ਐਸ.ਏ.ਐਸ.ਨਗਰ ਸ਼ਹਿਰ ਵਿੱਚ 10 ਕਰੋੜ ਰੁਪਏ ਦੀ ਲਾਗਤ ਨਾਲ ਪੇਬਰ ਬਲਾਕ ਲਗਾਏ ਜਾਣਗੇ : ਹਰਭਜਨ ਮਾਨ

ਸ਼ਹਿਰ ਦੀ ਸੁੰਦਰਤਾ ਲਈ 5 ਕਰੋੜ ਰੁਪਏ ਖਰਚ ਕੀਤੇ ਜਾਣਗੇ ,ਜ਼ਿਲ੍ਹਾ ਯੋਜਨਾ ਕਮੇਟੀ ਦੇ ਚੇਅਰਮੈਨ ਵੱਲੋ ਨਗਰ ਨਿਗਮ ਭਵਨ ਵਿਖੇ ਸੁਵਿਧਾ ਕੇਂਦਰ ਦਾ ਕੀਤਾ ਉਦਘਾਟਨ

5 ਦਰਿਆ ਨਿਊਜ਼ (ਸੀ.ਪੀ.ਸਿੰਘ)

ਐਸ.ਏ.ਐਸ.ਨਗਰ (ਮੁਹਾਲੀ) 09-Aug-2012

ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਸ਼ਹਿਰ ਨੂੰ ਵਿਸ਼ਵ ਦਾ ਸੁੰਦਰ ਸ਼ਹਿਰ ਅਤੇ ਇੱਕ ਨਮੂਨੇ ਦਾ ਸ਼ਹਿਰ ਬਣਾਉਣ ਲਈ ਕੋਈ ਕਸਰ ਬਾਕੀ ਨਹੀਂ ਛੱਡੀ ਜਾਵੇਗੀ । ਸਹਿਰ ਨਿਵਾਸੀਆਂ ਦੀ ਸੁੱਖ ਸਹੂਲਤਾਂ ਲਈ ਸਮੁੱਚੇ ਸ਼ਹਿਰ ਵਿੱਚ 10 ਕਰੋੜ ਰੁਪਏ ਦੇ ਪੇਬਰ ਬਲਾਕ ਲਗਾਏ ਜਾਣਗੇ । ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਜ਼ਿਲ੍ਹਾ ਯੋਜਨਾ ਕਮੇਟੀ ਦੇ ਚੇਅਰਮੈਨ  ਹਰਭਜਨ ਮਾਨ ਨੇ ਨਗਰ ਨਿਗਮ ਭਵਨ ਵਿਖੇ ਇਸ ਦੇ ਆਸ ਪਾਸ ਦੇ ਸ਼ਹਿਰ ਨਿਵਾਸੀਆਂ ਦੀ ਸਹੂਲਤ ਲਈ ਖੋਲ੍ਹੇ ਗਏ ਸੁਵਿਧਾ ਕੇਂਦਰ ਦਾ ਉਦਘਾਟਨ ਕਰਨ ਉਪਰੰਤ ਨਗਰ ਨਿਗਮ ਭਵਨ ਦੇ ਮੀਟਿੰਗ ਹਾਲ ਵਿਖੇ ਫੇਜ਼ 2 ਦੇ ਨਿਵਾਸੀਆਂ ਦੀਆਂ ਸਮੱਸਿਆਵਾਂ ਸੁਣਨ ਸਬੰਧੀ ਅਤੇ ਉਨ੍ਹਾਂ ਦੇ ਨਿਪਟਾਰੇ ਲਈ ਸੱਦੀ ਗਈ ਸਮਾਜ ਸੇਵੀ ਸੰਸਥਾਵਾਂ ਦੇ ਨੁਮਾਇੰਦੀਆਂ ਅਤੇ ਵੱਖ ਵੱਖ ਵਿਭਾਗਾਂ ਦੇ ਅਧਿਕਾਰੀਆਂ ਦੀ ਮੀਟਿੰਗ ਦੋਰਾਨ ਕੀਤਾ।  