ਪੰਜਾਬ ਵਿਚ ਹੜ੍ਹਾਂ ਪ੍ਰਤੀ ਵਰਤੇ ਢਿਲੇ ਰੱਵਈਏ ਕਾਰਨ ਹਰਸਿਮਰਤ ਕੌਰ ਬਾਦਲ ਨੇ ਕੇਂਦਰ ਨੂੰ ਕੋਸਿਆ

5 ਦਰਿਆ ਨਿਊਜ਼

ਚੰਡੀਗੜ੍ਹ 07-Sep-2013

ਬਠਿੰਡਾ ਲੋਕ ਸਭਾ ਹਲਕੇ ਤੋਂ ਮੈਂਬਰ ਪਾਰਲੀਮੈਂਟ ਬੀਬੀ ਹਰਸਿਮਰਤ ਕੌਰ ਬਾਦਲ ਨੇ ਪੰਜਾਬ ਵਿਚ ਹੜ੍ਹਾਂ ਤੋਂ ਬਾਅਦ ਕਿਸਾਨਾ ਦੀ ਦੁਰਦਸ਼ਾ 'ਤੇ ਕਾਂਗਰਸ ਦੀ ਅਗਵਾਈ ਵਾਲੀ ਯੂ ਪੀ ਏ ਸਰਕਾਰ ਵਲੋਂ ਅਪਣਾਏ ਗਏ ਢਿਲੇ ਰੱਵਈਏ ਕਾਰਨ ਉਸ ਦੀ ਨਿਖੇਧੀ ਕੀਤੀ ਇਸ ਦੇ ਨਾਲ ਹੀ ਬੀਬੀ ਬਾਦਲ ਨੇ  ਕੇਂਦਰ ਸਰਕਾਰ ਤੋਂ ਹੜ੍ਹ ਮਾਰੁ ਖੇਤਰ ਦੇ ਕਿਸਾਨਾਂ ਲਈ ਵਿਸ਼ੇਸ਼ ਪੈਕੇਜ਼ ਦੀ ਮੰਗ ਵੀ ਕੀਤੀ। ਲੋਕ ਸਭਾ ਵਿਚ ਇਸ ਮੁੱਦੇ 'ਤੇ ਬੋਲਦਿਆਂ ਬੀਬੀ ਬਾਦਲ ਨੇ ਪੰਜਾਬ ਕਾਂਗਰਸ ਦੇ ਸੰਸਦ ਮੈਂਬਰਾਂ ਨੂੰ ਵੀ ਫਟਕਾਰਿਆ ਜੋਕਿ ਉਨ੍ਹਾਂ ਦੇ ਭਾਸ਼ਨ 'ਚ ਅੜਿਕਾ ਡਾਹੁਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਬੀਬੀ ਬਾਦਲ ਨੇ ਕਿਹਾ ਕਿ ਇਹ ਬੜੀ ਸ਼ਰਮ ਦੀ ਗੱਲ ਹੈ ਕਿ ਪੰਜਾਬ ਕਾਂਗਰਸ ਦੇ ਐਮ ਪੀ ਆਪਣੀ ਕਾਂਗਰਸ ਦੀ ਸਰਕਾਰ ਨੂੰ ਪੰਜਾਬ ਦੀ ਦਸ਼ਾ ਤੋਂ ਜਾਣੂ ਕਰਵਾ ਕੇ ਵਿਸ਼ੇਸ਼ ਪੈਕੇਜ ਨਹੀ ਲੈ ਸਕੇ। 

