ਐਸ.ਏ.ਐਸ.ਨਗਰ ਸ਼ਹਿਰ 'ਚ ਸਰਕਾਰੀ ਜਮੀਨਾਂ ਤੇ ਨਜਾਇਜ ਕਬਜੇ ਬਰਦਾਸਤ ਨਹੀਂ ਕੀਤੇ ਜਾਣਗੇ : ਸਿੱਧੂ

ਵਿਓਪਾਰਕ ਅਦਾਰਿਆਂ ਵੱਲੋਂ ਨਜਾਇਜ ਉਸਾਰੀਆਂ ਨੂੰ ਹਟਾਉਣ ਲਈ ਢੁੱਕਵੀਂ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇ

5 ਦਰਿਆ ਨਿਊਜ਼

ਐਸ.ਏ.ਐਸ.ਨਗਰ 14-May-2014

ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਸ਼ਹਿਰ 'ਚ ਸਰਕਾਰੀ ਜਮੀਨਾਂ ਤੇ ਨਜਾਇਜ ਕਬਜੇ ਬਰਦਾਸ਼ਤ ਨਹੀਂ ਕੀਤੇ ਜਾਣਗੇ । ਜੇਕਰ ਕੋਈ ਨਜਾਇਜ ਕਬਜਾ ਕਰਦਾ ਹੈ ਤਾਂ ਉਸ ਵਿਰੁੱਧ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕੀਤੀ ਜਾਵੇ ਅਤੇ ਨਜਾਇਜ ਕਬਜਾ ਹਟਵਾ ਕੇ ਤੁਰੰਤ ਰਿਪੋਰਟ ਦਿੱਤੀ ਜਾਵੇ। ਇਹ ਹਦਾਇਤਾਂ ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਸ੍ਰੀ ਤੇਜਿੰਦਰ ਪਾਲ ਸਿੰਘ ਸਿੱਧੂ ਨੇ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਦੇ ਮੀਟਿੰਗ ਹਾਲ ਵਿਖੇ ਗਮਾਡਾ ਅਤੇ ਨਗਰ ਨਿਗਮ ਦੇ ਅਧਿਕਾਰੀਆਂ ਦੀ ਵਿਕਾਸ ਕਾਰਜਾਂ ਦੀ ਸਮੀਖਿਆ ਸਬੰਧੀ ਸੱਦੀ ਗਈ ਮੀਟਿੰਗ ਦੀ ਪ੍ਰਧਾਨਗੀ ਕਰਦਿਆਂ ਦਿੱਤੀਆਂ। ਉਨ੍ਹਾਂ ਕਿਹਾ ਕਿ ਚੰਡੀਗੜ੍ਹ ਪ੍ਰਸਾਸ਼ਨ ਵੱਲੋਂ ਸ਼ਹਿਰ ਦੀ ਹੱਦ ਨਾਲ ਲਗਦੀਆਂ ਨਜਾਇਜ ਕਲੌਨੀਆਂ ਢਾਹੁਣ ਨਾਲ ਉਹ ਲੋਕ ਐਸ.ਏ.ਐਸ.