ਸੰਗੀਤ ਸਾਡੇ ਰੂਹ ਦੀ ਖੁਰਾਕ ਨੌਜਵਾਨ ਸੰਗੀਤ ਨੂੰ ਆਪਣੀ ਜਿੰਦਗੀ ਦਾ ਹਿੱਸਾ ਬਣਾਉਣ : ਲਖਮੀਰ ਸਿੰਘ

ਐਸ.ਡੀ.ਐਮ. ਵੱਲੋਂ ਉੱਘੇ ਗਜ਼ਲ ਗਾਇਕ ਸੁਨੀਲ ਡੋਗਰਾ ਦੀ ਐਲਬਮ ਕੀਤੀ ਲੋਕ ਅਰਪਣ

5 ਦਰਿਆ ਨਿਊਜ਼

ਐਸ.ਏ.ਐਸ. ਨਗਰ 16-Aug-2013

ਪੰਜਾਬ ਦਾ ਸੱਭਿਆਚਾਰ ਵਿਰਸਾ ਬਹੁਤ ਹੀ ਅਮੀਰ ਹੈ ਇਸ ਵਿਰਸੇ ਨੂੰ ਹੋਰ ਪ੍ਰਫੁਲਿੱਤ ਕਰਨ ਲਈ ਨੌਜਵਾਨ ਪੀੜ੍ਹੀ ਨੂੰ ਅੱਗੇ ਆਉਣ ਦੀ ਲੋੜ ਹੈ। ਸੰਗੀਤ ਸਾਡੇ ਰੂਹ ਦੀ ਖੁਰਾਕ ਹੈ ਨੌਜਵਾਨ ਸੰਗੀਤ ਨੂੰ ਆਪਣੀ ਜਿੰਦਗੀ ਦਾ ਹਿੱਸਾ ਬਣਾਉਣ । ਇਹਨਾਂ ਵਿਚਾਰਾਂ ਦਾ ਪ੍ਰਗਟਾਵਾ ਐਸ.ਡੀ.ਐਮ. ਸ੍ਰੀ ਲਖਮੀਰ ਸਿੰਘ ਐਸ.ਏ.ਐਸ.ਨਗਰ ਜਿਹੜੇ ਕਿ ਉੱਘੇ ਲੇਖਕ ਵੀ ਹਨ ਨੇ ਗਿਆਨ ਜੋਯਤੀ ਇੰਸਟੀਚਿਊਟ ਦੇ ਆਡੀਟੋਰੀਅਮ ਵਿਖੇ ਉੱਘੇ ਗਜ਼ਲ ਗਾਇਕ ਸੁਨੀਲ ਡੋਗਰਾ ਦੀ ਪਹਿਲੀ ਐਲਬਮ 'ਆਗਾਜ਼'  ਨੂੰ ਲੋਕ ਅਰਪਣ ਕਰਦਿਆਂ ਆਪਣੇ ਸੰਬੋਧਨ ਵਿੱਚ ਕੀਤ । ਉਹਨਾਂ ਨੌਜਵਾਨ ਗਜ਼ਲ ਗਾਇਕ ਸੁਨੀਲ ਡੋਗਰਾ ਦੀ ਪ੍ਰਸੰਸਾਂ ਕਰਦਿਆਂ ਕਿਹਾ ਕਿ ਇਸ ਕਲਾਕਾਰ ਵੱਲੋਂ ਸਾਫ਼ ਸੁਥਰੀ ਗਾਇਕੀ ਰਾਹੀਂ ਆਪਣੇ ਅਮੀਰ ਸੱਭਿਆਚਾਰ ਨੂੰ ਪ੍ਰਫੁਲਿੱਤ ਕਰਨ ਲਈ ਸ਼ਲਾਘਾਯੋਗ ਕਾਰਜ ਕੀਤਾ ਜਾ ਰਿਹਾ ਹੈ ਅਤੇ ਇਹਨਾਂ ਦੀ ਗਾਇਕੀ ਵਿੱਚ ਸਾਫ਼ ਸੁਥਰੇ ਸੱਭਿਆਚਾਰ ਦੀ ਝਲਕ ਪੈਂਦੀ ਹੈ। ਉਹਨਾਂ ਐਲਬਮ ਦੀ ਕਾਮਯਾਬੀ ਲਈ ਕਾਮਨਾ ਕਰਦਿਆਂ ਗਾਇਕ ਸੁਨੀਲ ਡੋਗਰਾ ਨੂੰ ਵਧਾਈ ਵੀ ਦਿੱਤੀ। 

