ਹੋਟਲ ਮੈਨੇਜਮੈਂਟ ਤੇ ਸੈਰ ਸਪਾਟਾ ਦੀ ਵਿੱਦਿਆ ਪ੍ਰਦਾਨ ਕਰਨ 'ਚ ਪੰਜਾਬ ਪਹਿਲੇ ਨੰਬਰ 'ਤੇ ਸਰਵਣ ਸਿੰਘ ਫਿਲੌਰ

5 ਦਰਿਆ ਨਿਊਜ਼

ਚੰਡੀਗੜ੍ਹ 05-Apr-2013

ਪ੍ਰਾਹੁਣਚਾਰੀ ਸੈਰ ਸਪਾਟਾ ਅਤੇ ਟ੍ਰੈਵਲਿੰਗ ਇੰਡਸਟਰੀ ਵਿੱਚ ਹੁਨਰਵੰਦ ਵਿਅਕਤੀਆਂ ਦੀ ਵੱਧ ਰਹੀ ਮੰਗ ਨੂੰ ਧਿਆਨ ਵਿੱਚ ਰੱਖਦਿਆਂ ਪੰਜਾਬ ਸਰਕਾਰ ਵੱਲੋਂ ਇਨ੍ਹਾਂ ਖੇਤਰਾਂ ਵਿੱਚ ਨੌਜਵਾਨਾਂ ਨੂੰ ਮਿਆਰੀ ਸਿੱਖਿਆ ਤੇ ਉੱਚ ਜਾਣਕਾਰੀ ਦਿਵਾਉਣ ਲਈ ਇਹਨਾਂ ਖੇਤਰਾਂ ਨਾਲ ਸਬੰਧਤ ਵਿਸ਼ਿਆਂ ਵਿੱਚ ਅੰਡਰ ਗ੍ਰੈਜੂਏਟ/ਗ੍ਰੈਜੂਏਟ/ਪੋਸਟ ਗ੍ਰੈਜੂਏਟ ਪੱਧਰ 'ਤੇ ਵੱਖ-ਵੱਖ ਪ੍ਰੋਗਰਾਮ ਸ਼ੁਰੂ ਕੀਤੇ ਜਾ ਰਹੇ ਹਨ।ਇਹ ਜਾਣਕਾਰੀ ਦਿੰਦਿਆਂ ਅੱਜ ਇੱਥੇ ਸ. ਸਰਵਣ ਸਿੰਘ ਫਿਲੌਰ ਸੈਰ-ਸਪਾਟਾ ਅਤੇ ਸਭਿਆਚਾਰਕ ਮਾਮਲੇ ਮੰਤਰੀ ਨੇ ਦੱਸਿਆ ਕਿ ਹੋਟਲ ਮੈਨੇਜਮੈਂਟ ਅਤੇ ਸੈਰ ਸਪਾਟਾ ਦੀ ਵਿੱਦਿਆ ਪ੍ਰਦਾਨ ਕਰਨ ਦੇ ਖੇਤਰ ਵਿੱਚ ਪੰਜਾਬ ਦੇਸ਼ ਭਰ ਵਿੱਚੋਂ ਅਵੱਲ ਆਇਆ ਹੈ। ਕੇਂਦਰੀ ਟੂਰੀਜ਼ਮ ਵਿਭਾਗ ਅਤੇ ਹੋਟਲ ਮੈਨੇਜਮੈਂਟ ਦੀ ਨੈਸ਼ਨਲ ਕੌਂਸਲ ਵੱਲੋਂ ਕਰਵਾਏ ਗਏ ਸਰਵੇਖਣ ਵਿੱਚ ਚੰਡੀਗੜ੍ਹ ਕਾਲਜ ਆਫ ਹੋਟਲ ਮੈਨੇਜਮੈਂਟ ਐਂਡ ਕੈਟਰਿੰਗ ਟੈਕਨੌਲੋਜੀ ਲਾਂਡ ਰਾ ਨੂੰ ਦੇਸ਼ ਭਰ 'ਚੋਂ ਨੰਬਰ ਇੱਕ ਹੋਟਲ ਮੈਨੇਜਮੈਂਟ ਸਿੱਖਿਆ ਸੰਸਥਾ ਐਲਾਨਿਆ ਗਿਆ ਹੈ। ਇਹ ਅਵਾਰਡ ਕੇਂਦਰੀ ਸੈਰ ਸਪਾਟਾ ਮੰਤਰਾਲਿਆ ਵੱਲੋਂ ਨਵੀਂ ਦਿੱਲੀ ਵਿਖੇ ਅੱਜ ਦਿੱਤਾ ਗਿਆ। 