ਨਗਰ ਸ਼ਹਿਰ 'ਚ ਸਰਕਾਰੀ ਥਾਵਾਂ ਤੇ ਕਾਬਜ ਹੋ ਸਕਦੇ ਹਨ । ਉਨ੍ਹਾਂ ਤੇ ਸਖ਼ਤ ਨਿੱਗਾ੍ਹ ਰੱਖੀ ਜਾਵੇ ਕਿਸੇ ਨੂੰ ਵੀ ਨਜਾਇਜ ਕਾਬਜ ਨਾ ਹੋਣ ਦਿੱਤਾ ਜਾਵੇ। ਸਿੱਧੂ ਨੇ ਹੋਰ ਆਖਿਆ ਕਿ ਸ਼ਹਿਰ ਵਿੱਚ ਕਈ ਵਿਓਪਾਰਕ ਅਦਾਰਿਆਂ ਅਤੇ ਮਾਰਕੀਟਾਂ ਵਿੱਚ ਦੁਕਨਦਾਰਾਂ ਵੱਲੋਂ ਨਜਾਇਜ ਉਸਾਰੀਆਂ ਕੀਤੀਆਂ ਹੋਈਆਂ ਹਨ ਜਿਹੜਾ ਵੀ ਕੋਈ ਵਿਅਕਤੀ ਪਾਸ ਕਰਵਾਏ ਨਕਸੇ ਦੀ ਉਲਘੰਣਾ ਕਰਦਾ ਹੈ ਉਸ ਵਿਰੁੱਧ ਅਤੇ ਨਜਾਇਜ ਉਸਾਰੀਆਂ ਨੂੰ ਹਟਾਉਣ ਲਈ ਢੁੱਕਵੀ ਕਾਰਵਾਈ ਕੀਤੀ ਜਾਵੇ ਅਤੇ ਅਜਿਹੇ ਅਦਾਰਿਆਂ ਦੀ ਲਿਸਟ ਤਿਆਰ ਕੀਤੀ ਜਾਵੇ। ਉਨ੍ਹਾਂ ਮਾਰਕੀਟਾਂ ਨੂੰ ਸਾਫ਼ ਸੁਥਰੀ ਨਵੀਂ ਦਿੱਖ ਪ੍ਰਦਾਨ ਕਰਨ ਦੀਆਂ ਹਦਾਇਤਾ ਵੀ ਦਿੱਤੀਆ। ਸ੍ਰੀ ਸਿੱਧੂ ਨੇ ਇਸ ਮੌਕੇ ਗਮਾਡਾ ਅਤੇ ਨਗਰ ਨਿਗਮ ਦੇ ਅਧਿਕਾਰੀਆਂ ਨੂੰ ਆਖਿਆ ਕਿ ਉਹ ਆਪਸੀ ਤਾਲਮੇਲ ਨਾਲ ਕੰਮ ਕਰਨ ਤਾਂ ਜੋ ਸ਼ਹਿਰ ਦੇ ਕੰਮ 'ਚ ਬਿਨ੍ਹਾਂ ਵਜ੍ਹਾ ਦੇਰੀ ਨਾ ਹੋਵੇ। ਉਨ੍ਹਾਂ ਇਸ ਮੌਕੇ ਆਖਿਆ ਕਿ ਉਨ੍ਹਾਂ ਵੱਲੋਂ ਸ਼ਹਿਰ 'ਚ ਹੋਏ ਵਿਕਾਸ ਕਾਰਜ ਅਤੇ ਚੱਲ ਰਹੇ ਵਿਕਾਸ ਕਾਰਜਾ ਦੀ ਅਚਨਚੇਤੀ ਚੈਕਿੰਗ ਕੀਤੀ ਜਾਵੇਗੀ ਅਤੇ ਜੇਕਰ ਕਿਸੇ ਕਿਸਮ ਦੀਆਂ ਤਰੁੱਟੀਆਂ ਪਾਈਆਂ ਗਈਆਂ ਤਾਂ ਉਸ ਦੇ ਜਿੰਮੇਵਾਰ ਸਬੰਧਤ ਅਧਿਕਾਰੀ ਹੋਣਗੇ। ਅਣਗਹਿਲੀ ਕਰਨ ਵਾਲਿਆਂ ਵਿਰੁੱਧ ਕਾਰਵਾਈ ਕੀਤੀ ਜਾਵੇਗੀ। ਸ੍ਰੀ ਸਿੱਧੂ ਨੇ ਇਸ ਮੌਕੇ ਵਿਕਾਸ ਕਾਰਜਾਂ ਦੇ ਮਿਆਰੀ ਹੋਣ ਨੂੰ ਯਕੀਨੀ ਬਣਾਉਣ ਦੀਆਂ ਸਖ਼ਤ  ਹਦਾਇਤਾਂ ਵੀ ਦਿੱਤੀਆ। 

