ਗਿਆਨ ਜੋਤੀ ਦੇ ਕੈਡਿਟਸ ਸੂਬਾ ਪੱਧਰੀ ਐਨ ਸੀ ਸੀ ਕੈਂਪ 'ਚ ਸਰਵੋਤਮ ਐਲਾਨੇ , ਹਰੇਕ ਈਵੈਂਟ 'ਚ ਜੇਤੂ ਰਹਿ ਕੇ ਓਵਰ ਆਲ ਟਰਾਫ਼ੀ ਤੇ ਹੋਏ ਕਾਬਜ਼

5 Dariya News

ਐਸ.ਏ.ਐਸ. ਨਗਰ (ਮੁਹਾਲੀ) 02-Jul-2016

ਰੋਪੜ 'ਚ ਸਥਿਤ ਸੂਬਾ ਪੱਧਰੀ ਐਨ ਸੀ ਸੀ ਕੁਆਏ ਤੀਸਰੀ ਪੰਜਾਬ ਬਟਾਲੀਅਨ ਵੱਲੋਂ ਪੰਜਾਬ ਭਰ ਦੇ ਸਕੂਲਾਂ ਅਤੇ ਕਾਲਜਾਂ ਦੇ ਰੱਖੇ ਗਏ 10 ਦਿਨਾ ਐਨ ਸੀ ਸੀ ਕੈਂਪ ਵਿਚ ਗਿਆਨ ਜੋਤੀ ਗਰੁੱਪ ਆਫ਼ ਇੰਸਟੀਚਿਊਟਸ ਦੇ ਕੈਡਿਟਸ ਨੇ ਆਪਣੀ ਪ੍ਰਤਿਭਾ ਦਾ ਝੰਡਾ ਗੱਡਦੇ ਹੋਏ ਲਗਭਗ ਹਰ ਈਵੈਂਟ ਵਿਚ ਮੋਹਰੀ ਰਹਿੰਦੇ ਹੋਏ ਓਵਰ ਆਲ ਟਰਾਫ਼ੀ ਤੇ ਵੀ ਕਬਜ਼ਾ ਕੀਤਾ ਹੈ। ਇਸ ਕੈਂਪ ਵਿਚ ਪੰਜਾਬ ਭਰ ਦੇ 20 ਸਕੂਲਾਂ ਅਤੇ ਕਾਲਜਾਂ ਦੇ 650 ਕੈਡਿਟਸ ਨੇ ਹਿੱਸਾ ਲੈਦੇ ਹੋਏ ਵੱਖ ਵੱਖ ਈਵੇਂਟਸ ਵਿਚ ਸਖ਼ਤ ਮੁਕਾਬਲੇ ਦਾ ਪ੍ਰਦਰਸ਼ਨ ਕੀਤਾ। ਫਾਈਨਲ ਮੁਕਾਬਲਿਆਂ ਵਿਚ  ਗਿਆਨ ਜੋਤੀ ਦੀ ਪੂਨਮ ਵਰਮਾ ਨੇ ਰਾਈਫ਼ਲ ਸ਼ੂਟਿੰਗ ਵਿਚ ਪਹਿਲਾਂ ਸਥਾਨ, ਲਿਖਾਈ ਵਿਚ ਦੂਜਾ ਸਥਾਨ ਹਾਸਿਲ ਕਰਦੇ ਹੋਏ ਬੈੱਸਟ ਸੀਨੀਅਰ ਕੈਡਟ ਦਾ ਤਮਗ਼ਾ ਵੀ ਹਾਸਿਲ ਕੀਤਾ। ਇਸੇ ਤਰਾਂ ਕੈਡਟ ਜੈ ਮਾਲਵੀਆ ਨੇ ਲਿਖਾਈ ਵਿਚ ਪਹਿਲਾ ਸਥਾਨ, ਕੈਡਟ ਵਰਿੰਦਰ ਕਰਾਸ ਕੰਟਰੀ ਵਿਚ ਤੀਸਰਾ ਸਥਾਨ ਹਾਸਿਲ ਕੀਤਾ। ਗਰੁੱਪ ਸਾਂਗ ਵਿਚ ਪਹਿਲਾ ਸਥਾਨ, ਗਰੁੱਪ ਡਾਂਸ ਵਿਚ ਦੂਜਾ ਸਥਾਨ ਅਤੇ ਡ੍ਰਿੱਲ ਵਿਚ ਦੂਜਾ ਸਥਾਨ ਵੀ ਗਿਆਨ ਜੋਤੀ ਦੇ ਕੈਡਿਟਸ ਦੀ ਝੋਲੀ ਪਿਆ। 

