ਰਾਜੇਸ਼ ਬਾਘਾ ਵਲੋਂ ਉਦਯੋਗ ਮੰਤਰੀ ਨਾਲ ਵਿਚਾਰ ਵਟਾਂਦਰਾ, ਅਰਧ ਸਰਕਾਰੀ ਪੱਤਰ ਸੌਂਪਿਆ

ਦਲਿਤ ਐਨ.ਆਰ.ਆਈ. ਸੰਮੇਲਨ ਦੀਆਂ ਤਿਆਰੀਆਂ ਸ਼ੁਰੂ

5 Dariya News

ਚੰਡੀਗੜ੍ਹ 12-Jan-2016

ਪੰਜਾਬ ਰਾਜ ਅਨੁਸੂਚਿਤ ਜਾਤੀਆਂ ਕਮਿਸ਼ਨ ਵਲੋਂ ਉਦਯੋਗ ਤੇ ਵਣਜ ਵਿਭਾਗ ਪੰਜਾਬ ਦੇ ਸਹਿਯੋਗ ਨਾਲ ਦਲਿਤ ਵਰਗ ਨਾਲ ਸਬੰਧਤ ਵਿਦੇਸ਼ਾਂ 'ਚ ਵਪਾਰ ਨਾਲ ਜੁੜੇ ਪਰਵਾਸੀ ਭਾਰਤੀਆਂ ਦਾ ਸੰਮੇਲਨ  ਕਰਵਾਉਣ ਦੀਆਂ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਗਈਆਂ ਹਨ। ਪੰਜਾਬ ਐਸ.ਸੀ. ਕਮਿਸ਼ਨ ਦੇ ਚੇਅਰਮੈਨ ਰਾਜੇਸ਼ ਬਾਘਾ ਨੇ ਅੱਜ ਉਦਯੋਗ ਤੇ ਵਣਜ ਮੰਤਰੀ ਸ੍ਰੀ ਮਦਨ ਮੋਹਨ ਮਿੱਤਲ ਨਾਲ ਕੀਤੀ ਮੀਟਿੰਗ ਮਗਰੋਂ ਦੱਸਿਆ ਕਿ ਪੰਜਾਬ 'ਚ ਐਨ.ਆਰ.ਆਈ. ਤੇ ਵਪਾਰੀਆਂ ਨੂੰ ਨਿਵੇਸ਼ ਲਈ ਚੰਗੇ ਮਾਹੌਲ ਦੇ ਚਲਦਿਆਂ ਅਨੁਸੂਚਿਤ ਜਾਤੀ ਵਰਗ ਨਾਲ ਸਬੰਧਤ ਐਨ.ਆਰ.ਆਈ. ਸੰਮੇਲਨ ਫ਼ਰਵਰੀ, 2016 ਦੇ ਅਖ਼ੀਰ 'ਚ ਕਰਵਾਇਆ ਜਾਵੇਗਾ, ਜਿਸ 'ਚ ਵਿਦੇਸ਼ਾਂ 'ਚ ਵਿਭਿੰਨ ਕਾਰੋਬਾਰਾਂ ਨਾਲ ਜੁੜੇ ਪਰਵਾਸੀ ਭਾਰਤੀ/ਪੰਜਾਬੀ ਹਿੱਸਾ ਲੈਣਗੇ। ਬਾਘਾ ਨੇ ਦੱਸਿਆ ਕਿ ਇਸ ਸੰਮੇਲਨ ਕਰਾਉਣ ਦਾ ਮਕਸਦ ਦਲਿਤ ਵਰਗ ਨਾਲ ਸਬੰਧਤ ਪਰਵਾਸੀ ਭਾਰਤੀਆਂ ਨੂੰ ਪੰਜਾਬ 'ਚ ਨਿਵੇਸ਼ ਕਰਨ ਤੇ ਆਪਣਾ ਕਾਰੋਬਾਰ ਸਥਾਪਿਤ ਕਰਨ ਲਈ ਪ੍ਰੇਰਿਤ ਕਰਨਾ ਹੈ। ਉਨ੍ਹਾਂ ਕਿਹਾ ਇਹ ਯਤਨ ਜਿੱਥੇ ਅਨੁਸੂਚਿਤ ਜਾਤੀ ਲੋਕਾਂ ਨੂੰ ਅੱਗੇ ਵਧਣ ਦਾ ਮੌਕਾ ਪ੍ਰਦਾਨ ਕਰਨਗੇ, ਉਥੇ ਸੂਬੇ ਦੀ ਅਰਥ ਵਿਵਸਥਾ ਲਈ ਵੀ ਮਦਦਗਾਰ ਸਿੱਧ ਹੋਣਗੇ।ਸ੍ਰੀ ਬਾਘਾ ਨੇ ਅੱਗੇ ਦੱਸਿਆ ਕਿ ਸੂਬੇ ਵਿਚਲੇ ਅਨੁਸੂਚਿਤ ਜਾਤੀ ਨੌਜਵਾਨਾਂ ਨੂੰ ਰੁਜ਼ਗਾਰ ਹਾਸਲ ਕਰਨ ਲਈ ਤੇ ਆਪਣਾ ਕਾਰੋਬਾਰ ਸ਼ੁਰੂ ਕਰਨ ਲਈ ਪ੍ਰੇਰਿਤ ਕਰਨ ਹਿੱਤ ਇਹ ਸੰਮੇਲਨ ਲਾਹੇਵੰਦ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਅਮਰੀਕਾ, ਇੰਗਲੈਂਡ, ਫਰਾਂਸ, ਇਟਲੀ, ਆਸਟ੍ਰੇਲੀਆ ਤੇ ਅਰਬ ਦੇਸ਼ਾਂ ਆਦਿ ਦੇ ਦਲਿਤ ਵਰਗ ਨਾਲ ਪਰਵਾਸੀ ਭਾਰਤੀ 'ਦਲਿਤ ਐਨ.ਆਰ.ਆਈ. ਸੰਮੇਲਨ' 'ਚ ਸ਼ਾਮਲ ਹੋਣਗੇ।