ਇੱਥੇ ਇਹ ਵਰਨਣਯੋਗ ਹੈ ਕਿ ਗਜ਼ਲ ਗਾਇਕ ਸੁਨੀਲ ਡੋਗਰਾ ਨੰਗਲ ਦੇ ਜੰਗਪਲ ਹਨ ਅਤੇ ਉਹ ਇਸ ਸਮੇਂ ਭਾਖੜਾ ਬਿਆਸ ਮੈਨੇਜਮੈਂਟ ਬੋਰਡ ਦੇ ਡੀ.ਏ.ਵੀ ਸਕੂਲ ਨੰਗਲ ਵਿਖੇ ਬਤੌਰ ਸੰਗੀਤ ਅਧਿਆਪਕ ਵੀ ਸੇਵਾ ਨਿਭਾ ਰਹੇ ਹਨ। ਗਾਇਕੀ ਉਹਨਾਂ ਨੂੰ ਆਪਣੇ ਵਿਰਸੇ ਵਿੱਚੋਂ ਮਿਲੀ ।ਉਹਨਾਂ ਦੇ ਪਿਤਾ ਸਵਰਗੀ ਹੁਕਮ ਚੰਦ ਪ੍ਰਸਿੱਧ ਗਾਇਕ ਸਨ ਅਤੇ ਸਵਰਗੀ ਦਾਦਾ ਰੁਲੀਆ ਰਾਮ ਪ੍ਰਸਿੱਧ ਸਾਰੰਗੀ ਵਾਦਕ ਸਨ ਅਤੇ ਸੁਨੀਲ ਡੋਗਰਾ ਦੇ ਵੱਡੇ ਭਰਾ ਅਜਮੇਰ ਮੀਤ ਮਿਊਜ਼ਿਕ ਡਾਇਰੈਕਟਰ ਹਨ।ਇਸ ਐਲਬਮ ਵਿੱਚ 8 ਗਜ਼ਲਾਂ ਹਨ ਜਿਹਨਾਂ ਨੂੰ ਕਿ ਪਰਵਾਸੀ ਭਾਰਤੀ ਜੋ ਕਿ ਜਲੰਧਰ ਦੇ ਵਸਿੰਦੇ ਹਨ ਵੱਲੋਂ ਲਿਖੀਆਂ ਹੋਈਆਂ ਹਨ ਅਤੇ ਐਲਬਮ ਨੂੰ ਸੰਗੀਤ ਹਰਜੇਸ ਬਿੱਟੂ ਅਤੇ ਗੋਰਵ ਅਜ਼ਾਦ ਨੇ ਦਿੱਤਾ ਹੈ। ਇਸ ਐਲਬਮ ਵਿੱਚ ਰੁਮਾਂਟਿਕ, ਦੇਸ਼ ਭਗਤੀ ਦੇ ਨਾਲ ਨਾਲ ਸਮਾਜਿਕ ਕੁਰੀਤੀਆਂ ਤੇ ਅਧਾਰਿਤ ਗ਼ਜਲਾ ਹਨ ਅਤੇ ਇੱਕ ਗੀਤ 'ਬਿਰਹਾ ਦਾ ਸੁਲਤਾਨ' ਸ਼ਿਵ ਕੁਮਾਰ ਬਟਾਲਵੀ ਨੂੰ ਸਮਰਪਿਤ ਕੀਤਾ ਗਿਆ ਹੈ।'ਆਗਾਜ਼' ਐਲਬਮ ਦੀ ਰਿਕਾਰਡਿੰਗ ਦਿੱਲੀ , ਕੁਰਾਲੀ ਅਤੇ ਲੁਧਿਆਣਾ ਵਿਖੇ ਕਰਵਾਈ ਗਈ। ਸੁਨੀਲ ਡੋਗਰਾ ਵੱਲੋਂ ਪਹਿਲਾਂ ਵੀ 30 ਦੇ ਕਰੀਬ ਪੰਜਾਬੀ, ਹਿੰਦੀ ਅਤੇ ਉਰਦੂ ਦੀਆਂ ਗ਼ਜਲਾਂ ਰਿਕਾਰਡ ਕਰਵਾਈਆਂ ਜਾ ਚੁੱਕੀਆਂ ਹਨ।