ਇਸ ਬਿਹਤਰੀਨ ਪ੍ਰਦਰਸ਼ਨ ਲਈ ਗਿਆਨ ਜੋਤੀ ਨੂੰ ਉਵਰ ਆਲ ਟਰਾਫ਼ੀ ਪ੍ਰਦਾਨ ਕੀਤੀ ਗਈ। ਇਸ ਦੇ ਇਲਾਵਾ ਸੀਨੀਅਰ ਅੰਡਰ ਅਫ਼ਸਰ ਪੂਨਮ ਵਰਮਾ, ਕੈਡਟ ਅਮਤੇਸ਼ਵਰ ਸਿੰਘ ਅਤੇ ਕੈਡਟ ਵਰਿੰਦਰ ਕੁਮਾਰ ਨੂੰ  ਗਣਤੰਤਰ ਦਿਵਸ ਦੀ ਪਰੇਡ ਅਤੇ ਥਲ ਸੈਨਾ ਕੈਂਪ ਲਈ ਵੀ ਚੁਣ ਲਿਆ ਗਿਆ ਹੈ।ਇਸ ਮੌਕੇ ਤੇ ਗਿਆਨ ਜੋਤੀ ਗਰੁੱਪ ਦੇ ਚੇਅਰਮੈਨ ਜੇ ਐੱਸ ਬੇਦੀ ਨੇ ਸਭ ਕੈਡਿਟਸ ਨੂੰ ਉਨ੍ਹਾਂ ਦੀ ਸਖ਼ਤ ਮਿਹਨਤ ਦਾ ਫਲ ਟਰਾਫ਼ੀਆਂ ਅਤੇ ਮੈਡਲਜ਼ ਦੇ ਰੂਪ ਵਿਚ ਮਿਲਣ ਲਈ ਵਧਾਈ ਦਿੰਦੇ ਹੋਏ ਕਿਹਾ ਕਿ ਇਹ ਸਾਡੇ  ਲਈ ਮਾਣ ਦੀ ਗੱਲ ਹੈ ਕਿ ਉਨ੍ਹਾਂ  ਦੇ ਕੈਡਿਟਸ ਨੇ ਗਿਆਨ ਜੋਤੀ ਦਾ ਨਾਮ ਸੂਬੇ ਭਰ ਵਿਚ ਉੱਚਾ ਕੀਤਾ ਹੈ ।ਉਨ੍ਹਾਂ  ਜਾਣਕਾਰੀ ਦਿੰਦੇ ਹੋਏ ਦੱਸਿਆਂ ਕਿ ਗਿਆਨ ਜੋਤੀ ਗਰੁੱਪ ਦੇ ਕੈਂਡਿਡਸ ਜਿੱਥੇ ਹਰ ਸਾਲ ਦਿੱਲੀ ਵਿਖੇ ਹੋਣ ਵਾਲੀ 15 ਅਗਸਤ ਅਤੇ 26 ਜਨਵਰੀ ਦੀ  ਪਰੇਡ ਵਿਚ ਚੁਣੇ ਜਾਂਦੇ ਹਨ । ਉੱਥੇ ਹੀ  ਗਰੁੱਪ ਵੱਲੋਂ  ਵਿਦਿਆਰਥੀਆਂ ਨੂੰ ਦੇਸ਼ ਦੀ ਸੇਵਾ ਕਰਨ ਲਈ ਫ਼ੌਜ ਵਿਚ ਭਰਤੀ ਹੋਣ ਲਈ ਦਿਤੀ ਜਾਂਦੀ ਪ੍ਰੇਰਨਾ  ਸਦਕਾ ਅੱਜ ਗਿਆਨ ਜੋਤੀ ਗਰੁੱਪ ਦੇ ਸੈਂਕੜੇ ਵਿਦਿਆਰਥੀ ਭਾਰਤੀ ਫ਼ੌਜ ਵਿਚ ਜਾ ਕੇ ਦੇਸ਼ ਦੀ ਸੇਵਾ ਕਰ ਰਹੇ ਹਨ ।