'ਮਿਸ਼ਨ ਤੰਦਰੁਸਤ ਪੰਜਾਬ' : ਖੇਡ ਅਕਾਦਮੀਆਂ ਦੀ ਸਾਫ਼-ਸਫ਼ਾਈ, ਦੋਸਤਾਨਾ ਮੈਚ, ਨਸ਼ਿਆਂ ਖਿਲਾਫ਼ ਪੁਲਿਸ ਵਲੋਂ ਕਰਵਾਏ ਗਏ ਸੈਮੀਨਾਰ

ਸਰਕਾਰੀ ਪ੍ਰਾਇਮਰੀ ਸਕੂਲ ਗਿਆਨਾ ਦੇ ਅਧਿਆਪਕ ਨੇ ਕੀਤੇ ਸਕੂਲ ਦੇ ਪਖ਼ਾਨੇ ਸਾਫ਼

5 Dariya News

ਬਠਿੰਡਾ 05-Aug-2018

ਮਿਸ਼ਨ ਤੰਦਰੁਸਤ ਪੰਜਾਬ ਤਹਿਤ ਜ਼ਿਲਾ ਬਠਿੰਡਾ ਵਿੱਚ ਵੱਖ-ਵੱਖ ਥਾਂਵਾਂ 'ਤੇ ਸਰਕਾਰੀ ਸਕੂਲਾਂ ਵਿੱਚ ਚਲਾਈਆਂ ਜਾ ਰਹੀਆਂ ਖੇਡ ਅਕਾਦਮੀਆਂ ਦੇ ਖਿਡਾਰੀਆਂ ਨੇ ਸਾਫ਼-ਸਫ਼ਾਈ ਕੀਤੀ, ਵੱਖ-ਵੱਖ ਥਾਂਵਾਂ 'ਤੇ ਦੋਸਤਾਨਾ ਮੈਚ ਕਰਵਾਏ ਗਏ ਅਤੇ ਪੁਲਿਸ ਵਲੋਂ ਵਿਦਿਅਕ ਅਦਾਰਿਆਂ ਵਿੱਚ ਨਸ਼ਿਆਂ ਖਿਲਾਫ਼ ਸੈਮੀਨਾਰ ਕਰਵਾਏ ਗਏ। ਈ.ਟੀ.ਟੀ. ਅਧਿਆਪਕ ਸ਼੍ਰੀ ਰਣਜੀਤ ਸਿੰਘ ਨੇ ਆਪਣੇ ਸਰਕਾਰੀ ਪ੍ਰਾਇਮਰੀ ਸਕੂਲ ਗਿਆਨਾ ਜਿੱਥੇ ਉਹ ਬੱਚਿਆਂ ਨੂੰ ਪੜਾ ਰਿਹਾ ਹੈ, ਦੇ ਪਖਾਨੇ ਸਾਫ਼ ਕਰਕੇ ਇੱਕ ਮਿਸ਼ਾਲ ਕਾਇਮ ਕੀਤੀ।ਇਸੇ ਤਰਾਂ ਮਿਸ਼ਨ ਤੰਦਰੁਸਤ ਪੰਜਾਬ ਤਹਿਤ ਤਲਵੰਡੀ ਸਾਬੋ ਵਿਖੇ ਵਾਲੀਬਾਲ ਦੇ ਕੋਚਿੰਗ ਸੈਂਟਰ ਦੀ ਖਿਡਾਰੀਆਂ ਵਲੋਂ ਸਫ਼ਾਈ ਕੀਤੀ ਗਈ। ਇਸੇ ਤਰਾਂ ਬਹੁ-ਮੰਤਵੀ ਖੇਡ ਸਟੇਡੀਅਮ ਬਠਿੰਡਾ ਵਿਖੇ ਫੁਟਬਾਲ ਦੇ ਖਿਡਾਰੀਆਂ ਨੇ ਗਰਾਊਂਡ ਦੀ ਸਫ਼ਾਈ ਕੀਤੀ। ਤਲਵੰਡੀ ਸਾਬੋ ਅਤੇ ਬਹੁ-ਮੰਤਵੀ ਖੇਡ ਸਟੇਡੀਅਮ ਬਠਿੰਡਾ ਵਿਖੇ ਲੜਕੀਆਂ ਦੇ ਵਾਸਕਟਬਾਲ ਅਤੇ ਬਾਕਸਿੰਗ ਦੇ ਦੋਸਤਾਨਾ ਮੈਚ ਕਰਵਾਏ ਗਏ। ਸਰਕਾਰੀ ਹਾਈ ਸਕੂਲ ਗਾਟਵਾਲੀ ਵਿਖੇ 150 ਤੋਂ ਵੱਧ ਵਿਦਿਆਰਥੀਆਂ ਨੂੰ ਖੇਡ ਕਿੱਟਾਂ ਵੰਡੀਆਂ ਗਈਆਂ। ਇਸੇ ਤਰਾਂ ਸਰਕਾਰੀ ਪ੍ਰਾਇਮਰੀ ਸਕੂਲ ਗਾਟਵਾਲੀ ਵਿਖੇ ਵਿਦਿਆਰਥੀਆਂ ਨੇ ਐਤਵਾਰ ਵਾਲੇ ਦਿਨ ਸਫ਼ਾਈ ਕੀਤੀ।