਿਦਿਅਕ ਸੰਸਥਾਵਾਂ ਵਿਖੇ ਲਗਾਇਆ ਕੈਂਸਰ ਜਾਗਰੂਕਤਾ ਕੈਂਪ

5 Dariya News

ਸਰਹਾਲੀ ਕਲਾਂ (ਤਰਨ ਤਾਰਨ) 17-Nov-2018

ਗੁਰੂ ਗੋਬਿੰਦ ਸਿੰਘ ਖਾਲਸਾ ਵਿਦਿਅਕ ਸੰਸਥਾਵਾਂ ਸਰਹਾਲੀ ਕਲਾਂ, ਜੋ ਕਿ ਆਪਣੀ ਸਥਾਪਨਾ ਦੇ ਸ਼ਤਾਬਦੀ ਜਸ਼ਨ ਮਨਾ ਰਹੀ ਹੈ, ਦੀ ਪ੍ਰਬੰਧਕੀ ਕਮੇਟੀ ਦੇ ਪ੍ਰਧਾਨ ਜਸਜੀਤ ਸਿੰਘ ਸਮੁੰਦਰੀ  ਦੀ ਅਗਵਾਈ ਹੇਠ ਵਰਲਡ ਕੈਂਸਰ ਕੇਅਰ ਚੈਰੀਟੇਬਲ ਟਰੱਸਟ ਯੂ. ਕੇ. ਦੀ ਸਹਾਇਤਾ ਨਾਲ ਕੈਂਸਰ ਪ੍ਰਤੀ ਜਾਗਰੂਕਤਾ ਅਤੇ ਜਾਂਚ ਲਈ ਮੁਫ਼ਤ ਮੈਡੀਕਲ ਕੈਂਪ ਲਗਾਇਆ ਗਿਆ। ਇਸ ਕੈਂਪ ਵਿਚ ਇਲਾਕੇ ਭਰ ਵਿਚੋਂ ਪਹੁੰਚੇ 1847 ਮਰਦ ਤੇ ਔਰਤਾਂ ਦੀ ਡਾਕਟਰੀ ਜਾਂਚ ਕੀਤੀ ਗਈ ਅਤੇ ਖੂਨ ਦੇ ਨਮੂਨੇ ਜਾਂਚ ਲਈ ਲਏ ਗਏ, ਜਿੰਨਾਂ ਦੀ ਰਿਪੋਰਟ ਅਗਲੇ ਮਹੀਨੇ ਆਵੇਗੀ। ਇਸ ਮੌਕੇ ਸੰਬੋਧਨ ਕਰਦੇ ਕੈਂਸਰ ਕੇਅਰ ਚੈਰੀਟੇਬਲ ਟਰੱਸਟ ਯੂ. ਕੇ. ਦੇ ਚੇਅਰਮੈਨ ਸ੍ਰੀ ਕੁਲਵੰਤ ਸਿੰਘ ਧਾਲੀਵਾਲ ਨੇ ਕਿਹਾ ਕਿ ਕੈਂਸਰ ਤੋਂ ਬਚਣ ਲਈ ਜ਼ਰੂਰੀ ਹੈ ਕਿ ਅਸੀਂ ਸਾਦਾ ਜੀਵਨ ਬਤੀਤ ਕਰੀਏ ਅਤੇ ਨਰੋਈ ਖਾਧ-ਖੁਰਾਕ ਲਈਏ। ਉਨਾਂ ਕੈਂਸਰ ਤੋਂ ਬਚਣ ਅਤੇ ਸਿਹਤਮੰਦ ਜੀਵਨ ਲਈ 'ਵੀਟ ਗਰਾਸ' ਨੂੰ ਆਪਣੀ ਰੋਜ਼-ਮਰਾ ਦੀ ਖੁਰਾਕ ਦਾ ਹਿੱਸਾ ਬਨਾਉਣ 'ਤੇ ਜ਼ੋਰ ਦਿੱਤਾ। ਉਨਾਂ ਕਿਹਾ ਕਿ ਜੇਕਰ ਅਸੀਂ ਆਪਣਾ ਜੀਵਨ ਸੌਖਾ ਅਤੇ ਤਨਾਅ ਮੁਕਤ ਰੱਖਣਾ ਹੈ ਤਾਂ ਸਾਨੂੰ ਵਿਆਹਾਂ ਅਤੇ ਸਮਾਗਮਾਂ 'ਤੇ ਕੀਤੇ ਜਾਂਦੇ ਫਜ਼ੂਲ ਖਰਚ ਦੇ ਨਾਲ-ਨਾਲ ਆਮ ਜੀਵਨ-ਜਾਚ ਵਿਚੋਂ ਵਿਚ ਵੀ ਬਿਨਾਂ ਲੋੜੋਂ ਤੋਂ ਕੀਤੇ ਜਾਂਦੇ ਖਰਚ ਨੂੰ ਰੋਕਣਾ ਪਵੇਗਾ।