ਮਾਨ ਨੇ ਇਸ ਮੌਕੇ ਦੱਸਿਆ ਕਿ ਐਸ.ਏ.ਐਸ.ਨਗਰ ਸ਼ਹਿਰ ਦੀ ਸੁੰਦਰਤਾ ਵਿੱਚ ਹੋਰ ਵਾਧਾ ਕਰਨ ਲਈ ਪਾਰਕਾਂ ਨੂੰ ਸੁੰਦਰ, ਸੜਕਾਂ ਤੇ ਲਾਈਟਾਂ ਆਦਿ ਲਗਾਉਣ ਤੇ 5 ਕਰੋੜ ਰੁਪਏ ਖਰਚ ਕੀਤੇ ਜਾਣਗੇ। ਇਸ ਤੋਂ ਇਲਾਵਾ ਸ਼ਹਿਰ ਵਿੱਚ 1 ਕਰੋੜ ਰੁਪਏ ਦੀ ਲਾਗਤ ਨਾਲ 13 ਆਧੁਨਿਕ ਕਿਸਮ ਦੇ ਕੁੜਾਂ ਕਰਕੱਟ ਕੁਲੈਕਸ਼ਨ ਸੈਂਟਰ ਬਣਾਏ ਜਾਣਗੇ।  ਉਨ੍ਹਾਂ ਕਿਹਾ ਕਿ ਨਗਰ ਨਿਗਮ ਅਤੇ ਗਮਾਡਾ ਦੇ ਅਧਿਕਾਰੀਆਂ ਨੂੰ ਆਖਿਆ ਗਿਆ ਹੈ ਕਿ ਸ਼ਹਿਰ ਦੀਆਂ ਸਮੱਸਿਆਵਾਂ ਨੂੰ ਦੂਰ ਕਰਨ ਲਈ ਆਪਸੀ ਤਾਲਮੇਲ ਰਾਹੀਂ ਵਿਭਾਗੀ ਕੰਮਾਂ ਨੂੰ ਸਮੇਂ ਸਿਰ ਨੇਪਰੇ ਚੜਾਉਣ ਨੂੰ ਯਕੀਨੀ ਬਣਾਉਣ ਤਾਂ ਜੋ ਲੋਕਾਂ ਨੂੰ ਦਰਪੇਸ਼ ਮੁਸ਼ਕਲਾਂ ਤੋਂ ਛੁਟਕਾਰਾ ਮਿਲ ਸਕੇ।  ਮਾਨ ਨੇ ਦੱਸਿਆ ਕਿ ਪਹਿਲਾਂ ਨਗਰ ਨਿਗਮ ਭਵਨ ਦੇ ਨੇੜਲੇ ਫੇਜ਼ਾਂ ਦੇ ਲੋਕਾਂ ਨੂੰ ਰੋਜਮਰਾਂ ਦੇ  ਕੰਮ ਕਰਾਉਣ ਲਈ ਡਿਪਟੀ ਕਮਿਸ਼ਨਰ ਦੇ ਦਫ਼ਤਰ ਵਿਖੇ ਖੋਲ੍ਹੇ ਸੁਵਿਧਾ ਕੇਂਦਰ ਵਿਖੇ ਜਾਣਾ ਪੈਦਾ ਸੀ। 

