ਜ਼ਿਲ੍ਹਾ ਭਾਸ਼ਾ ਦਫ਼ਤਰ ਦੇ ਸਹਿਯੋਗ ਨਾਲ ਕੌਮਾਂਤਰੀ ਸਾਹਿਤਕ ਮੰਚ (ਰਜਿ:) ਵੱਲੋਂ ਕਾਵਿ-ਪੁਸਤਕ ‘ਚਿੱਟੇ ਪ੍ਰਛਾਵੇਂ’ ਲੋਕ ਅਰਪਣ
5 Dariya News
ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ 28-Nov-2025
ਬੀਤੀ ਸ਼ਾਮ ਜ਼ਿਲ੍ਹਾ ਭਾਸ਼ਾ ਦਫ਼ਤਰ, ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਦੇ ਸਹਿਯੋਗ ਨਾਲ ਕੌਮਾਂਤਰੀ ਸਾਹਿਤਕ ਮੰਚ (ਰਜਿ:) ਵੱਲੋਂ ਗ਼ਜ਼ਲਕਾਰ ਭੁਪਿੰਦਰ ਸਿੰਘ ਬੇਕਸ ਦੀ ਦੂਜੀ ਕਾਵਿ ਪੁਸਤਕ ‘ਚਿੱਟੇ ਪ੍ਰਛਾਵੇਂ’ ਨੂੰ ਲੋਕ ਅਰਪਣ ਕੀਤਾ ਗਿਆ। ਪ੍ਰੋਗਰਾਮ ਦਾ ਆਰੰਭ ਭਾਸ਼ਾ ਵਿਭਾਗ ਦੀ ਵਿਭਾਗੀ ਧੁਨੀ ‘ਧਨੁ ਲੇਖਾਰੀ ਨਾਨਕਾ’ ਨਾਲ ਕੀਤਾ ਗਿਆ।
ਪ੍ਰਧਾਨਗੀ ਮੰਡਲ ਵਿੱਚ ਮੁੱਖ ਮਹਿਮਾਨ ਸ. ਕੁਲਵੰਤ ਸਿੰਘ ਐੱਮ.ਐੱਲ.ਏ., ਸਮਰੱਥ ਕਵੀ ਅਤੇ ਆਲੋਚਕ ਪ੍ਰੋ. ਸੁਖਦੇਵ ਸਿੰਘ ਸਿਰਸਾ, ਪ੍ਰੋ. ਸੁਰਜੀਤ ਜੱਜ, ਡਾ: ਗੁਰਮਿੰਦਰ ਸਿੱਧੂ, ਪ੍ਰੈਸ ਕਲੱਬ ਮੋਹਾਲੀ ਦੇ ਪ੍ਰਧਾਨ ਸੁਖਦੇਵ ਸਿੰਘ ਪਟਵਾਰੀ ਤੇ ਪੁਸਤਕ ਦੇ ਲੇਖਕ ਭੁਪਿੰਦਰ ਬੇਕਸ ਸ਼ਾਮਿਲ ਸਨ। ਮੁੱਖ ਮਹਿਮਾਨ ਸ੍ਰ. ਕੁਲਵੰਤ ਸਿੰਘ ਨੇ ਕਿਹਾ ਕਿ ਅਜੋਕੇ ਦੌਰ ਵਿੱਚ ਮਨੁੱਖ ਨੂੰ ਅਗਾਊਂ ਸਮੇਂ ਅੰਦਰ ਪ੍ਰਫੁੱਲਿਤ ਕਰਨ ਲਈ ‘ਚਿੱਟੇ ਪ੍ਰਛਾਵੇਂ’ ਵਰਗੀ ਸ਼ਾਇਰੀ ਦੀ ਲੋੜ ਹੈ।
