ਬੇਨਿਫਿਟ ਆਫ ਡਾਊਟ ਅਰਥਾਤ ਸਕਾਰਾਤਮਕ ਸੋਚ ਨੂੰ ਅਪਣਾਓ
ਨਿਰੰਕਾਰੀ ਮਹਿਲਾ ਸਮਾਗਮ
5 Dariya News
ਚੰਡੀਗੜ੍ਹ 12-Apr-2026
ਮਨੁੱਖੀ ਜੀਵਨ ਸੰਬੰਧਾਂ, ਪਰਿਸਥਿਤੀਆਂ ਅਤੇ ਭਾਵਨਾਵਾਂ ਦਾ ਮਿਲਾਪ ਹੈ। ਅਸੀਂ ਹਰ ਰੋਜ਼ ਕਈ ਲੋਕਾਂ ਨੂੰ ਮਿਲਦੇ ਹਾਂ ਅਤੇ ਵੱਖ-ਵੱਖ ਹਾਲਾਤਾਂ ਦਾ ਸਾਹਮਣਾ ਕਰਦੇ ਹਾਂ। ਅਕਸਰ ਕਿਸੇ ਦੇ ਵਿਹਾਰ ਨੂੰ ਦੇਖ ਕੇ ਅਸੀਂ ਜਲਦੀ ਵਿੱਚ ਇਹ ਨਤੀਜਾ ਕੱਢ ਲੈਂਦੇ ਹਾਂ ਕਿ ਸਾਹਮਣੇ ਵਾਲਾ ਗਲਤ ਹੈ ਜਾਂ ਉਸ ਨੇ ਜਾਣਬੁੱਝ ਕੇ ਅਜਿਹਾ ਕੀਤਾ ਹੈ, ਜਦਕਿ ਹਕੀਕਤ ਇਹ ਵੀ ਹੋ ਸਕਦੀ ਹੈ ਕਿ ਉਹ ਵਿਅਕਤੀ ਕਿਸੇ ਮੁਸ਼ਕਲ ਹਾਲਾਤ, ਮਜਬੂਰੀ ਜਾਂ ਨਿੱਜੀ ਸਮੱਸਿਆ ਵਿੱਚੋਂ ਗੁਜ਼ਰ ਰਿਹਾ ਹੋਵੇ।
ਜੇ ਅਸੀਂ “ਬੇਨਿਫਿਟ ਆਫ ਡਾਊਟ” ਨੂੰ ਅਪਣਾਉਂਦੇ ਹੋਏ ਹੋਰਨਾਂ ਨੂੰ ਸਮਝਣ ਲਈ ਸਮਾਂ ਦਈਏ ਤਾਂ ਅਸੀਂ ਆਪਣੇ ਮਨ ਵਿੱਚ ਬਿਨਾਂ ਲੋੜ ਨਕਾਰਾਤਮਕ ਭਾਵਨਾ ਪੈਦਾ ਹੋਣ ਤੋਂ ਬਚ ਸਕਦੇ ਹਾਂ। ਇਹ ਵਿਚਾਰ ਅੱਜ ਇੱਥੇ ਸੈਕਟਰ 30 ਸਥਿਤ ਸੰਤ ਨਿਰੰਕਾਰੀ ਸਤਸੰਗ ਭਵਨ ਵਿੱਚ ਆਯੋਜਿਤ ਮਹਿਲਾ ਸਮਾਗਮ ਦੌਰਾਨ ਸਥਾਨਕ ਪ੍ਰਚਾਰਕ ਡਾ. ਅਮ੍ਰਿਤਪਾਲ ਕੌਰ ਜੀ ਨੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਮੌਜੂਦ ਸਾਧਸੰਗਤ ਨੂੰ ਸੰਬੋਧਨ ਕਰਦਿਆਂ ਪ੍ਰਗਟ ਕੀਤੇ।
ਸਤਿਗੁਰੂ ਮਾਤਾ ਸੁਦੀਕਸ਼ਾ ਜੀ ਮਹਾਰਾਜ ਦੇ ਪ੍ਰਵਚਨਾਂ ਵਿੱਚ “ਬੇਨਿਫਿਟ ਆਫ ਡਾਊਟ” ਬਾਰੇ ਕੀਤੀ ਗਈ ਚਰਚਾ ਦਾ ਜ਼ਿਕਰ ਕਰਦਿਆਂ ਡਾ. ਕੌਰ ਨੇ ਕਿਹਾ ਕਿ ਇਹ ਦ੍ਰਿਸ਼ਟਿਕੋਣ ਸਿਰਫ ਸਮਾਜਿਕ ਜੀਵਨ ਲਈ ਹੀ ਨਹੀਂ, ਸਗੋਂ ਪਰਿਵਾਰਕ ਜੀਵਨ ਵਿੱਚ ਵੀ ਬਹੁਤ ਮਹੱਤਵਪੂਰਨ ਹੈ। ਘਰ-ਪਰਿਵਾਰ ਵਿੱਚ ਛੋਟੇ-ਛੋਟੇ ਮਨਮੁਟਾਅ ਅਕਸਰ ਇਸ ਲਈ ਵੱਧ ਜਾਂਦੇ ਹਨ ਕਿਉਂਕਿ ਅਸੀਂ ਇਕ-ਦੂਜੇ ਦੀ ਗੱਲ ਨੂੰ ਸਮਝਣ ਤੋਂ ਬਿਨਾਂ ਹੀ ਤੁਰੰਤ ਪ੍ਰਤੀਕਿਰਿਆ ਦੇ ਦਿੰਦੇ ਹਾਂ।