ਪਰੰਤੂ ਹੁਣ ਨਗਰ ਨਿਗਮ ਭਵਨ ਵਿਖੇ ਖੋਲ੍ਹੇ ਸੁਵਿਧਾ ਕੇਂਦਰ ਰਾਹੀਂ ਇਹ ਕੰਮ ਹੋ ਸਕਣਗੇ। ਉਨ੍ਹਾਂ ਦੱਸਿਆ ਕਿ ਇਸ ਸੁਵਿਧਾ ਸੈਂਟਰ ਰਾਹੀਂ ਜਿਥੇ ਜਨਤਕ ਸੇਵਾਵਾਂ ਨਾਲ ਸਬੰਧਤ ਸਾਰੇ ਫਾਰਮ ਉਪਲਬਧ ਹੋਣਗੇ ਅਤੇ ਇਸ ਸੁਵਿਧਾ ਕੇਦਰ ਰਾਹੀਂ ਜਨਮ ਸਰਟੀਫਿਕੇਟ ਦੀ ਤਸਦੀਕ ਸੁਦਾ ਕਾਪੀ ਲੈਣ, ਮੋਤ ਸਰਟੀਫਿਕੇਟ ਦੀ ਤਸਦੀਕ ਸੁਦਾ ਕਾਪੀ ਲੈਣ, ਜਨਮ/ਮੌਤ ਸਰਟੀਫਿਕੇਟ ਵਿੱਚ ਨਾਮ ਦਰਜ ਅਤੇ ਸੋਧ ਸਬੰਧੀ ਦਰਖਾਸਤ, ਲੇਟ ਐਂਟਰ ਜਨਮ/ਮੋਤ ਸਬੰਧੀ ਦਰਖਾਸਤ, ਪਾਣੀ/ਸੀਵਰੇਜ ਕੁਨੈਕਸ਼ਨ ਲੈਣ ਲਈ ਦਰਖਾਸਤ, ਰਾਸ਼ਨ ਕਾਰਡ ਸਬੰਧੀ ਦਰਖਾਸਤ, ਹਲਫਿਆ ਬਿਆਨ ਤਸਦੀਕ ਕਰਵਾਉਣ, ਸਿਉਰਟੀਬਾਂਡ ਤਸਦੀਕ ਕਰਨਾ, ਇੰਨਡੈਨਿਟੀ ਬਾਂਡ ਤਸਦੀਕ ਕਰਨਾ, ਸਰਟੀਫਿਕੇਟ (ਅਸ.ਸੀ./ਬੀ.ਸੀ/ਓ.ਬੀ.ਸੀ/ ਰਿਹਾਇਸ਼/ਰੂਰਲ ਏਰੀਆ/ਜਾਤੀ), ਲਾਊਡ ਸਪੀਕਰ/ਡੀ.ਜੇ. ਦੀ ਪਰਮੀਸ਼ਨ ਸਬੰਧੀ, ਪੁਰਾਣੀ ਰਜਿਸਟਰੀ ਦੀ ਨਕਲ ਲੈਣ ਸਬੰਧੀ, ਸੀਨੀਅਰ ਸੀਟੀਜ਼ਨ ਆਈ.ਡੀ. ਕਾਰਡ, ਅੰਗਹੀਣਤਾ ਆਈ.ਡੀ. ਕਾਰਡ ਵਰਗੀਆਂ ਸਹੂਲਤਾਂ ਨੂੰ ਨਿਯਤ ਸਮੇਂ ਤੇ ਮੁਹੱਈਆਂ ਕਰਵਾਈਆਂ ਜਾਣਗੀਆਂ। ਇਸ ਮੌਕੇ ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ  ਵਰੁਣ ਰੂਜ਼ਮ ਨੇ ਦੱਸਿਆ ਕਿ ਫੇਜ਼ ਪੱਧਰ ਤੇ ਲੋਕਾਂ ਦੀਆਂ ਸਮੱਸਿਆਵਾਂ ਨੂੰ ਮੌਕੇ ਤੇ ਹੀ ਹੱਲ ਕਰਨ ਦਾ ਬੀੜਾ ਚੁੱਕਿਆ ਗਿਆ ਹੈ ਉਨ੍ਹਾ ਕਿਹਾ ਕਿ ਪੜਾਅ ਬਾਰ ਸੁਰੂ ਕੀਤੇ ਇਸ ਸਿਲਸਿੱਲੇ ਨਾਲ ਚੰਗੇ ਨਤੀਜੇ ਸਾਹਮਣੇ ਆ ਰਹੇ ਹਨ। ਉਨ੍ਹਾਂ ਫੇਜ਼ ਵਾਸੀਆਂ ਦੀ ਮੰਗ ਤੇ ਵਿਸ਼ਵਾਸ਼ ਦਿਵਾਇਆ ਕਿ ਵੱਡੇ ਪਾਰਕਾਂ ਵਿੱਚ ਪਾਖਾਨੇ ਅਤੇ ਪੀਣ ਵਾਲੇ ਪਾਣੀ ਦੀ ਵਿਵਸਥਾ ਕੀਤੀ ਜਾਵੇਗੀ। ਇਸ ਮੌਕੇ ਰਾਜਾ ਕੰਵਰਜੋਤ ਸਿੰਘ ਮੋਹਾਲੀ ਅਤੇ ਰੈਜੀਡੈਂਸ ਵੈਲਫੇਅਰ ਐਸੋਸੀਏਸ਼ਨ ਦੇ ਪ੍ਰਧਾਨ ਕੈਪਟਨ ਅਜੀਤ ਸਿੰਘ ਫੇਜ 2 ਦੀਆਂ ਸਮੱਸਿਆਵਾਂ ਸਬੰਧੀ ਵਿਸਥਾਰਪੁਰਵਕ ਜਾਣਕਾਰੀ ਦਿੱਤੀ ਅਤੇ ਫੇਜ਼ 2 ਵਿੱਚ ਡਿਸਪੈਂਸਰੀ ਖੋਲ੍ਹਣ ਅਤੇ ਕੰਮਿਊਨਿਟੀ ਸੈਂਟਰ ਵਿੱਚ ਐਸੋਸੀਏਸ਼ਨ ਨੂੰ ਕਮਰਾ ਅਲਾਟ ਕਰਨ ਦੀ ਮੰਗ ਕੀਤੀ । ਇਸ ਤੋਂ ਇਲਾਵਾ ਫਰੈਂਕੋ ਹੋਟਲ ਤੋਂ ਚੰਡੀਗੜ੍ਹ ਜਾਣ ਵਾਲੀ ਸੜਕ ਤੇ ਟੀ-ਪੁਆਇੰਟ ਤੇ ਟਰੈਫਿਕ ਲਾਈਟਾਂ ਲਗਾਉਣ ਦੀ ਮੰਗ ਵੀ ਕੀਤੀ। ਇਸ ਮੌਕੇ ਨਗਰ ਨਿਗਮ ਦੇ ਸਯੁੰਕਤ ਕਮਿਸ਼ਨਰ  ਜੇ.ਸੀ. ਸੱਭਰਾਵਾਲ, ਐਸ.ਡੀ.ਐਮ  ਲਖਮੀਰ ਸਿੰਘ, ਐਸ.ਪੀ. (ਸਿਟੀ 2) ਸੁਨੀਤਾ ਰਾਣੀ , ਐਚ.ਐਸ. ਰਿਆੜ ਡੀ.ਐਸ.ਪੀ (ਹੈਡਕੁਆਟਰ), ਮਾਨ ਦੇ ਸਲਾਹਕਾਰ  ਗੁਲਜਾਰ ਇੰਦਰ ਸਿੰਘ ਚਾਹਿਲ,   ਜਗਜੀਤ ਸਿੰਘ ਕਾਰਜ ਸਾਧਕ ਅਫ਼ਸਰ, ਐਕਸੀਅਨ  ਨਰਿੰਦਰ ਸਿੰਘ ਦਾਲਮ ਤੋਂ ਇਲਾਵਾ ਹੋਰਨਾ ਵਿਭਾਗਾਂ ਦੇ ਅਧਿਕਾਰੀਆਂ ਸਮੇਤ ਸਮਾਜ ਸੇਵੀ ਸੰਸਥਾਵਾਂ ਦੇ ਹੋਰ ਨੁਮਾਇੰਦੇ ਵੀ ਮੌਜੂਦ ਸਨ।