ਨਗਰ ਪੰਚਾਇਤਾਂ ਵਲੋਂ ਵੀ ਆਪਣੀ-ਆਪਣੀ ਸਫ਼ਾਈ ਮੁਹਿੰਮ ਨੂੰ ਜਾਰੀ ਰਖਦਿਆਂ ਨਗਰ ਪੰਚਾਇਤ ਮਹਿਰਾਜ ਵਿਖੇ ਪਾਰਕਾਂ ਦੀ ਸਫ਼ਾਈ ਕੀਤੀ ਗਈ ਅਤੇ ਮੰਡੀ ਕਲਾਂ ਵਿਖੇ ਸੜਕਾਂ ਦੀ ਸਫ਼ਾਈ ਕੀਤੀ ਗਈ। ਭਾਈ ਰੂਪਾ ਦੇ ਵਾਰਡ ਨੰਬਰ 2 ਵਿੱਚ ਬਣੇ ਸਟੇਡੀਅਮ ਦੀ ਸਫ਼ਾਈ ਕੀਤੀ ਗਈ। ਵਾਟਰ ਸਪਲਾਈ ਵਿਭਾਗ ਡਵੀਜ਼ਨ ਨੰਬਰ 2 ਵਲੋਂ ਪਿੰਡ ਫਤਿਹਗੜ ਨੌਂ ਅਬਾਦ, ਬਲਾਕ ਤਲਵੰਡੀ ਸਾਬੋ ਵਿਖੇ ਪੌਦੇ ਲਗਾਏ ਗਏ। ਇਸੇ ਤਰਾਂ ਤਲਵੰਡੀ ਸਾਬੋ ਵਿਖੇ ਸੜਕਾਂ ਦੇ ਕਿਨਾਰੇ ਪੌਦੇ ਲਗਾਏ ਗਏ। ਨਹਿਰੀ ਵਿਭਾਗ ਨੇ ਗੋਨਿਆਣਾ ਨਹਿਰੀ ਅਰਾਮ ਘਰ ਵਿਖੇ 150 ਪੌਦੇ ਲਗਾਏ। ਇਸੇ ਤਰਾਂ ਪਿੰਡ ਮਹਿਮਾ ਸਰਕਾਰੀ ਅਤੇ ਪਿੰਡ ਸਿਵੀਆਂ, ਬਲਾਕ ਗੋਨਿਆਣਾ ਵਿਖੇ ਵੀ ਪੌਦੇ ਲਗਾਏ ਗਏ। ਦਿਆਲਪੁਰਾ ਪੁਲਿਸ ਵਲੋਂ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਪਿੰਡ ਭੋਡੀਪੁਰਾ ਵਿਖੇ ਨਸ਼ਿਆਂ ਖਿਲਾਫ਼ ਜਾਗਰੂਕਤਾ ਪੈਦਾ ਕਰਨ ਲਈ ਸੈਮੀਨਾਰ ਕਰਵਾਇਆ ਗਿਆ। ਇਸੇ ਤਰਾਂ ਕੋਟਫੱਤਾ ਪੁਲਿਸ ਨੇ ਪਿੰਡ ਕੋਟਭਾਰਾ ਵਿਖੇ ਟ੍ਰੈਫ਼ਿਕ ਦੇ ਨਿਯਮਾਂ ਆਦਿ ਸਬੰਧੀ ਵਿਦਿਆਰਥੀਆਂ ਨੂੰ ਜਾਣਕਾਰੀ ਦਿੱਤੀ। ਸਾਂਝ ਕੇਂਦਰ ਕੋਤਵਾਲੀ ਵਲੋਂ ਗਿਆਨੀ ਜ਼ੈਲ ਸਿੰਘ ਕਾਲਜ ਵਿਖੇ ਨਸ਼ਿਆਂ ਖਿਲਾਫ਼ ਸੈਮੀਨਾਰ ਕਰਵਾਇਆ ਗਿਆ। ਇਸੇ ਤਰਾਂ ਸਾਂਝ ਕੇਂਦਰ ਰਾਮਾਂ ਵਲੋਂ ਸਰਕਾਰੀ ਹਾਈ ਸਕੂਲ ਜੱਜਲ ਵਿਖੇ ਸੈਮੀਨਾਰ ਕਰਵਾਕੇ ਜਾਗਰੂਕਤਾ ਪੈਦਾ ਕੀਤੀ ਗਈ। ਪੁਲਿਸ ਵਲੋਂ ਸ਼ਿਵਾਲਿਕ ਸਕੂਲ ਭੁੱਚੋ ਮੰਡੀ, ਸ਼ਿਵਾਲਿਕ ਕਾਲਜ਼ ਭੁੱਚੋ ਮੰਡੀ ਅਤੇ ਰੈਡ ਕਰਾਸ ਭਵਨ ਬਠਿੰਡਾ ਵਿਖੇ ਵੀ ਸੈਮੀਨਾਰ ਕਰਵਾਏ ਗਏ।