ਪੈਰਾਪਲੈਜਿਕ ਰੀਹੈਬਲੀਟੇਸ਼ਨ ਸੈਂਟਰ ਮੋਹਾਲੀ ਨੇ ਆਪਣਾ 37ਵਾਂ ਸਥਾਪਨਾ ਦਿਵਸ ਸਾਨੋ ਸ਼ੌਕਤ ਨਾਲ ਮਨਾਇਆ

ਰਾਜਪਾਲ ਹਰਿਆਣਾ ਪ੍ਰੋ: ਕਪਤਾਨ ਸਿੰਘ ਸੋਲੰਕੀ ਬਤੌਰ ਮੁੱਖ ਮਹਿਮਾਨ ਹੋਏ ਸ਼ਾਮਲ

5 ਦਰਿਆ ਨਿਊਜ਼

ਐਸ.ਏ.ਐਸ.ਨਗਰ 01-Dec-2014

ਮੋਹਾਲੀ ਸਥਿਤ ਪੈਰਾਪਲੈਜਿਕ ਰੀਹੈਬਲੀਟੇਸ਼ਨ ਸੈਂਟਰ ਨੇ ਆਪਣਾ 37ਵਾਂ ਸਥਾਪਨਾ ਦਿਵਸ ਬੜੇ ਹੀ ਸਾਨੋ -ਸ਼ੌਕਤ ਨਾਲ ਮਨਾਇਆ ਇਸ ਮੌਕੇ ਰਾਜਪਾਲ ਹਰਿਆਣਾ ਪ੍ਰੋ: ਕਪਤਾਨ ਸਿੰਘ ਸੋਲੰਕੀ ਨੇ ਬਤੌਰ ਮੁੱਖ ਮਹਿਮਾਨ ਸ਼ਾਮਲ ਹੋਏ। 

