ਬਸਪਾ ਦੀ ਅਗਵਾਈ 'ਚ ਹੋਰਨਾਂ ਦਲਿਤ ਜੱਥੇਵੰਦੀਆਂ ਨੇ ਅਕਾਲੀ ਭਾਜਪਾ ਸਰਕਾਰ ਦਾ ਪੁਤਲਾ ਫੂਕ ਕੇ ਕੀਤਾ ਰੋਸ ਪ੍ਰਦਰਸ਼ਨ

ਮਾਮਲਾ ਮਾਨਸਾ 'ਚ ਦਲਿਤ ਨੌਜਵਾਨ ਦਾ ਤਸੱਦਦ ਪਿੱਛੋਂ ਅੰਗ ਵੱਢ ਕੇ ਕਤਲ ਕਰਨ ਅਤੇ ਦੋਸ਼ੀਆਂ ਖਿਲਾਫ ਕੋਈ ਕਾਰਵਾਈ ਨਾ ਕਰਨ ਦਾ

5 Dariya News (ਅਜੇ ਪਾਹਵਾ)

ਲੁਧਿਆਣਾ 13-Oct-2016

ਮਾਨਸਾ ਜਿਲੇ ਦੇ ਪਿੰਡ ਘਰਾਗਣਾਂ ਵਿਖੇ ਪਿਛਲੇ ਦਿਨੀਂ 20 ਸਾਲ ਦੇ ਇਕ ਦਲਿਤ ਨੌਜਵਾਨ ਸੁਖਚੈਨ ਸਿੰਘ ਉਰਫ ਪਾਲੀ ਦਾ ਗੈਰ ਕਾਨੂੰਨੀ ਢੰਗ ਨਾਲ ਸ਼ਰਾਬ ਦਾ ਧੰਦਾ ਕਰਨ ਵਾਲਿਆਂ ਨੇ ਬੇਰਹਮੀ ਨਾਲ ਦੋਵੇਂ ਬਾਹਵਾਂ ਨੂੰ ਤੋੜਨ ਅਤੇ ਲੱਤਾਂ ਵੱਢਣ ਤੋਂ ਬਾਅਦ ਅੰਨਾ ਤਸੱਦਦ ਢਾਹ ਕੇ ਕਤਲ ਕਰ ਦਿੱਤਾ। ਕਤਲ ਕਰਨ ਵਾਲੇ ਸ਼ਰਾਬ ਮਾਫੀਆ ਦੇ ਅਕਾਲੀ ਦਲ ਨਾਲ ਸਬੰਧ ਹੋਣ ਕਾਰਨ ਸਥਾਨਕ ਪੁਲਿਸ ਵੱਲੋਂ ਉਨਾਂ ਖਿਲਾਫ ਕਾਰਵਾਈ ਨਾ ਕਰਨ ਅਤੇ ਸੂਬੇ ਵਿੱਚ ਦਲਿਤਾਂ ਤੇ ਦਿਨੋਂ ਦਿਨ ਵਧ ਰਹੀਆਂ ਅਜਿਹੀਆਂ ਘਟਨਾਵਾਂ ਦੇ ਰੋਸ ਵਜੋਂ ਅੱਜ ਬਸਤੀ ਯੋਧੇਵਾਲ ਚੌਂਕ ਵਿਖੇ ਬਹੁਜਨ ਸਮਾਜ ਪਾਰਟੀ ਦੀ ਅਗਵਾਈ 'ਚ ਇੱਕਠੀਆਂ ਹੋਈਆਂ ਹੋਰਨਾਂ ਦਲਿਤ ਜੱਥੇਵੰਦੀਆਂ ਦੇ ਮੈਂਬਰਾਂ ਨੇ ਪੰਜਾਬ ਦੀ ਅਕਾਲੀ ਭਾਜਪਾ ਸਰਕਾਰ ਦਾ ਪੁਤਲਾ ਫੂਕਿਆ ਅਤੇ ਰਾਸ਼ਟਰਪਤੀ ਤੇ ਗਵਰਨਰ ਤੋਂ ਸਰਕਾਰ ਨੂੰ ਤੁਰੰਤ ਭੰਗ ਕਰਕੇ ਰਾਸ਼ਟਰਪਤੀ ਰਾਜ ਲਾਉਣ ਦੀ ਮੰਗ ਕੀਤੀ। ਇਸ ਸਬੰਧੀ ਗੱਲ ਕਰਦਿਆਂ ਜਿਲਾ ਇੰਚਾਰਜ ਸ਼ਿਵ ਚੰਦ ਗੋਗੀ, ਜਿਲਾ ਪ੍ਰਧਾਨ ਜੀਤ ਰਾਮ ਬਸਰਾ, ਜਨਰਲ ਸਕੱਤਰ ਪ੍ਰਗਣ ਬਿਲਗਾ, ਵਿਆਨਾ ਕਾਂਡ ਸੰਘਰਸ਼ ਕਮੇਟੀ ਦੇ ਤੀਰਥ ਰਾਮ ਬਸਰਾ, ਬਹੁਜਨ ਮੁਕਤੀ ਪਾਰਟੀ ਦੇ ਜਨਰਲ ਸਕੱਤਰ ਜੋਗਿੰਦਰ ਰਾਏ ਅਤੇ ਹੋਰ ਸੰਗਠਨਾਂ ਦੇ ਆਹੁਦੇਦਾਰਾਂ ਨੇ ਕਿਹਾ ਕਿ ਸੂਬੇ ਦੀ ਅਕਾਲੀ ਭਾਜਪਾ ਸਰਕਾਰ ਵੱਖ ਵੱਖ ਪ੍ਰਕਾਰ ਦੇ ਮਾਫੀਆ ਅਤੇ ਗੁੰਡਾ ਅਨਸਰਾਂ ਦੀ ਪੁਸ਼ਤਪਨਾਹੀ ਕਰ ਰਹੀ ਹੈ ਜਿਸ ਕਾਰਨ ਸੂਬੇ ਵਿੱਚ ਦਹਿਸਤ ਦਾ ਮਾਹੌਲ ਹੈ ਅਤੇ ਹਰ ਵਿਆਕਤੀ ਅਪਣੇ ਆਪ ਨੂੰ ਅਸੱਰਖਿਅਤ ਮਹਿਸੂਸ ਕਰ ਰਿਹਾ ਹੈ। 

ਆਗੂਆਂ ਨੇ ਕਿਹਾ ਕਿ ਪੁਲਿਸ ਲੋਕਾਂ ਨੂੰ ਸੁਰੱਖਿਆ ਦੇ ਨਾਲ ਨਾਲ ਨਿਆ ਦਿੰਦੀ ਹੈ ਪਰ ਦੇਸ਼ ਭਰ ਵਿੱਚ ਜਿਥੇ ਵੀ ਭਾਜਪਾ ਦੀਆਂ ਰਾਜ ਸਰਕਾਰਾਂ ਹਨ ਉਥੇ ਦੂਸਰੇ ਸੂਬਿਆਂ ਦੇ ਮੁਕਾਬਲੇ ਦਲਿਤਾਂ ਤੇ ਜਿਆਦਾ ਤੱਸਦਦ ਹੋ ਰਿਹਾ ਹੈ। ਉਨਾਂ ਕਿਹਾ ਕਿ ਪੰਜਾਬ ਇਸ ਮਾਮਲੇ ਵਿੱਚ ਨੰਬਰ ਇੱਕ ਤੇ ਹੈ ਜਿਥੇ ਅਕਾਲੀ ਦਲ ਦੇ ਪਾਲੇ ਗੁੰਡੇ ਦਲਿਤਾਂ ਨੂੰ ਅਪਣਾ ਨਿਸਾਨਾ ਬਣਾ ਰਹੇ ਹਨ। ਉਨਾਂ ਕਿਹਾ ਕਿ ਪਹਿਲਾਂ ਸ਼ਰਾਬ ਮਾਫੀਆ ਜਿਸ ਦੀ ਅਕਾਲੀ ਦਲ ਨਾਲ ਗੂੜੀ ਨੇੜਤਾ ਸੀ ਨੇ ਭੀਮ ਟਾਂਕ ਨਾਮ ਦੇ ਦਲਿਤ ਨੌਜਵਾਨ ਦਾ ਅੰਗ ਅੰਗ ਵੱਢ ਕੇ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ ਅਤੇ ਹੁਣ ਉਸ ਨੂੰ ਦੁਹਰਾਉਂਦਿਆਂ ਸੁਖਚੈਨ ਸਿੰਘ ਦਾ ਅੰਗ ਅੰਗ ਵੱਢ ਕੇ ਕਤਲ ਕਰ ਦਿੱਤਾ ਗਿਆ। ਆਗੂਆਂ ਨੇ ਕਿਹਾ ਕਿ ਅਜਿਹੇ ਕਾਰਨਾਮੇ ਕਰਕੇ ਅਜਿਹੇ ਗੁੰਡਾ ਅਨਸ਼ਰ ਸਿਰਫ ਦਲਿਤਾਂ ਤੇ ਦਹਿਸਤ ਬਣਾਉਣਾ ਚਾਹੁੰਦੇ ਹਨ। ਆਗੂਆਂ ਨੇ ਕਿਹਾ ਦਲਿਤ ਹੁਣ ਹੋਰ ਬਰਦਾਸਤ ਨਹੀ ਕਰਨਗੇ ਅਤੇ 2017 ਵਿੱਚ ਇਸ ਸਰਕਾਰ ਦਾ ਤਖਤਾ ਪਲਟਣ ਦਾ ਸਕੰਲਪ ਲੈਂਦੇ ਹਨ। ਆਗੂਆਂ ਨੇ ਸਾਰੇ ਦੋਸ਼ੀਆਂ ਦੀ ਤੁੰਰਤ ਗ੍ਰਿਫਤਾਰੀ ਦੇ ਨਾਲ ਨਾਲ ਰਾਸ਼ਟਰਪਤੀ ਤੇ ਗਵਰਨਰ ਤੋਂ ਪੰਜਾਬ ਸਰਕਾਰ ਦੀ ਬਰਖਾਸਤਗੀ ਦੀ ਮੰਗ ਕੀਤੀ। ਇਸ ਮੌਕੇ ਤੇ ਨਰੇਸ਼ ਬਸਰਾ, ਚਰਨਦਾਸ ਮਾਂਗਟ, ਸੁਖਦੇਵ ਮਹੇ, ਪਰਮਿੰਦਰ ਕੁਮਾਰ, ਮਹਿੰਦਰ ਸਿੰਘ, ਸੁਰਿੰਦਰ ਮੇਹਰਬਾਨ, ਅਮਰਜੀਤ ਸਿੰਘ ਖਾਲਸਾ, ਬੰਟੀ ਸੂਦ, ਖਵਾਜਾ ਪ੍ਰਸਾਦ ਅਤੇ ਹੋਰ ਹਾਜਰ ਸਨ।