ਸਿੱਧੂ ਨੇ ਇਸ ਮੌਕੇ ਆਖਿਆ ਕਿ ਸ਼ਹਿਰ ਦੀਆਂ ਕੁੱਝ ਸੜਕਾਂ ਦੇ ਦੁਆਲੇ ਟਾਇਲਾਂ ਆਦਿ ਲਗਾਉਣ ਉਪਰੰਤ ਉਨ੍ਹਾਂ ਦਾ ਮਲਵਾ ਉਸੇ ਤਰ੍ਹਾਂ ਪਿਆ ਹੈ ਜਿਸ ਕਾਰਨ ਸੜਕਾਂ ਤੇ ਗੰਦਗੀ ਨਜਰ ਆਉਂਦੀ ਹੈ । ਉਨ੍ਹਾਂ ਆਖਿਆ ਕਿ ਜਿਸ ਕਿਸੇ ਏਜੰਸੀ ਵੱਲੋਂ ਕੰਮ ਕਰਵਾਇਆ ਗਿਆ ਹੈ ਉਸ ਨੂੰ ਉਹ ਮਲਵਾ ਤੁਰੰਤ ਹਟਾਉਣ ਦੀਆਂ ਹਦਾਇਤਾਂ ਕੀਤੀਆਂ ਜਾਣ ਅਤੇ ਸਾਰੀਆਂ ਸੜਕਾਂ ਦੀ ਮੁਕੰਮਲ ਸਫਾਈ ਕੀਤੀ ਜਾਵੇ, ਕਿਸੇ ਵੀ ਸੜਕ ਤੇ ਮਿੱਟੀ ਅਤੇ ਮਲਵੇ ਆਦਿ ਦੀ ਢੇਰੀ ਨਜਰ ਨਹੀਂ ਆਉਣੀ ਚਾਹੀਦੀ । ਸ੍ਰੀ ਸਿੱਧੂ ਨੇ ਹੋਰ ਆਖਿਆ ਕਿ ਸ਼ਹਿਰ 'ਚ ਆਵਾਜਾਈ ਨੂੰ ਸੁਖਾਲਾ ਬਣਾਉਣ ਲਈ ਰਹਿੰਦੀਆਂ ਮੁੱਖ ਸੜਕਾਂ ਤੇ ਜਿਥੇ ਡੀਵਾਇਡਰ ਨਹੀਂ ਬਣੇ ਉਥੇ ਡੀਵਾਇਡਰ ਬਣਾਉਣ ਲਈ ਇੱਕ ਯੋਜਨਾ ਤਿਆਰ ਕੀਤੀ ਜਾਵੇ ਤਾਂ ਜੋ ਸਾਰੀਆਂ ਸੜਕਾਂ ਤੇ ਵਨ ਵੇਅ ਟਰੈਫਿਕ ਹੋ ਸਕੇ ਇਸ ਤੋ ਇਲਾਵਾ ਟਰੈਫਿਕ ਲਾਈਟਾਂ ਅਤੇ ਜਿਹੜੀਆਂ ਸੜਕਾਂ ਤੇ ਰਾਤ ਨੂੰ  ਰੋਸ਼ਨੀ ਲਈ ਲਾਈਟਾਂ ਲਗਾਈਆਂ ਗਈਆਂ ਹਨ ਜਿਥੇ ਬੰਦ ਹਨ ਉਨ੍ਹਾਂ ਨੂੰ ਤੁਰੰਤ ਚਾਲੂ ਕੀਤਾ ਜਾਵੇ। ਸ੍ਰੀ ਸਿੱਧੂ ਨੇ ਸ਼ਹਿਰ ਵਿਚਲੇ ਪਾਰਕਾਂ ਦੇ ਰੱਖ ਰਖਾਓ ਲਈ ਵੀ ਪੁਖਤਾ ਇੰਤਜਾਮ ਕਰਨ ਲਈ ਆਖਿਆ । ਉਨ੍ਹਾਂ ਸ਼ਹਿਰ ਦੇ ਨੇਚਰ ਪਾਰਕ ਵਿਖੇ ਪੀਣ ਵਾਲੇ ਸਾਫ ਸੁਥਰੇ ਪਾਣੀ ਦੀ ਵਿਵਸਥਾ ਕਰਨ ਦੀਆਂ ਹਦਾਇਤਾਂ ਦਿੱਤੀਆ। ਉਨ੍ਹਾਂ ਨਗਰ ਨਿਗਮ ਦੇ ਅਧਿਕਾਰੀਆਂ ਨੂੰ ਸ਼ਹਿਰ ਵਿੱਚ ਮੁੜ ਸਫਾਈ ਮੁਹਿੰਮ ਸੁਰੂ ਕਰਨ ਲਈ ਆਖਿਆ ਅਤੇ ਸਹਿਰ ਵਿੱਚ ਉੱਗੇ ਕਾਂਗਰਸੀ ਘਾਹ ਜਿਸ ਨਾਲ ਤਰ੍ਹਾਂ-ਤਰ੍ਹਾਂ ਦੀਆਂ ਬਿਮਾਰੀਆਂ ਫੈਲਦੀਆਂ ਹਨ ਨੂੰ ਤੁਰੰਤ ਕਟਾਉਣ ਦੀਆਂ ਹਦਾਇਤਾਂ ਦਿੱਤੀਆ। ਸਿੱਧੂ ਨੇ ਰੈਣ ਬਸੇਰੇ ਨੇੜੇ ਪਾਣੀ ਦੀ ਪਾਈਪ ਦੀ ਲੀਕੇਜ ਕਾਰਨ ਟੁੱਟੀ ਸੜਕ ਨੂੰ ਵੀ ਮੁਰੰਮਤ ਕਰਨ ਅਤੇ ਪਾਈਪ ਦੀ ਲੀਕੇਜ ਨੂੰ ਬੰਦ ਕਰਨ ਦੀਆਂ ਹਦਾਇਤਾਂ ਦਿੱਤੀਆ । ਉਨ੍ਹਾਂ ਪੰਜਾਬ ਸਰਕਾਰ ਵੱਲੋ  ਸ਼ਹਿਰ ਵਿੱਚ ਬਣਾਏ ਗਏ ਬਹੁਮੰਤਵੀ ਖੇਡ ਸਟੇਡੀਅਮਾਂ ਦੇ ਰੱਖ ਰਖਾਓ ਲਈ ਵੀ ਪੁਖਤਾ ਇੰਤਜਾਮ ਕਰਨ ਲਈ ਆਖਿਆ ਅਤੇ ਜਿਨ੍ਹਾਂ ਖੇਡ ਸਟੇਡੀਅਮਾਂ ਵਿੱਚ ਤੈਰਾਕੀ ਪੁਲ ਬਣੇ ਹੋਏ ਹਨ ਉਨ੍ਹਾਂ ਨੂੰ ਚਾਲੂ ਕਰਨ ਦੀਆਂ ਹਦਾਇਤਾਂ ਵੀ ਦਿੱਤੀਆ  ਅਤੇ ਇਨ੍ਹਾਂ ਸਬੰਧੀ ਇੱਕ ਵਿਸ਼ੇਸ ਯੋਜਨਾ ਤਿਆਰ ਕਰਨ ਲਈ ਆਖਿਆ ਤਾਂ ਜੋ ਇਨ੍ਹਾਂ ਸਟੇਡੀਅਮਾਂ ਦਾ ਖਿਡਾਰੀ ਅਤੇ ਸ਼ਹਿਰ ਨਿਵਾਸੀ ਵੱਧ ਤੋਂ ਵੱਧ ਫਾਇਦਾ ਉਠਾ ਸਕਣ। ਮੀਟਿੰਗ ਵਿੱਚ ਅਸਟੇਟ ਅਫ਼ਸਰ ਗਮਾਡਾ ਸ੍ਰੀਮਤੀ ਇੰਦਰਜੀਤ ਕੌਰ ਕੰਗ, ਐਸ.ਈ. ਗਮਾਡਾ ਸ੍ਰੀ ਜਤਿੰਦਰ ਮੋਹਨ, ਵਧੀਕ ਕਮਿਸ਼ਨਰ ਤਕਨੀਕੀ ਨਗਰ ਨਿਗਮ ਸ੍ਰੀ ਬੀ.ਡੀ ਸਿੰਗਲਾ, ਐਕਸੀਅਨ ਗਮਾਡਾ ਸ੍ਰੀ ਅਸੋਕ ਵਿਰਦੀ, ਸ੍ਰੀ ਆਰ.ਐਸ. ਚੀਮਾ ਅਤੇ ਨਗਰ ਨਿਗਮ ਅਤੇ ਗਮਾਡਾ ਦੇ ਹੋਰ ਅਧਿਕਾਰੀ ਵੀ ਮੌਜੂਦ ਸਨ।