ਪੰਜਾਬ ਵੱਲੋਂ ਅਧਿਆਪਕ ਸਿਖਲਾਈ ਪੋਰਟਲ 'ਪ੍ਰਸਿਕਸ਼ਕ' ਦੀ ਸ਼ੁਰੂਆਤ ਦੀ ਭਰਪੂਰ ਸ਼ਲਾਘਾ

ਆਪਸੀ ਤਾਲਮੇਲ, ਗੁਣਵੱਤਾ ਵਿੱਚ ਸੁਧਾਰ ਅਤੇ ਨਿਗਰਾਨੀ ਵਿੱਚ ਹੋਵੇਗਾ ਸਹਾਇਕ: ਡਾ.ਚੀਮਾ

5 Dariya News

ਨਵੀਂ ਦਿੱਲੀ 30-Jun-2016

ਪੰਜਾਬ ਦੇ ਸਿੱਖਿਆ ਮੰਤਰੀ ਡਾ.ਦਲਜੀਤ ਸਿੰਘ ਚੀਮਾ ਨੇ ਅੱਜ ਨਵੀਂ ਦਿੱਲੀ ਵਿਖੇ ਕੇਂਦਰੀ ਮਨੁੱਖੀ ਸਰੋਤ ਵਿਕਾਸ ਮੰਤਰੀ ਸ੍ਰੀਮਤੀ ਸਮਰਿਤੀ ਜ਼ੁਬਿਨ ਇਰਾਨੀ ਵੱਲੋਂ ਦੇਸ਼ ਭਰ ਦੀਆਂ ਜ਼ਿਲਾ ਸਿੱਖਿਆ ਸਿਖਲਾਈ ਸੰਸਥਾਵਾਂ (ਡਾਇਟਜ਼) ਨੂੰ ਆਨ ਲਾਈਨ ਜੁੜਦੇ ਪੋਰਟਲ 'ਪ੍ਿਰਸਕਸ਼ਕ' ਨੂੰ ਜਾਰੀ ਕਰਨ 'ਤੇ ਵਧਾਈ ਦਿੰਦਿਆਂ ਇਸ ਨੂੰ ਸਮੇਂ ਦੀ ਸਭ ਤੋਂ ਵੱਡੀ ਲੋੜ ਦੱਸਿਆ। ਨਵੀਂ ਦਿੱਲੀ ਸਥਿਤ ਵਿਗਿਆਨ ਭਵਨ ਵਿਖੇ ਪੋਰਟਲ ਨੂੰ ਜਾਰੀ ਕਰਨ ਉਪਰੰਤ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਡਾ.ਚੀਮਾ ਨੇ ਦੱਸਿਆ ਕਿ ਇਸ ਪੋਰਟਲ ਦੇ ਬਣਨ ਨਾਲ ਦੇਸ਼ ਭਰ ਦੀਆਂ ਡਾਇਜ਼ ਵਿੱਚ ਆਪਸੀ ਤਾਲਮੇਲ, ਗੁਣਵੱਤਾ ਵਿੱਚ ਸੁਧਾਰ, ਸਿਹਤਮੰਦ ਮੁਕਾਬਲੇ ਅਤੇ ਨਿਗਰਾਨੀ ਵਿੱਚ ਸਹਾਇਤਾ ਮਿਲੇਗੀ।ਡਾ.ਚੀਮਾ ਨੇ ਕਿਹਾ, ''ਕੇਂਦਰੀ ਮਨੁੱਖ ਸਰੋਤ ਵਿਕਾਸ ਮੰਤਰਾਲੇ ਦੇ ਇਸ ਵਿਲੱਖਣ ਉਦਮ ਨਾਲ ਦੇਸ਼ ਭਰ ਦੀਆਂ 588 ਡਾਇਟਜ਼ ਨੂੰ ਇਕ ਸਾਂਝਾ ਮੰਚ ਮਿਲ ਗਿਆ ਹੈ ਜਿੱਥੇ ਗਿਆਨ ਅਤੇ ਨਵੇਂ ਰੁਝਾਨਾਂ ਦਾ ਆਦਾਨ-ਪ੍ਰਦਾਨ, ਅਧਿਆਪਕਾਂ ਤੇ ਵਿਦਿਆਰਥੀਆਂ ਵਿਚਾਲੇ ਬਿਹਤਰ ਆਪਸੀ ਸਬੰਧ ਕਾਇਮ ਹੋਣਗੇ।'' ਉਨ੍ਹਾਂ ਕਿਹਾ ਕਿ ਇਸ ਨਾਲ ਡਾਇਟਜ਼ ਦੇ ਕੰਮ ਦੀ ਨਿਗਰਾਨੀ ਰੱਖਣ ਵਿੱਚ ਵੀ ਸਹਾਇਤਾ ਹੋਵੇਗੀ ਅਤੇ ਪਾਰਦਰਸ਼ਤਾ ਨੂੰ ਹੁਲਾਰਾ ਮਿਲੇਗਾ। ਸਿੱਖਿਆ ਦੇ ਵੱਖ-ਵੱਖ ਮਾਪਦੰਡਾਂ ਦੇ ਆਦਾਨ-ਪ੍ਰਦਾਨ ਨਾਲ ਵੱਖ-ਵੱਖ ਸੂਬਿਆਂ ਵਿੱਚ ਸਿੱਖਿਆ ਦੇ ਮਿਆਰਾਂ ਦਾ ਪੱਧਰ ਅਤੇ ਰੈਂਕਿੰਗ ਵੀ ਪਤਾ ਲੱਗੇਗੀ। 

