ਮੁਢਲੀ ਸਹਾਇਤਾ ਨਾਲ ਕਿਸੇ ਦੁਰਘਟਨਾਂ ਦੇ ਪੀੜਤਾਂ ਜਾਂ ਕੁਦਰਤੀ ਆਫਤਾਂ ਦੇ ਸ਼ਿਕਾਰ ਵਿਅਕਤੀਆਂ ਦੀਆਂ ਅਨਮੋਲ ਜਾਨਾਂ ਬਚਾਈਆਂ ਜਾ ਸਕਦੀਆਂ ਹਨ : ਕਾਕਾ ਰਾਮ ਵਰਮਾਂ

ਮੁਢਲੀ ਸਹਾਇਤਾ ਦੀ ਜਾਣਕਾਰੀ ਹਰੇਕ ਨਾਗਰਿਕ ਲਈ ਜਰੂਰੀ, ਯੂਨੀਵਰਸਿਟੀ ਕਾਲਜ਼ ਚੁੰਨੀ ਕਲਾਂ ਵਿਖੇ ਫਸਟ ਏਡ ਸਬੰਧੀ ਕਰਵਾਇਆ ਜਾਗਰੂਕਤਾ ਪ੍ਰੋਗਰਾਮ

5 Dariya News

ਫਤਹਿਗੜ ਸਾਹਿਬ 16-Nov-2018

ਕਿਸੇ ਵੀ ਦੁਰਘਟਨਾ ਜਾਂ ਕੁਦਰਤੀ ਆਫਤ ਤੋਂ ਪੀੜਤ ਵਿਅਕਤੀਆਂ ਨੂੰ ਸਹੀ ਸਲਾਮਤ ਹਸਪਤਾਲ ਤੱਕ ਪਹੁੰਚਾਉਣ ਲਈ ਮੁੱਢਲੀ ਸਹਾਇਤਾ ਦੀ ਜਾਣਕਾਰੀ ਹਰੇਕ ਨਾਗਰਿਕ ਨੂੰ ਹੋਣੀ ਜਰੂਰੀ ਹੈ। ਕਿਉਂਕਿ ਇਸ ਵਿਧੀ ਨਾਲ ਕਈ ਅਨਮੋਲ ਮਨੁੱਖੀ ਜਾਨਾਂ ਅਜਾਈ ਜਾਣ ਤੋਂ ਬਚਾਈਆਂ ਜਾ ਸਕਦੀਆਂ ਹਨ। ਇਹ ਪ੍ਰਗਟਾਵਾ ਫਸਟ ਏਡ ਮਾਹਰ ਕਾਕਾ ਰਾਮ ਵਰਮਾਂ ਨੇ ਯੂਨੀਵਰਸਿਟੀ ਕਾਲਜ ਚੁੰਨੀ ਕਲਾਂ ਵਿਖੇ ਵਿਦਿਆਰਥੀਆਂ ਨੂੰ ਫਸਟ ਏਡ ਦੀ ਸਿਖਲਾਈ ਦੇਣ ਮੌਕੇ ਸੰਬੋਧਨ ਕਰਦਿਆਂ ਕੀਤਾ। ਉਨਾਂ ਕਿਸੇ ਇਨਸਾਨ ਦੀ ਸਾਹ ਕਿਰਿਆ ਜਾ ਦਿਲ ਦਿਮਾਗ ਰੁੱਕਣ 'ਤੇ ਸੀ.ਪੀ.ਆਰ. ਕਰਨ, ਸੱਪ ਜਾਂ ਕੁੱਤੇ ਵੱਲੋਂ ਕੱਟਣ 'ਤੇ, ਅੱਗ ਲਗਣ ਤੇ ਪਾਣੀ ਰੇਤ, ਅੱਗ ਬੁਝਾਓ ਸਿਲੰਡਰਾਂ ਨਾਲ ਕਾਬੂ ਕਰਨ, ਸੜਕਾਂ ਤੇ ਚੱਲਦੇ ਸਮੇਂ ਸੇਫਟੀ ਨਿਯਮਾਂ ਦੀ ਪਾਲਣਾ ਕਰਨ ਸਬੰਧੀ ਵਿਸਥਾਰ ਸਹਿਤ ਜਾਣਕਾਰੀ ਦਿੱਤੀ। ਉਨਾਂ ਇਸ ਮੌਕੇ ਕਾਲਜ ਦੇ ਵਿਦਿਆਰਥੀਆਂ ਨੂੰ ਫਸਟ ਏਡ ਦੀ ਜਾਣਕਾਰੀ ਦੇਣ ਤੋਂ ਇਲਾਵਾ ਪੀੜਤਾਂ ਨੂੰ ਹਸਪਤਾਲ ਤੱਕ ਪਹੁੰਚਾਉਣ ਦਾ ਪ੍ਰੈਕਟੀਕਲ ਵੀ ਕਰਵਾਇਆ। ਇਸ ਮੌਕੇ ਜ਼ਿਲਾ ਰੈਡ ਕਰਾਸ ਸੋਸਾਇਟੀ ਦੀ ਸਕੱਤਰ ਸ਼੍ਰੀਮਤੀ ਸਵਤੰਤਰ ਅਰੋੜਾ ਨੇ ਜ਼ਿਲਾ ਰੈੱਡ ਕਰਾਸ ਸੋਸਾਇਟੀ ਦੇ ਇਤਿਹਾਸ ਤੇ ਕੰਮਾਂ ਬਾਰੇ ਵਿਸਥਾਰ ਵਿੱਚ ਜਾਣਕਾਰੀ ਦਿੱਤੀ। ਕਾਲਜ ਦੀ ਪ੍ਰਿੰਸੀਪਲ ਡਾ: ਸਰਬਜੀਤ ਕੌਰ ਸੋਹਲ ਨੇ ਰੈਡ ਕਰਾਸ ਦੇ ਅਧਿਕਾਰੀਆਂ ਨੂੰ ਅਪੀਲ ਕੀਤੀ ਕਿ ਹਰੇਕ ਕਾਲਜ ਅਤੇ ਸਕੂਲ ਵਿਖੇ ਇਹੋ ਜਿਹੇ ਟਰੇਨਿੰਗ ਕੈਂਪ ਜਰੂਰ ਲਗਾਏ ਜਾਣ।  ਇਸ ਮੌਕੇ ਰੈੱਡ ਕਰਾਸ ਯੂਨਿਟ ਦੇ ਇੰਚਾਰਜ ਡਾ. ਗੁਰਕਮਲ ਅਤੇ ਗੀਤ ਲਾਂਬਾ, ਡਾ. ਸੰਵਾਦ ਸਿੰਘ, ਹਰਪ੍ਰੀਤ ਕੌਰ ਅਤੇ ਅਮਨਪ੍ਰੀਤ ਕੌਰ ਸਮੇਤ ਵੱਡੀ ਗਿਣਤੀ ਵਿਚ ਵਿਦਿਆਰਥੀ ਤੇ ਅਧਿਆਪਕ ਹਾਜਰ ਸਨ।