ਜੇ ਅਸੀਂ ਧੀਰਜ ਰੱਖਦਿਆਂ ਸਕਾਰਾਤਮਕ ਭਾਵ ਨਾਲ ਸੋਚੀਏ ਤਾਂ ਕਈ ਵਿਵਾਦ ਆਪਣੇ ਆਪ ਹੀ ਸਮਾਪਤ ਹੋ ਸਕਦੇ ਹਨ। ਇਸ ਨਾਲ ਰਿਸ਼ਤਿਆਂ ਵਿੱਚ ਭਰੋਸਾ, ਪ੍ਰੇਮ ਅਤੇ ਆਪਸੀ ਸਤਿਕਾਰ ਵਧਦਾ ਹੈ। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਇਹ ਸੋਚ ਆਧਿਆਤਮਿਕ ਮਾਰਗ ‘ਤੇ ਚਲਣ ਲਈ ਵੀ ਜ਼ਰੂਰੀ ਹੈ, ਕਿਉਂਕਿ ਇਹ ਸਾਨੂੰ ਆਪਣੇ ਅਹੰਕਾਰ ਅਤੇ ਜਲਦੀਬਾਜ਼ੀ ‘ਤੇ ਕਾਬੂ ਰੱਖਣਾ ਸਿਖਾਉਂਦੀ ਹੈ ਅਤੇ ਹਰ ਸਥਿਤੀ ਨੂੰ ਸਮਝਦਾਰੀ ਅਤੇ ਕਰੁਣਾ ਨਾਲ ਦੇਖਣ ਦੀ ਪ੍ਰੇਰਣਾ ਦਿੰਦੀ ਹੈ।
ਇਹ ਦ੍ਰਿਸ਼ਟਿਕੋਣ ਵਿਅਕਤੀ ਨੂੰ ਨਿਮਰ ਬਣਾਉਂਦਾ ਹੈ ਅਤੇ ਹੋਰਨਾਂ ਪ੍ਰਤੀ ਸਹਾਨੁਭੂਤੀ ਵਿਕਸਿਤ ਕਰਦਾ ਹੈ। ਜਦੋਂ ਅਸੀਂ ਹੋਰਨਾਂ ਨੂੰ ਸੰਦੇਹ ਦਾ ਲਾਭ ਦਿੰਦੇ ਹਾਂ, ਤਦ ਅਸਲ ਵਿੱਚ ਅਸੀਂ ਆਪਣੇ ਮਨ ਨੂੰ ਸ਼ਾਂਤੀ ਪ੍ਰਦਾਨ ਕਰਦੇ ਹਾਂ ਅਤੇ ਜੀਵਨ ਨੂੰ ਸਹਿਜ ਬਣਾਉਂਦੇ ਹਾਂ। ਇਹ ਤਦੋਂ ਹੀ ਸੰਭਵ ਹੈ ਜਦੋਂ ਸਮੇਂ ਦੇ ਸਤਿਗੁਰੂ ਦੀ ਸ਼ਰਨ ਵਿੱਚ ਜਾ ਕੇ ਬ੍ਰਹਮਗਿਆਨ ਪ੍ਰਾਪਤ ਕਰਕੇ ਉਸ ਨੂੰ ਜੀਵਨ ਵਿੱਚ ਅਪਣਾਇਆ ਜਾਵੇ।
ਇਸ ਤੋਂ ਪਹਿਲਾਂ ਇੱਥੇ ਕਈ ਵਕਤਾਵਾਂ ਨੇ ਸਤਿਗੁਰੂ ਮਾਤਾ ਸੁਦੀਕਸ਼ਾ ਜੀ ਮਹਾਰਾਜ ਦੁਆਰਾ ਦਿੱਤੇ ਗਏ ਬ੍ਰਹਮਗਿਆਨ ਨਾਲ ਆਪਣੀ ਜੀਵਨ-ਯਾਤਰਾ ਨੂੰ ਸੁਖਮਈ ਬਣਾਉਣ ਦੇ ਤਰੀਕਿਆਂ ਬਾਰੇ ਆਪਣੇ-ਆਪਣੇ ਭਾਵ ਪ੍ਰਗਟ ਕੀਤੇ ਅਤੇ ਸੈਕਟਰ 40 ਇਲਾਕੇ ਦੇ ਮੁਖੀ ਸ੍ਰੀ ਪਵਨ ਕੁਮਾਰ ਜੀ ਨੇ ਡਾ. ਅਮ੍ਰਿਤਪਾਲ ਕੌਰ ਜੀ, ਜ਼ੋਨਲ ਇੰਚਾਰਜ, ਸੰਯੋਜਕ ਅਤੇ ਇੱਥੇ ਹਾਜ਼ਰ ਸਾਰੀ ਸਾਧਸੰਗਤ ਦਾ ਧੰਨਵਾਦ ਤੇ ਸਵਾਗਤ ਕੀਤਾ।