ਡਾ.ਚੀਮਾ ਨੇ ਅਗਾਂਹ ਕਿਹਾ ਕਿ ਹੁਣ ਤੱਕ ਸਿੱਖਿਆ ਢਾਂਚੇ ਵਿੱਚ ਅਜਿਹੀ ਕੋਈ ਵਿਵਸਥਾ ਨਹੀਂ ਸੀ ਕਿ ਵੱਖ-ਵੱਖ ਸੂਬਿਆਂ ਦੀਆਂ ਡਾਇਟਜ਼ ਵਿੱਚ ਕੋਈ ਸਾਂਝਾ ਲਿੰਕ ਹੋਵੇ ਅਤੇ ਅੱਜ ਇਸ ਪੋਰਟਲ ਦੇ ਲਾਂਚ ਹੋਣ ਨਾਲ ਇਹ ਕਮੀ ਦੂਰ ਹੋ ਗਈ ਇਸ ਨਾਲ ਮਿਆਰੀ ਸਿੱਖਿਆ ਦੇ ਟੀਚਿਆਂ ਨੂੰ ਪੂਰਾ ਕੀਤਾ ਜਾਵੇਗਾ।ਡਾ.ਚੀਮਾ ਨੇ ਇਸ ਮੌਕੇ ਕੇਂਦਰੀ ਮੰਤਰੀ ਸ੍ਰੀਮਤੀ ਇਰਾਨੀ ਦਾ ਧੰਨਵਾਦ ਵੀ ਕੀਤਾ ਕਿ ਲਾਂਚਿੰਗ ਮੌਕੇ ਦਿੱਤੇ ਇਕ ਸੁਝਾਅ ਨੂੰ ਮੌਕੇ 'ਤੇ ਹੀ ਮੰਨਦਿਆਂ ਸੰਚਾਰ ਦੀ ਵਿਵਸਥਾ ਅਤੇ ਸਿਲੇਬਸ ਸੂਬਿਆਂ ਨੂੰ ਆਪੋ-ਆਪਣੀਆਂ ਖੇਤਰੀ ਭਾਸ਼ਾਵਾਂ ਵਿੱਚ ਬਣਾਉਣ ਦੀ ਪ੍ਰਵਾਨਗੀ ਦਿੱਤੀ। ਇਸ ਨਾਲ ਸੂਬਿਆਂ ਦੀ ਰੁੱਚੀ ਹੋਰ ਵਧੇਰੀ ਵਧੇਗੀ ਅਤੇ ਅਧਿਆਪਕਾਂ ਤੇ ਵਿਦਿਆਰਥੀਆਂ ਦੀ ਸਮੱਰਥਾ ਵਿੱਚ ਵੀ ਵਾਧਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਇਸ ਪੋਰਟਲ ਨਾਲ ਸਾਰੀਆਂ ਡਾਇਟਜ਼ ਦੇ ਵਿਦਿਆਰਥੀਆਂ ਇਕ-ਦੂਜੇ ਨਾਲ ਵਿਚਾਰਾਂ ਦਾ ਵਟਾਂਦਰਾ ਵੀ ਕਰ ਸਕਣਗੇ ਅਤੇ ਸਮੱਸਿਆਵਾਂ ਨੂੰ ਦੂਰ ਕਰਨ ਵਿੱਚ ਵੱਡੀ ਸਹਾਇਤਾ ਮਿਲੇਗੀ।ਇਸ ਤੋਂ ਪਹਿਲਾਂ ਕੇਂਦਰੀ ਮਨੁੱਖੀ ਸਰੋਤ ਵਿਕਾਸ ਮੰਤਰੀ ਸ੍ਰੀਮਤੀ ਸਮਰਿਤੀ ਜ਼ੁਬਿਨ ਇਰਾਨੀ ਨੇ ਕੇਂਦਰੀ ਰਾਜ ਮੰਤਰੀ ਸ੍ਰੀ ਉਪੇਂਦਰ ਖੁਸ਼ਬਾਹਾ ਤੇ ਪ੍ਰੋ. ਰਾਮ ਸ਼ੰਕਰ ਕਥੇਰੀਆ ਅਤੇ ਵੱਖ-ਵੱਖ ਸੂਬਿਆਂ ਆਸਾਮ, ਝਾਰਖੰਡ, ਹਰਿਆਣਾ, ਗੁਜਰਾਤ, ਉਤਰਾਖੰਡ, ਮੱਧ ਪ੍ਰਦੇਸ਼ ਤੇ ਰਾਜਸਥਾਨ ਦੇ ਸਿੱਖਿਆ ਮੰਤਰੀ ਵੀ ਸ਼ਾਮਲ ਹੋਏ।