ਲੋਕ ਸੰਘਰਸ਼ ਦੀ ਜਿੱਤ : ਬਲੌਂਗੀ–ਟੀਡੀਆਈ ਸਮੇਤ ਖੇਤਰ ਨਗਰ ਨਿਗਮ ਮੋਹਾਲੀ ਦੀ ਹੱਦ ਵਿੱਚ ਵਸਨੀਕਾਂ ਵਿੱਚ ਖੁਸ਼ੀ ਦੀ ਲਹਿਰ

ਡਿਪਟੀ ਮੇਅਰ ਕੁਲਜੀਤ ਸਿੰਘ ਬੇਦੀ ਨੇ ਕਿਹਾ "ਲੋਕਾਂ ਦੇ ਏਕੇ ਅਤੇ ਸੰਘਰਸ਼ ਨੇ ਸਰਕਾਰ ਨੂੰ ਹੱਦ ਵਧਾਉਣ ਲਈ ਮਜਬੂਰ ਕੀਤਾ”

5 Dariya News

ਮੋਹਾਲੀ 29-Nov-2025

ਮੋਹਾਲੀ ਨਗਰ ਨਿਗਮ ਦੇ ਡਿਪਟੀ ਮੇਅਰ ਕੁਲਜੀਤ ਸਿੰਘ ਬੇਦੀ ਨੇ ਨਵੀਂ ਆਈ ਨੋਟੀਫਿਕੇਸ਼ਨ ਨੂੰ ਇਤਿਹਾਸਕ ਕਦਮ ਦੱਸਦਿਆਂ ਕਿਹਾ ਕਿ ਨਗਰ ਨਿਗਮ ਮੋਹਾਲੀ ਦੀ ਹੱਦ ਨੂੰ ਵੱਡੇ ਪੱਧਰ ’ਤੇ ਵਧਾਇਆ ਗਿਆ ਹੈ ਅਤੇ ਇਸ ਵਿੱਚ ਟੀਡੀਆਈ ਸਿਟੀ, ਬਲੌਂਗੀ ਅਤੇ ਹੋਰ ਨਜ਼ਦੀਕੀ ਖੇਤਰ ਅਧਿਕਾਰਕ ਤੌਰ ’ਤੇ ਸ਼ਾਮਿਲ ਹੋ ਗਏ ਹਨ। ਬੇਦੀ ਨੇ ਕਿਹਾ ਕਿ ਇਹ ਸਿਰਫ ਸਰਕਾਰੀ ਨੋਟੀਫਿਕੇਸ਼ਨ ਨਹੀਂ, ਸਗੋਂ ਸਥਾਨਕ ਲੋਕਾਂ ਦੇ ਲੰਮੇ ਸੰਘਰਸ਼ ਅਤੇ ਏਕੇ ਦੀ ਜਿੱਤ ਹੈ।

ਡਿਪਟੀ ਮੇਅਰ ਮੁਤਾਬਕ, ਟੀਡੀਆਈ ਸਿਟੀ ਅਤੇ ਬਲੌਂਗੀ ਦੇ ਨਿਵਾਸੀਆਂ ਨੇ ਆਪਣੇ ਖੇਤਰ ਨੂੰ ਨਗਰ ਨਿਗਮ ਦੇ ਅਧੀਨ ਲਿਆਉਣ ਲਈ ਵੱਡਾ ਜੱਥੇਬੰਦਕ ਸੰਘਰਸ਼ ਕੀਤਾ।ਡਿਪਟੀ ਮੇਅਰ ਬੇਦੀ ਨੇ ਕਿਹਾ ਕਿ “ਇਨ੍ਹਾਂ ਖੇਤਰਾਂ ਦੇ ਲੋਕਾਂ ਨੇ ਆਪਣੇ ਹੱਕ ਲਈ ਕਦੇ ਹਾਰ ਨਹੀਂ ਮੰਨੀ। ਧਰਨੇ ਵੀ ਹੋਏ, ਮਾਮਲਾ ਅਦਾਲਤ ਤੱਕ ਵੀ ਗਿਆ। ਆਖ਼ਿਰਕਾਰ ਇਸ ਲੋਕੀ ਸੰਘਰਸ਼ ਦੀ ਬਦੌਲਤ ਇਹ ਖੇਤਰ ਨਗਰ ਨਿਗਮ ਦੇ ਨਕਸ਼ੇ ਵਿੱਚ ਸ਼ਾਮਿਲ ਹੋਏ।”

