ਦੂਰੀਆਂ ਕਿਲੋਮੀਟਰਾਂ ਚ ਹਨ, ਦਿਲਾਂ ਚ ਨਹੀਂ : ਅੰਸਾਰੀ
ਲਾਹੌਰ ਪ੍ਰੈਸ ਕਲੱਬ ਵਫ਼ਦ ਪਹੁੰਚਿਆ ਮੋਹਾਲੀ ਪ੍ਰੈਸ ਕਲੱਬ
5 ਦਰਿਆ ਨਿਊਜ਼
ਐਸ.ਏ.ਐਸ.ਨਗਰ. 23-Feb-2013
ਜਿਉਂ ਹੀ ਮੋਹਾਲੀ ਪ੍ਰੈਸ ਕਲੱਬ ਦੇ ਮੰਚ ਤੋਂ ਇਹ ਸਤਰਾਂ ''ਸੁਖੀ ਵੱਸੇ ਕਸ਼ਮੀਰ ਮੁੱਕੇ ਰੇਹੜਾ ਪਿਸ਼ੌਰ ਦਾ, ਕਰੀਂ ਕਦੇ ਮੇਲ ਰੱਬਾ ਦਿੱਲੀ ਤੇ ਲਾਹੌਰ ਦਾ'' ਗੁੰਜੀਆਂ ਤਾਂ ਕਲੱਬ ਦਾ ਹਾਲ ਲਹਿੰਦੇ ਤੇ ਚੜ੍ਹਦੇ ਪੰਜਾਬ ਦੇ ਪੱਤਰਾਕਰਾਂ ਦੀਆਂ ਤਾੜੀਆਂ ਨਾਲ ਗੂੰਜ ਉਠਿਆ। ਇਸ ਮੌਕੇ ਲਾਹੌਰ ਪ੍ਰੈਸ ਕਲਬ ਦੇ ਪ੍ਰਧਾਨ ਅਰਸ਼ਦ ਅੰਸਾਰੀ ਨੇ ਕਿਹਾ ਕਿ ਦੂਰੀਆਂ ਕਿਲੋਮੀਟਰਾਂ 'ਚ ਹਨ, ਦਿਲਾਂ ਦੀਆਂ ਨਹੀਂ, ਜੇਕਰ ਅਸੀਂ ਕੋਸ਼ਿਸ਼ ਕਰੀਏ ਤਾਂ ਇਹ ਵੀ ਮਿਟ ਸਕਦੀਆਂ ਹਨ, ਇਹ ਦਿਲ ਦੀਆਂ ਭਾਵਨਾਵਾਂ ਉਨ੍ਹਾਂ ਨੇ ਸ਼ਨੀਵਾਰ ਨੂੰ ਮੋਹਾਲੀ ਪ੍ਰੈਸ ਕਲੱਬ ਵਿਖੇ ਵਿਅਕਤ ਕੀਤੀਆਂ। ਪਾਕਿਸਤਾਨ ਤੋਂ ਚੰਡੀਗੜ ਆਏ ਹੋਏ ਲਾਹੌਰ ਪ੍ਰੈਸ ਕਲਬ ਦੇ 30 ਮੈਂਬਰੀ ਵਫ਼ਦ ਨੇ ਸ਼ਨੀਵਾਰ ਨੂੰ ਮੋਹਾਲੀ ਪ੍ਰੈਸ ਕਲਬ ਦਾ ਦੌਰਾ ਕੀਤਾ । ਮੋਹਾਲੀ ਪ੍ਰੈਸ ਕਲਬ ਦੇ ਵੇਹੜੇ 'ਚ ਉਨ੍ਹਾਂ ਦਾ ਸਵਾਗਤ ਬੜੀ ਧੂਮ ਧਾਮ ਨਾਲ ਪ੍ਰਧਾਨ ਸੁਖਦੇਵ ਸਿੰਘ ਪਟਵਾਰੀ ਅਤੇ ਕਲੱਬ ਦੇ ਮੈਬਰਾਂ ਨੇ ਕੀਤਾ । ਆਪਣੇ ਭਾਸ਼ਣ 'ਚ ਸ. ਪਟਵਾਰੀ ਨੇ ਕਿਹਾ ਕਿ ਲਾਹੌਰ ਬਾਰੇ ਇਕ ਕਹਾਵਤ ਹੈ ਕਿ 'ਜਿਨ੍ਹੇ ਲਾਹੌਰ ਨੀਂ ਦੇਖਿਆ ਉਹ ਜੰਮਿਆ ਹੀ ਨਹੀਂ' ਪਰ ਇੱਥੇ ਦੇ ਉਹ ਬਾਸ਼ਿੰਦੇ ਜੋ ਅੱਜ ਲਾਹੌਰ ਪ੍ਰੇਸ ਕਲਬ ਦੇ ਮੈਬਰਾਂ ਨਾਲ ਮਿਲੇ ਹਨ ਦਾ ਇਹ ਰੰਜ ਵੀ ਦੂਰ ਹੋ ਗਿਆ ਹੈ, ਭਲੇ ਹੀ ਉਹ ਲਾਹੌਰ ਨਾ ਜਾ ਸਕੇ ਹੋਣ । ਦੋ ਮੁਲਕਾਂ ਦੇ ਪੱਤਰਕਾਰਾਂ ਦੇ ਮਿਲਣ ਦਾ ਇਹ ਪ੍ਰਬੰਧ ਚੰਡੀਗੜ ਪ੍ਰੈਸ ਕਲਬ ਦੇ ਸਹਿਯੋਗ ਨਾਲ ਪੂਰਾ ਹੋਇਆ। ਚੰਡੀਗੜ ਪ੍ਰੈਸ ਕਲਬ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਜਵਾ ਨੇ ਕਿਹਾ ਕਿ ਉਹ ਖੁਸ਼ ਕਿਸਮਤ ਹਨ ਕਿ ਉਨ੍ਹਾਂ ਨੂੰ ਲਾਹੌਰ ਦੇ ਪੱਤਰਕਾਰਾਂ ਦੀ ਸੇਵਾ ਕਰਨ ਦਾ ਮੌਕਾ ਮਿਲਿਆ । ਲਾਹੌਰ ਤੋਂ ਆਏ ਵਫ਼ਦ 'ਚ ਇਮਰਾਨ ਅਹਿਮਦ ਸ਼ੇਖ, ਐਮ. ਇਰਫਾਨ, ਬਾਬਰ ਡੋਗਰ, ਮੁੰਨਵਰ ਇਕਬਾਲ ਬੱਟ, ਪਰਵੇਜ਼ ਅਲਤਾਫ, ਅਕਰਮ ਵਿਆਸ, ਮੈਡਮ ਨਾਸਾ ਅਤੀਕ, ਸਾਈਮਾ ਵੜੈਚ, ਮਿਸਜ਼ ਅੰਸਾਰੀ, ਮਿਸਜ਼ ਸਮਰ ਇਮਰਾਨ ਆਦਿ ਨੇ ਕਿਹਾ ਕਿ ਇੱਥੇ ਆ ਕੇ ਉਨ੍ਹਾਂ ਨੂੰ ਅਜਿਹਾ ਲਗਾ ਕਿ ਜਿਵੇਂ ਉਹ ਆਪਣੇ ਘਰ ਵਿੱਚ ਆ ਗਏ ਹਨ, ਕਿਉਕਿ ਦੋਨੋਂ ਹੀ ਪਾਸੇ ਦੀਆਂ ਭਾਵਨਾਵਾਂ, ਦਿਲ ਦੇ ਜਜਬਾਤ ਇੱਕੋ ਜਿਹੇ ਹਨ । ਅੰਸਾਰੀ ਦੁਆਰਾ ਮੋਹਾਲੀ ਪ੍ਰੈਸ ਕਲਬ ਦੇ ਮੈਂਬਰਾਂ ਨੂੰ ਪਾਕਿਸਤਾਨ ਆਉਣ ਦਾ ਨਿਘਾ ਸੱਦਾ ਵੀ ਦਿੱਤਾ ਗਿਆ । ਮੋਹਾਲੀ ਪ੍ਰੈਸ ਕਲਬ ਦੇ ਵੱਲੋਂ ਲਾਹੌਰ ਪ੍ਰੈਸ ਕਲਬ ਨੂੰ ਇੱਕ ਯਾਦ ਨਿਸ਼ਾਨੀ ਵੀ ਦਿੱਤੀ ਗਈ । ਮੋਹਾਲੀ ਪ੍ਰੈਸ ਕਲਬ ਦੇ ਸਾਬਕਾ ਪ੍ਰਧਾਨ ਅਨਿਲ ਭਾਰਦਵਾਜ ਨੇ ਆਏ ਹੋਏ ਮਹਿਮਾਨ ਪੱਤਰਕਾਰਾਂ ਦਾ ਸੁਆਗਤ ਕੀਤਾ । ਮੰਚ ਦਾ ਸੰਚਾਲਨ ਕਰਨਬੀਰ ਸਿੰਘ ਸ਼ਾਹ ਦੁਆਰਾ ਕੀਤਾ ਗਿਆ । ਇਸ ਮੌਕੇ ਤੇ ਕਲੱਬ ਦੇ ਸੀਨੀਅਰ ਮੀਤ ਪ੍ਰਧਾਨ ਜਗਤਾਰ ਸਿੰਘ ਭੁੱਲਰ, ਜਨਰਲ ਸਕੱਤਰ ਗੁਰਮੀਤ ਸਿੰਘ ਸ਼ਾਹੀ, ਸੰਯੁਕਤ ਸਕੱਤਰ ਬਲਜੀਤ ਸਿੰਘ ਮਰਵਾਹਾ ਤੇ ਅਮਰਜੀਤ ਰਤਨ, ਜੱਥੇਬੰਦਕ ਸਕੱਤਰ ਗੁਰਦੀਪ ਬੈਨੀਪਾਲ, ਖਜ਼ਾਨਚੀ ਕਰਨਬੀਰ ਸਿੰਘ ਸ਼ਾਹ, ਰਮੇਸ਼ ਹਾਂਡਾ ਤੇ ਜਸਵਿੰਦਰ ਰੁਪਾਲ, ਸੱਭਿਆਚਾਰ ਕਮੇਟੀ ਦੇ ਪ੍ਰਧਾਨ ਗੁਰਜੀਤ ਸਿੰਘ ਬਿੱਲਾ, ਰਾਜੀਵ ਤਨੇਜਾ, ਵਿਜੇਪਾਲ ਆਦਿ ਹਾਜ਼ਰ ਸਨ।