ਗਾਇਕ ਸੁਨੀਲ ਡੋਗਰਾ ਨੇ ਐਲਬਮ ਨੂੰ ਲੋਕ ਅਰਪਣ ਕਰਨ ਲਈ ਕਰਵਾਏ ਗਏ ਸਮਾਗਮ ਦੀ  ਸ਼ੁਰੂਆਤ ਸ਼ਾਹ ਹੂਸ਼ੈਨ ਦੀ ਗ਼ਜਲ 'ਸਾਹਿਬ ਤੇਰੀ ਬੰਦੀ ਹਾਂ, ਮੰਦੀ ਹਾਂ ਕਿ ਚੰਗੀ ਹਾਂ ' ਗਾ ਕੇ ਕੀਤੀ। ਇਸ ਉਪਰੰਤ ਉਹਨਾਂ ਸ਼ਿਵ ਕੁਮਾਰ ਬਟਾਲਵੀ ਦੀ ਕਵਿਤਾ 'ਮੈਨੂੰ ਤੇਰਾ ਸ਼ਬਾਬ ਲੈ ਬੈਠਾ ਰੰਗ ਗੋਰਾ ਗੁਲਾਬ ਲੈ ਬੈਠਾ' ਆਪਣੇ ਹੀ ਅੰਦਾਜ਼ ਵਿੱਚ ਗਾ ਕੇ ਸਰੋਤਿਆਂ ਦੀ ਵਾਹ ਵਾਹ ਖੱਟੀ । ਉਹਨਾਂ 'ਕਿੱਥੇ ਗੁੰਮ ਹੋਇਆ ਸਾਡਾ ਜਿਹਲਮ ਤੇ ਝਨਾਬ, ਸੁੰਨਾਂ ਜਿਹਾ ਲੱਗਦਾ ਮੇਰਾ ਏ ਪੰਜਾਬ' ਗ਼ਜਲ ਵੀ ਪੇਸ਼ ਕੀਤੀ। ਉਹਨਾਂ ਐਸ.ਡੀ.ਐਮ. ਸ੍ਰੀ ਲਖਮੀਰ ਸਿੰਘ ਵੱਲੋਂ ਲਿਖੀ ਗ਼ਜਲ 'ਨਾ ਦਿਨ ਲੰਘਦਾ ਨਾ ਰਾਤ ਲੰਘੇ ਇਹ ਕਿਹੜਾ ਰੋਗ ਅਵੱਲਾ ਏ , ਦੁਨੀਆਂ ਦੀ ਇਸ ਭੀੜ ਅੰਦਰ ਬੰਦਾ ਕਿਉਂ ਲੱਗਦਾ ਇਕੱਲਾ ਏ, ਇਹ ਤਾਂ ਰੋਗ ਇਸ਼ਕ ਦਾ ਯਾਰੋ ਕਰ ਦਿੰਦਾਂ ਝੱਲਾ, ਬਚਾਅ ਲਈ ਅੱਲ੍ਹਾ, ਬਚਾਅ ਲਈ ਅੱਲ੍ਹਾ' ਵੀ ਪੇਸ਼ ਕਰਕੇ ਸਰੋਤਿਆਂ ਦੀ ਵਾਹ ਵਾਹ ਖੱਟੀ । ਉਹਨਾਂ ਇਸ ਮੌਕੇ ਹੋਰ ਵੀ ਗ਼ਜਲਾਂ ਅਤੇ ਗੀਤ ਪੇਸ਼ ਕੀਤੇ। ਇਸ ਮੌਕੇ ਪੰਜਾਬੀ ਗਾਇਕੀ ਦੇ ਮੰਨੇ ਜਾਂਦੇ ਬਾਬਾ ਬੋਹੜ ਹਰਦੀਪ ਗਿੱਲ, ਪਰਵਾਸੀ ਭਾਰਤੀ ਅਤੇ ਗਾਇਕ ਸ੍ਰੀ ਅਮਰਜੀਤ ਸਿੰਘ ਦੁੱਗਲ, ਮਿਉਜ਼ਿਕ ਡਾਇਰੈਕਟਰ ਹਰਜੇਸ਼ ਬਿੱਟੂ ਅਤੇ ਗੌਰਵ ਅਜ਼ਾਦ ਸਮੇਤ ਹੋਰ ਸਖ਼ਸੀਅਤਾਂ ਅਤੇ ਪੱਤਵੰਤੇ ਵੀ ਮੌਜੂਦ ਸਨ।