ਬੇਦੀ ਨੇ ਇਹ ਵੀ ਕਿਹਾ ਕਿ ਨਗਰ ਨਿਗਮ ਦੇ ਅਧੀਨ ਆਉਣ ਨਾਲ ਇਨ੍ਹਾਂ ਖੇਤਰਾਂ ਵਿੱਚ ਮੌਜੂਦਾ ਸਮੱਸਿਆਵਾਂ ਦਾ ਹੱਲ ਤੇਜ਼ੀ ਨਾਲ ਹੋਵੇਗਾ। ਡਿਵੈਲਪਮੈਂਟ ਪ੍ਰੋਜੈਕਟਾਂ ਨੂੰ ਸਹੀ ਪਲਾਨਿੰਗ, ਬਜਟ ਅਤੇ ਨਿਗਰਾਨੀ ਦੇ ਨਾਲ ਅੱਗੇ ਵਧਾਇਆ ਜਾਵੇਗਾ।ਉਹਨਾਂ ਮੁਤਾਬਕ, “ਹੁਣ ਜਦ ਇਹ ਖੇਤਰ ਨਗਰ ਨਿਗਮ ਦੇ ਨਕਸ਼ੇ ’ਤੇ ਹਨ — ਵਿਕਾਸ ਰੁਕਿਆ ਨਹੀਂ ਰਹੇਗਾ। ਜਿਹੜੀਆਂ ਕਮੀਆਂ ਅਤੇ ਤਕਲੀਫਾਂ ਲੋਕਾਂ ਨੇ ਸਾਲਾਂ ਸਾਲ ਝੱਲੀਆਂ, ਉਹ ਮਸਲੇ ਇੱਕ-ਇੱਕ ਕਰਕੇ ਹੱਲ ਕੀਤੇ ਜਾਣਗੇ।

ਲੋਕਾਂ ਵਿੱਚ ਖੁਸ਼ੀ ਦੀ ਲਹਿਰਨੋਟੀਫਿਕੇਸ਼ਨ ਜਾਰੀ ਹੋਣ ਦੇ ਤੁਰੰਤ ਬਾਅਦ ਟੀਡੀਆਈ ਸਿਟੀ, ਬਲੌਂਗੀ ਅਤੇ ਨਜ਼ਦੀਕੀ ਖੇਤਰਾਂ ਦੇ ਵਸਨੀਕਾਂ ਵਿੱਚ ਜਸ਼ਨ ਅਤੇ ਰਾਹਤ ਦਾ ਮਾਹੌਲ ਦੇਖਣ ਨੂੰ ਮਿਲਿਆ। ਲੋਕਾਂ ਨੇ ਖੁੱਲ੍ਹ ਕੇ ਕਿਹਾ ਕਿ ਅੱਜ ਉਹਨਾਂ ਦੇ ਸਬਰ, ਯਤਨ ਅਤੇ ਇਕੱਠ ਦੀ ਕਦਰ ਹੋਈ ਹੈ।ਟੀਡੀਆਈ ਸਿਟੀ ਦੇ ਵਸਨੀਕਾਂ ਨੇ ਕਿਹਾ ਕਿ ਵੱਡੇ ਪ੍ਰੋਜੈਕਟ ਹੋਣ ਦੇ ਬਾਵਜੂਦ ਸਾਲਾਂ ਤੱਕ ਇਲਾਕੇ ਨੂੰ ਡਿਵੈਲਪਮੈਂਟ, ਸਫਾਈ ਅਤੇ ਬੁਨਿਆਦੀ ਸਹੂਲਤਾਂ ਨਹੀਂ ਮਿਲ ਰਹੀਆਂ ਸਨ।ਇੱਕ ਸਥਾਨਕ ਨਿਵਾਸੀ ਨੇ ਖੁਸ਼ੀ ਦੱਸਦਿਆਂ ਕਿਹਾ:“ਅੱਜ ਸਾਡਾ ਸੰਘਰਸ਼ ਕਾਮਯਾਬ ਹੋਇਆ। 

ਅਖੀਰਕਾਰ ਅਸੀਂ ਮੋਹਾਲੀ ਸ਼ਹਿਰ ਦਾ ਅਸਲੀ ਹਿੱਸਾ ਬਣੇ ਹਾਂ।”ਬਲੌਂਗੀ ਦੇ ਲੋਕਾਂ ਨੇ ਵੀ ਵਧਾਈ ਦਿੰਦਿਆਂ ਕਿਹਾ ਕਿ ਨਗਰ ਨਿਗਮ ਵਿੱਚ ਆਉਣ ਨਾਲ ਖੇਤਰ ਦੇ ਭਵਿੱਖ ਦੀ ਦਿਸ਼ਾ ਹੁਣ ਬਦਲ ਚੁੱਕੀ ਹੈ। ਉਹਨਾਂ ਕਿਹਾ ਕਿ ਪਿੰਡ ਤੋਂ ਸ਼ਹਿਰ ਤੱਕ ਦਾ ਬਦਲਾਅ ਹੁਣ ਕਾਗਜ਼ਾਂ ’ਚ ਨਹੀਂ, ਹਕੀਕਤ ਵਿੱਚ ਹੋਵੇਗਾ।ਡਿਪਟੀ ਮੇਅਰ ਕੁਲਜੀਤ ਸਿੰਘ ਬੇਦੀ ਨੇ ਕਿਹਾ ਕਿ “ਸਰਕਾਰਾਂ ਨੀਤੀਆਂ ਬਣਾਉਂਦੀਆਂ ਹਨ, ਪਰ ਤਬਦੀਲੀਆਂ ਲੋਕਾਂ ਦੀ ਅਵਾਜ਼ ਬਣਾਉਂਦੀ ਹੈ। ਇਹ ਅਵਾਜ਼ ਕਦੇ ਰੁੱਕੀ ਨਹੀਂ ਇਸ ਲਈ ਅੱਜ ਨਤੀਜਾ ਵੀ ਸਭ ਦੇ ਸਾਹਮਣੇ ਹੈ। ਇਹ ਲੋਕਤੰਤਰ ਦੀ ਜਿੱਤ ਹੈ।”