ਪ੍ਰੋ: ਸੋਲੰਕੀ ਨੇ ਦੇਸ਼ ਦੀ ਰੱਖਿਆ ਕਰਦਿਆਂ ਅੰਗਹੀਣ ਹੋਏ ਸੈਨਿਕਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਦੇਸ਼ ਦੀ ਸਰਹੱਦਾਂ ਦੀ ਰਾਖੀ ਕਰਦਿਆਂ ਅਤੇ ਦੁਸਮਣਾ ਨਾਲ ਲੋਹਾ ਲੈਦਿਆਂ ਸੈਨਿਕਾ ਵੱਲੋਂ ਦਿੱਤੀਆਂ ਹਰ ਤਰ੍ਹਾਂ ਦੀਆਂ ਕੁਰਬਾਨੀਆਂ ਨੂੰ ਹਮੇਸ਼ਾਂ ਯਾਦ ਰੱਖਿਆ ਜਾਵੇਗਾ ਕਿਉਂਕਿ ਉਨ੍ਹਾਂ ਵੱਲੋਂ ਆਪਣੇ ਹਿੱਤਾਂ ਲਈ ਨਹੀਂ ਸਗੋ ਰਾਸ਼ਟਰ ਦੀ ਰੱਖਿਆ ਲਈ ਦੁਸ਼ਮਣਾਂ ਦਾ ਟਾਕਰਾ ਕੀਤਾ। ਉਨ੍ਹਾਂ ਕਿਹਾ ਕਿ ਅੰਗਹੀਣ ਹੋਏ ਸੈਨਿਕਾਂ ਨੂੰ ਹਰ ਤਰ੍ਹਾਂ ਦਾ ਸਹਿਯੋਗ ਅਤੇ ਮਦਦ ਦੇਣਾ ਸਾਡੀ ਸਭ ਦੀ ਨੈਤਿਕ ਜਿੰਮੇਵਾਰੀ ਹੈ। ਉਨ੍ਹਾਂ ਇਸ ਮੌਕੇ ਆਪਣੇ ਫੰਡ ਵਿੱਚੋਂ 10 ਲੱਖ ਪੀ.ਆਰ.ਸੀ ਮੋਹਾਲੀ ਨੂੰ ਦੇਣ ਦਾ ਐਲਾਨ ਵੀ ਕੀਤਾ। ਪ੍ਰੋ: ਸੋਲੰਕੀ ਨੇ  ਪੀ.ਆਰ.ਸੀ ਵੱਲੋਂ ਅੰਗਹੀਣ ਸੈਨਿਕਾਂ ਨੂੰ ਦਿੱਤੀਆਂ ਜਾ ਰਹੀਆਂ ਸਹੂਲਤਾਂ ਦੀ ਸਲਾਘਾ ਕੀਤੀ ਅਤੇ ਪੀ.ਆਰ.ਸੀ ਦੇ 37ਵੇਂ ਸਥਾਪਨਾ ਦਿਵਸ ਦੀ ਮੁਬਾਰਕਬਾਦ ਵੀ ਦਿੱਤੀ। ਇਸ ਤੋਂ ਪਹਿਲਾ ਉਨ੍ਹਾ ਪੀ.ਆਰ.ਸੀ ਵੱਲੋਂ ਅੰਗਹੀਣ ਸੈਨਿਕਾਂ ਲਈ ਚਲਾਏ ਜਾ ਰਹੇ ਵੱਖ-ਵੱਖ ਕਿੱਤਾ ਸਿਖਲਾਈ ਕੋਰਸਾਂ ਅਤੇ ਉਨ੍ਹਾਂ ਲਈ ਚਲਾਏ ਜਾ ਰਹੇ ਸਵੈ ਰੋਜ਼ਗਾਰ ਧੰਦਿਆਂ ਜਿਸ ਵਿੱਚ ਸਿਲਾਈ ਤੇ ਕਢਾਈ, ਮੋਮਬਤੀਆਂ ਬਣਾਉਣਾ, ਕੁਰਸੀਆਂ ਦੀ ਕੇਨਿੰਗ ਕਰਨਾ, ਕੰਪਿਊਟਰ ਸਿਖਲਾਈ ਸੈਂਟਰ ਆਦਿ ਦਾ ਦੌਰਾ ਵੀ ਕੀਤਾ ਅਤੇ ਤਿਆਰ ਕੀਤੀਆਂ ਵਸਤਾਂ ਨੂੰ ਵੀ ਵੇਖਿਆ ਅਤੇ ਅੰਗਹੀਣ ਸੈਨਿਕਾਂ ਵੱਲੋਂ ਤਿਆਰ ਕੀਤੀਆਂ ਵਸਤਾਂ ਦੀ ਸਲਾਘਾ ਕੀਤੀ। ਇਸ ਮੌਕੇ ਉਨ੍ਹਾਂ ਅੰਗਹੀਣ ਸੈਨਿਕਾਂ ਵੱਲੋਂ ਖੇਡੇ ਗਏ ਬਾਸਕਟਬਾਲ ਦੇ ਸੋਅ ਮੈਚ ਨੂੰ ਵੀ ਬੜੀ ਹੀ ਦਿਲਚਸਪੀ ਨਾਲ ਵੇਖਿਆ। ਉਨ੍ਹਾਂ ਅੰਗਹੀਣ ਸੈਨਿਕਾਂ ਨੂੰ ਪੀ.ਆਰ.ਸੀ. ਦੇ ਸਥਾਪਨਾ ਦਿਵਸ ਮੌਕ ਤੋਹਫੇ  ਅਤੇ ਫਲ ਵੀ ਵੰਡੇ। 