ਉਹਨਾਂ ਭਵਿੱਖ ਵਿੱਚ ਵੀ ਮੰਚ ਨੂੰ ਅਜਿਹੀਆਂ ਕਾਰਵਾਈਆਂ ਕਰਨ ਲਈ ਪ੍ਰੇਰਿਆ। ਪ੍ਰੋ. ਸੁਖਦੇਵ ਸਿੰਘ ਸਿਰਸਾ ਨੇ ਪੁਸਤਕ ’ਤੇ ਚਰਚਾ ਕਰਦਿਆਂ ਅਜੋਕੇ ਦੌਰ ਦੀ ਸ਼ਾਇਰੀ ’ਤੇ ਨਿੱਠ ਕੇ ਚਰਚਾ ਕੀਤੀ ’ਤੇ ‘ਚਿੱਟੇ ਪ੍ਰਛਾਵੇਂ’ ਦੀ ਸ਼ਾਇਰੀ ਦੀ ਮੁੱਖ ਸੁਰ ਮੁਹੱਬਤ ਨੂੰ ਕਬੂਲ ਕਰਦਿਆਂ ਲੇਖਕ ਨੂੰ ਥਾਪੜਾ ਵੀ ਦਿੱਤਾ।
ਪ੍ਰੋ. ਸੁਰਜੀਤ ਜੱਜ ਨੇ ਕਿਹਾ ਕਿ ਹੁਣ ਪੰਜਾਬੀ ਗਜ਼ਲ ਉਰਦੂ ਦੇ ਪ੍ਰਭਾਵ ਤੋਂ ਮੁਕੰਮਲ ਮੁਕਤ ਹੋ ਚੁੱਕੀ ਹੈ ਅਤੇ ਆਪਣੀਆਂ ਪੈੜਾਂ ਖੁ਼ਦ ਬਣਾ ਰਹੀ ਹੈ। ਉਹਨਾਂ ਮੰਚ ਵੱਲੋਂ ਉਲੀਕੇ ਪ੍ਰੋਗਰਾਮ ਦੀ ਸ਼ਲਾਘਾ ਵੀ ਕੀਤੀ। ਸੁਖਦੇਵ ਸਿੰਘ ਪਟਵਾਰੀ ਨੇ ਮੁੱਖ ਮਹਿਮਾਨ ਸ੍ਰ. ਕੁਲਵੰਤ ਸਿੰਘ ਦੀ ਸ਼ਲਾਘਾ ਕਰਦਿਆਂ ਉਹਨਾਂ ਵੱਲੋਂ ਸਮਾਜ ਦੀ ਸੇਵਾ ਉੱਤੇ ਭਰਪੂਰ ਚਾਨਣਾ ਪਾਇਆ।
ਇਸ ਸਮੇਂ ਡਾ. ਗੁਰਮਿੰਦਰ ਸਿੱਧੂ ਨੇ ਪੁਸਤਕ ਉੱਤੇ ਭਾਵ ਪੂਰਤ ’ਤੇ ਪੜਚੋਲਵਾਂ ਪੇਪਰ ਪੜ੍ਹਦਿਆਂ ਪੁਸਤਕ ਵਿੱਚੋਂ ਕਈ ਸ਼ੇਅਰਾਂ ਦਾ ਹਵਾਲਾ ਦਿੰਦਿਆਂ ਪੁਸਤਕ ਨੂੰ ਮੁਹੱਬਤੀ ਸਿਰਨਾਵਿਆਂ ਦਾ ਸੁਨੇਹਾ ਐਲਾਨਿਆ। ਇਸ ਤੋਂ ਬਾਅਦ ਗਾਇਕ ਸੁਰਖਾਬ ਨੇ ਕਾਵਿ ਪੁਸਤਕ ‘ਚਿੱਟੇ ਪ੍ਰਛਾਵੇਂ’ ’ਚੋਂ ਮਿੱਠੀ ਸੁਰਮਈ ਅਤੇ ਬੁਲੰਦ ਅਵਾਜ਼ ਦਾ ਜਾਦੂ ਬਿਖੇਰਦਿਆਂ ਗੀਤ ‘ਆ ਮਿਲ ਰਾਂਝਣਾ’, ਜਗਤਾਰ ਸਿੰਘ ਜੋਗ ਨੇ ਗਜ਼ਲ ‘ਦਿਲ ਦੇ ਮਹਿਰਮ’ ਅਤੇ ਬੀਬਾ ਜਤਿੰਦਰ ਕੌਰ ਨੇ ਟੱਪੇ ਗਾ ਕੇ ਖੂਬ ਰੰਗ ਬੰਨ੍ਹਿਆ।
ਹਾਜ਼ਰ ਕਵੀਆਂ ’ਤੇ ਅਧਾਰਿਤ ਕਵੀ ਦਰਬਾਰ ਦਾ ਅਗਾਜ਼ ਕਰਦਿਆਂ ਗ਼ਜ਼ਲਕਾਰ ਰਮਨ ਸੰਧੂ ਨੇ ਖੂਬਸੂਰਤ ਸ਼ੇਅਰ ਕਹੇ, ਸ਼ਾਇਰ ਸ਼ਬਦੀਸ਼ ਨੇ ਤਰੰਨੁਮ ਵਿੱਚ ਗਜ਼ਲ ਸੁਣਾਈ, ਅਮਰਜੀਤ ਪਟਿਆਲਵੀ ਨੇ ਸ਼ਾਹਿਰਾਨਾ ਅੰਦਾਜ਼ ਵਿੱਚ ਵਧੀਆ ਸ਼ੇਅਰ ਕਹੇ, ਪਿਆਰਾ ਸਿੰਘ ਰਾਹੀ ਨੇ ਗਜ਼ਲ, ਬਾਬੂ ਰਾਮ ਦੀਵਾਨਾ ਨੇ ਗੁਰੂ ਤੇਗ ਬਹਾਦਰ ਦੀ ਸ਼ਹਾਦਤ ਨੂੰ ਨਮਨ ਕਰਦਿਆਂ ਨਜ਼ਮ ਕਹੀ, ਕੁਲਦੀਪ ਦੀਪ ਨੇ ਗੀਤ, ਸਰਵਨ ਸਾਬਰ ਤੇ ਹਰਜੀਤ ਸਿੰਘ ਨੇ ਆਪਣੀ ਹਾਜਰੀ ਲਗਵਾਈ।
ਮੰਚ ਵੱਲੋਂ ਡਾ. ਗੁਰਮਿੰਦਰ ਸਿੱਧੂ ਨੂੰ ਦੀਵਾਨ ਸਿੰਘ ਮਹਿਰਮ ਯਾਦਗਾਰੀ ਐਵਾਰਡ ਨਾਲ ਸਨਮਾਨਿਆ ਗਿਆ। ਗੁਰਨਾਮ ਕੰਵਰ ਨੇ ਡਾ. ਸਿੱਧੂ ਲਈ ਸਨਮਾਨ ਪੱਤਰ ਵੀ ਪੜ੍ਹਿਆ। ਮੰਚ ਵੱਲੋਂ ਸੁਖਦੇਵ ਸਿੰਘ ਪਟਵਾਰੀ, ਡਾ. ਅਨਿਲ ਅੰਗਰਿਸ਼ ਤੇ ਡਾ. ਮਨਜਿੰਦਰ ਗਿੱਲ ਨੂੰ ਵੀ ਸਨਮਾਨਿਤ ਕੀਤਾ ਗਿਆ।
ਵਿਚਾਰ ਚਰਚਾ ਵਿੱਚ ਸਰਵ ਸ਼੍ਰੀ ਗੁਰਨਾਮ ਕੰਵਰ, ਸੁਖਦੇਵ ਸਿੰਘ ਪਟਵਾਰੀ, ਡਾ. ਅਨਿਲ ਅੰਗਰਿਸ਼, ਡਾ. ਮਨਜਿੰਦਰ ਗਿੱਲ, ਡਾ. ਅਵਤਾਰ ਸਿੰਘ ਪਤੰਗ ’ਤੇ ਪਾਲ ਅਜਨਬੀ ਸ਼ਾਮਿਲ ਹੋਏ। ਅੰਤ ਵਿੱਚ ਭੁਪਿੰਦਰ ਸਿੰਘ ਬੇਕਸ ਨੇ ਸਾਰੇ ਬੁੱਧੀਜੀਵੀਆਂ ਵੱਲੋਂ ਪ੍ਰਗਟਾਏ ਵਿਚਾਰਾਂ ਨਾਲ ਸਹਿਮਤੀ ਪ੍ਰਗਟਾਈ ’ਤੇ ਕੁੱਝ ਸ਼ੇਅਰ ਤਰੰਨੁਮ ਵਿੱਚ ਕਹੇ।
ਸਮਾਗਮ ਵਿੱਚ ਹੋਰਾਂ ਤੋਂ ਇਲਾਵਾ ਸਾਹਿਤ ਚਿੰਤਨ ਦੇ ਮੁੱਖੀ ਸਰਦਾਰਾ ਸਿੰਘ ਚੀਮਾ, ਸ਼੍ਰੀਮਤੀ ਊਸ਼ਾ ਕੰਵਰ, ਡਾ. ਬਲਦੇਵ ਖਹਿਰਾ, ਹਰਜਿੰਦਰ ਸਿੰਘ, ਤਰਨਪ੍ਰੀਤ, ਸੁਖਜੀਤ ਕੌਰ, ਮਨਜੀਤ ਸਿੰਘ, ਜਗਜੀਤ ਸਿੰਘ ’ਤੇ ਗੁਰਜੀਤ ਕੌਰ ਬੇਕਸ ਵੀ ਸ਼ਾਮਲ ਹੋਏ। ਮੰਚ ਦਾ ਸੰਚਾਲਨ ਸ਼ਾਇਰ ਪੱਤਰਕਾਰ ‘ਤੇ ਗ਼ਜ਼ਲਗੋ ਸ੍ਰ. ਥੰਮਣ ਸਿੰਘ ਸੈਣੀ ਨੇ ਬਾਖ਼ੂਬੀ ਨਿਭਾਇਆ।