ਵਿਸ਼ਵ ਭੋਜਨ ਸੁਰੱਖਿਆ ਦਿਵਸ 'ਤੇ ਮਿਲੇਟ ਵਿਸ਼ੇ ’ਤੇ ਵਰਕਸ਼ਾਪ

ਨੌਜਵਾਨ ਉੱਦਮੀਆਂ ਵੱਲੋਂ ਮਿਲੇਟ ਆਧਾਰਿਤ ਮਠਿਆਈ, ਬਿਸਕੁਟ ਤੇ ਹੋਰ ਪਕਵਾਨ ਪ੍ਰਦਰਸ਼ਿਤ

5 Dariya News

ਜਲੰਧਰ 07-Jun-2023

ਜ਼ਿਲ੍ਹਾ ਫੂਡ ਸੇਫਟੀ ਟੀਮ ਵੱਲੋਂ ਬੁੱਧਵਾਰ ਨੂੰ ਵਿਸ਼ਵ ਭੋਜਨ ਸੁਰੱਖਿਆ ਦਿਵਸ ਮੌਕੇ ਸਿਵਲ ਸਰਜਨ ਡਾ. ਰਮਨ ਸ਼ਰਮਾ ਦੀ ਅਗਵਾਈ ਹੇਠ ਸਿਵਲ ਸਰਜਨ ਦਫ਼ਤਰ ਵਿਖੇ ਉਦਯੋਗਪਤੀ ਸ਼੍ਰੇਆ ਮੈਣੀ ਦੇ ਸਹਿਯੋਗ ਨਾਲ ਮਿਲੇਟ ਵਿਸ਼ੇ ’ਤੇ ਆਧਾਰਿਤ ਵਰਕਸ਼ਾਪ ਲਗਾਈ ਗਈ, ਜਿਸ ਦੌਰਾਨ ਮਿਲੇਟ ਨੂੰ ਖੁਰਾਕ ਵਿੱਚ ਸ਼ਾਮਿਲ ਕਰਨ ਦੇ ਫਾਇਦਿਆਂ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ ਗਈ।

ਵਰਕਸ਼ਾਪ ਵਿੱਚ ਸ਼੍ਰੇਆ ਮੈਣੀ ਵੱਲੋਂ ਮਿਲੇਟ 'ਤੇ ਆਧਾਰਿਤ ਵੱਖ-ਵੱਖ ਕਿਸਮਾਂ ਦੇ ਬਿਨਾਂ ਖੰਡ, ਆਟਾ, ਮੈਦਾ ਜਾਂ ਹੋਰ ਪ੍ਰਜ਼ਰਵੇਟਿਵ ਦੇ ਪਕਵਾਨਾਂ ਦਾ ਪ੍ਰਦਰਸ਼ਨ ਕੀਤਾ ਗਿਆ। ਲੋਕਾਂ ਨੂੰ ਮਿਲੇਟ ਦੇ ਸਿਹਤ ਸਬੰਧੀ ਲਾਭਾਂ ਬਾਰੇ ਜਾਗਰੂਕ ਕਰਨ ਲਈ ਵੱਖ-ਵੱਖ ਕਿਸਮਾਂ ਦੇ ਮਿਲੇਟ ਆਧਾਰਿਤ ਬਿਸਕੁਟ ਵੀ ਡਿਸਪਲੇ 'ਤੇ ਮੌਜੂਦ ਸਨ।

ਜ਼ਿਲ੍ਹਾ ਸਿਹਤ ਅਫ਼ਸਰ ਡਾ. ਰੀਮਾ ਜੰਮੂ ਨੇ ਦੱਸਿਆ ਕਿ ਸ਼੍ਰੇਆ ਮੈਣੀ ਇਸ ਸਾਲ ਅੰਮ੍ਰਿਤਸਰ ਵਿਖੇ (ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਸਹਿਯੋਗ ਨਾਲ) ਕਰਵਾਏ ਗਏ ਜੀ-20 ਸੰਮੇਲਨ ਦਾ ਹਿੱਸਾ ਵੀ ਸਨ, ਜਿੱਥੇ ਉਨ੍ਹਾਂ ਵੱਲੋਂ ਵਿਦੇਸ਼ੀ ਡੈਲੀਗੇਟਾਂ ਸਾਹਮਣੇ ਆਪਣੇ ਮਿਲੇਟ ਆਧਾਰਿਤ ਵੱਖ-ਵੱਖ ਪਕਵਾਨਾਂ ਦਾ ਪ੍ਰਦਰਸ਼ਨ ਕੀਤਾ ਗਿਆ।