ਹੜ੍ਹਾਂ ਵਲੋਂ ਕੀਤੀ ਤਬਾਹੀ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਕਿਹਾ ਕਿ ਇਸ ਕੁਦਰਤੀ ਕਰੋਪੀ ਨੇ ਜਿਥੇ ਲੱਖਾਂ ਏਕੜ ਫਸਲ ਤਬਾਹ ਕਰ ਦਿਤੀ ਉਥੇ ਹੀ ਹਜ਼ਾਰਾ ਲੋਕਾਂ ਦੇ ਘਰ ਤਬਾਹ ਕੀਤੇ ਅਤੇ ਉਨ੍ਹਾਂ ਨੂੰ ਘਰੋਂ ਬੇਘਰ ਹੋਣਾ ਪਿਆ। ਉਨ੍ਹਾਂ ਕਿਹਾ ਕਿ ਇਹ ਬੜੀ ਹੀ ਹਾਸੋਹੀਣੀ ਗੱਲ ਹੈ ਕਿ ਇਸ ਤਬਾਹੀ ਉਪਰੰਤ ਵੀ ਕੇਂਦਰ ਸਰਕਾਰ ਹੇ ਹੜ੍ਹ ਮਾਰੂ ਲੋਕਾਂ ਲਈ ਬੜੀ ਹੀ ਨਿਗੂਣੀ ਰਕਮ ਦੀ ਪੇਸ਼ਕਸ਼ ਕੀਤੀ ਹੈ ਜਿਵੇਂ ਹਰ ਵਿਅਕਤੀ ਪਿਛੇ 20 ਰੁਪਏ, ਹਰ ਬੱਚੇ ਪ੍ਰਤੀ 15 ਰੁਪਏ। ਉਨ੍ਹਾਂ ਕਿਹਾ ਕਿ ਫਸਲ ਪੂਰੀ ਤਬਾਹ ਹੋ ਜਾਣ ਪਿਛੇ ਵੀ ਕੇਂਦਰ ਸਰਕਾਰ ਨੇ ਪ੍ਰਤੀ ਏਕੜ 3600 ਰੁਪਏ ਦੇ ਰਹੀ ਹੈ ਜਦਕਿ ਇਕ ਏਕੜ ਫਸਲ ਲਗਾਉਣ ਲਈ 42 ਹਜ਼ਾਰ ਰੁਪਏ ਦਾ ਖਰਚਾ ਆਉਂਦਾ ਹੈ।ਬੀਬੀ ਬਾਦਲ ਹੇ ਕਿਹਾ ਕਿ ਕੇਂਦਰ ਸਰਕਾਰ ਲੈਂਡ ਐਕਵੀਜੇਸ਼ਨ ਬਿਲ ਅਤੇ ਖੁਰਾਕ ਸੁਰੱਖਿਆ ਬਿਲ ਨੂੰ ਪੇਸ਼ ਕਰਕੇ ਬਹੁਤ ਦਮਗਜੇ ਮਾਰ ਰਹੀ ਹੈ ਜਦ ਕਿ ਹੜ੍ਹਾਂ ਉਪਰੰਤ ਪੰਜਾਬ ਵਿਚ ਬੇੱਘਰ ਹੋਏ ਭੁੱਖੇ ਭਾਣੇ ਲੋਕਾਂ ਪ੍ਰਤੀ ਕੇਂਦਰ ਸਰਕਾਰ ਨੇ ਭੋਰਾਂ ਵੀ ਹਮਦਰਦੀ ਨਹੀ ਪ੍ਰਗਟਾਈ। 

ਕੇਂਦਰ ਸਰਕਾਰ ਦੀਆਂ ਕੁਦਰਤੀ ਆਫਤਾਂ ਵਿਚ ਗ੍ਰਸਤ ਲੋਕਾਂ ਦੀ ਭਲਾਈ ਲਈ ਬਣਾਈਆਂ ਗਈਆਂ ਦਿਸ਼ਾਹੀਣ ਨੀਤੀਆਂ ਦੀ ਨਿਖੇਧੀ ਕਰਦਿਆਂ ਬੀਬੀ ਬਾਦਲ ਨੇ ਕਿਹਾ ਕਿ ਕੇਂਦਰ ਸਰਕਾਰ ਦੀਆਂ ਨੀਤੀਆਂ ਕੇਵਲ ਇਸ ਗੱਲ ਨੂੰ ਯਕੀਨੀ ਬਣਾਉਂਦੀਆਂ ਹਨ ਕਿ ਜੇਕਰ ਤੁਸੀ ਕੁਦਰਤੀ ਆਫਤ ਵਿਚੋ ਕਿਸੇ ਤਰ੍ਹਾਂ ਬੱਚ ਗਏ ਤਾਂ ਉਹ ਤੁਹਾਡੀ ਬਚੀ ਜਿੰਦਗੀ ਨੂੰ ਨਰਕ ਬਣਾ ਦੇਣਗੇ। ਉਨ੍ਹਾਂ ਕਿਹਾ ਕਿ ਰਾਹਤ ਵਜੋਂ ਦਿੱਤੀ ਜਾ ਰਹੀ ਨਿਗੁਣੀ ਰਾਸ਼ੀ ਨਾਲ ਨਾ ਤਾਂ ਕਿਸਾਨ ਰੋਟੀ ਖਾ ਸਕਣ ਦੇ ਕਾਬਲ ਹੋਵੇਗਾ ਅਤੇ ਨਾ ਹੀ ਆਪਣੇ ਸਿਰ 'ਤੇ ਛੱਤ ਦਾ ਆਸਰਾ ਬਣਾ ਸਕੇਗਾ ਇਥੋਂ ਤੱਕ ਕਿ ਉਹ ਕਿਸੇ ਵੀ ਹਾਲਤ ਵਿਚ ਫਸਲ ਨੂੰ ਪੈਦਾ ਕਰਨ ਲਈ ਲਏ ਗਏ ਕਰਜ਼ੇ ਦਾ ਭੁਗਤਾਨ ਕਰਨ ਦੇ ਕਾਬਲ ਨਹੀ ਹੋ ਸਕੇਗਾ।