ਰਾਜਪਾਲ ਹਰਿਆਣਾ ਨੇ ਇਸ ਮੌਕੇ ਪੀ.ਆਰ.ਸੀ. ਮੋਹਾਲੀ ਵਿਖੇ ਮੇਜਰ ਜਨਰਲ ਰਿਟ: ਕੀਰਤੀ ਚੱਕਰਾ ਅਤੇ ਵਸੀਸਟ ਸੇਵਾ ਮੈਡਲ ਐਸ.ਕੇ. ਰਾਜ਼ਦਾਨ ਜਿਹੜੇ ਕਿ ਫੌਜ ਵਿੱਚ ਇੱਕੋ ਇੱਕ ਪੈਰਾਪਲੈਜਿਕ ਅਫ਼ਸਰ ਸਨ ਜੋ ਕਿ ਮੇਜਰ ਜਨਰਲ ਵਜੋਂ ਸੇਵਾ ਮੁਕਤ ਹੋਏ ਹਨ ਜਿਹੜੇ ਕਿ ਸਥਾਪਨਾ ਦਿਵਸ ਮੌਕੇ ਵਿਸ਼ੇਸ ਤੌਰ ਤੇ ਸ਼ਾਮਲ ਹੋਏ। ਉਨ੍ਹਾਂ ਦੇ ਨਾਂ ਤੇ ਬਣਾਏ ਗਏ ਨਵੇਂ  ਰਿਹਾਇਸ਼ੀ ਮਕਾਨਾਂ ਦੇ ਬਲਾਕ ਦਾ  ਮੁਆਇਨਾ ਵੀ ਕੀਤਾ। ਮਾਣਯੋਗ ਰਾਜਪਾਲ ਹਰਿਆਣਾ ਨੇ ਪੀ.ਆਰ.ਸੀ ਵਿੱਖੇ ਬੋਟਲ ਪਾਮ ਦਾ ਰੁੱਖ ਵੀ ਲਗਾਇਆ ਅਤੇ ਪੀ.ਆਰ.ਸੀ ਦੀ ਵਿਜ਼ਿਟਰ ਬੁੱਕ ਤੇ ਹਸਤਾਖਰ ਵੀ ਕੀਤੇ। ਇਸ ਤੋਂ ਪਹਿਲਾ ਲੈਫਟੀਨੇਟ ਜਨਰਲ ਕੇ.ਜੇ ਸਿੰਘ ਏ.ਵੀ.ਐਸ.ਐਮ ਜਨਰਲ ਆਫੀਸਰ ਕਮਾਂਡਿੰਗ ਇੰਨ ਚੀਫ ਵੈਸਟਰਨ ਕਮਾਂਡ ਨੇ ਰਾਜਪਾਲ ਹਰਿਆਣਾ ਨੂੰ ਪੀ.ਆਰ.ਸੀ ਦੇ 37ਵੇਂ ਸਥਾਪਨਾ ਦਿਵਸ ਮੌਕੇ ਪੁੱਜਣ ਤੇ ਜੀ ਆਇਆ ਆਖਿਆ ਅਤੇ ਪੀ.ਆਰ.ਸੀ ਵੱਲੋਂ ਅੰਗਹੀਣ ਸੈਨਿਕਾਂ ਦੀ ਭਲਾਈ ਲਈ ਅਤੇ ਉਨ੍ਹਾਂ ਦੇ ਮੁੜ ਵਸੇਬੇ ਲਈ ਕੀਤੇ ਜਾ ਰਹੇ ਕੰਮਾਂ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਦਿੱਤੀ। ਇਸ ਮੌਕੇ ਪੀ.ਆਰ.ਸੀ ਦੇ ਚੇਅਰਮੈਨ ਮੇਜਰ ਜਨਰਲ ਆਰ.ਐਸ ਰਠੌਰ ਫੌਜ ਦੇ ਹੋਰ ਸੀਨੀਅਰ ਅਧਿਕਾਰੀ ਅਤੇ ਐਸ.ਡੀ.ਐਮ ਸ੍ਰੀ ਲਖਮੀਰ ਸਿੰਘ, ਐਸ.ਪੀ.(ਸਿਟੀ-1) ਸ੍ਰੀ ਅਸ਼ੀਸ ਕੁਮਾਰ ਤੇ ਹੋਰ ਪ੍ਰਸਾਸ਼ਨਿਕ ਅਧਿਕਾਰੀ ਵੀ ਮੌਜੂਦ ਸਨ।