ਮੰਤਰੀ ਨੇ ਇਹ ਵੀ ਕਿਹਾ ਕਿ 'ਹੁਨਰ ਤੇ ਰੋਜ਼ਗਾਰ' ਪ੍ਰੋਗਰਾਮ-ਇੱਕ ਗਰੀਬ ਪੱਖੀ ਸਕੀਮ ਹੈ ਜਿਸ ਦਾ ਉਦੇਸ਼ ਯੁਵਕਾਂ ਵਿੱਚ ਰੋਜ਼ਗਾਰ ਦੀ ਮੁਹਾਰਤ ਪੈਦਾ ਕਰਨਾ ਹੈ, ਵਿਸ਼ੇਸ਼ ਕਰਕੇ ਅੰਨ ਉਤਪਾਦਨ ਅਤੇ ਬੇਕਰੀ ਆਦਿ ਖੇਤਰਾਂ ਵਿੱਚ। ਉਨ੍ਹਾਂ ਕਿਹਾ ਕਿ 18 ਤੋਂ 28 ਸਾਲ ਦੇ ਬੱਚੇ ਜਿਨ੍ਹਾਂ ਦੀ ਘੱਟੋ-ਘੱਟ ਵਿਦਿਅਕ ਯੋਗਤਾ 8ਵੀਂ ਕਲਾਸ ਹੈ, ਇਸ ਕੋਰਸ ਲਈ ਯੋਗ ਹੋਣਗੇ। ਸਿੱਖਿਆਰਥੀਆਂ ਨੂੰ ਸਿਖਲਾਈ ਸਮੱਗਰੀ, ਵਰਦੀ, ਟੂਲ ਕਿੱਟ ਅਤੇ ਮੁਫ਼ਤ ਖਾਣੇ ਦੇ ਨਾਲ ਦੋ ਹਜ਼ਾਰ ਰੁਪਏ ਵਜੀਫਾ ਦਿੱਤਾ ਜਾਵੇਗਾ। ਸ. ਫਿਲੌਰ ਨੇ ਦੱਸਿਆ ਕਿ ਸਾਲ 2011-12 ਵਿੱਚ 900 ਵਿਦਿਆਰਥੀਆਂ ਨੇ ਇਹ ਸਿਖਲਾਈ ਹਾਸਲ ਕੀਤੀ ਸੀ ਅਤੇ 1800 ਵਿਦਿਆਰਥੀਆਂ ਨੂੰ ਸਾਲ 2012-13 ਵਿੱਚ ਸਿਖਲਾਈ ਮੁਹੱਈਆ ਕਰਵਾਈ ਜਾਵੇਗੀ। ਸਰਕਾਰ ਵੱਲੋਂ ਇਹਨਾਂ ਸਿੱਖਿਅਤ ਵਿਦਿਆਰਥੀਆਂ ਨੂੰ ਰੋਜ਼ਗਾਰ ਦੇ ਮੌਕੇ ਵੀ ਮੁਹੱਈਆ ਕਰਵਾਏ ਜਾਣਗੇ। ਉਨ੍ਹਾਂ ਦੱਸਿਆ ਕਿ 1 ਸਾਲ ਦੀ ਸਿਖਲਾਈ ਲਈ 5 ਕਰੋੜ ਰੁਪਏ ਰੱਖੇ ਗਏ ਹਨ। ਇਹ ਪ੍ਰੋਗਰਾਮ ਲਾਗੂ ਹੋਣ ਤੋਂ ਬਾਅਦ ਭਾਰਤ ਸਰਕਾਰ ਦੀ ਸਕੀਮ ਹੇਠ ਹਰ ਸਾਲ 5 ਹਜ਼ਾਰ ਸਿੱਖਿਅਤ ਪ੍ਰੋਫੈਸ਼ਨਲ ਉਪਲਬੱਧ ਹੋਣਗੇ। ਉਨ੍ਹਾਂ ਦੱਸਿਆ ਕਿ ਪ੍ਰਾਹੁਣਚਾਰੀ ਦੇ ਮਿਆਰ ਨੂੰ ਵਧਾਉਣ ਲਈ ਪੰਜਾਬ ਦੇ ਇੱਕ ਹੋਟਲ ਵਿੱਚ ਮੁਫ਼ਤ ਸਿਖਲਾਈ ਦਿੱਤੀ ਜਾ ਰਹੀ ਹੈ।