ਸੰਸਥਾ ਦੇ ਪ੍ਰਧਾਨਜਸਜੀਤ ਸਿੰਘ ਸਮੁੰਦਰੀ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਉਕਤ ਸੰਸਥਾ, ਜੋ ਕਿ ਇਕ ਸਕੂਲ ਦੇ ਰੂਪ ਵਿਚ 1917 ਵਿਚ ਸੁਤੰਤਰਤਾ ਸੈਨਾਨੀ ਸ. ਤੇਜਾ ਸਿੰਘ ਸਮੁੰਦਰੀ ਨੇ ਸ਼ੁਰੂ ਕੀਤੀ ਸੀ, ਦੇ 100 ਸਾਲਾ ਪੂਰੋ ਹੋਏ ਹਨ ਅਤੇ ਅਸੀਂ ਇਸ ਮੌਕੇ ਇਲਾਕੇ ਦੀ ਸਿਹਤ ਤੰਦਰੁਸਤ ਰੱਖਣ ਦੇ ਮਕਸਦ ਨਾਲ ਸ੍ਰੀ ਧਾਲੀਵਾਲ ਹੁਰਾਂ ਦੇ ਸਾਥ ਲੈ ਕੇ ਇਹ ਕੈਂਸਰ ਜਾਂਚ ਕੈਂਪ ਲਗਾਇਆ ਹੈ ਅਤੇ ਅੱਗੇ ਤੋਂ ਵੀ ਇਹ ਯਤਨ ਜਾਰੀ ਰਹਿਣਗੇ ਅਤੇ ਹਰ ਸਾਲ ਇਹ ਮੈਡੀਕਲ ਕੈਂਪ ਸਰਹਾਲੀ ਕਲਾਂ ਵਿਖੇ ਲਗਾਇਆ ਜਾਵੇਗਾ।ਕੈਂਪ ਦੌਰਾਨ ਇਲਾਕੇ ਭਰ ਵਿਚੋਂ ਆਏ ਲੋਕਾਂ ਦੀ ਜਾਂਚ ਮਾਹਿਰ ਡਾਕਟਰਾਂ ਵੱਲੋਂ ਕੀਤੀ ਗਈ ਅਤੇ ਲੋੜਵੰਦਾਂ ਦੇ ਟੈਸਟ ਲਈ ਨਮੂਨੇ ਲਏ ਗਏ, ਜਿੰਨਾ ਦੀ ਰਿਪੋਰਟ ਅਗਲੇ ਮਹੀਨੇ ਆਵੇਗੀ। ਕੈਂਪ ਵਿਚ ਪਹੁੰਚੇ ਲੋਕਾਂ ਨੂੰ ਮੋਬਾਈਲ ਸਿਨੇਮਾ, ਲਿਟਰੇਚਰ ਆਦਿ ਰਾਹੀਂ ਕੈਂਸਰ ਦੀ ਬਿਮਾਰੀ ਤੋਂ ਜਾਣੂੰ ਕਰਵਾ ਕੇ ਇਸ ਤੋਂ ਬਚਣ ਦੇ ਢੰਗ ਦੱਸਣ ਦੇ ਨਾਲ-ਨਾਲ ਇਸ ਅੱਗੇ ਗੋਡੇ ਟੇਕਣ ਨਾਲੋਂ ਲੜਨ ਦੇ ਗੁਰ ਦੱਸੇ ਗਏ। ਕੈਂਸਰ ਮਾਹਿਰ ਡਾਕਟਰ ਦਵਿੰਦਰ ਸਿੰਘ ਸੰਧੂ ਵੱਲੋਂ ਬੜੇ ਵਿਸਥਾਰ ਵਿਚ ਕੈਂਸਰ ਬਾਬਤ ਭਰਮ-ਭੁਲੇਖੇ ਦੂਰ ਕੀਤੇ ਗਏ ਅਤੇ ਮਰੀਜਾਂ ਦੀ ਜਾਂਚ ਦੀ ਅਗਵਾਈ ਕੀਤੀ ਗਈ। ਕਈ ਲੋੜਵੰਦ ਮਰੀਜਾਂ ਨੂੰ ਸੰਸਥਾ ਵੱਲੋਂ ਮੁਫ਼ਤ ਦਵਾਈ ਦੀ ਸਹੂਲਤ ਵੀ ਦਿੱਤੀ ਗਈ। ਇਸ ਮੌਕੇ ਟਰੱਸਟੀ ਧੰਨਵੰਤ ਸਿੰਘ ਸੰਧੂ, ਮੈਨੇਜਰ ਪਰਮਿੰਦਰ ਸਿੰਘ ਸੰਧੂ, ਸਾਬਕਾ ਬ੍ਰਿਗੇਡੀਅਰ ਪਰਮਜੀਤ ਸਿੰਘ ਸੰਧੂ  ਨੇ ਕੈਂਸਰ ਕੇਅਰ ਟਰੱਸਟ ਦਾ ਧੰਨਵਾਦ ਕਰਦੇ ਪ੍ਰਬੰਧਕਾਂ ਨੂੰ ਸਨਮਾਨਿਤ ਕੀਤਾ।